Mateo 16

Abafalise bafwaya icishibilo cacipeshamano

(Mako 8:11-13; Luka 12:54-56)

1Awe Abafalise na Basaduki baishile kuli Yesu kukumwesha. Bamulomba ukuti acitepo icipeshamano icakulanga ukuti aba na Lesa. 2Yesu abasuka ati, “Ilyo kwaba icungulo, ku mulu nga kwakashika, mutila amuti, ‘Bukaca bwino.’ 3Ulucelo lwena, nga ku mulu kwakashika, kwaba ne cikutuma, mutila, ‘Lelo kuleba icimwela.’ Mwalishiba ukwilula ifimoneka umulu, nomba mwafilwa ukwilula ifishibilo fya ino nshita! 4Iyi nkulo ibi kabili iyasangukila Lesa ilefwaya icishibilo cacipeshamano! Nomba tayakamone icishibilo nakalya, kanofye ninshi icishibilo cakwa Yona.” Awe Yesu abasha, afumapo.

Intutumushi ya Bafalise na Basaduki

(Mako 8:14-21)

5Elyo abasambi bayabukile kwishilya, kanshi ninshi balilabile ukusenda imikate. 6Yesu alabeba ati, “Mulecenjela no kulaisunga ku ntutumushi ya Bafalise na Basaduki.” 7Nabo epakulalanshanya abati, “Nico tushisendele mikate.” 8Yesu nao ico eshibe ifyo balelanda, abeba ati, “Mwe bantu ba cisumino cinono, cinshi ico mulelanshanya amuti, ‘Nico tushikwete mikate?’ 9Bushe kanshi na nomba tamulailuka? Bushe tamuleibukisha ifyo nalishishe abantu amakana yasano ku mikate isano? Bushe mwaiswishe imiseke inga ku fipandwa fyasheleko? 10Kabili nelyo nalishishe abantu amakana yane ku mikate cine lubali, bushe mwaiswishe imiseke inga ku fipandwa fyasheleko? 11Nga kanshi cinshi mushilukile ukuti te mikate naciba ndelandapo? Kanshi cenjeleni ku ntutumushi ya Bafalise na Basaduki!” 12Elyo abasambi bailuka ukuti, intutumushi acilabasokako, te ntutumushi ya mukate iyoo, lelo ni ku mafunde ya Bafalise na Basaduki.

Petelo alumbula ukuti Yesu e Kristu Umwana wakwa Lesa

(Mako 8:27-30; Luka 9:18-21)

13Elyo Yesu afikile mu calo mwabela umusumba wa Kesalia Filipi. Aipwishe abasambi bakwe ati, “Bushe abantu batila Umwana wa muntu nani?” 14Nabo bamwasuka abati, “Bamo batila ni Yoani Kabatisha, bambi batila ni Eliya, elyo bambi nabo batila ni Yeremia, nangu umo pali bakasesema.” 15Yesu nao abepusha ati, “Nga imwe, mutila nine ani?” 16Elyo Simoni Petelo ayasuka ati, “Niwe Kristu, Umwana wakwa Lesa wamweo.” 17Yesu amweba ati, “Walishuka Simoni, mwana Yona! Pantu te muntu uwakusokolwela ici, ni Tata wa mu mulu. 18Kanshi ine nakweba nati, niwe Petelo,#16:18 Petelo: Lishiwi lya Cigiriki, emukutila ilibwe. nakabili pa cilibwe ici epo nkakuula ulukuta lwandi. Na maka ya mfwa tayakalucimfye nakalya. 19Nkakupa ne mfungulo sha Bufumu bwa mu mulu. Conse ico walesha pano calo, ninshi na mu mulu caleshiwa. Na conse ico wasuminisha pano calo, ninshi na mu mulu casuminishiwa.” 20Elyo akonkomesha abasambi bakwe ati, “Tecakwesha ukwebako umuntu nelyo umo ukuti nine Kristu.”

Yesu asobela amacushi yakwe

(Mako 8:31-33; Luka 9:22)

21Ukutulafye lilya line, Yesu atampile ukulanda ku basambi bakwe apabuuta tuutu ati, “Ndi nokuya ku Yerusalemu, uko abakalamba, bashimapepo bacindami na bakafundisha bamafunde bakaya ncusha nganshi. Bakaya njipaya, lelo ubushiku bwalenga shitatu nkabuuka ku bafwa.” 22Elyo Petelo amusenda pambali, alamukalipila ati, “Ico cena teco we Mfumu! Awe iyoo, ico tekuti cikucitikile.” 23Elyo Yesu apilibukila kuli Petelo amweba ati, “Fuma apa we Satana we! Ulencilikila inshila. Pantu imitontonkanishishe yobe teyakwa Lesa, yabuntunsefye!”

Pakuba umusambi wakwa Yesu

(Mako 8:31—9:1; Luka 9:23-27)

24Elyo Yesu aebele abasambi bakwe ati, “Umuntu nga alefwaya ukulankonka, aleikaanya umwine, alesenda no musalaba wakwe, elyo alenkonka. 25Pantu uyo onse uufwaya ukupususha umweo wakwe, akaulofya. Lelo uyo onse uulofya umweo wakwe pa mulandu wa ine, akausanga. 26Bushe umuntu kuti amwenamo nshi, nga cakuti anonka ifyuma fyonse ifya pano calo, elyo alufishapo umweo wakwe? Nga cintu nshi umuntu engapeela icingalinga ukukabusha no mweo wakwe? 27Ala Umwana wa muntu alaswa ese no bucindami bwakwa Wishi pamo na bamalaika bakwe, pakwisa lambula bonse ukulingana ne micitile yabo. 28Ndemweba icine cine, bamo pali imwe mwe beminine pano, tabakafwe mpaka bakasuke bakamona Umwana wa muntu uko aleisa no Bufumu bwakwe.”

Currently Selected:

Mateo 16: ILL15

Highlight

Copy