MATAIO FAZA 2.
FAZA 2.
I. Ere si otarai danõ ba gatoemboecha loea. II. Foloi ba danõ Miseraji. III. Famoenoe ono ba Mbetilechema. IV. Fangawoeli moroi ba danõ Miseraji.
1I. Ba me no toemboe Jesoe ba Mbetilechema, ba Joedaia, me loeo razo Herode andrõ, ba hiza gere, moroi ba danõ ba gatoemboecha, si mõi ba Jeroezalema. (Loek. 2, 4 b. t.). 2Lamane: Hezo razo Niha Jehoeda andrõ, sawena toemboe? No oroma chõma ndrõfinia ba danõ ba gatoemboecha, ba mõiga mangaloeloe chõnia. (Moz. IV. 24, 17). 3Ba me irongo daʼõ razo andrõ, Herode, ba tobali dõdõnia ba samba banoea manõ Jeroezalema, awõnia. 4Ba ifaloechaʼõ gere seboea fefoe, awõ zangila amachoita ba niha Jehoeda, ba izofoezofoe chõra, hadia niw̃aʼõ, heza toemboe Keriso. 5Ba lamane chõnia daʼõ: Ba Mbetilechema ba Joedaia, si mané sa ba zoera zamaʼeleʼõ: (Joh. 7, 42). 6”Ba jaʼoegõ, Betilechema, ba danõ mado Joeda, maʼifoe tenga fondrege zideʼide ndraʼoegõ bazolohe mado Joeda andrõ, me ba chõoe iʼotarai dania solohe andrõ, sokoebaloi banoeagoe andrõ Iraono Gizeraëli”. (Mich. 5, 1). 7Awena ifakaoniʼõ gere no mege Herode, ibiniʼõ wamakaoniʼõ, ba izofoezofoe sibai chõra, ha mega oroma ndrõfi andrõ (Jes. 60, 1). 8Ba ifatenge ira ba Mbetilechema, imane: Miʼaeʼe, miʼaloealoei sibai, heza so nono andrõ, ba na no misõndra, ba miʼombachaʼõ chõgoe, enaʼõ mõido gõi mangaloeloe chõnia. 9Ba me no larongo niw̃aʼõ razo andrõ, ba mõi ira, ba hiza ndrõfi andrõ, niʼilara ba danõ ba gatoemboecha, mowaõwaõ fõnara, iroegi tebato ia faoedoe zi so ono andrõ. 10Ba me laʼila ndrõfi andrõ ba omoeso sibai dõdõra. 11Ba mõi ira jomo ba daʼõ, ba hiza nono, awõ ninania Maria, ba labalõdoehini tooe danõ, mangaloeloe chõnia ba labokai naha ganaʼara, mamoeala ira chõnia, balaki ba koemõjõ ba emoeri. (Sin. 72, 10, b. t.). 12Ba iw̃aʼõ chõra Lowalangi, ba wangifi, bõi lafoeli ira chõ Herode; ba latõrõ lala bõʼõ, wangawoeli ba danõra.
13II. Ba me no mofanõ ira, ba hiza malaʼika Zoʼaja, sangoromaʼõ jaʼia chõ Josefo, ba wangifi, imane: Faoso, ohe nono, awõ ninania, ba oloi ba danõ Miseraji ba ba daʼõ iagõ, irege moehededo chõoe; iʼaloei sa dania nono Herode, ba wamakiko jaʼia. 14Ba maoso ia, iʼohe nono, awõ ninania, ba zi bongi ba isaw̃a danõ Miseraji. 15Ba ba daʼõ so ia iroegi waʼamate Herode, enaʼõ itõrõ niw̃aʼõ Zoʼaja, niʼombachaʼõ zamaʼeleʼõ andrõ, me imane: ”No oekaoni nonogoe moroi ba danõ Miseraji”. (Hos. 11, 1).
16III. Ba me iʼila Herode, no lalimo ia ere andrõ ba mofõnoe sibai ia, ba ifatenge, ifaboenoeʼõ fefoe ndraono ba Mbetilechema ba ba zi fasoei fefoe, iʼotarai zi mendroea fache faʼeboea, no malõ ba zideʼide moroi andrõ, da i waʼara andrõ nizofoezofoenia ba gere andrõ. 17Ba daʼõ itõrõ niw̃aʼõ Jeremia andrõ, samaʼeleʼõ, me imane: 18”No terongo wangarõngarõ ba Rama, fegeʼege, ba fangeʼesi sabõlõbõlõ; iʼeʼesi nononia Rachela, ba lõ edõna ia larara dõdõnia, me lõ jaʼira saʼae”. (Jer. 31, 15).
19IV. Ba me no mate Herode, ba hiza malaʼika Zoʼaja, sangoromaʼõ jaʼia chõ Josefo, ba wangifi, ba danõ Miseraji. 20Imane: Faoso, ohe nono, awõ ninania ba foeliʼõ ba danõ Ndraono Gizeraëli, noa sa mate zamoenoe ono andrõ enaʼõ. 21Ba maoso ia, iʼohe nono, awõ ninania, ba isaw̃a danõ Ndraono Gizeraëli. 22Ba me irongo, no tobali razo Joedaia Gerichelaʼo, fangali namania Herode, ba ataʼoe ia mõi ba daʼõ. Ba hoemede chõnia Lowalangi, ba wangifi; ba isaw̃a danõ Galilaia. 23Mõi ia ba mbanoea sotõi Nazareta, enaʼõ itõrõ niw̃aʼõ zamaʼeleʼõ, wa banoea Nazareta dania dõinia. (Loek. 2, 39. Jes. 11, 1; 53, 2. Sach. 6, 12).
Currently Selected:
MATAIO FAZA 2.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.