مَرقُس ۷
۷
چوطو دورونٚ جأ وأ پاک بوستن
۱ فریسیأن، بعضی جٚه دینٚ علما اَمرأ کی اورشلیمٚ جأ بمو بید، عیسی ورجأ جمَ بوستید ۲ و بیده‌ییدی بعضی جٚه اونٚ شاگردأن نجستٚ دسٚ اَمرأ، ینی دس نوشوسته، غذا خوردَن‌دریدی. ۳ فریسیأن و هَطویم تومامٚ یوهودیأن، ریش سیفیدأنٚ سنتٚ پیروی کودنٚ وأسی تا خوشأنٚ دسأنَ مطابقٚ تطهیرٚ رسم و رسوم نوشورید، غذا نوخوریدی. ۴ وختی بازارٚ جأ وأگردیدی، تا بوشور وأشور نوکونید، هیچی نوخوریدی و خیلی سنتأنٚ دیگرم حفظ کونیدی، پیاله‌یأن، تشت و تیأنأن و مسٚ ظرفأنٚ#۴:۷بعضی طومارأنٚ دورون ایچی دیگرم بینیوشته بوبوسته کی تأنیم بیگیم «نیمکتأن» کی خوردنٚ وأسی اونٚ سر نیشتیدی. شوستنٚ مأنستن. ۵ پس فریسیأن و دینٚ علما عیسی جأ وأورسه‌ییدی: «چره تی شاگردأن ریش سیفیدأنٚ سنتٚ مأنستن رفتار نوکونیدی، و نجستٚ دسٚ اَمرأ غذا خوریدی؟» ۶ اون جواب بدَه: «اِشعیای نبی در موردٚ شومأن ریاکارأن چی خُب پیشگویی بوکوده! جوری کی بینیویشته بوبوسته:
«‹اَ قوم خوشأنٚ زوانٚ اَمرأ مرَ ایحترام نیهیدی
ولی اَشأنٚ دیل می جأ دوره. ۷ اوشأن بیخودی مرَ عیبادت کونیدی،
و اوشأن فقط اینسأنی حوکمأنَ تعلیم دیهیدی.›
۸ «شومأن خودا حوکمأنَ کنار بنَه‌ییدی و اینسأنی سنتأنَ حفظ کونیدی.»
۹ بأزین بوگفته: «هه، شومأن چی خُب خودا حوکمَ نیهیدی کنار کی شیمی سنتَ بپا بدأرید! ۱۰ چره کی موسی بوگفته: ‹تی پئر و مارَ ایحترام بنه#۷:۱۰خروج بابٚ ۲۰ آیه› و هَطویم ‹هر کی خو پئر و مارَ ناجورٚ گبأن بزنه، وأستی بوکوشته ببه.› ۱۱ ولی شومأن گیدی اینفر تأنه خو پئر و مارَ بگه: ‹هر کومکی کی ایمکأن دأشتی می جأ فیگیرید، قوربان› - ینی وقفٚ خودا ایسه، ۱۲ و دِه ونألیدی هیتّأ کار خو پئر و مارٚ رِه بوکونه. ۱۳ شومأن اَطویی سنتأنٚ اَمرأ، کی اوشأنَ دس به دس چرخأنیدی، خودا کلامَ باطیلَ کونیدی و خیلی اَجور کردکارأن کونید.»
۱۴ عیسی ایوار دِه او مردومأنَ خو ورجأ دوخوأده و بوگفته: «شومأن همه‌تأن مرَ گوش بدید و اَنَ درک بوکونید: ۱۵ هیچ چی اینسأنٚ بیرون ننَه کی بتأنه بشه اونٚ وجودٚ دورون و اونَ نجستَ کونه، بلکی اونچی کی اینسأنٚ جأ بیرون اَیه، اونَ نجستَ کونه!
۱۶ «هر کی دوس دأره گوش بوکونه بیشنأوه!»
۱۷ بعدٚ اَنکی مردومأنَ ترکَ کوده و بمو بخانه، اونٚ شاگردأن اَ مثلٚ معنی‌یَ اونٚ جأ وأورسه‌یید. ۱۸ بوگفته: «ینی شومأنم هنوز نفأمستیدی؟ ینی نأنیدی کی اونچی کی بیرونٚ جأ، اینسأنٚ وجودٚ دورون بشه، نتأنه اونَ نجستَ کونه؟ ۱۹ چره کی اونٚ دیلٚ دورون رأ نیأفه، بلکی اونٚ شکمٚ دورون شه و بأزین دفع به.» عیسی اَ گبٚ اَمرأ تومامٚ خوراکی‌یأنَ پاک اعلام بوکوده ۲۰ و ایدامه بدَه: «اونچی کی اینسأنٚ دورونٚ جأ بیرون اَیه، اونه کی اونَ نجستَ کونه ۲۱ چره کی اَشأن او چیزأنیدی کی جٚه اینسأنٚ دورون بیرون اَیه: پلیدٚ فیکرأن، بی‌عیصمتی، دوزدی، آدم‌کوشی، زنا، ۲۲ حرص و طمأ، بد خوأستن، جوفت و کلک، هرزگی، حسودی، تهمت زِئن، غرور و احمق بوستن. ۲۳ تومامٚ اَ بدی‌یأن، اینسأنٚ دورونٚ جأ بیرونَ اَیه و اونَ نجستَ کونه.»
غیرٚ یوهودی زنأکٚ ایمأن
۲۴ عیسی رأ دکفته بوشو صور و صیدونٚ ناحیه‌یأن. بوشو ایتأ خانه دورون ولی نخوأستی هیکس وأخبرَ بٚه. با اَ حال نتأنسته خو حوضورَ قایمَ کونه. ۲۵ ایتأ زنأی کی اونٚ کوجه دُختر پلیدٚ روح دأشتی، وختی بیشتأوسته عیسی اویه ایسَه، فوری بمو و خورَه تأوده اونٚ پا جیر. ۲۶ زنای کی یونانی زوان و سوریه فینیقیه شین بو، عیسی جأ هَی ایلتماس کودی کی دیوَ خو دُخترٚ جأ بیرونَ کونه. ۲۷ عیسی اونَ بوگفته: «بدأ اوّل زأکأن سِئرَ بید، چره کی زأکأنٚ نانَ فیگیفتن و سگأنٚ ورجأ تأودن روا نی‌یه.» ۲۸ زنأی جواب بدَه: «دوروست گی، اَی سرور، ولی سکأنم زأکأنٚ سفره ورجأ خورده‌یأنٚ جأ خوریدی!» ۲۹ عیسی اونَ بوگفته: «تی اَ گبٚ وأسی بوشو، دیو تی دُخترٚ جأ بیرون بمو.» ۳۰ او زنأی هَطو کی فأرسه بخانه بیده کی اونٚ دُختر خو جا سر درازَ کشه‌بو و دیو اونٚ جأ بیرون بوشو.
کر و لالٚ مردأکٚ شفا
۳۱ عیسی صورٚ ناحیه جأ وأگردسته، صیدونٚ جأ دوأرسته بوشو جلیلٚ دریاچه، و وختی دِکاپولیسٚ قلمرو دورون فأرسه، ۳۲ اویه ایتأ مردأکَ اونٚ ورجأ بأوردیدی کی هم کر بو و هم نتأنستی خُب گب بزنه. عیسی جأ ایلتماس بوکودیدی خو دسَ اونٚ سر بنه. ۳۳ عیسی او مردأکَ جٚه او جمعیتٚ میأن بیرون بأورده، ببرده ایتأ کنار و خو پنجه‌یأنَ بنَه اونٚ گوشأنٚ دورون. بأزین فیلی فوکوده و او مردأکٚ زوانَ دس بزه. ۳۴ او وخت خو سرَ راستَ کوده آسمانَ فندرسته، ایتأ عمیقٚ آه بکشه و بوگفته: «اِفَّتَح» ینی «وازَ بو!» ۳۵ فوری اونٚ گوشأن وازَ بوستید و اونٚ زوانم خُب بوبوسته و بتأنسته خیلی راحت گب بزنه. ۳۶ ولی عیسی اوشأنَ قدٚغن بوکوده کی اَ موضوع‌یَ هیکسَ نیگید. ولی هر چی ویشتر اوشأنَ قدغن کودی، ویشتر اونَ پخشَ کودیدی. ۳۷ مردوم ایتأ عالمه حیرتٚ اَمرأ گفتیدی: «هرچی اون انجام بدَه خوروم کار بو، حتی کرأن و لالأنَ شفا دهه!»
Currently Selected:
مَرقُس ۷: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
