Icitendekelo 11

Ulupungu lwa Babele

1Pesonde ponse palelandwafye ululimi lumo, kabili na mashiwi yalebomfiwa yamo yene. 2#Icite 10:10Ilyo abantu baselele no kulola lwa ku kabanga, basangile iwanga mu calo ca Shina,#11:2 Shina: E cimo cine na Babilonia. emo baikala. 3Balalanshanya abati, “Iseni tutame amatafwali tuyoce na bwino.” Kanshi babomfeshe amatafwali mu nshita yakubomfya amabwe. Elyo babomfeshe amanenekela mu nshita yakubomfya indaka. 4Elyo batile, “Iseni tuikuulile fwe bene umusumba no lupungu mukati ulwakuti lukafike na ku mulu pakuti tukalumbuke, kabili twikasalanganina pesonde lyonse.”

5Lelo Yawe epakwika kukwisa mona umusumba no lupungu abantu balekuula. 6Elyo Yawe atile ati, “Moneni, nga cakuti aba bantu bali umutundu umo, kabili balelanda ululimi lumo batendeka ukucita ici, lyena pafyo bengatontonkanya tapakabe nelyo cimo ico bakafilwa ukucita. 7Iseni, natwike tuye fulunganya ululimi lwabo pakuti belaumfwa umulolele ifyo umunankwe alelanda.” 8Kanshi ukufuma kuli ilya ncende Yawe epakubasalanganishisha pesonde lyonse, baleka no kukuula umusumba. 9Eco uyu musumba balewitila Babele,#11:9 Babele: Ili shiwi lya Cihibulu, capala ishiwi “ukufulungana.” pantu ni muli uyu musumba emo Yawe afulunganishishe ululimi lwe sonde lyonse. Ukufuma muli uyu musumba, Yawe abasalanganishishe pesonde lyonse.

Aba mu lupwa lwakwa Shemu

(1 Imilandu 1:24-27)

10Ubu e butantiko bwa lupwa lwakwa Shemu.

Imyaka ibili panuma ye lyeshi, ilyo Shemu ali ne myaka yakufyalwa umwanda umo (100), afyele umwana umwaume ishina lyakwe ni Afakisadi. 11Kabili panuma yakufyala Afakisadi, Shemu aikele imyaka imyanda isano (500), alifyele abana na bambi abaume na banakashi.

12Ilyo Afakisadi ali ne myaka amakumi yatatu na isano (35), afyele Shela. 13Kabili panuma yakufyala Shela, Afakisadi aikele imyaka imyanda ine na itatu (403), alifyele abana na bambi abaume na banakashi.

14Ilyo Shela ali ne myaka amakumi yatatu (30), afyele Eberi. 15Kabili panuma yakufyala Eberi, Shela aikele imyaka imyanda ine na itatu (403), alifyele abana na bambi abaume na banakashi.

16Ilyo Eberi ali ne myaka amakumi yatatu na ine (34), afyele Pelegi. 17Kabili panuma yakufyala Pelegi, Eberi aikele imyaka imyanda ine na makumi yatatu (430), alifyele abana na bambi abaume na banakashi.

18Ilyo Pelegi ali ne myaka amakumi yatatu (30), afyele Reu. 19Kabili panuma yakufyala Reu, Pelegi aikele imyaka imyanda ibili na pabula (209), alifyele abana na bambi abaume na banakashi.

20Ilyo Reu ali ne myaka amakumi yatatu na ibili (32), afyele Serugi. 21Kabili panuma yakufyala Serugi, Reu aikele imyaka imyanda ibili na cine lubali (207), alifyele abana na bambi abaume na banakashi.

22Ilyo Serugi ali ne myaka amakumi yatatu (30), afyele Naho. 23Kabili panuma yakufyala Naho, Serugi aikele imyaka imyanda ibili (200), alifyele na bambi abana abaume na banakashi.

24Ilyo Naho ali ne myaka amakumi yabili na pabula (29), afyele Tera. 25Kabili panuma yakufyala Tera, Naho aikele imyaka umwanda umo ikumi limo na pabula (119), alifyele abana na bambi abaume na banakashi.

26Ilyo Tera ali ne myaka amakumi cine lubali (70), afyele Abramu, Naho na Harani.

Aba mu lupwa lwakwa Tera

27Ubu e butantiko bwa lupwa lwakwa Tera.

Tera afyele Abramu, Naho na Harani. Harani nao ewafyele Loti. 28Harani afwilile mu Uri mu musumba afyalilwemo mu calo ca Kaludea, ninshi na wishi Tera acili umumi. 29Abramu na Naho bonse babili balyupile. Abramu aupile Sarai. Naho nao aupile Milika mwana Harani. Uyu Harani ewafyele Milika na Isika. 30Lelo Sarai takwete mwana, pantu ali ni ŋumba.

31Tera abuulile umwana wakwe Abramu, umwishikukulu wakwe Loti mwana Harani na nafyala Sarai, muka Abramu umwana wakwe, elyo bonse pamo bafumine mu musumba wa Uri mu calo ca Kaludea baile na ku calo ca Kenani. Nomba ilyo bafikile ku musumba wa Harani uko eko bacitile icifulo.

32Tera ali ne myaka imyanda ibili na isano (205) ilyo afwilile mu musumba wa Harani.

Currently Selected:

Icitendekelo 11: ILL15

Highlight

Copy