San Mateo 20

Woun ãbmua piyonnaan jẽertarr ag nem ĩgkhaa

1’Mʉg atag mʉch iek ʉkha durrum khʉʉnag amach phithur atarr jũrr mua nem deeju edan, woun ãb uvado papau ich piyonnaanag nemjõ phierrtarr jũrr phagtarrjota ajugui ajim. Mag wounau nacha piyón jẽraag edpherre õor jʉraan majim aajem. 2Mag mawi, chi nacha ooimatarr khʉʉn dʉi iekhaawai, khãai ãb phidkhabarm paar phaagjemjo denario ãb phagju ajim aajem. Mag iekhawi phidkhamkhĩir pʉijim aajem. 3Maimua ya edau ʉ̃gtharraa las nuevejo aadem ee, deeu õor jʉraan mawia kaaijã ee sĩi õor phidagjã chukhu par nʉm ooimajim aajem. 4Magbaa makhʉʉnagjã, “Pãarjã ĩchab mʉ phidag ee phidkhabamit; mua pãrag pãach phidkhabarmpierr phagjugui” ajim anʉm. Magbaa makhʉʉnjã ĩchab phidkhaan wetjim aajem. 5Maimua edausĩe aadee, ich chi morkhʉ jooiraupai deeu ũwaai õor jʉraan mawi, kheeuragjã las tresjonaa deeu ichpai majim aajem. Maimua makhʉʉn dʉijã iekhawi ich agjo phidkhaan pʉijim aajem. 6Maimua ya kheeuraacha las cincojo aadem ee, deeu ũwaai nacha ichdeu õor ooimatarr aar majim aajem. Maimua ooimaawai sĩi õor phidagjã chukkhu aig naajim aajem. Magbaawai amag, “¿Khani jãg kheumaamta jãg sĩi phidkhajã phidkhaba, parta kheudʉtkhamaama?” ajim anʉm. 7Magbaa amachdeu, “Marag ni ãbmuajã phidag jaauba aawaita mʉg maar par naabahab” ajierram anʉm. Magbaa jooirau makhʉʉnagjã, “Magan mʉ nemjĩir ee uva phierrbamit” ajim anʉm, “kheu nʉm ora.”

8’Maimua ya edau kheubaadee chi uva papau ich chog mag õor phidag ee wai jẽer sĩerragta jũrr, “Jãimua phidkha narr khʉʉn thʉ̃rkha aunaa amag phagkhabá ajim anʉm. Ẽudeecha dubtarr khʉʉnagta nacha phagnaa maimua nacha dubtarr khʉʉnagta jũrr ẽudeecha phagbá” ajim anʉm. 9Mag, chadcha ẽudeecha kheeuraa las cincojo dubtarr khʉʉnta nacha thʉ̃rkha auwi khãai ãb phidkha kheutarr khʉʉnagamjo denario ãhãbdo phagkhamajim anaabá, agdaujo. 10Maimuata jũrr nacha dubtarr khʉʉn thʉ̃rkha aujim aajem. Ya mag amach thʉ̃rkhʉʉibaadee, warm khʉʉnag mag denario ãb deematarr aawai, amaun jũrr amachigta ʉ̃r phagjupii naajima, amachta edpherre dubtarr aawai. Pari magba amagjã ẽudeecha dubtarr khʉʉnag phagtarrjopai phagkhajim anaabá. 11Mamʉ amachig magpai phagbaawai khĩujã ãwatba, chi morkhʉʉgchata jũrr ãbmua, 12“Jãkhʉʉn ya maar oberaagpam eeta bardʉtkhachetarr aawai ora ãbpaita phidkhajierram. Magtarrta maar ed durr pom phidkha kheuwi ed pechagjã jẽmer kheudʉtkhamaam khʉʉn dʉi ãbata pua amag phagbarbma, jũrr amag erraapai phagju aai simta” ajim anʉm irig. 13Pari magbaawai chi phidag khʉ jooirau jũrr am eem ãbakhaíg, “Kake pari warr maach iekhaawaijã, ¿denario ãbpaita pʉrʉg phagju abajĩ, pʉ phidkhabarm paar? Magtarr aawai mua pʉ khũgurba chirʉm perá” ajim anʉm. 14“Pʉch phatkhondam auwia petá” ajim anʉm. “Pari mua ichiita kheeuraacha dubtarragjã pʉrʉg phagtarrjo phagam khõsi chirʉmgui” ajim anʉm. 15“Mʉch phatkhon aawai mʉchdeu phagam aig phagju aai chirʉmgui” ajim anʉm, “pom phidkhaba arr khʉʉnag awiajã. ¿Wa sĩita pua mʉrʉg õor dʉi o wajapha apimaphata chirʉ́wa?” ajim anʉm chi phidag khʉ jooirau.

16Mag nem ĩgkhaadam jaauwi ich Jesuupai, —Ich jãgta ajugui ajim ĩchab mʉg atagjã. Ẽudeecha phidag ee dubtarr khʉʉnagta nacha dubtarr khʉʉnag phagtarrjo, ẽudeecha mʉch iek ʉkhatarr khʉʉnagjã nacha ʉkhatarr khʉʉnagamjo agdaujo nem deemaju. Maiguin Ẽwandam athee pom nem wauba arr khʉʉnagjã warm khʉʉnagamjo phagmajugui ajim.

Õrau ich thõoju Jesuu jaautarr

(Mr. 10:32-34; Lc. 18:31-34)

17Maimua mag Jerusalenag mam arr aawai ya khʉd ee paaukhabaadee, ich Jesuu maar maach ap thʉ̃rkha auwi marag jaaumamua magjim:

18—Pãrau oo nʉmgui ajim, maach Jerusalenag wetum. Mamʉ nau maach barbaimaawai mʉch chi Emkhooi Iewaa mʉg chirʉmʉn thethemnaanag mʉ pʉr deeju. Magbaawai makhʉʉnau mʉ thõopi jaauwi 19jũrr maach meeun khabam khʉʉn jua ee mʉ thʉsĩepʉijugui ajim. Magbaawai makhʉʉnau mʉ wau iekhanaa mʉ gaai mas waunaa pakuls gaai mʉ meerphepʉijugui ajim. Pari amau mag mʉ wau thõowiajã khãai thãrjup nʉm ee deeu mʉ iiu phiidʉju a jaaumajim maachigcha.

Jooi Zebedeo ũanau ich chaain athee khãidu jeeutarr

(Mr. 10:35-45)

20Maimua i iekha obaadem ee, jooi Zebedeo ũan ich chaain dʉi beewi nem inag jewaagpamjo Jesús khĩirphee phõbkha thʉnaaichejim. 21Magbaawai Jesuu irig, —¿Khandamta ig ʉ? ajim.

Magbaa ich ũanau, —Señor, magan ya pʉchta thumaam khʉʉn Porkhabaadeewai mʉ chaain mʉkhʉʉn numiita pʉch bigaau juppibá ajim, pʉch dʉi iek theeg amkhĩir: ãb pʉch juachaar gar, maagwai ãb pʉch juawe gar, Santiago Juan dʉi igwi.

22Magbaawai Jesuu warre chi chaainagta, —Pãrau chan pãachdeu jeeu nʉmjã khaugbata nʉmgui ajim. ¿Pãrau khĩirjuawai mag pãachta warm khʉʉn khãai ʉ̃rpai aag chikhamnau pãach dau aug wau nʉmjã mʉ denjo ãwatju aai nʉ? ajim amag.

Magbaawai amachdeu, —Eera, marau ãwatbajup ajierram.

23Magbaa deeu Jesuu ichdeupai amag, —Chadcha pãrau õrau pãach dau aphʉʉ wau nʉm ãwatma ajim. Pari mag mʉch juachaar gar wa juawe gar khãijã mʉch dʉi ãba juppiju chan mua pod jaauju khaba chirʉmgui ajim, ya jãig paawain mʉ Ayauta ichdeu khap jaauju aawai.

24Maach tagam khʉʉn agjo ich Jesús dʉi ogdʉba wenʉrraajerr khʉʉnau ũurwai, mag warm khʉʉnau i bigaau jupimaag khãidu jeeu nʉm ũrbaawai, chadcha am dʉi maar thãar ee khaba naajim. 25Pari magbaa deeu ũwaai maach appai khĩet thʉ̃rkhanaa marag magjim, ich Jesuu:

—Pãrau khaphʉ nʉm, mʉig eegar ar amachta chi porkha nʉm khʉʉnan amachta chi pornaan aawai iek theeg nʉm awi amach khãai jua eegpaim khʉʉn dʉi athuu aajerram. 26Pari jũrr pãrau am denjo magju khaba nʉmgui ajim pãach eepai. Magju khãai ãbmua khãijã pãach eepai ichta thumaam khʉʉn khãaijã ʉ̃rʉʉ am khõsi sim khai, magan jũrr ich garmuata ich khapeenau nem mag abaawaijã am ipierr nʉnʉʉu aju aai simgui ajim. 27Maagwai ar ichta ʉ̃gthar pawiajã Ẽwandamau ich garcha juppi ahau apim khõsi sim khai, magan ichta sĩi parhoobam khʉʉn chogkhaju aai sim ajim. 28Mʉ pãar khãai Emkhooi Iewaakha chirʉmjã mag sĩi mʉch garmua chikham chogaagjã beebajim. Mʉ beetarran sĩi chikhamnag mʉch chogamkhĩirta beejimgui ajim, mag chitʉmua chikham jua machgau thõowi mag thõobarm gaaimua õor pom sĩi amach pekau ee preso sĩsidʉmjo nʉm khʉʉn obeerkhapäain.

Õor numí dau khĩsu khitheem Jesuu monaautarr

(Mr. 10:46-52; Lc. 18:35-43)

29Mag wetumua Jericó phobor ee naaimawi, deeu ereu phobaadeeu, õor pooma Jesús ẽudee wetjim. 30Mag õor pom wetum khʉd bigaau dau khĩsu khitheem numí ohoodo durrajim. Mag durrumua Jesús dichmam khaug athaawai ähäakhamua, —Señor, pʉʉta rey David khararr ag chaain ewagam khʉʉn Iewaau marau nʉ narr. Maar apdurrum maar dau aug khaugbahur anaajim.

31Mamʉ mag am ähäakham ũrwia aig dich wetum khʉʉnau amag meeurrarrau aajeejim, khĩupamkhĩir. Pari magʉmjã waragta Jesuug uhuukhamua, —Señor, jooi David khararr Iewaa, maar apdurrum maar dau aug khaugbahur aajeejim.

32Magbaawai Jesuu dʉnʉisiwi mag chi dau khaugba khithee arr khʉʉn thʉ̃rkhanaa, —¿Khani pãrau mʉrʉg pãach dʉi apim khõsi nʉ? ajim amag.

33Magbaawai amachdeu, —Señor, maraun pʉrʉg maach dauta daujã wajaug paapim khõsi nʉmgui ajierram irig.

34Magbaa chadcha Jesuu am dau aug khaugwi, am dauheu aaithʉ aaithʉ abaawai, warre daujã wajaug sĩi bi eewe ich magta thaabatarrjo nʉisijim. Mag amach dau monaaubapäaiwai warag i dʉi ereubaadejim.

Currently Selected:

San Mateo 20: noaA

Highlight

Copy