مَرقُس ۱۳
۱۳
معبدٚ ویرانَ بوستن و آخرٚ زمأنٚ نیشأنه‌یأن
۱ وختی عیسی معبدٚ جأ شوئون‌دوبو بیرون، ایتأ جٚه شاگردأن اونَ بوگفته: «اوستاد، فندر! چی سنگأن و چی با شکوهٚ عیمارتأنی!» ۲ ولی عیسی اونَ بفرمأسته: «تومامٚ اَ پیله عیمارتأنَ دینی؟ بدأن کی ایتأ سنگم سنگٚ سر بجا نمأنه، بلکی همه‌تأ فوگُردیدی.»
۳ وختی عیسی کوهٚ زیتونٚ سر، معبدٚ روبرو نیشته‌بو، پطرس و یعقوب و یوحنا و آندریاس خلوتی اونَ وأورسه‌ییدی: ۴ «اَمرَ بوگو اَ ایتفاقأن کِی دکفه و وختی قراره تومامٚ اوشأن ایتفاق دکفید، چی نیشأنه‌یی ظاهیرَ به؟» ۵ عیسی اوشأنَ بفرمأسته: «شیمی حواس بمأنه کی هیکس شمرَ جٚه رأ بدٚرَ نوکونه. ۶ خیلی‌یأن می نامٚ اَمرأ اَییدی، گیدی: ‹من هونم#۱۳:۶ینی «من مسیح ایسم».› و خیلی‌یأنَ جٚه رأ بدرَ کونیدی. ۷ وختی در موردٚ جنگأن ایشتأویدی و جنگأنٚ خبر شیمی گوش فأرسه، به هول و ولا دئنکفید. اَ جور ایتفاقأن وأ دکفه، ولی اَشأنٚ معنی اَن نی‌یه کی دونیا تومامَ بوسته. ۸ اَیتأ قوم، اویتأ قومٚ ضد و اَیتأ حکومت اویتأ حکومتٚ ضد ویریزیدی. زیمین لرزه‌یأن خیلی جیگایأن اَییدی و قأحطی سال اَیه. ولی اَشأن فقط زایمأنٚ دردٚ شروع بوستنٚ شینه.
۹ «ولی شیمی حواس بمأنه، چونکی شمرَ محکمه‌یأنَ ایسپأریدی و کنیسه‌یأنٚ دورون زنیدی و می وأسی والیأن و پادشایأنٚ جُلُو وأ بِئسید و اوشأنَ شهادت بدید. ۱۰ اوّل وأ خوروم خبر تومامٚ قومأنٚ رِه اعلام ببه. ۱۱ پس هر وخت شمرَ دسگیرَ کونید و محاکمه‌یأنَ ایسپأریدی، جُلُو جُلُو نیگران نیبید کی چی وأ بیگید، بلکی هر چی کی هو موقع شمرَ فأده به، اونَ بیگید، چره کی شومأن گب نزنیدی بلکی روح‌القدس گب زنه. ۱۲ برأر خو برأرَ، و پئر خو زأکَ مرگٚ دس ایسپأره. زأکأن، خوشأنٚ پئر و مارٚ ضد ویریزیدی و باعیثٚ اوشأنٚ مرگ بیدی. ۱۳ همه‌تأن می نامٚ وأسی شیمی جأ متنفر بیدی، ولی هر کی تا آخر قایم بِئسه، نجات یأفه.
۱۴ «ولی وختی او ‹ویرانگرٚ مکروهَ#۱۳:۱۴ دانیالٚ کیتاب، بابٚ ۹، آیه ۲۷، بابٚ ۱۱، آیه ۳۱ و بابٚ ۱۲، آیه ۱۱› بر پا بیدینید او جایی دورون کی نوأستی اویه بِئسه» - اونی کی خوأنه دقّت بوکونه - «بأزین اوشأنی کی یوهودیه دورون ایسَه‌یید، وأستی فرار بوکونید بیشید کویأنٚ جور؛ ۱۵ و هر کی خو خانه پوشتٚ بامٚ جور ایسَه، ایچی اوسأدنٚ وأسی بیجیر نأیه و خانه دورون نشه؛ ۱۶ و هر کی مزرعه دورون ایسَه، نوأستی وأگرده کی خو قبایَ اوسأنه. ۱۷ اَی وای شکمدارٚ زنأکأن و شیر ده مارأنٚ وأسی او روزأنٚ دورون! ۱۸ دوعا بوکونید کی اَ ایتفاقأن زمستانٚ دورون دئنکفید، ۱۹ چره کی او روزأن ایجور موصیبت رأ دکفه کی اونٚ مأنستن جٚه اوّلٚ دونیایی کی خودا خلق بوکوده تا هسأ ایتفاق دئنکفته و دِه هیوختم ایتفاق دئنکفه. ۲۰ و اگه خوداوند او روزأنَ کوتاه نوکوده‌بی، هیچ آدمی نتأنستی سالم جیویزه. ولی اینتخاب بوبوسته‌یأنٚ وأسی، کی خودش اینتخاب بوکوده، او روزأنَ کوتاه بوکوده. ۲۱ او روزأنٚ دورون اگه اینفر شمرَ بگه: ‹بیدینید، مسیح اَیه ایسَه!› یا ‹بیدینید اویه ایسَه!› باور نوکونید. ۲۲ چره کی دورُغی مسیح‌یأن و پیغمبرأن پیدا بیدی، نیشأنه‌یأن و معجزه‌یأن انجام دیهیدی کی اگه ایمکأن بدأره اینتخاب بوبوسته‌یأنَ جٚه رأ بدٚرَ کونید. ۲۳ پس شیمی حواس بمأنه، چره کی جٚه قبل، تومامٚ اَشأنَ شمرَ بوگفتم.
۲۴ «ولی او روزأنٚ دورون، او موصیبتٚ پسی،
«‹خورشید تاریکَ به
و ماه نور دِئنتوأنه.
۲۵ ستاره‌یأن آسمانٚ جأ بیجیر فیویدی
و آسمانأنٚ قوّتأن به لرزه دکفیدی›#۱۳:۲۵ اِشعیا بابٚ ۱۳، آیه ۱۰ و اِشعیا بابٚ ۳۴، آیه ۴.
۲۶ «بأزین مردوم، اینسأنٚ پسرَ دینیدی کی پیله قوّت و جلالٚ اَمرأ ابرأنٚ دورون اَمون‌دره.#۱۳:۲۶دانیال کیتابَ بابٚ ۷، آیه ۱۳میأن در هَه مورد تأنیدی ویشتر بخوأنید. ۲۷ بأزون فرشته‌یأنَ اوسه کونه و خو اینتخاب بوبوسته‌یأنَ جٚه دونیا چار کُنج، جٚه تومامٚ زیمین و آسمانٚ جاجیگایأن، همدیگرٚ ورجأ جمَ کونه.
۲۸ «اَسأ انجیل دارٚ جأ اَ درسَ یاد بیگیرید: هَطوتأ اونٚ شاخه‌یأن زپّه زنه و ولگ دهه، فأمیدی کی تابستان نزدیکه، ۲۹ هَطویم وختی کی بیدینید اَ ایتفاقأن دکفتَن‌دره، فأمیدی کی اینسأنٚ پسرٚ اَمون نزدیکه، بلکی درٚ سر ایسَه. ۳۰ آمین شمرَ گم کی تا تومامٚ اَ ایتفاقأن دئنکفه، اَ نسل جٚه بین نیشه. ۳۱ آسمان و زیمین جٚه بین شه، ولی می گبأن هیوخت جٚه بین نیشه.
مسیحٚ وأگردستنٚ وأسی آماده بیبید
۳۲ «هیکس او روز و ساعتَ نأنه، جغرز پئر؛ حتی فرشته‌یأنی کی آسمانٚ دورون ایسَه‌ییدی و پسرم نأنیدی. ۳۳ پس بیدار بیبید و شیمی حواس جم ببه، چره کی نأنیدی او وخت کِی فأرسه. ۳۴ هَچین اینفرَ مأنه کی سفر بوشو بی و رأ دکفتنٚ موقع، خو ختمتکارأنَ بیسپرده‌بی کی خو خانه کارأنَ انجام بدید، و هر کی‌یَ ایتأ وظیفه خاص بیسپرده و دربانم بوگفته کی بیدار بِئسه. ۳۵ پس شومأنم بیدار بِئسید، چره کی نأنیدی صاب‌خانه کِی وأگرده، شب یا نیصفٚ شب، خروس خوأن یا صُبٚ دم ۳۶ نوکونه کی اون ایدفعه‌یی وأگرده و شمرَ بیدینه کی خوفته‌یید. ۳۷ اونچی کی شمرَ گفتَن‌درم، همه کسَ گم: بیدار بِئسید!»
Currently Selected:
مَرقُس ۱۳: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
