San Mateo 28

Jesús phiidʉtarr

(Mr. 16:1-8; Lc. 24:1-12; Jn. 20:1-10)

1Jua ʉ̃i kheutarr noram, domighed edpherre agtha khĩsu nʉwe María Magdalenaau deeum ʉʉi agjo María a thʉ̃r sĩerr dʉi Jesús aukhertarr jẽbdi aar oon wetjim aajem. 2Mag nʉm ee Ẽwandam chog ʉ̃gtharmua beewi mag mokpor chi jẽbdi ee joothʉ sĩerr chaaug pʉreubapäaiwai ʉʉur theega duuijim. Mag chi mok chaaug pʉreupʉiwia warag ag ʉ̃r oo sim ooimajierram aajem. 3Chi Ẽwandam chog khĩir eerpaawai sĩi pagthʉm dau phʉr jẽer atham bʉ oo nʉmjo sĩejim anʉm, maimua i khajũa sĩi bäpphä sĩejim aajem. 4Soldaaun chi jẽbdi thʉa narr khʉʉn mag oobaawai jãphierr wajaugau kha duuiphobaadewi sĩi warag chi meemjo jẽkhʉt thuphãau aphobaadejim anaabá. 5Pari mag chi soldaaun thuphãau aphobaadem ee, chi Ẽwandam chogau chi ʉʉinag, —Oob jãphierrmiet ajim anʉm. Mua khaphʉ chirʉmgui ajim anʉm, pãrau Jesuuta jʉr wenʉrrʉm, ar amau pakuls gaai meerphe thõotarr. 6Mʉig ich aukhertarr eemua phiidʉwi petaawai ya mʉig khaba sim. Pãach daujãau i aukhertarr ee oon beejurauma ajim anʉm. 7Magnaa amag, Ereubaadet, maimua i khapeen aar, “ya iiu phiidʉwi pãar na Galileaag petajim, nau jamta pãrau i ooimajugui” a jaaubaimat ajim anʉm chi Ẽwandam chogau.

8Am iek amachig magbaawai aigmua apuraa ereubaadejim anaabá. Jãphierraa naajieb mamʉ agjo onee naajim aajem, amachig mag Jesús phiidʉbarm a jaaubaawai. Mag warag khajapha bʉ chʉp wetjim aajem, maach chi khapeenag jaauwimaag. 9Mag am eerpamjo wetumta ich Jesús am khĩirphee oberchewi amag saludaachejim anaabá. Mag amachig iekhabaichee i khaug athaawai i bʉkhʉrr phõbkhanaa i bʉʉta ud athajierram aajem, irig jeeumamua. 10Magbaawai ichdeu amag, —Oob nem okho amiet ajim anʉm. Jãg jãphierr wenʉrraju khãai, mʉ khapeen aar wetwi Galileaag wetpi jaaubat, nau jamta amau mʉ ooimaju a jaaubaimat ajim anʉm.

Phadnaan chi pornaanag soldaaunau nem ĩgkhatarr

11Mag ich dʉicha oowia chi khapeen aar jawaan dʉdʉrkhamich, soldaaun chi jẽbdi thʉa narr khʉʉn eem ãaur khʉʉnau phobor ee wetwi chi phadnaan pornaanag jaauwimajierram anaabá, mag chi mok chawag pʉreupʉinaa ag ʉ̃r jup sim amachdeu ootarr maimua chi Jesujã ich aukhertarr ee ooba khãidu parii aadem. 12Mamʉ magbaawai chi phadnaan pornaanaujã ag bʉrre tagam judionaan chi thethemnaan thum thʉ̃rkhanaa ibepjierram anaabá, soldaaunag Jesús iiu phiidʉbarm igwi seukha nem ĩgkhapieg. Magnaa ĩchab chi soldaaunau seukha nem jaaubarm paarjã phatkhon pom phagju ajierram aajem. 13Ya mag amach ap chi iekham arr aawai chi soldaaun wawimamua amag magjierram anʉm:

—Õrag jaauwai edaar pãach khãi nʉmich chi khapeen beewiata chi aukhertarr eem jĩgkha arrwi amachdeu khap wai nʉm a jaaubat ajim anaabá. 14Mag pãar khãitarr gobernadorrau ũrwia pãar dʉi khaigba amʉn, marau maachdeuchata i dʉi iekhawi maachig paa auju. Magbaawai pãar chig abajugui ajierram anʉm amag.

15Mag, chadcha amachig phagbaawai, õrag jaauwaijã, am khãi nʉmichta chi khapeen beewi jĩgkha arrjierram a jaaujim anaabá. Magtarr aawaita ĩs ewag pawiajã judionaan eyan agtha Jesús chan phiidʉba maach chi khapeenauta arrwi maach jua khap bep sĩujim a jaaujem.

Ãbmiecha Jesuu ich khapeenag nem jaau pʉatarr

(Mr. 16:14-18; Lc. 24:36-49; Jn. 20:19-23)

16Mag Marianaanau maachig Galileaagta wetpi naajim a jaaubaawai maach chi khapeen thum once Galileaag wetjim, ich Jesuu maachig nʉpi jaautarr buchagdam gaai ãba i dʉi oog. 17Maimua mam pawia ya ich Jesús warp urum maachdeu oophobaadeewai Ẽwandam chi Ayagamjo irig jeeu naajim; mamʉ mag irig jeeu nʉm ee, maar khapeen ãaur khʉʉnau ar khabampii naajim. 18Mag nʉm ee warag maar aig beewi maar dʉi iyʉʉmamua magjim:

—Ya mʉ Ayau mʉrʉg ʉ̃gtharm khʉʉn dʉijã iek theeg apinaa mʉig eegarm khʉʉn dʉijã iek theeg apibarmgui ajim. 19Magua mua pãragan, mʉ matarr khur pãach ap paaukhabaadee durrpierr aaidʉbaadet a chirʉmgui ajim; magnaa thumaam khʉʉnag amach meupierr mʉg pãach peerdʉtarr iekta jaaunaa chi ʉkhamam khʉʉnagjã pãach denjo mʉchta amach Porkhapibat ajim. Magnaa ĩchab Ẽwandam chi Aai thʉ̃r gaai, chi Iewaa thʉ̃r gaai maimua ich Ẽwandam Akhaar thʉ̃r gaai por choopetat ajim, mag chi ʉkhamam khʉʉn. 20Mag nʉm dʉi ĩchab mua pãachig jaaujerrjo Ẽwandamau nem waupi jaaumamta i ipierraa waupi jaaubat ajim, ich jãg pãachdeujã mʉ ipierr wenʉrrʉmjo. Mʉʉn mʉchin Jooirau mʉg durr i agkha nʉm aar ich mag ed eepierr pãar dʉi chitajugui a jaau pʉajim maachigcha.

Currently Selected:

San Mateo 28: noaA

Highlight

Copy