SOERA MALEACHI FAZA 2.
FAZA 2.
I. Fanegoe ere andrõ, sanawõ fawoeʼoesa li andrõ chõ Lowalangi. II. Fanegoe sato, me falimolimo ira, si aʼania ba chõ ngambatõra.
1I. Ba iadaʼe, ba ba chõmi tetandrõsaigõ goroisa andre, jaʼami ere. 2Na lõ mifondrondrongo ba na lõ mibeʼe ba dõdõmi, ba wamo soemange dõigoe, iw̃aʼõ Jehowa soemange dõigoe, iw̃aʼõ Jehowa ngahõnõ ba oefatõrõ chõmi wangelifi ba oeʼelifi wamahoewoemi andrõ; ba noa saʼae oeʼelifi, me lõ odõna mibeʼe ba dõdõmi. (Moz. III. 26, 16. Moz. V. 28, 15). 3Hiza, oetegoe dangami, ba oelaoe ba mbawami golawoea, olawoea zoemange andrõ chõmi, ba ba daʼõ lafao ami. 4Ba aboto dania ba dõdõmi, wa no oefafaʼemaʼõ chõmi goroisa andrõ, enaʼõ fawoeʼoesa li chõgoe ba Ndraono Lewi, iw̃aʼõ Jehowa ngahõnõ. (Moz. IV. 25, 12). 5Fawoeʼoesa ligoe andrõ chõra, ba no fangorifi ba faʼohahaoe dõdõ, ba ba wangataʼoefi jaʼodo oebeʼe chõra, ba no laʼataʼoefi ndraʼodo, ba no manizinizi ira ba dõigoe andrõ. (Jer. 32, 40). 6Oroisa si ndroehoe nifaʼemara, ba si lõ atoelõ, ba lõ faloecha ba mbewera. Ba wa lõ sinegoe ba ba waʼatoelõ latõrõ lalara somasi ndraʼo, ba no ato ladõnisi mangawoeli, ba wondrõi lala si lõ atoelõ. (Jak. 1, 25). 7Ba mbewe gere sa, ba bõi aefa wamahaõ si ndroehoe; famobawa lala taʼaloei ba mbewenia, me no sinenge Jehowa ngahõnõ ia. (Jer. 18, 18). 8Ba jaʼami, ba no mirõi lala, no ato zi teʼala mibeʼe famahaõmi andrõ, no mifoefoe wawoeʼoesa li andrõ, ba Ndraono Lewi, iw̃aʼõ Jehowa ngahõnõ. 9Ba jaʼodo gõi, ba si lõ ba dõdõ ami, oebeʼe, ba si lõ tõi, ba zato fefoe, me no olifoe ami lala andrõ chõgoe, ba me no eboea dõdõmi zamboeana, ba wamahaõ andrõ.
10II. Hadia, tenga ha samõsa namada, jaʼita fefoe? Tenga ha samõsa Lowalangi sombõi jaʼita? Ba hana wa faoma falimolimo ita chõ nawõda, wolaoe salacha ba wawoeʼoesa li andrõ chõ ndra toeada? (Efes. 4, 6). 11Si falimo mado Joeda, ba ba Ndraono Gizeraëli ba ba Jeroezalema, ba no telaoe zogoro ita; mado Joeda, ba noa sa lalaoe zalacha ba niʼamoniʼõ andrõ, chõ Jehowa, somasi ia; ba no omasi ira nono Lowalangi bõʼõ, ba no laʼowaloe. (Eser. 9, 1 b. t. Neh. 13, 23). 12Jamoehori Jehowa zi lõ mõrõ ba sanedema li, ba nose maʼoewoe Jakobo, ba niha andrõ, sameʼe soemange chõ Jehowa ngahõnõ! 13Ba daʼõ na nilaoemi: mihawoe taw̃a hõrõ naha wameʼe soemange andrõ chõ Jehowa, ba fegeʼege ba fangarõngarõ, tobali lõʼõ saʼae iʼotahõgõ zoemange nibeʼemi, ba lõʼõ saʼae ihalõ ba dangami zomasi ia. 14Ba mimane: Hana? Me no anehe Lowalangi wolaoemõ chõ ngambatõmõ me ono matoea ndraʼoegõ ba zi no falimo ndraʼoegõ, lõ lai wa no awõoe ia ba foʼomo ba wawoeʼoesa li andrõ chõoe. (Mat. 5, 32). 15Ba samõsa lõ solaoe si manõ, si so tõdõ na maʼifoe. Ba he wisa dõdõ zi samõsa andrõ? Chõ Lowalangi iʼaloei ngaʼõtõ. Ba miʼangelama, tõdõmi andrõ, ba bõi manõ falimo ndraʼoegõ chõ ngambatõoe me ono matoea ndraʼoegõ. (Moz. I. 15, 3; 16, 3). 16Me no si fatoewoe chõgoe wanibo andrõ, iw̃aʼõ Jehowa, Lowalangi Ndraono Gizeraëli; ihawoei horõ mbaroenia [solaoe daʼõ], iw̃aʼõ Jehowa ngahõnõ. Ba miʼangelama saʼae, tõdõmi andrõ, ba bõi manõ falimo ami! (Moz. V. 24, 1. Mat. 19, 8). 17Atage Jehowa mibeʼe, ba wehedemi andrõ, ba mimane: Heza mabeʼe atage ndraʼoegõ? Me miwaʼõ: Dozi solaoe si lõ atoelõ, ba no si sõchi, wamaigi Jehowa, ba no jaʼira zomasi ia: ma hezo na Lowalangi andrõ, samatõrõ hoekoe satoelõ?
Currently Selected:
SOERA MALEACHI FAZA 2.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.