مَرقُس ۱۰

۱۰

۱ عیسی او محلَ ترکَ کوده و بوشو یوهودیه دور و اطراف و اُردُنٚ روخانٚ او طرف. دوواره مردومأن اونٚ دور و ور جمَ بوستید و اون، همیشه مأنستن اوشأنَ تعلیم دَ‌یی.

عیسی ایزدواج و طلاقٚ رسم و رسومَ یاد دهه

۲ بعضی جٚه فریسیأن بموییدی اونٚ ورجأ و ایمتحان کودنٚ وأسی وأورسه‌ییدی: «ینی ایتأ مردأکٚ رِه جایزه خو زنَ طلاقَ دٚه؟» ۳ عیسی جواب بدَه: «موسی شمرَ چی حوکمی فأدَه؟» ۴ بوگفتیدی: «موسی ایجازه بدَه کی مردأی ایتأ طلاقنامه بینیویسه و خو زنَ ولَ کونه کی بشه.#۱۰‏:۴ تثنیه بابٚ ۲۴ آیه ۱» ۵ عیسی اوشأنَ بفرمأسته: «موسی شیمی سنگ‌دیلی وأسی اَ حوکمَ شِمرِه بینیویشته. ۶ ولی جٚه اوّلٚ آفرینش، خودا اَشأنَ مردأک و زنأی خلق بوکوده.#۱۰‏:۶ پیدایش بابٚ ۱ آیه ۲۷ ۷ هَنٚ وأسی مردأی خو پئر و مارَ ترکَ کونه و خو زنٚ اَمرأ ایتأ به ۸ و او دو‌تأ ایتأ تن بیدی.#۱۰‏:۸ پیدایش بابٚ ۲ آیه ۲۴ اَطویی دِه اوشأن دو نفر نی‌ییدی بلکی ایتأ تن بوبوستیدی. ۹ پس اونچی‌یَ کی خودا بهم برسأنه، اینسأن نوأستی سیوأ بوکونه.»

۱۰ وختی خانه دورون ایسَه‌بید، شاگردأن ایوار دِه در موردٚ اَ موضوع عیسی جأ وأورسه‌ییدی. ۱۱ عیسی بفرمأسته: «هر کی خو زنَ طلاقَ ده و ایتأ زنٚ دیگر ببره، ینی در حقٚ خو زن زنا بوکوده. ۱۲ و اگه ایتأ زنأی خو مردٚ جأ طلاقَ گیره و ایتأ مردأکٚ دیگرٚ رِه ببه، زنا بوکوده.»

عیسی کوجه زأکأنَ برکت دهه

۱۳ مردوم زأکأنَ عیسی ورجأ اَوردیدی کی اوشأنٚ سر دس بنه. ولی شاگردأن مردومَ اَ کارٚ وأسی سرزنش بوکودید. ۱۴ وختی عیسی اَ موضویَ بیده، اونَ خفتَ گیفته و خو شاگردأنَ بوگفته: «وئلید زأکأن بأیید می ورجأ و اَشأنٚ جُلُویَ نیگیرید، چره کی خودا پادشایی اَ جورٚ کسأنٚ شینه! ۱۵ آمین شمرَ گم هر کی خودا پادشایی‌یَ ایتأ کوجه زأکٚ مأنستن قوبیل نوکونه، هیوخت نتأنه اونٚ دورون بشه.» ۱۶ بأزون او جغلانَ کشه گیفته، دس بنَه اوشأنٚ سر و اوشأنَ برکت بدَه.

مال و منالدارٚ جوان

۱۷ وختی عیسی رأ دکفته، ایتأ مردأی بودُو بودُو بمو، اونٚ جُلُو زانو بزه و وأورسه: «اَی اوستادٚ نیکو، چی وأ بوکونم کی اَبدی حیات می ارث ببه؟» ۱۸ عیسی جواب بدَه: «چره مرَ ‹نیکو› دوخوأنی؟ هیکس جز خودا نیکو نی‌یه. ۱۹ حوکمأنَ دأنی: ‹قتل نوکون، زنا نوکون، دوزدی نوکون، دورُغٚ شهادت ندن، جوفت و کلک نوکون، تی پئر و مارَ ایحترام بنه.›» ۲۰ او مردأی جواب بدَه: «اوستاد، همه‌یٚ اَشأنَ جٚه وختی کی زأی بوم بجا بأوردم.» ۲۱ عیسی اونَ فندرسته، موحبت بوکوده و بوگفته: «تو ایچی کم دأری؛ بوشو هر چی دأری بوفروش و اوشأنٚ پولَ فأدن فقیرأنَ کی آسمانٚ دورون گنج بدأری. بأزین بیأ و می جأ پیروی بوکون.» ۲۲ مردأی اَ گبٚ جأ ناامیدَ بوسته و اونٚ دیلَ غم دکفته، رأ دکفته بوشو، چره کی مال و منالٚ زیادی دأشتی.

۲۳ او وخت عیسی دور و ورَ فندرسته و خو شاگردأنَ بوگفته: «مال و منالدارأنٚ رِه خودا پادشایی دورون رأ یأفتن چی سخته!» ۲۴ شاگردأن اونٚ گبأنٚ جأ خیلی تعجب بوکودیدی. ولی عیسی ایوار دِه اوشأنَ بوگفته: «اَی زأکأن، خودا پادشایی دورون شوئون چی سخته! ۲۵ شوتور، سوزنٚ سولاخٚ جأ راحتتر دٚوأره تا ایتأ پولدارٚ آدم خودا پادشایی دورون رأ بیأفه.» ۲۶ شاگردأن کی خیلی قاقَ بوسته بید، کس‌کسَ بوگفتید: «پس کی تأنه نجات بیأفه؟» ۲۷ عیسی اوشأنَ فندرسته و بوگفته: «اَ کار اینسأنٚ رِه ایمکأن نأره، امّا خودا رِه نه، چره کی خودا رِه همه چی ایمکأن دأره.»

۲۸ بأزین پطرس شروع بوکوده گب زِئن و بوگفته: «بیدین، اَمأن همه چی‌یَ ولَ کودیم و تی جأ پیروی کودَن‌دریم.» ۲۹ عیسی بفرمأسته: «آمین شمرَ گم، هیکس نی‌یه کی می وأسی یا خوروم خبرٚ وأسی، خو خانه، ملک و املاک یا خو برأر و خأخورأن یا خو پئر و مارَ یا خو زأکأنٚ جأ دس بکشه ۳۰ و اَ دونیا دورون صد برابر ویشتر خانه و ملک و املاک و برأر و خأخور و مار و زأک - و اوشأنٚ اَمرأ اذیت و آزار - بدس نأوره، و هَطویم او دونیا دورون، اَبدی زندگی‌یَ. ۳۱ ولی خیلی‌یأن کی اوّل‌ییدی، آخر بیدی و آخریأن اوّل بیدی!»

عیسی درباره‌یٚ خو مردن و ویریشتن جٚه مورده‌یأنٚ دونیا پیشگویی کونه

۳۲ هَطو کی شوئون‌دیبید اورشلیم، رأ دورون عیسی اوشأنٚ جُلُو رأ شوئون دوبو. شاگردأن قاق بیدی و کسایی کی اوشأنٚ دونبألسر شوئون‌دیبید، وحشت دأشتیدی. عیسی ایوار دِه خو دوازده‌تأ شاگردَ ببرده ایتأ گوشه و شروع بوکوده هر چی‌یَ کی وأستی اونٚ رِه ایتفاق دکفه، اوشأنٚ رِه گفتن. ۳۳ بفرمأسته: «هسأ شوئون دریم اورشلیم. اویه اینسأنٚ پسرَ پیله کاهنأن و دینٚ علما دس، تسلیم کونیدی، اوشأن اونَ محکوم کونیدی کی وأ بیمیره و ایسپأریدی غیرٚ یوهودیأنٚ دس. ۳۴ اوشأن اونَ دس پرَ گیریدی، اونٚ سر فیلی فوکونیدی، اونَ شلاق زنیدی و کوشیدی. ولی بأزین کی بمرده، سوّمی روزٚ رِه مورده‌یأنٚ دونیا جأ ویریزه.»

یعقوب و یوحنا درخوأست کودن

۳۵ یعقوب و یوحنا، زِبدی پسرأن، بموییدی عیسی ورجأ و بوگفتید: «اوستاد، خوأهش کونیم او چیزی کی تی جأ درخوأست دأریم، اَمِره انجام بدی.» ۳۶ اوشأنَ بوگفته: «چی خوأییدی کی شِمرِه بوکونم؟» ۳۷ بوگفتید: «عطا بفرما کی تی جلالٚ دورون، ایتأ تی راستٚ دس و ایتأ تی چپٚ دس بینیشینیم.» ۳۸ عیسی اوشأنَ بفرمأسته: «شومأن نأنیدی چی درخوأست کودَن‌دریدی. ینی تأنیدی جٚه او پیاله‌یی کی من خوروم، شومأنم بوخورید و او تعمیدی‌یَ کی من گیرم، بیگیرید؟» ۳۹ بوگفتید: «بله، تأنیم!» عیسی بفرمأسته: «هو پیاله جأ کی من خوروم، شومأنم خوریدی و تعمیدی‌یَ کی من گیرم، شومأنم گیریدی، ۴۰ ولی بدأنید کی می راستٚ دس و چپٚ دس نیشتن می‌شین نی‌یه کی کسی‌یَ ببخشم، اَ جایگاه کسأنٚ شین ایسه کی اوشأنٚ رِه فراهم بوبوسته دره.»

۴۱ وختی او ده‌تأ شاگرد اَ ماجرایَ بیشتأوستید، یعقوب و یوحنا دسٚ جأ اوشأنَ غیظَ گیفته. ۴۲ عیسی اوشأنَ دوخوأده و بوگفته: «شومأن دأنیدی اوشأنی کی غیرٚ یوهودیأنٚ حاکم بحیساب اَییدی، اوشأنٚ رِه آقایی کونیدی و غیرٚ یوهودیأنٚ پیله کسأن اوشأنَ فرمان دیهیدی. ۴۳ ولی شیمی میأن نوأ اَطویی ببه، بلکی هر کی خوأیه شیمی میأنی پیله کس ببه، وأسی شیمی خادم ببه ۴۴ و هر کی خوأیه شیمی میأن اوّل ببه، وأ همه‌تأنٚ غولام ببه، ۴۵ هوطو کی اینسأنٚ پسرم نمو کی اونَ ختمت بوکونید، بلکی بمو کی ختمت بوکونه و خو جانَ خیلی‌یأنٚ آزادَ کودنٚ وأسی فدا بوکونه.»

کورٚ بارتیمائوسٚ شفا گیفتن

۴۶ او وخت بموییدی اَریحا و وختی عیسی و اونٚ شاگردأن، ایتأ عالمه مردومٚ اَمرأ شهرَ ترکَ کودَن‌دیبید، ایتأ کورٚ گدا کی اونٚ نام بارتیمائوس ینی «تیمائوسٚ پسر»، رأ کنار نیشته‌بو. ۴۷ وختی بیشتأوسته کی عیسای ناصری اویه ایسَه، ایجگره زنان بوگفته: «اَی عیسی، داوودٚ پسر،#۱۰‏:۴۷«داوودٚ پسرٚ» معنی اَن نی‌یه کی عیسی داوودٚ زأکه، بلکی جٚه اونٚ نسل و نتاجه و اَن ایتأ جٚه عیسی صفتأنه کی نیشأن دهه اون، مسیحه. مرَ رحم بوکون!» ۴۸ خیلی جٚه مردومأن اونَ تشر بزه‌ییدی کی ساکیتَ به، ولی اون ویشتر ایجگره زه‌یی و گفتی: «اَی داوودٚ پسر، مرَ رحم بوکون!» ۴۹ عیسی بِئسَه و بفرمأسته: «اونَ دوخوأنید.» پس او کورٚ مردأکَ دوخوأدید و اونَ بوگفتید: «تی دیل قورص ببه! ویریز کی ترَ دوخوأدَن‌دره.» ۵۰ اون فوری خو عبایَ تأوده ایتأ گوشه، جٚه خو جا سر ویریشته و بمو عیسی ورجأ. ۵۱ عیسی اونٚ جأ وأورسه: «چی خوأیی تِره بوکونم؟» جواب بدَه: «اوستاد، خوأیم می چومأن بیدینید.» ۵۲ عیسی اونَ بفرمأسته: «بوشو کی تی ایمأن ترَ شفا بدَه.» او مردأکٚ چوم هو لحظه به سو بمو و عیسی دونبألسر رأ دکفته بوشو.

Currently Selected:

مَرقُس ۱۰: گیلکی (رشتی)

Highlight

Copy