مَرقُس ۸
۸
عیسی دوواره چن هیزار نفرَ سِئرَ کونه
۱ او روزأنٚ دورون، دوواره ایتأ عالمه مردوم جمَ بوستیدی و جٚه اَ خأطر کی هیچی نأشتیدی بوخورید، عیسی خو شاگردأنَ دوخوأده و اوشأنَ بفرمأسته: ۲ «می دیل اَ مردومٚ رِه سوجه، چره کی الأن سه روزه کی می اَمرأییدی و هیچی خوردنٚ رِه نأریدی. ۳ اگه اوشأنَ ویشتأ اوسه کونم کی بیشید خوشأنٚ خانه، رأ دورون جٚه رمق دکفیدی، چره کی بعضی‌یأنٚ رأ خیلی دوره.» ۴ شاگردأن وأگردستید بوگفتید: «اَ بیابانٚ دورون جٚه کویه اینفر تأنه اَشأنٚ سِئرَ کودنٚ وأسی نان بأوره؟» ۵ عیسی وأورسه: «چن‌تأ نان دأریدی؟» بوگفتید: «هفت‌تأ.» ۶ بأزین او مردومأنَ بفرمأسته زیمینٚ سر بینیشینید. او وخت هفت‌تأ نانَ اوسأده، خودایَ شوکر بوکوده، اوشأنَ تیکه تیکَه کوده و فأدَه خو شاگردأنَ کی بنید مردومٚ ورجأ، شاگردأنم هَه کارَ بوکودید. ۷ چن‌تأ کوجه‌دأنه مأیی‌یم دأشتیدی. پس عیسی اوشأنَ برکت بدَه و بفرمأسته کی بنید مردومٚ جُلُو. ۸ همه‌تأن بوخوردید و سِئرَ بوستید و خورده‌یأنی کی بمأنسته، جمَ کودید و هفت‌تأ زیبیل پورَ بوسته. ۹ اویه تقریباً چار هیزار نفر ایسَه‌بید. بأزین عیسی او مردومَ اوسه کوده بیشید ۱۰ و فوری شاگردأنٚ اَمرأ کرجی‌یَ سوارَ بوسته و بوشو دَلمانوتَه ناحیه.
فریسیأن ایتأ آسمانی نیشأنه درخوأست کونیدی
۱۱ فریسیأن بموییدی عیسی ورجأ و شروع بوکودید اونٚ اَمرأ بحث کودن. اوشأن اونٚ ایمتحان کودنٚ وأسی اونٚ جأ بخوأستید کی ایتأ نیشأنه آسمانٚ جأ اوشأنٚ رِه بأوره. ۱۲ ولی عیسی خو دیلٚ جأ ایتأ آه بکشه و بوگفته: «چره اَ نسل نیشأنه خوأیه؟ آمین شمرَ گم، هی نیشأنه‌یی اوشأنَ فأده نیبه.» ۱۳ بأزین جٚه اوشأنٚ ورجأ بوشو و دوواره کرجی‌یَ سوارَ بوسته و بوشو دریاچه او طرف.
فریسیأن و هیرودیسٚ تورشٚ خمیر
۱۴ ولی شاگردأنَ خأطرَ شو بو کی خوشأنٚ مره نان اوسأنید و کرجی دورون ایتأ نان ویشتر نأشتیدی. ۱۵ عیسی اوشأنَ هوشدار بدَه و بفرمأسته: «شیمی حواس بمأنه، فریسیأن و هیرودیسٚ تورشٚ خمیرٚ جأ دوری بوکونید.» ۱۶ هَنٚ وأسی شاگردأن همدیگرٚ اَمرأ بوگو مگو بوکودیدی و بوگفتیدی: «چون اَمی اَمرأ نان نأوردیم، اون اَ گبَ بزه.» ۱۷ عیسی کی اَنَ بفأمسته، اوشأنَ بوگفته: «چره نان نأشتنٚ وأسی بوگو مگو کونیدی؟ ینی هنوز نأنیدی و درک نوکونیدی؟ ینی شیمی دیل هنوز سخته؟ ۱۸ آیا چوم دأریدی و نیدینیدی و گوش دأریدی و نشنأویدی؟ شمرَ یاد نی‌یه کی ۱۹ وختی پنج‌تأ نانَ پنج هیزار نفرٚ رِه تیکه تیکَه کودم، چن‌تأ سبد نانٚ خورده جأ جمَ کودیدی؟» بوگفتید: «دوازده‌تأ سبد.» ۲۰ «و وختی هفت‌تأ نانَ چار هیزار نفرٚ رِه تیکه تیکَه کودم، چن‌تأ زیبیل نانٚ خورده جمَ کودیدی؟» بوگفتید: «هفت‌تأ زیبیل.» ۲۱ او وخت عیسی اوشأنَ بفرمأسته: «بازم درک نوکونیدی؟»
ایتأ کورٚ مردأکٚ شفا گیفتن بِیت‌صِیْدا دورون
۲۲ وختی فأرسه‌ییدی بِیت‌صِیْدا، چن نفر ایتأ کورٚ مردأکَ بأوردیدی عیسی ورجأ و ایلتماس بوکودیدی کی خو دسَ اونٚ سر بنه. ۲۳ عیسی او مردأکٚ دسَ بیگیفته و اونَ او دیهأتٚ جأ ببرده بیرون. بأزین اونٚ چومٚ سر فیلی فوکوده و خو دسأنَ اونٚ سر بنَه و وأورسه: «هیچی دینی؟» ۲۴ او مردای خو سرَ راستَ گیفته و بوگفته: «مردومَ دینم کی رأ شوئون دریدی ولی هَچین دار و درختأنٚ مأنیدی.» ۲۵ پس عیسی ایوار دِه خو دسأنَ اونٚ چومأنٚ سر بنَه. او وخت اونٚ چومأن وازَ بوسته و دوواره شروع بوکوده دِئن و همه چی‌یَ خُب دِه‌یی. ۲۶ عیسی اونَ اوسه کوده بخانه و بفرمأسته: «دیهأتٚ دورون وأنگرد.»
پطرس در موردٚ عیسی ایعتراف کونه
۲۷ عیسی خو شاگردأنٚ اَمرأ بوشو قیصریه‌یٚ فیلیپی دور و ورٚ دیهأتأن. رأ میأن خو شاگردأنَ وأورسه: «مردوم چی گیدی، من کیسم؟» ۲۸ جواب بدَه‌ییدی: «بعضی‌یأن گیدی یحیی کی تعمید دَیی، ایتأ عیدّه گیدی ایلیاسٚ نبی و تعدادی‌یم گیدی ایتأ جٚه پیغمبرأن ایسی.» ۲۹ اوشأنَ وأورسه: «شومأن چی گیدی؟ مرَ کی دأنیدی؟» پطرس جواب بدَه: «تو مسیح ایسی.» ۳۰ ولی عیسی اوشأنَ قدغن بوکوده کی در موردٚ اون هیکسَ هیچی نیگید.
عیسی خو مردن و ویریشتن جٚه مورده‌یأنٚ دونیا پیشگویی کونه
۳۱ بأزین عیسی شروع بوکوده اوشأنَ تعلیم دَئن کی لازمه کی اینسأنٚ پسر ایتأ عالمه رنج و عذاب بکشه و قومٚ پیله کسأن و پیله کاهنأنٚ و دینٚ علما اونَ قوبیل نوکونید و بوکوشید و سومی روزٚ رِه مورده‌یأنٚ دونیا جأ ویریزه. ۳۲ وختی عیسی اَنَ اوشأنٚ رِه روشن واگویا بوکوده، پطرس اونَ ببرده ایتأ گوشه و شروع بوکوده اونَ سرزنش کودن. ۳۳ ولی عیسی خو دیمَ وأگردأنه، خو شاگردأنَ فندرسته و سرزنشٚ اَمرأ پطرسَ بوگفته: «می جأ دورَ بو، اَی شیطأن! چره کی تی فیکرأن اینسأنی‌یه، نه خودایی.»
۳۴ بأزین عیسی او مردومأنَ خو شاگردأنٚ اَمرأ دوخوأده و اوشأنَ بوگفته: «اگه کسی بخوأیه مرَ پیروی بوکونه، وأستی خورَه اینکار بوکونه، خو صلیبَ اوسأنه و می دونبألسر بأیه. ۳۵ چره کی هر کی بخوأیه خو جانَ نجات بده، اونَ جٚه دس دهه؛ ولی هر کی می وأسی و خوروم خبرٚ#۸:۳۵ اینجیل ینی خوروم خبر وأسی خو جانَ فأده، اونَ نجات دهه. ۳۶ اینسأنٚ رِه چی فایده دأره کی تومامٚ دونیا اونٚ شین ببه ولی خو جانَ جٚه دس بده؟ ۳۷ اینسأن خو جانٚ دوواره بدس اَوردنٚ وأسی چی تأنه فأده؟ اینسأن چی‌یَ تأنه خو جانٚ رِه کفاره بوکونه؟ ۳۸ چره کی هرکی اَ زناکار و گوناهکارٚ نسلٚ میأن، من و می گبأنٚ جأ عارناموس بدأره، اینسأنٚ پسرم، او وختی کی خو پئرٚ جلالٚ دورون، موقدّسٚ فرشته‌یأنٚ اَمرأ اَیه، اونٚ جأ عار دأره.»
Currently Selected:
مَرقُس ۸: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
