Mateo 19
19
Umulandu wakulekana mu fyupo
(Mako 10:1-12)
1Ilyo Yesu apwile ukusosa aya mashiwi, afumine mu Galile, aile na ku calo ca Yudeya, kwishilya lya mumana wa Yordani. 2Amabumba ya bantu ayakalamba yamukonka, nao kulya kwine alaposha na balwele.
3Abafalise bamo baisa kuli Yesu, balamwesha abati, “Bushe calisuminishiwa ukuti umwaume aleke umukashi wakwe pa mulandu cikulufye mulandu?” 4#Icite 1:27; Icite 5:2Yesu abasuka ati, “Bushe tamwabelenga ukuti, Lesa uwabumbile abantu pa citendekelo, abumbile umwaume no mwanakashi! 5#Icite 2:24Kabinge atile, ‘Kanshi eco umwaume ashiila wishi na nyina, no kuminkana no mukashi wakwe, elyo aba babili baba umubili umo.’ 6Kanshi nomba tabali babili, balifye umubili umo. Ico Lesa alundinkanya, umuntu ecilekanya.” 7#Amaf 24:1-4Abafalise nabo bamwipusha abati, “Nga kanshi cinshi ico Mose atupeelele ili ifunde ilyakuti, umwaume ali nokulemba kalata wakulekelapo umukashi wakwe, epakumutamfya?” 8Yesu abasuka ati, “Ico Mose amupeelele ulusa lwakuleka abakashi benu, mulandu wakumalala kwa mitima yenu. Lelo ukufuma ku citendekelo tacali ifi iyoo. 9#Mateo 5:32; 1 Kol 7:10-11Nomba ine ndemweba nati, uwaleka umukashi wakwe, apashili mulandu wa bulalelale, aupa na umbi, ninshi lubembu acita.”
10Elyo abasambi bamweba abati, “Kanshi nga efyo caba pakati ka mulume no mukashi, ninshi cawamapo no kukanaupa.” 11Yesu abasuka ati, “Te bonse bengapokelela aya mashiwi, kanofye kubo capeelwa. 12Kwaliba abantu abashaba na maka yakuupa pantu efyo bafyalwa. Bambi ni bamutungwi ico abantu ebabacita ifyo. Bambi bena basala ukukanaupa pa mulandu wa Bufumu bwa mu mulu. Uwingapokelela aya mashiwi, nayapokelele.”
Yesu apaala utwaice
(Mako 10:13-16; Luka 18:15-17)
13Abantu bamo baletele utwaice kuli Yesu, pakuti atutambalikilepo amaboko no kutupepelako. Nomba abasambi bena balakalipila abantu. 14Yesu ena asosa ati, “Lekeni utwaice twise uko ndi, mwitulesha iyoo. Pantu ababa ngotu twaice, e bene ba Bufumu bwa mu mulu.” 15Elyo atambalikilapo amaboko pa twaice, afumapo alaya.
Umulumendo wa fyuma
(Mako 10:17-22; Luka 18:18-23)
16Elyo kwaishile umuntu umo kuli Yesu, amwipwishe ati, “Kafundisha, fisuma nshi ndi nokucita pakumona umweo wape?” 17Yesu amwasuka ati, “Cinshi ico wanjipushisha pa mulandu wa busuma? Umusuma abafye umo mpo. Nga ulefwaya ukumona umweo ulekonka amafunde.” 18#Ukuf 20:12-13; Amaf 5:16-17; Levi 19:18Nao umuntu aipusha ati, “Mafunde nshi?” Yesu amwasuka ati, “Wilaipaya, wilabembuka, wilaiba, wilabepa bufi, 19ulecindika wiso na noko, uletemwa no mubiyo ngefyo waitemwa we mwine.” 20Umulumendo ayasuka Yesu ati, “Ifi fyonse ndafikonka. Nga kanshi finshi fimbi ifyo ndi nokucita?” 21Yesu amwasuka ati, “Nga ulefwaya ukuba uwapwililika, kabiye uye shitisha ifyo wakwata. Upeele ne ndalama ku balanda, lyena ninshi ukakwata icuma mu mulu. Elyo wise unkonke.” 22Awe umulumendo ati omfwe aya mashiwi, aya alelanguluka, pantu ali ne fyuma ifingi.
Ubwafya bwa fyuma
(Mako 10:23-27; Luka 18:24-27)
23Elyo Yesu aebele abasambi bakwe ati, “Ndemweba icine cine, cintu cayafya ku wafyuma ukwingila mu Bufumu bwa mu mulu. 24Nakabili ndemweba nati, cayangukapo ingamila ukupula mu linso lya nshindano, ukucila umuntu uwafyuma ukwingila mu Bufumu bwakwa Lesa.” 25Abasambi pakumfwa ifi basunguka nganshi. Balasosa abati, “Nga kanshi nani engapusuka?” 26Yesu abalolesha, abeba ati, “Abantu bena kuti bafilililwafye, lelo Lesa ena tafilwa kantu.”
Icilambu ca basha fyonse
(Mako 10:28-31; Luka 18:28-30)
27Elyo Petelo aipusha Yesu ati, “Mona, ifwe twalisha ifyuma fyesu fyonse, twalikukonka. Bushe finshi tukamwenapo?” 28Yesu abeba ati, “Ndemweba icine cine, ilyo fyonse fikaluka cipya cipya, no Mwana wa muntu aisa ikala pa cipuna cakwe icabufumu icacindama, elyo imwe mwe bamukonka, mukekala pa fipuna fyabufumu ikumi limo na fibili. Mukaleputula imilandu ya nko ikumi limo na shibili isha bena Israeli. 29Na onse uwasha amayanda, nangu bamunyina, nangu inkashi, nangu wishi, nangu nyina, nangu abana, nangu amabala, pa mulandu wakukonka ine, akapokelapo pali conse umwanda umo. Elyo akakwata no mweo wape. 30Lelo abengi abantanshi, bakaba abakulekelesha, na bengi abakulekelesha, bakaba e bantanshi.
Currently Selected:
Mateo 19: ILL15
Highlight
Share
Copy
Want to have your highlights saved across all your devices? Sign up or sign in
Bible Society of Zambia
Free Reading Plans and Devotionals related to Mateo 19
Matthew | Reading Plan + Study Questions
Navigating Singleness The Biblical Way
Matthew