Mateo 17

Yesu alanga abasole ubucindami bwakwe

(Mako 9:2-13; Luka 9:28-36; 2 Petelo 1:16-18)

1Ilyo papitile inshiku mutanda, Yesu asendele Petelo na Yakobo na Yoani munyina, baile nina ulupili ulutali ukwakuti babefye beka. 2Elyo Yesu ayaluka pa menso yabo. Impumi yakwe yalabengeshima nga kasuba. Ne nsalu shakwe shayaluka shalabekafye ngo lubuuto. 3Awe apopene bamona Mose na Eliya balelanda na Yesu. 4Elyo Petelo aeba Yesu ati, “We Mfumu, kuti cawama twaikala pano pene. Nga uulefwaya kuti napangapo insakwe shitatu, imo yobe, imbi iyakwa Mose, elyo na imbi iyakwa Eliya.” 5#Icite 22:2; Amaf 2:7; Esaya 42:1; Mateo 3:17; 2 Pet 1:17-18Ilyo Petelo acili alelanda, awe ikumbi ilyabeka lyabakupa mu cinshingwa. Elyo ishiwi lyafuma mwikumbi aliti, “Uyu e mwana wandi uo natemwa, uo nsekelamo. Mulemumfwa.” 6Cilya abasambi baumfwa ifi, bawa panshi ubukupeme ku mulandu wa kwikatwa no mwenso. 7Elyo Yesu aisa uko bali. Abakumya alabeba ati, “Imeni, mwitiina!” 8Awe bati benune amenso, tabamwene nelyo umo, kanofye Yesu eka.

Baipusha pali Eliya

(Mako 9:9-13)

9Ilyo baletentemuka ulupili, Yesu alebakonkomesha ati, “Tecakwesha ukwebako umuntu nelyo umo pafyo mwacimona, kanofye ilyo Umwana wa muntu akabuuka ku bafwa.” 10#Mala 4:5Elyo abasambi baipusha Yesu abati, “Ngeco bakafundisha bamafunde basosela abati, ‘Eliya euli nokubalilapo ukwisa cinshi?’ ” 11Yesu abasuka ati, “Kwena nifyo fine. Eliya ali nokwisa mona ukuti fyonse fili ngomo fifwile ukubela. 12Lelo ndemweba nati, Eliya alisa kale. Nomba abantu tabamwishibe nakalya. Bena bamucitile umo balefwaila. Eifyo fine bakacusha no Mwana wa muntu.” 13Elyo abasambi bailuka ukuti, ni pali Yoani Kabatisha epo Yesu alelanda.

Yesu aposha akalumendo akali no mupashi wakowela

(Mako 9:14-29; Luka 9:37-43)

14Yesu na basambi balya batatu, babwelele kwibumba. Elyo kwaishile umuntu umo, aishile fukama apali Yesu, alamweba ati, 15“We Mfumu, shi wingalangulukilako umwana wandi. Alipena, kabili acula nganshi. Imikufye iyingi alaponena mu mulilo, nangu mu menshi. 16Nacimuleta ku basambi bobe, nomba nabafilwa ukumuposha.” 17Yesu epakwasuka ati, “Mwe nkulo iyabula icisumino, iyaumalala imitima! Bushe ndi nokuba na imwe mpaka lilali? Bushe ndi nokushipikisha ukuba na imwe mpaka lilali? Leteni akalumendo kuno.” 18Elyo Yesu akalipila umupashi wakowela. Awe nao wafuma mu kalumendo, nako ukupola kapola apopene.

19Elyo abasambi baisa kuli Yesu, balamwipusha kumbali abati, “Nga ifwe cinshi twacifililwa ukuutamfya?” 20Yesu abasuka ati, “Nico muli ba cisumino cinono. Ndemweba icine cine, amuba ne cisumino icili nga akalubuto ka lubanga, nga kuti mwaeba ulu lupili amuti, ‘Fuma apa selela kulya,’ nalo kuti lwasela. Teti kube nelyo cimo ico mwingafilwa. 21[Nomba tekuti mutamfye iciwa ca uyu musango, kanofye ku mapepo no kufunga ukulya].”#17:21 Ba Baibele bamo tabakwata 17:21.

Yesu abwekeshapo ukusobela imfwa yakwe

(Mako 9:30-32; Luka 9:43-45)

22Ilyo Yesu na basambi bali pamo mu Galile, elyo Yesu alabeba ati, “Umwana wa muntu akaposwa mu minwe ya bantu. 23Bakamwipaya, elyo ubushiku bwalenga shitatu akabuuka ku bafwa.” Awe abasambi baikalafye nkumbabulili.

Umusonko we Tempele

24 # Ukuf 30:13; 38:26 Cilya Yesu na basambi bakwe bafikile mu musumba wa Kapenamu, bakalonganya wa musonko wa mwi Tempele baishile kuli Petelo, balamwipusha abati, “Bushe kafundisha wenu tasonka musonko we Tempele?” 25Petelo abasuka ati, “Alasonka.” Elyo Petelo aingila mu ŋanda, Yesu ewabalilapo ukumweba ati, “Simoni, iwe uletipo shani? Bushe imfumu sha pano calo ni kuli bani shipoka umusonko no mutuulo? Bushe ni ku bana bashiko nangu ni ku bantu bafye?” 26Petelo ayasuka ati, “Ni ku bantu bafye.” Yesu amweba ati, “Kanshi abana bena tabali nakusonka. 27Nomba te mulandu, pakuti twileka aba bantu bafulwe, iwe akuya kuli bemba. Uye posa ubulobo muli bemba. Isabi walaya balilapo ukuloba, ulyasamune akanwa. Uleya sangamo indalama iyilingene no musonko wa mwi Tempele. Uye ubuule, ubapeele, usonkeleko ine na iwe wine.”

Currently Selected:

Mateo 17: ILL15

Highlight

Copy