SOERA JOBI FAZA 39.
FAZA 39.
Tohoetohoe: Faʼatoeatoea Lowalangi ba wamazõchi saliw̃aliw̃a ba danõ.
1”Hadia, õʼila ginõtõ woʼono nago, ba hadia, õtõngõni waʼafõchõ hoeloe ba mbõhõ? (Sin. 29, 9).
2Hadia, õʼofaja mbaw̃ara, ba õʼila mbaw̃a woʼonora?
3Lakõrõboei ira, ba bõla nonora, ba dõhõ waʼafõchõ hoeloera.
4Ba abeʼe nonora, manõi ba ndroeʼoe, moloi, ba lõʼõ saʼae mangawoeli.
5Ha zamoloi galide ndroeʼoe ba ha zi doedoe si so ba ndroeʼoe andrõ, (F. 24, 5. Jer. 2, 24),
6nibeʼegoe tanõ si mate, ba weʼaso ba daʼõ, ba decha moʼasio, nahiania?
7Maʼiki ia ba goeagoea andrõ jomo ba mbanoea, ba feʼao zamatõrõ, ba lõ irongo.
8Hadia niʼilania ba hili, ba õnia, ba iʼaloealoei ngawalõ ndroeʼoe saoeri, fefoe.
9Hadia, edõna mõi ngoningonioe gõrõbao ndroeʼoe; hadia mõi ia mõrõ ba kandra chõoe?
10Hadia, õʼila õbeʼe ba wesoe gõrõbao ndroeʼoe andrõ, ba wangoehoendra laza; hadia, igoʼõgoʼõ maõ ndraʼoegõ, ba wonowi ba ndraso?
11Hadia, õdõnadõna chõnia, me no sabõlõ, ba õbeʼe balazi ia halõw̃õmõ andrõ?
12Hadia, õdõnadõna chõnia iʼohe baose mbasitõmõ, iʼohe ba golajama mbasitõ chõoe?
13Mangafongafo wofo ondra, omoeso dõdõ; ba hadia, no afi doembao ba boe doembao [fofo si no ahonohono]?
14Tenga jaʼia; itooeʼõ manõ tooe ba danõ gadoelonia ba ifaoechoe ba zogawoegawoe tooe,
15ba lõ itõrõ tõdõnia, ma ihoendragõ sanõrõ ba ma amama ba gahe goetoe ndroeʼoe.
16Safaito ia ba chõ nononia, hoelõ zi tenga chõnia; lõ iʼaboesi tõdõ na zajazaja gõlõ waʼerege dõdõnia.
17Noa sa lõ nibeʼe Lowalangi faʼatoeatoea chõnia; lõ nifoʼoerachania jaʼia tõdõ.
18Ba na ifanoka ia, ba iʼigiʼigiʼõ koedo, fabaja si fakoedo ba hoeloe.
19Hadia, jaʼoegõ zameʼe faʼabõlõ ba koedo? Hadia, jaʼoegõ zamonoecha baginia boe zõri sangafongafo andrõ?
20Hadia, jaʼoegõ zamanoka, fa amaedola kao mbõhõ? Sataʼoe ita wehõfoehõfoenia andrõ, si no eboea li! (Joël. 2, 4).
21Ichaʼachaʼai danõ ba ndraso; omoeso dõdõnia, ba waʼabõlõnia andrõ; ifaondragõ zi no mangaró.
22Iʼigiʼigiʼõ waʼataʼoe, ba lõ tokea, ba lõ ibaliʼõ ia foeri, na iʼila ziʼõli.
23Roemiti ba hoeloenia naha nono wana, ba takile doho ba kalakala.
24Ichaʼachaʼai tooe danõ, ba walõʼahono ba ba wofõnoe, ba lõ ahono ia, na telaoe dorofe.
25Ero na molī dorofe ba imane: ’Laboe!’ ba moroi ba zarõoe iʼago wasõndrata; irongo weʼao zolohe, si oegoeʼoegoe, ba fangahahagõ andrõ.
26Hadia, ba waʼaboto ba dõdõoe andrõ ifaliw̃a gafinia fahanew̃a andrõ, ba ibologõ miraja?
27Hadia, ba niw̃aʼõoe isaw̃a mijaw̃a mojo, ba mangazoeni ba zalaw̃a jaw̃a? (Jer. 49, 16. Obad. a. 4).
28Ba dete gara ba hili iʼiagõ, ba daʼõ monahia ia ba doetoeroe gara, naha zanaro.
29Moroi ba daʼõ idarodarogõ gõnia; ichamõ zarõoe hõrõnia.
30Ba labadoe ndro ononia, ba ba zi so niboenoe tooe, ba daʼõ so ia. (Mat. 24, 28).
Currently Selected:
SOERA JOBI FAZA 39.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.