Mako 11

Yesu aingila mu Yerusalemu no mucinshi

(Mateo 21:1-11; Luka 19:28-40; Yoani 12:12-19)

1Cilya Yesu na basambi bakwe baya balepalama ku Yerusalemu, bafika na pa Betifage na Betani mupepi no lupili lwa Miolifa. Yesu atuma abasambi bakwe babili, abeba ati, 2“Kabiyeni pa mushi ulya pantanshi. Kabili pakwingilafye pene muleya sanga umwana wa punda nakulikwa, uo umuntu ashatala aninapo. Mumukakule, mumulete kuno. 3Umo nga amwipusha ati, ‘Cinshi mwalakakwila umwana wa punda?’ Musose amuti, ‘Ni Mfumu eilemufwaya, kabili yalamubwesha nombalinefye.’ ” 4Awe baima, baya sanga no mwana wa punda nabamukulikila pa mwinshi wa ŋanda panse mumbali ya musebo. Nomba cilya balakakula umwana wa punda, 5abantu bamo abaimininepo balabepusha abati, “Cinshi ico mulecita, mulekakula umwana wa punda?” 6Nabo bayasukafye ngomo Yesu acibebela, na bantu babaleka, balaya. 7Awe baleta umwana wa punda kuli Yesu. Bayanshikapo ne nsalu shabo epo Yesu aikala. 8Abantu abengi balayanshika insalu shabo mu nshila, elyo bambi nabo balayansa imisambo ya miti balekontola mu mpanga. 9#Amalu 118:25-26Abatangile na balekonka panuma balepunda abati, “Hosana, nakalebalika!#11:9 Nakalebalika: Mu Cihibulu ni “Hosana.” Lesa apaale uyu waisa uo Imfumu yatuma! 10Nabupaalwe ubufumu buleisa ubwakwa shifwe Davidi! Lumbanyeni Lesa Mukulu!”

11Awe Yesu afika mu Yerusalemu aingila na mwi Tempele.#11:11 Itempele: Iŋanda yakwa Lesa iya mapepo iyalifye imo mu Yerusalemu. Alolesha fyonse ifyalimo, nomba ico akasuba kalasumbila kukuwa, afumamo, aya ku Betani na basambi ikumi limo na babili.

Yesu alapisha umukunyu

(Mateo 21:18-19)

12Ubushiku bwakonkelepo, ilyo balebwela ukufuma ku Betani, Yesu insala yamwikata. 13Cilya amona umukunyu akatalamukila uli na mabula ayalelema, eko aya kukumona nga walitwala. Nomba cilya afikako, asangakofye amabula yeka yeka, pantu tayali nshita amakunyu yatwalilapo. 14Elyo aeba umukunyu ati, “Kwikaba nelyo umo uwakulyako nakabili icitwalo kuli iwe.” Na basambi bakwe baleumfwa uko alesosa ifi.

Yesu atamfya abamakwebo mwi Tempele

(Mateo 21:12-17; Luka 19:45-48; Yoani 2:13-22)

15Awe bafika mu Yerusalemu. Yesu aingila mwi Tempele, atendeka no kutamfisha panse abaleshitishamo na baleshita ifintu. Kabili alapenaula amatebulo ya balekabushanya indalama, ne fipuna fya baleshitisha inkunda. 16Elyo alesha na bonse abalesenda ifipe ukupita mwi Tempele. 17#Esaya 56:7; Yere 7:11Kabili alabafunda, alabeba ati, “Bushe tacalembwa ukuti, ‘Iŋanda yandi ikalaitwa ukuti ni ŋanda iyakupepelamo abantu aba mishobo yonse?’ Nomba imwe mwaisangula icifulo ca bapupu!”

18Kanshi bashimapepo bacindami na bakafundisha bamafunde ilyo batesha ifi, balafwailisha inshila iyakuti bengamwipailamo. Pantu balemutiina ico abantu bonse balepapa imifundile yakwe.

19Ilyo kwaba icungulo, awe afuma mu musumba.

Umukunyu wauma

(Mateo 21:20-22)

20Nomba ilyo balepitapo ulucelo, bamona ukuti umukunyu nauma onse ukufikafye na ku mishila. 21Elyo Petelo aibukisha. Aeba na Yesu ati, “Kafundisha, shimona ulya mukunyu walapishe nauma!” 22Yesu abasuka ati, “Mube ne cisumino muli Lesa. 23Ndemweba icine cine, umuntu nga aeba ulupili ulu ati, fuma apa uipose muli bemba, elyo no kutwishika taletwishika mu mutima wakwe, lelo nasumina ukuti ico alanda calacitika, ninshi cili nokucitika. 24Eico kanshi ndemweba nati, fyonse ifyo mwingalomba mu mapepo, mwasumina nokuti namupeelwa, ninshi mukapeelwa. 25Kabili lyonse ilyo mulepepa, nga palipo ico bamulufyanya ku muntu umo, mubeleleni uluse. Ninshi na Shinwe wa mu mulu akamubelela uluse ku fintu mubifya.”#11:25 Bamo balundapo icikomo 26: [Lelo nga tamulebelela abantu bambi uluse pafyo balemubifya, Shinwe nao takamubelele uluse kufyo mubifya] (moneni Mateo 6:15).

Amaka yakwa Yesu uko yafuma

(Mateo 21:23-27; Luka 20:1-8)

27Kabili babwelelamo ku Yerusalemu. Nomba ilyo Yesu aleendauka mwi Tempele, bashimapepo bacindami na bakafundisha bamafunde na bakalamba baisa uko ali, balamwipusha abati, 28“Bushe ni ku maka nshi ucitilako ifi fintu? Nangu nani wakupeela amaka yakucita ifi fintu?” 29Yesu abasuka ati, “Na ine nalamwipushapo icipusho cimo. Nga mwanjasuka, elyo na ine nalamweba ukufuma amaka ncitilako ifi fintu. 30Bushe ulubatisho lwakwa Yoani lwafumine ku mulu nangu ni ku bantu? Njasukeni.” 31Awe balapingushanya abati, “Nga twatila lwafumine ku mulu, ninshi aletweba ati, ngeco mushamusuminine cinshi? 32Conse nga twati ni ku bantu, awe abantu tabatupanye, pantu bonse balishininkisha ukuti Yoani ali kasesema icine cine.” 33Kanshi epakwasuka Yesu abati, “Awe tatwishibe.” Yesu nao abeba ati, “Kanshi na ine nshamwebe ukufuma amaka ncitilako ifi fintu.”

Currently Selected:

Mako 11: ILL15

Highlight

Copy