Mateo 21

Yesu aingila mu Yerusalemu no mucinshi

(Mako 11:1-11; Luka 19:28-40; Yoani 12:12-19)

1Cilya Yesu na basambi bakwe baile balepalama ku Yerusalemu, bafikile na ku Betifage, ku lupili lwa Miolifa. Yesu atuma abasambi babili, 2abeba ati, “Kabiyeni pa mushi ulya pantanshi. Pakwingilafye pene, muleya sanga punda nakulikwa pamo na kamwane. Mubakakule, mubandetele. 3Nomba umo nga alafwaya ukumulesha, mumwebe amuti, ‘Imfumu eilebafwaya, kabili yalababwesha nombalinefye.’ ”

4Kanshi ifi fyacitike pakufikilisha ifyasosele kasesema ati,

5 # Saka 9:9 “Mwebe umwana mwanakashi Sioni#21:5 Sioni: E shina limbi lya musumba wa Yerusalemu. amuti,

ala mona Imfumu yobe iyi,

yakufikilila iyamutembo,

ininine pali punda, pa musepela, umwana wa punda.”

6Awe abasambi baya citila ngomo Yesu abebele. 7Baleta punda na kamwane. Elyo bayanshikapo insalu shabo na Yesu epo aikala. 8Na bantu ibumba likalamba balayansa insalu shabo mu nshila. Elyo bambi bena balakontaula imisambo ya miti, balayansa mu nshila. 9#Amalu 118:25-26Amabumba ya bantu abali pantanshi na balemukonka panuma balapunda abati,

“Hosana,#21:9 Nakalebalika: Mu Cihibulu ni “Hosana.” nakalebalika Mwana Davidi!

Lesa apaale uyu waisa uo Imfumu yatuma!

Lumbanyeni Lesa Mukulu!”

10Ilyo Yesu aingila mu Yerusalemu, mu musumba onse mwakaba na see ku congo. Abantu balaipusha abati, “Nga uyu nani?” 11Amabumba ya bantu bakonkele Yesu, yalayasuka ayati, “Uyu ni Yesu, kasesema uwafuma ku Nasaleti mu Galile.”

Yesu atamfya abamakwebo mwi Tempele

(Mako 11:15-19; Luka 19:45-48; Yoani 2:13-22)

12Ilyo Yesu aingile mwi Tempele, atamfishe panse bonse abaleshitamo na baleshitishamo ifintu. Kabili alapenaula amatebulo ya balekabushanya indalama, ne fipuna fya baleshitisha inkunda. 13#Esaya 56:7; Yere 7:11Abeba ati, “Ala calembwa ukuti, ‘Iŋanda yandi ikalaitwa ukuti ni ŋanda ya mapepo’, lelo imwe muisangwile icifulo ca bapupu!”

14Kabili impofu na balemana baisa kuli Yesu mwi Tempele, nao abaposha. 15Nomba bashimapepo bacindami na bakafundisha bamafunde bafulwa nganshi pakumona ifipeshamano acita, elyo no kumfwa uko abaice balepunda mwi Tempele baleti, “Hosana, nakalebalika Mwana Davidi!” 16#Amalu 8:2Epakwipusha Yesu abati, “Bushe tauleumfwa ifyo aba baice balesosa?” Yesu nao abasuka ati, “Ee, nintesha. Nomba bushe tamwabelenga ukuti, ‘Ku tunwa twa twaice no twa kwibele, eko waipekanishisha amalumbo yene yene?’ ” 17Awe afumapo, abasha, aya na ku musumba wa Betani, eko aya sendama.

Yesu alapisha umukunyu

(Mako 11:12-14,20-24)

18Ulucelo ilyo Yesu alebwelela ku musumba wa Yerusalemu, insala yamwikete. 19Cilya amona umukunyu umo mumbali ya nshila, eko aya. Asangakofye amabula yeka yeka, takwatwala nangu kamo. Elyo aeba umuti ati, “We muti we, wikatala autwala ifitwalo nakabili!” Awe apopene no mukunyu wauma. 20Abasambi bati bamone ifi, basunguka nganshi. Balasosa abati, “Nga kanshi umukunyu wauma shani apa pene?” 21Yesu abasuka ati, “Ndemweba icine cine, nga namusumina tamuletwishika nelyo panono, kuti mwacita ico nacita ku mukunyu. Kuti mwaeba nolu lupili amuti, ‘Fuma apa, uipose muli bemba’, no kucitika kuti cacitika. 22Nga muli bacisumino, fyonse ifyo mwakulalomba mu mapepo mwakulapeelwa.”

Baipusha ukwafuma amaka yakwa Yesu

(Mako 11:27-33; Luka 20:1-8)

23Elyo Yesu aingilile mwi Tempele. Ilyo alefunda abantu, bashimapepo bacindami na bakalamba ba bantu baisa kuli Yesu. Balamwipusha abati, “Bushe ni ku maka nshi ucitilako ifi fintu? Nga uwakupeela aya maka nani?” 24Yesu abasuka ati, “Na ine nalamwipushapo icipusho cimo. Na imwe nga mwayasuka, na ine nalamwebako ukufuma amaka ayo ncitilako ifi fintu. 25Bushe ulubatisho lwakwa Yoani lwafumine kwi? Bushe lwafumine ku mulu, atemwa ku bantu?” Awe balapingushanya abati, “Nga twatila lwafumine ku mulu, ninshi aletweba ati, ‘Ngeco mushamusuminine cinshi?’ 26Conse nga twatila ni ku bantu lwafumine, awe abantu tabatupanye, pantu bonse balishininkisha ukuti Yoani ali ni kasesema.” 27Kanshi epakwasuka Yesu abati, “Awe tatwishibe.” Yesu nao abeba ati, “Kanshi na ine nshamwebe ukufuma amaka ncitilako ifi fintu.”

Umulumbe wa bana baume babili

28“Nga imwe kuti mwatilapo shani? Kwaliko umuntu umo uwali na bana abaume babili. Uyu muntu aya ku wamukalamba, amweba ati, ‘We mwana, kabiye kukubomba lelo mwibala lyandi lya myangashi.’ 29Ena ayasuka ati, ‘Awe nshayeko.’ Nomba panuma ashala alanguluka, aya na kukubomba mwibala. 30Kabili uyu muntu aya ku wamwaice, nao amweba cimo cine. Ena amwasuka ati, ‘Ee mukwai, nalaya.’ Lelo taileko iyoo. 31Bushe pali aba babili, uwacitile ifyo wishi alefwaya nani?” Bamwasuka abati, “Wamukalamba.” Yesu abasuka ati, “Ndemweba icine cine, bakasonkesha bamusonko na bacilende balemutangilila ukwingila mu Bufumu bwakwa Lesa. 32Pantu Yoani ilyo aishile kukumulanga inshila yabololoke, tamwamusumine. Lelo bakasonkesha bamusonko na bacilende bena balimusumine. Kabili nelyo mwamwene ifi, awe nalyo line tamwalapile no kusumina Yoani.”

Umulumbe wa balimi bamisoka

(Mako 12:1-12; Luka 20:9-19)

33 # Esaya 5:1-2 Yesu ati, “Umfweniko umulumbe na umbi. Kwaliko umuntu uwalimine ibala lya myangashi. Apindako ne linga, aimbilamo ne cakukaminamo umwangashi, akuulilamo no lupungu. Elyo aseekesha ibala lya myangashi ku balimi, ena aima aya pa bulendo. 34Cilya ulwakulobolola ifisabo lwafika, atumako abasha ku balimi, pakuti bese bamupokeleko ifisabo fimo. 35Nomba abalimi bena baikata abasha bakwe. Umo bamupumaula, umbi bamwipaya, elyo umbi nao bamulasaula amabwe. 36Kabili atumako abasha na bambi abengi ukucila pa bantanshi. Nabo bene, abalimi babacita ngefyo bacitile ababiye. 37Pakulekelesha atumako umwana wakwe ati, ‘Wena balaya mucindika.’ 38Lelo abalimi bashimona mwane, balaebana abati, ‘Impyani iyi! Aleni, iseni natuipaye, uleke nifwe tukamubuulile ibala.’ 39Awe bamwikata, bamuposa kunse ye bala lya myangashi, bamwipaya.

40“Nomba umwine ibala lya myangashi nga abwela, bushe akesa bacita shani abo balimi?” 41Bayasuka Yesu abati, “Abo bantu babi, umwine ibala akabonaula icabipisha. Akaseekesha ne bala lyakwe ku balimi bambi abakuti balemupeela ifisabo fyakwe pa nshita yakulobolola.” 42#Amalu 118:22-23Elyo Yesu abeba ati, “Bushe tamwatala amubelenga mu Malembo Yamushilo ayatila,

“‘Ilibwe ilyo bakakuula basuulile,

elyaisa ba ilyakwikasha petungi.

Ifi efyo Imfumu yacita,

kabili cakupapa kuli fwe baleimwena.’

43“Eico ndemweba nati, imwe bakamupoka Ubufumu bwakwa Lesa bakabupeela na ku bantu abacita ubufwayo bwa Mfumu. 44[Umuntu onse uukaponena pali ili libwe, akafunaika, na uo likaponena likamushonaula.]”#21:44 Muli ba Baibele bamo tamwaba 21:44.

45Bashimapepo bacindami na Bafalise, pakumfwa iyi milumbe, bailuka ukuti ebo alelandapo. 46Balafwaya ukumwikata, nomba batiina amabumba ya bantu, pantu abantu bena baleti Yesu ni kasesema.

Currently Selected:

Mateo 21: ILL15

Highlight

Copy