Mateo 22

Umulumbe wa mitebeto ya bwinga

(Luka 14:15-24)

1Yesu nakabili abalandile mu milumbe ati, 2“Ubufumu bwa mu mulu kuti twabupalanya ku mfumu iyacitile mwane imitebeto ya bwinga. 3Awe yatuma abasha baiko ukuya eba abalalikwe ku bwinga. Nomba bakaana ukwisako. 4Elyo yatuma abasha bambi aiti, ‘Kebeni abalalikwe amuti, ala nimpekanya imitebeto yandi. Ninjipaya bacilume wa ŋombe ne ŋombe ishaina. Fyonse nafipekanishiwa, isenifye ku bwinga!’ 5Lelo abalalikwe ku bwinga tabasakamene. Umo aya ku mabala yakwe, umbi nao ku fya makwebo yakwe. 6Bambi abalalikwe baikata abasha ba mfumu, balabacusha, babepaya. 7Imfumu yafulwa nganshi. Yatumako ne fita fyaiko, fyaya ipaya filya fipondo, fyafyocela no musumba. 8Elyo imfumu yaeba abasha baiko aiti, ‘Ubwinga nabupekanishiwa, lelo abalalikwe tabalingile. 9Kanshi kabiyeni ku masansa ya misebo, bonse abo mulesanga mubete ku bwinga.’ 10Awe abasha basalanganina mu misebo, balalonganya bonse ababi na basuma. Awe ne ŋanda ya bwinga yaisula abantu.

11“Elyo imfumu yaisamo kukumona abalalikwe. Yaisa sangamo umuntu umo ushafwele insalu sha bwinga. 12Elyo yamwipusha aiti, ‘Mune, nga wingile shani muno, ukwabula ukufwala insalu sha bwinga?’ Awe ena alifye tondolo. 13Elyo imfumu yaeba ababomfi aiti, ‘Mukakeni amaboko na molu, mumupose panse mu mfifi, ukukalaba imisowa no kusumanya ameno.’ 14Pantu abetwa bengi, lelo abasalwa banono.”

Ukusonka kuli Kesalo

(Mako 12:13-17; Luka 20:20-26)

15Elyo Abafalise baile kukupandana amano, pakuti bafwaye umwakumwikatila mu milandile yakwe. 16Awe batuma abasambi babo na bena Herodi kuli Yesu. Bamweba abati, “Kafundisha, twalishiba ukuti uli mufumacumi, ufunda fyonse ifyo Lesa afwaya mu cishinka. Kabili tautiina muntu nelyo umo, pantu tawaba na kapatulula. 17Kanshi twebeko ifyo iwe utontonkanya. Bushe calilinga ukulasonka umusonko kuli Kesalo nangu iyoo?” 18Nomba Yesu ico eshibe imitontonkanishishe yabo ibi, abasuka ati, “Mwe mfundabuteshi mwe! Cinshi ico mulenjesesha? 19Nangeni indalama mupeela ku musonko?” Awe nabo bamuletela imo. 20Elyo Yesu abepusha ati, “Ngoyu balengelepo nefi filembelwepo fyakwani?” 21Nabo bayasuka abati, “Fyakwa Kesalo.” Elyo Yesu abeba ati, “Eyo, kanshi akupeeleni Kesalo, ifyakwa Kesalo. Elyo akupeeleni Lesa, ifyakwa Lesa.” 22Bati bomfwe ifi, awe balapapa. Kanshi epakumusha.

Ukushukuka kwa bafwa

(Mako 12:18-27; Luka 20:27-40)

23Ubushiku ubo bwine Abasaduki bamo baishile kuli Yesu. Abasaduki bena batila, “Takwaba kushukuka kwa bafwa.” Balaipusha Yesu abati, 24#Amaf 25:5“Kafundisha, Mose asosa ati, ‘Umuntu nga afwa, nomba tafyelepo abana, munyina ali nokuupa mukamfwilwa pakuti afyalileko munyina abana.’ 25Nomba kumwesu kwaliko bamunyina cine lubali, abaume beka beka. Umukalamba wabo ewabalilepo ukuupa, lelo afwa ukwabula ukufyalamo umwana. Epakushila munyina umukashi wakwe. 26Uwabubili no wabutatu nabo bamuupa, nomba nabo lumo lwine, mpakafye bonse cine lubali bafwa ukwabula ukufyalamo abana. 27Elyo pakulekelesha nao umwanakashi asuka afwa. 28Nomba pakushukuka kwa bafwa, bushe umwanakashi akaba umukashi wakwani pali aba bonse cine lubali aupilweko?”

29Yesu abasuka ati, “Mwaliluba, pantu tamwaishiba Malembo Yamushilo, nangu amaka yakwa Lesa. 30Pantu ilyo abantu bakashukuka ku bafwa, tabakaleupa nangu ukulaupwa. Lelo bakaba nga bamalaika ba mu mulu. 31Kabinge pa mulandu wakushukuka ku bafwa, bushe tamwabelenga ifyo Lesa umwine amweba ati, 32#Ukuf 3:6‘Nine Lesa wakwa Abrahamu, Lesa wakwa Isaki, Lesa wakwa Yakobo?’ Kanshi ni Lesa wa bomi, te Lesa wa bafwa iyoo.” 33Ilyo amabumba yaumfwa ifi, yalapapa imifundile yakwe.

Ifunde ilyacilapo

(Mako 12:28-34; Luka 10:25-28)

34Ilyo Abafalise baumfwile ukuti Yesu aputula Abasaduki umulomo, nabo balilongene. 35Elyo umunabo umo kafundisha wamafunde, alamwesha ati, 36“Kafundisha ifunde ilyacilapo pa mafunde yonse ayakwa Lesa, lifunde nshi?” 37#Amaf 6:5Yesu amwasuka ati, “‘Uletemwa Imfumu Lesa obe no mutima obe onse, no mweo obe onse, na mano yobe yonse.’ 38Ili e funde ilyacila pali yonse, kabili elyakubalilapo. 39Elyo ilyabubili ilyapalana neli line, lyakutila, ‘Uletemwa umubiyo ngefyo waitemwa we mwine.’ 40Pali aya mafunde yabili, epashinta Amafunde yonse ayakwa Mose na fyonse ifyo bakasesema balembele.”

Bushe Kristu ni mwana ani?

(Mako 12:35-37; Luka 20:41-44)

41Ilyo acili na Bafalise abalongene, Yesu abepwishe ati, “Nga imwe mutontonkanya shani pali Kristu? Bushe mutila ni mwana ani?” 42Nabo bamwasuka abati, “Ni mwana Davidi.” 43Yesu nao abeba ati, “Nga kanshi Davidi ilyo asanikilwe na Mupashi, amwitile shani ‘Imfumu?’ Ilyo atile ati,

44 # Amalu 110:1 ‘Imfumu yaeba Imfumu yandi aiti,

ikala ku kulyo kwandi,

mpaka abalwani bobe nkabacita

apakunyanta amakasa yobe.’

45Nga kanshi apo Davidi aita Kristu ati ni Mfumu, bushe Kristu kuti aba shani mwane?” 46Awe tapali nangu umo uwakwasukapo. Ukufuma ubo bwine bushiku, tapali nangu umo uwakupama ukwipusha Yesu na fimbi.

Currently Selected:

Mateo 22: ILL15

Highlight

Copy