مَرقُس ۱۱
۱۱
عیسی شه اورشلیم و مردوم شادی کونیدی
۱ وختی فأرسه‌یید «بِیت‌فاجی» و «بیت‌عَنْیا» کی اورشلیمٚ نزدیکی، کوهٚ زیتونٚ دامنه سر نهَه‌بید، عیسی دوتأ جٚه خو شاگردأنَ اوسه کوده ۲ و اوشأنَ بفرمأسته: «بیشید او دیهأتی کی شیمی جُلُو نهَه. هَطو‌تأ بودورون شیدی، ایتأ کُرّه اولاغَ دینیدی کی دٚوٚسته نهَه و هیکس تا هسأ اونٚ سر سوارَ نوبوسته. اونٚ لافندَ وأکونید و بأورید. ۳ اگه شمرَ وأورسه‌ییدی: ‹چره اَطو کونیدی؟› بیگید: ‹اَمی سرور اَنَ لازم دأره و زود اونَ شمرَ پسَ ده.›» ۴ او دوتأ شاگرد بوشوییدی و بیرون ایتأ کوچه دورون ایتأ کُرّه اولاغَ بیأفتید کی ایتأ درٚ جُلُو دٚوٚسته نهَه‌بو. پس اونٚ لافندَ وأکودیدی. ۵ هو موقع، بعضی جٚه اوشأنی کی اویه ایسَه‌بید وأورسه‌ییدی: «چره کُرّه اولاغَ وأکودَن دریدی؟» ۶ او دوتأ، هوطو کی عیسی اوشأنَ بفرمأسته‌بو، جواب بدَه‌ییدی؛ پس وأهشتیدی کی بیشید. ۷ بأزون کُرّه اولاغَ بأوردیدی عیسی ورجأ و خوشأنٚ لیباسأنَ تأودَه‌ییدی اونٚ سر و عیسی اونَ سوارَ بوسته. ۸ خیلی جٚه مردومم خوشأنٚ لیباسأنَ رأ سر وأشأدیدی و ایتأ عیدّه‌یم ولگ و شاخه‌یأنی‌یَ کی مزرعه‌یأنٚ جأ وأوه‌بید، رأ سر بنَه‌ییدی. ۹ اوشأنی کی جُلُو جُلُو شوئون‌دیبید و اوشأنی کی اونٚ دونبألسر اَموییدی، فریادٚ اَمرأ گفتیدی:
«هوشیعانا!»
«موبارکه اونی کی خوداوندٚ نامٚ اَمرأ اَیه!»#۱۱:۹ مزمور ۱۱۸ آیه ۲۶
۱۰ «موبارکه اَمی پئر، داوودٚ پادشایی کی کرأ اَمون‌دره!»
«هوشیعانا بوجورترین آسمانأنٚ دورون!»
۱۱ پس عیسی بمو اورشلیم و بوشو معبدٚ صحنٚ دورون. اویه همه چی‌یَ فندرسته، ولی جٚه اَ خأطر کی خیلی دِئر بو او دوازده‌تأ اَمرأ بوشو بیت‌عَنْیا.
اَنجیل در و معبد
۱۲ فردا روزٚ رِه، بیت‌عَنْیا بیرون شوئونٚ موقع، عیسایَ ویشتأ کوده. ۱۳ جٚه دور ایتأ اَنجیل دارَ بیده کی ولگ دأشتی؛ پس بوشو جُلُو کی بیدینه میوه دأره یا نه. وختی نزدیکَ بوسته، جٚغٚرز ولگ هیچی اونٚ سر نیده، چره کی اَنجیلٚ فصل نوبو. ۱۴ هَنٚ وأسی او دارَ بوگفته: «ببه کی دِه هیوخت هیکس تی میوه‌یَ نوخوره!» اونٚ شاگردأن اَنَ بشتأوستیدی.
۱۵ وختی فأرسه‌ییدی اورشلیم، عیسی بوشو معبدٚ صحنٚ دورون و شروع بوکوده اوشأنی‌یَ کی اویه بیهین بوفروش کودیدی بیرونَ کودن. اون، صرافأنٚ تختأن و کوتر فروشأنٚ بیساطأنَ فوگُردأنه ۱۶ و ونأشته هیکس اثاث اَ طرف او طرف کودنٚ وأسی معبدٚ صحنٚ جأ دوأره. ۱۷ بأزین شروع بوکوده اوشأنَ تعلیم دَئن و بوگفته: «مگه بینیویشته نوبوسته کی
«‹می خانه، همه‌تأ قومأنٚ رِه دوعا خانه دوخوأده به›#۱۱:۱۷ اِشعیا بابٚ ۵۶ آیه ۷؟
ولی شومأن اونَ دوزدأنٚ لانه چأکودیدی.»#۱۱:۱۷اِرمیا بابٚ ۷، آیه ۱۱
۱۸ پیله کاهنأن و دینٚ علما اَنَ کی بشتأوستید، سعی بوکودید اونٚ هلاک کودنٚ رِه ایتأ رأ بیأفید، چونکی اونَ ترسه‌ییدی، چره کی تومامٚ خلق اونٚ تعلیمأنٚ جأ قاق بید. ۱۹ وختی غروب دکفته، عیسی شاگردأنٚ اَمرأ شهرٚ جأ بیرون بوشویید.
اَنجیل دارٚ خوشکَ بوستن
۲۰ صُبٚ دم رأ دورون، اَنجیل دارَ بیده‌ییدی کی ریشه جأ خوشکَ بوسته‌بو. ۲۱ پطرس او ماجرایَ خأطر بأورده و عیسایَ بوگفته: «اَی اوستاد، فندر! او اَنجیل داری کی نیفرین بوکودی خوشکَ بوسته.» ۲۲ عیسی جواب بدَه: «خودایَ ایمأن بدأرید. ۲۳ آمین شمرَ گم، اگه کسی اَ کویَ بگه، ‹جٚه تی جا بکنده بوبو، دکف دریا دورون› و خو دیلٚ دورون شک نوکونه بلکی ایمأن بدأره کی اونچی کی گفتَن‌دره ایتفاق دکفه، اونٚ رِه انجام به. ۲۴ پس شمرَ گم، هر چی کی دوعا اَمرأ بخوأیید، ایمأن بدأرید کی اونَ فیگیفتیدی، و شیمی شین بِه.
۲۵ «پس هر وخت دوعا کودَن‌دریدی، اگه اینفرٚ جأ دیلخوریدی، اونَ ببخشید کی شیمی پئرم کی آسمانٚ دورون ایسَه شیمی خطایأنَ ببخشه. ۲۶ ولی اگه شومأن نبخشید، شیمی پئرم کی آسمانٚ دورون ایسَه، شیمی خطایأنَ نبخشه.»#۱۱: ۲۶ اَ آیه فقط بعضی طومارأنٚ دورون بمو دره. انجیلٚ متّی باب ۶ آیه ۱۵ بخوأنید.
عیسی جأ در موردٚ اونٚ ایقتدار وأورسیدی
۲۷ اوشأن ایوار دِه بمویید اورشلیم. وختی عیسی معبدٚ صارا دورون رأ شوئون دوبو، پیله کاهنأن و دینٚ علما و قومٚ پیله کسأن بموییدی اونٚ ورجأ ۲۸ وأورسه‌یید: «به چی حقّی اَ کارأنَ کونی؟ چی کسی اَ حقَّ ترَ فأدَه کی اَ کارأنَ انجام بدی؟» ۲۹ عیسی جواب بدَه: «منم ایچی شمرَ وأورسم. اگه می جوابَ بدید، منم شمرَ گم کی کو حقٚ اَمرأ اَ کارأنَ کونم. ۳۰ یحیی، حقٚ تعمید دَئنَ آسمانٚ جأ فیگیفته یا اینسأنٚ جأ؟ جواب بدید!» ۳۱ اوشأن کس‌کسٚ اَمرأ گب بزه‌ییدی: «اگه بیگیم، ‹آسمانٚ جأ بو،› گه، ‹پس چره اونَ ایمأن نأوردیدی؟› ۳۲ اگه بیگیم، ‹اینسأنٚ جأ›…»
اوشأن، مردومٚ جأ ترسه‌ییدی، چره کی همه یحیایَ ایتأ رأس رأسی پیغمبر دأنستیدی. ۳۳ پس عیسایَ جواب بدَه‌یید: «نأنیم.» عیسی بوگفته: «منم شمرَ نگم کی کو حقٚ اَمرأ اَ کارأنَ کونم.»
Currently Selected:
مَرقُس ۱۱: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
