Mako 12

Umulumbe wa balimi bamisoka

(Mateo 21:33-46; Luka 20:9-19)

1Kabili Yesu atampa ukubomina imilumbe ati, “Umuntu umo alilimine ibala lya myangashi, apindako ne linga, aimbamo ne cakukaminamo umwangashi, akuulamo no lupungu. Elyo aseekesha ibala lya myangashi ku balimi, ena aima aya pa bulendo. 2Cilya ulwakulobolola ifisabo lwafika, umwine ibala atuma umusha wakwe ku balimi, pakuti ese amupokeleko ifisabo fimo pa fya mwibala lyakwe ilya myangashi. 3Nomba bena bamwikata, bamupumaula, bamutamfya, aya iminwe nkutwa. 4Kabili umwine ibala atumako umusha na umbi, lelo nao bamumaula ku mutwe no kumusebanya icabipisha nganshi. 5Kabili atumako na umbi, wena bamwipaya. Kabili atuminekofye abengi, bamo babapumaula, bambi bena babepaya. 6Asuka ashalafye no muntu umo umwana wakwe umwaume uo atemenwe nganshi. Pakulekelesha eo atumako ati, ‘Wena balaya mucindika.’ 7Lelo abalimi balaebana abati, ‘Ala impyani iyi. Aleni iseni tuipaye, ne bala likaba lyesu!’ 8Awe bamwikata, bamwipaya, bamuposa na kunse ye bala lya myangashi.”

9Elyo Yesu aipusha ati, “Nga kanshi umwine ibala akacita shani? Akalofya abo balimi, akaseekesha ne bala lya myangashi kuli bambi. 10#Amalu 118:22-23Bushe tamwabelenga mu Malembo Yamushilo apo calembwa ukuti,

“‘Ilibwe ilyo bakakuula basuulile,

elyaisa ba ilyakwikasha petungi.

11Ifi efyo Imfumu yacita,

kabili cakupapa kuli fwe baleimwena!’ ”

12Elyo balafwaya ukwikata Yesu, ico bailuka ukuti muli uyu mulumbe ebo alelandapo. Lelo batiina amabumba ya bantu, kanshi epakumusha, baya.

Ukusonka kuli Kesalo

(Mateo 22:15-22; Luka 20:20-26)

13Kabili batumine Abafalise bamo na bena Herodi bamo kuli Yesu, abakuti bamone umwakumwikatila mu milandile yakwe. 14Awe baisa uko ali, balamweba abati, “Kafundisha, twalishiba ukuti uli mufumacumi. Kabili tautiina muntu nelyo umo, pantu tawaba na kapatulula, lelo ufunda fyonse ifyo Lesa afwaya mu cishinka. Bushe calilinga ukulasonka umusonko kuli Kesalo nangu iyoo? 15Bushe tulesonka nangu twilasonka?” Nomba Yesu ico eshibe ubucenjeshi bwabo, abeba ati, “Cinshi ico mulenjesesha? Leteni indalama monepo.” 16Awe nabo bamuletela imo. Elyo abepusha ati, “Ngoyu balengelepo nefi ifyalembwapo fyakwani?” Bamwasuka abati, “Fyakwa Kesalo.” 17Elyo Yesu abeba ati, “Kanshi akupeeleni Kesalo ifyakwa Kesalo, elyo akupeeleni Lesa ifyakwa Lesa.” Awe bapapa nganshi pafyo ayasuka.

Ukushukuka kwa bafwa

(Mateo 22:23-33; Luka 20:27-40)

18Elyo Abasaduki bamo baisa kuli Yesu. Abasaduki bena batila, “Takwaba kushukuka kwa bafwa.” 19#Amaf 25:5; Icite 38:8-9Balaipusha Yesu abati, “Kafundisha, ifwe Mose atulembele aya mashiwi ati, ‘Umuntu nga afwilwa munyina, uwasha umukashi nomba tafyelemo bana, ninshi uyu muntu ali nokuupa mukamfwilwa pakuti afyalileko munyina abana.’ 20Nomba kwaliko bamunyina abaume beka beka cine lubali. Umukalamba wabo ewabalilepo ukuupa umwanakashi, nomba afwafye ukwabula ukufyalamo umwana. 21Uwacibili amupyana#12:21 Ukupyana: Uku kupyana, tekupyana kwa shino nshiku ukwakuwamya mukamfwilwa, lelo kwakusunga ishina lya lupwa lwakwa munyina uwafwa., lelo nao afwa ukwabula ukufyalamo umwana, no walenga batatu nao nifyo fine. 22Basuka bonse cine lubali bapwa ukufwa, ukwabula ukufyalamo abana. Pakulekelesha umwanakashi nao wine asuka afwa. 23Nomba pakushukuka kwa bafwa, bushe akaba umukashi wakwani apo aupilwe kuli bonse cine lubali?”

24Yesu abasuka ati, “Bushe teko ekuluba kwenu uko, pantu tamwaishiba Malembo Yamushilo, nangu amaka yakwe? 25Pantu ilyo abantu bakabuuka ku bafwa, tabakaleupa nangu ukulaupwa, lelo bakaba nga bamalaika ba mu mulu. 26#Ukuf 3:2-6Nomba pa mulandu wakubuuka ku bafwa, bushe tamwabelenga mu citabo cakwa Mose, pa mulandu wa cimpusa calebilima, ifyo Lesa aebele Mose ati, ‘Nine Lesa wakwa Abrahamu, Lesa wakwa Isaki, Lesa wakwa Yakobo?’ 27Kanshi ni Lesa wa bomi, te Lesa wa bafwa iyoo. Mwalilubafye apakalamba nganshi.”

Ifunde ilyacilapo

(Mateo 22:34-40; Luka 10:25-28)

28Kafundisha wamafunde umo alyumfwileko uko balebikana ifikansa. Ilyo amona ukuti Yesu ayasuka bwino bwino, nao amwipusha ati, “Bushe ifunde ilyacila pa mafunde yonse lifunde nshi?” 29#Amaf 6:4-5Yesu amwasuka ati, “Ifunde ilyacilapo pali yonse nili ilyakutila, ‘Umfwa we Israeli, Imfumu Lesa wesu e Mfumu fye imo mpo epela. 30Na iwe uletemwa Imfumu Lesa obe no mutima obe onse, no mweo obe onse, na mano yobe yonse, na maka yobe yonse.’ 31#Levi 19:18Ifunde ilyakonkapo nili, ‘Uletemwa umubiyo ngefyo waitemwa we mwine.’ Takwaba ifunde limbi ilyacila pali aya.” 32Elyo kafundisha wamafunde amweba ati, “Kafundisha, wayasukafye bwino. Walungika mukusosa ukuti Lesa abafye umo, takwaba na umbi. 33Kabili ukumutemwa no mutima obe onse, na mano yobe yonse, na maka yobe yonse, elyo no kutemwa umubiyo ngefyo waitemwa we mwine, ifi fintu fyalicila amalambo yonse ayo balekela Lesa no kumocela.” 34Cilya Yesu amona ukuti ayasukafye ifyamano, amweba ati, “Iwe uli mupepi no Bufumu bwakwa Lesa.” Awe nomba tapali nakabili uwakupama ukwipusha Yesu na fimbi.

Bushe Kristu ni mwana ani?

(Mateo 22:41-46; Luka 20:41-44)

35Ilyo Yesu alefunda mwi Tempele, aipusha abantu ati, “Bushe cinshi ico bakafundisha bamafunde basosela abati, ‘Kristu#12:35 Kristu: Lishiwi lya Cigiriki, calola mukuti “Umusubwa wakwa Lesa.” ni Mwana Davidi?’ 36#Amalu 110:1Ngefyo Davidi umwine ilyo asanikilwe na Mupashi Wamushilo asosele ati,

“‘Imfumu yaeba Imfumu yandi aiti,

Ikala ku kulyo kwandi,

mpaka abalwani bobe nkabacita

apakunyanta amakasa yobe.’

37Nga kanshi apo Davidi umwine aita Kristu ati, ni Mfumu, bushe kanshi Kristu kuti aba shani mwane?” Na bantu ibumba ilikalamba basansamuka pakumfwa Yesu.

Cenjeleni kuli bakafundisha bamafunde

(Mateo 23:1-36; Luka 20:45-47)

38Elyo alabafunda ati, “Cenjeleni kuli bakafundisha bamafunde, abatemwa ukwendauka nabafwala imingila iyitali, nokuti abantu balebaposha mu mansa sha fisankano. 39Kabili basala ifipuna ificindamishepo mu sinagoga, elyo ne fipuna ifyamucinshi pa malila. 40Aba ebalila bamukamfwilwa ifyuma fyabo, kabili batemwa ukuilanga mukupepa amapepo ayatali. Ala aba bantu ebo Lesa akakandisha ukucila!”

Ubupe bwakwa mukamfwilwa

(Luka 21:1-4)

41Elyo Yesu aikala apalungatene ne cipao mwi Tempele. Alelolesha ifyo ibumba lya bantu lileposa indalama mu cipao. Abafyuma abengi baleposamo indalama ishingi. 42Elyo paisa mukamfwilwa umo umupina, ena aposamo utundalama tubili. 43Yesu aita abasambi bakwe, abeba ati, “Ndemweba icine cine uyu mukamfwilwa umupina, aposamo ukucila bonse abaposelemo indalama mu cipao. 44Pantu bonse abaposelemo indalama, bafumishe pa fingi, lelo uyu mukamfwilwa umupina wena aposamo tonse uto akwete utwakulilamo.”

Currently Selected:

Mako 12: ILL15

Highlight

Copy