San Marcos 1

Juan õor por choomieu Ẽwandam iek jaau nʉrrarr

(Mt. 3:1-12; Lc. 3:1-9; Jn. 1:19-28)

1Warrcha maach peerdʉajem iek jawaag Jesucristo Ẽwandam Iewaa beetarran mʉgta ajim aajem: 2Warr jooingar Ẽwandam i jaaumie Isaías khararrag Ẽwandamau ich iek phãpiewai ich Chaai pʉijuuta jaaujim anaabá. Pari mag ich Chaai pʉiju na deeum igwia ich Chaairagta magjim anʉm:

“Iewaa, mua pʉ na mʉch iek jaaujem pʉiju.

Mag wounauta pʉ na pʉ maju ee õrag pʉ barju jajawagmaju, thumaam khʉʉnau pʉ iek ũrm khõsi sĩi pʉ nʉ naamkhĩir” ajim anʉm. (Mal. 3:1)

3“Mag woun ajappai õor barba aajem aar sĩejemuata ich aar õor barbaimaawai pʉ jaaumamua, ‘Ya maach Por beeimʉʉ sim’ a jaaumaju, pʉ igwia.

Mag pʉ igmamua, ‘I beeju nawe pãach thãar khĩir khaugbat’ a jaaumaju, thãraucha khõsi pʉ iek ʉkhamkhĩir.” (Is. 40:3)

Magta ajim aajem Ẽwandamau ich Iewaag, Juan igwia.

4Mag chi Ẽwandam Iewaa maju na i jaau nʉrrarr Juan ajim aajem, chi õor por choomie. Warrgarwe chi Juan igwia mag nʉrraju jaautarr aawaita chadcha thum ich agjoo obebergmamua Juanau õrag, “Pãach khaibag ãsie ewag khĩirjuwia, Ẽwandamag chugpaapi jeeuwia, mʉrʉg pãach por choopibat; magbaawai Ẽwandamau chadcha pãar khaibag chugpaapʉiju” a jaaujeejim anaabá.

5Mag irua jaau nʉrrʉm ũrbaawai beejeejim aajem: Judea durram khʉʉn dʉi Jerusalén phobor eem khʉʉnpa, i iek ũraan. Mag amach jʉ̃gʉucha ũrwia, ãsie ewag amach khaibag khĩirjuwia, meerba jaaunaa amach por choopibaawai, Juanau am por choopʉimajim aajem, dojã Jordán ee.

6Juan chi õor por choomie khajũan camello eu denta kha sĩejim aajem. I ãi jʉ̃ajemjã nemheu den ajim aajem. Maagwai irua khoojerr, asphit ajim anaabá pamiel dʉi. 7Mag wounau õrag jaauwai, “Mʉg ed gaai mʉ ẽudee jopcha woun ãb beejugui” aajeejim anʉm. “Ma mʉ khãaijã ʉ̃rcha iek theeg sim. Mag mʉ khãaijã ʉ̃rʉʉcha iek theeg sĩewaita mʉ chan mʉg chirʉm aig sĩi i chogkhaagpaijã serbiiba chirʉm. 8Muan sĩi dodamaupai pãar por choo chirʉm. Pari ichcha beem ed gaai ichdeun pãrag ich Ẽwandam Akhaarchata deejugui” aajeejim aajem õrag, mag Jesús beeju igwia.

Juanau Jesús por chootarr

(Mt. 3:13-17; Lc. 3:21-22)

9Mag Juanau õor por choo nʉrrʉm jaarta Jesucristo Ẽwandam Iewaa beejim aajem, Galilea durram phobor Nazaretmua. Mag ich aig pierrwai Juanau dojã Jordán ee i por choopʉijim aajem. 10Mag por choowia do eemua oberaau oowai, edaujãata weeudʉbaadem eemua Ẽwandam Akhaarta duburjoo khitʉm i gaai jupcheeg wewewe urum oojim anʉm. 11Magbarm ee ĩchab ʉ̃gtharmua õor iekjo, “Iewaa, pʉʉta mʉ Chaai mʉchdeu jãsehne wai chitʉmʉu; pʉ gaaimua mʉ onee chiraajem” abarmjã ũrjim aajem.

Dosãtau Jesús khũgurju ẽkhatarr

(Mt. 4:1-11; Lc. 4:1-13)

12Mag por choo aaipawi i durrpabaadem ee, ich Ẽwandam Akharaucha warp õor chukag ee i warrjim aajem. 13Mag mam mawia cuarenta días sĩejim anaabá, durr warp õor chukag ee, maach khoojem nemkham ee. Mag i sim aigta dosãtau beewia irig seukhabaichejim anaabá, i khũgur awaag. Maigmua chi dosãt petarr ẽudee jũrr Ẽwandam chognaanauta ʉ̃gtharmua beewia i khĩir jãsenkhachejierram aajem.

Jesuu warrpem Galilea durr Ẽwandam iek jaaubaaderr

(Mt. 4:12-17; Lc. 4:14-15)

14Mag khur Jesús majim aajem Galilea durr, õrag “Ẽwandamau õor thumta ich denkha aum khõsi sim” a jawaan. Mag i maawai rey Erodeeu Juan pʉr auwi cárcel deg pʉitarr khur ajim aajem. 15Mag Ẽwandam iek jawaanta marr aawai ichpai igwia jaaumamua, “Warrgurwe Ẽwandamau Juan ẽudee woun ãb pʉiju a jaaujerr ĩsta barbaichemgui” ajim anʉm. “Maagwai ĩsin chad Ẽwandamau thumaam khʉʉn ich denkha aum khõsita sim. Pari magaagan pãach khaibag ãsie ewag khĩirjunaa iseg nʉm dʉi thãraucha maach peerdʉajem iekta ʉkhabat” aajeejim aajem ich Jesuucha õrag.

Do ʉamien jayap Jesuu ich dʉi thʉ̃rphe arrtarr

(Mt. 4:18-22; Lc. 5:1-11)

16Biek ãb Jesús thʉrrdo Galilea anʉm igaau nʉrrʉmua õor numí do ʉreu nʉm ooimajim aajem. Makhʉʉn Simón ajim aajem ich naam Andrés anʉm dʉi. Ich makhʉʉn do ʉamien ajim aajem. 17Makhʉʉnag Jesuu, —Ideu pãach red pʉawia mʉ dʉita wettarrau ajim anʉm. Ich jãg pãach mʉg sĩi do ʉa gaaipai nʉmjo, mʉg atag jũrr mʉ iek õrag jaau gaaipaita nʉisijugui ajim anʉm amag.

18Mag chadcha amachig magbarm bʉrre amach red pʉawia Jesús dʉi ereujim aajem. 19Mag ereubaadeeu ag atkhajãrpai deeu õor numí botedam ee amach red thʉrrdʉ sĩsidʉm kha nʉm ooimajim aajem. Makhʉʉn jooi Zebedeo chaain ajim aajem, Santiago Juan dʉi. 20Makhʉʉnjã Jesuu eeurrjim anaabá ich dʉi. Magbaa amach aai Zebedeo ich phidkhaajem khʉʉn dʉi bote ee pʉawia i dʉi wetjim aajem.

Jesuu woun ãb dosãt beneu baarjerr monaautarr

(Lc. 4:31-37)

21Mag wetwi, Capernaum phobor ee barwia, jua ʉ̃ʉijem ed aadeewai, judionaan Ẽwandam iek jaaujem ee mawia, õrag Ẽwandam iek jaaubaadejim aajem, ich Jesuu. 22Mag irua jaaumam ũrwia, aig õor i iek ũr narr khʉʉn jʉ̃gderraa naajim aajem, amachdeu ũurwai Jesuu jũrr Moiseeu ley phã pʉarr jawaag chi khaphʉm khaphʉm aajem khʉʉn khãyaujã jaau khapcha jaaumam ũrwia. 23Mag Jesuu Ẽwandam iek jaau sim aig woun ãb mor ee ben khaigbam wai sim sĩejim aajem. 24Mag wounau Jesús oo athaawai chi ben i mor ee simuata thet äa anaa irig, —¡Jesús Nazaretpierr! Ideu maar sĩi khajapha sĩubá ajim anʉm. Puan sĩi maar opäainta urum. Mua pʉ khaphʉ chirʉmgui ajim anʉm, pʉ jammua urú. Pʉ Ẽwandam Iewaa ʉ̃gtharmua beetarr khabahab, warrgurwe Ẽwandamau pʉiju a jaaujerr ajim anaabá irig chi mepeer garmua.

25Magbaawai jũrr Jesuu chi meperagta meeukhanaa, —Khĩu abá. Pʉchta warag jãg woun mor eemua oberbaad ajim anʉm.

26Jesuu mag iekhabaa, chi mepeer mag woun mor eemua wiwiug oberbaadeeu, warre jẽkhʉt phʉphʉrgpʉiwia, chi wounta iek chuk pʉajim anaabá. 27Õrau amach daúa mag oobaawai dauderraa nʉm iekhau amach wir aigpai, “¿Jãga jãg wounau iekhaawai meperaupa i ipierraa nʉma?” anaajim aajem. 28Jesuu mag woun mor eem mepeer jʉrbapʉim jopchata Galilea durr ee maimua ag bigaau phobordam nʉnʉidʉm eem magwe khakhapdo joisijim aajem.

Simón phaauhũan Jesuu monaaupʉitarr

(Mt. 8:14-15; Lc. 4:38-39)

29Mag judionaan Ẽwandam iek jaaujem deg Jesuu õrag Ẽwandam iek jaau sĩewia oberaau igbaadejim aajem, Simón Andrés dʉi joobaajerr di aar. Mag i mam dʉi i khapeen numí wetjim aajem. Makhʉʉn, Santiago ajim aajem Juan dʉi. 30Mag wetwia Jesús deg pabaimaawai aiguim khʉʉnau irig jaaujim aajem, Simón phaauhũan put ee khʉʉumieu mor mas sim. 31Ichig mag jaaubaa, aar dubwia, i jua gaai pʉrnaa ʉ̃gthaag phiriu aujim anaabá. Mag phiriu atham bʉrre chi khʉʉumiejã thumbabaadeewai warag phiidʉwia am jãhogjim aajem.

Kheubaadem ee Jesuu õor pom monaaupʉitarr

(Mt. 8:16-17; Lc. 4:40-41)

32Maimua ya edau kheubaadem ee, õrau amach aaunaan khamor machag khĩirpierr wai narr khʉʉn dʉi dosãt beneu sĩsidʉmpa Jesús aig waibeemajim aajem. 33Mag warag thum phobor eem khʉʉn beewia i sim di aig puertdi igaauta daaugajãrm magwe pos aphobaadejim anaabá. 34Mag, sĩi khajapham khamor machag khĩirpierr wai sĩsidʉm ich aig aubeemarr khʉʉn monaaumam dʉi ĩchab mepeenpa õor mor ee sĩsid arr jʉr werpmajim aajem. Chi mepeenau i khaphʉ naajim anaabá, i chadcha Ẽwandam Iewaakha sim. Mamʉ ich Jesuu bʉ̃ʉrjã amag iekhapiba aajeejim aajem.

Jesuu Galilea durr Ẽwandam iek jaau phʉʉrdʉ nʉrrarr

(Lc. 4:42-44)

35Jesuu ichdeu mag õor pom monaautarr ag noram edaraawe phiidʉwia phobor igaau warphaapai ich ap majim aajem, õor chukag ee, Ẽwandamag jewaan. 36Magbaawai Simonau tagam khʉʉn ich khapeen dʉimua i jʉr wenʉrrawi oobaimaawai 37irig jaaujierram aajem, õor thumaam khʉʉnau mag i jʉr wenʉrrʉm.

38Mamʉ magbaawai jũrr ichdeu amag magjim anʉm:

—Chawag dewam phobor dakhapaim aarta wettarrau, jũrr mamaam khʉʉnagjã Ẽwandam iek agjo jawaag. Warrjã mag jawaanta mʉ beejimgui ajim anaabá.

39Ich mag Jesuu Galilea durr õor nʉnʉidʉmpierr Ẽwandam iek jaau nʉrranaa judionaan Ẽwandam iek jaaujem degjã jaaujeejim aajem. Mag nʉrrʉmua õor mor ee mepeer khaigbam wai sĩsidʉmjã warre dau daau obeerpʉi maajeejim anaabá.

Jesuu woun ãb kokobé beneu bar sĩerr monaaupʉitarr

(Mt. 8:16-17; Lc. 4:40-41)

40Biek ãb woun phĩe kha dodoso sim Jesús aig beewia i khĩirphee kanieu phõbkhachewia irig, —Pua khõs chirʉm khai, mʉg phĩedau warre mʉ gaaimua chugpaabapʉi aichejim anʉm irig.

41-42Magbaa Jesuu i dau aug khaugwi i gaai pʉrnaa irig, —Mua pʉ monaaupʉim khõsi chirʉm. Monaau chirsí magan ajim anʉm irig. 43-44Magwia Jesuu irig, Mua mʉg pʉch monaaubarm oob õrag jawam ajim anʉm. Magju khãai nacha Jerusalén mawia Aai i jeeujem degam phadeg pʉch mor oopibaimá. Maimua Moiseeu iek phãtarr gaai jaau simjo pʉch monaaubarm paar nemchaain ofrendakha deebá ajim anʉm, pʉch mʉg monakha chirsim õrag khap amkhĩir.

45Mamʉ Jesuu mag ich monaautarr õrag jaaupiba arrta ich nʉrrʉmpierr jaaubaadejim anaabá. Mag gaaimua Jesús tag phobor ee parhooba oberju khaba, õor chukag chʉʉita sĩsijim aajem. Mamʉ magʉm ãba, mam phobor igaau i sim aar durrpierram khʉʉn i aar baarjeejim anaabá.

Currently Selected:

San Marcos 1: noaA

Highlight

Copy