San Lucas 17

¿Jãga anʉ́ Ẽwandamau chikham khaibag ee mapi nʉm khʉʉn dʉi?

(Mt. 18:6-7,21-22; Mr. 9:42)

1Jesuu magjim aajem ich dʉi wenʉrraajerr khʉʉnag:

—Mʉg jẽb gaai ichiita ich jãg õor pekau waupiejem nem paraa aju, mamʉ ¡eh, apkhit! ajim anʉm, chi magʉm nem paraa sim woun. 2Irua magʉm gaaimua chi mʉ iek ʉkha kherʉmta pekau ee burrpimʉn, ichta Ẽwandam dʉi iekkhõr pooma sĩsiju. Mamʉ mag Ẽwandam dʉita iekkhõr paarpaju khãai ichdeupai ich o gaai mokpor pomkham jʉ̃naa phũas ee baudʉkhiin ʉucha ajugui ajim anʉm Jesuu.

¿Jãga dich khapeen perdonaa nʉ?

3Maimua ĩchab, —Pãrag jaaukhim, khaphʉ abat ajim anʉm, ich Jesuupai. Pãachjo mʉ iek ʉkha nʉm khʉʉnau khãijã pãach dʉi khaigba abaawai warag dʉi agjo aju khãyau sĩi am wawibat ajim anʉm. Maimua amachdeu mag pãach dʉi khaigba abarm khaug auwia pãachig “Mʉ perdonaabá” aawai, am perdonaawia oob tag bʉ̃ʉrjã magʉm iek igmiet ajim anʉm. 4Ãbam edpai khãijã biek khapan pãach dʉi khaigba awia, “Kake mʉ perdonaabá, mua tag jãgbaju” a khʉrrkhakha awia khãijã, ich agpierr i perdonaabat ajim anʉm, tag magʉm iek bʉ̃ʉrjã igba.

Ẽwandam pãach dʉi sim a khĩirjunaata nem waukhiin

5Mag dich khapeen perdonaapi jaaubarm phithuurga sim khĩirjunaa, jũrr ich Jesuu chi doce jʉr autarr khʉʉn garmua irig magjierram aajem:

—Señor, Ẽwandamau marag khĩirjug deebam chan pod marau maach khapeen perdonaabaju. Marag juapá deebá ajierram anʉm, mag pʉchdeu jaau simjo aag.

6Magbaawai maach Por Jesuu magjim aajem amag:

—Pãrau khĩirjuawai chadcha Ẽwandam jua theeg sim khaphʉnaa pãachdeu nem mag abarmjo apiju khĩirjunaata nem waukhiin, Ẽwandam athee chan phithurm nem chukhu aajeewai, chadcha pãachdeu jajaaukhampierr ich mag pãachdeu jaau nʉmjo ajugui ajim anʉm. Pãar khĩirjug oojem anaa chi pomag mostaza daudam ar maach dau ee paba khitaajemjo khãijã khitakhiin, ar pabʉ pom simʉg wounagamjo, “Jãigmua mawia jũrr achum phũas ee dʉnʉʉubaimá” abaawai, chadcha pãar ipierraa ajugui ajim aajem.

Ẽwandam chogkha simua ¿jãga aju aai sĩ?

7Mag jaaumamua ĩchab magjim aajem: —¿Khaíuta ich chog phidkha sĩi awia barbaicheewai ithũu irig, “Ar pʉ athee ya thach mes gaai thoi kherʉm khobá” aju khai? 8Mag chan ni ãbmuajã iekhabamgui ajim anʉm. Jãan magju khãai warag, “Jopkhaa phiejãb wauwia mʉ jãhogbá, maimua murua nem ig chirʉm thum phedeebá; pʉchin nau mʉ kho dichtarr khur ẽudeechata khoju” a iekhaju. 9¿Pãrau oowai ãbmua ich chognaanau ich ipierraa nem wau nʉm paar “Ʉu ajim” aajẽ? Ʉu ajim chan abam, ich phidag ichdeu nem wauju atarrta wau sĩewai. Irig jaauba akhiinjã ichiita irua waub khaba waujugui ajim anʉm. 10Ich agjoraugui ajim anʉm pãarjã ĩchab: ya Ẽwandamau pãachig nem jaautarr thum wau obaadeewai sĩi warag, “Maachin Ẽwandam chognaanpaiu; ichdeu maachig jaautarrpierrpai waubapʉim” abat a jaaumajim aajem.

Diez kokobé beneu bar khithee arr khʉʉn

11Mag jaau sĩewia, warag Jerusalenag mamua didichagmajim aajem, Samaria durr Galilea durr dʉi ãba thẽu nʉm jãrr khʉdau ma sim ee. 12Mag mamua phobordam pom khaba khitʉm ee dubbaimaawai i khĩirphee õor diez kokobé beneu bar khitheem oberdʉtkhachejim aajem. 13Mag oberdʉtkhachewia warppaimua irig ähäakhamua, —Maestro Jesús, maar apdurrum maar dau aug khaugbahur aajeejim anʉm.

14Ichig dau aphʉʉ mag durrum oobaawai amag, —Jerusalenag ereuwia Aai i jeeujem deg phadnaanag pãach kha theerhʉ̃chpibat ajim anʉm.

Amachig magbaa chadcha i ipierr ereubaadejim aajem. Mag wetumua agtha barba nʉm ee, amach mor oowai kha ajapha magʉm ben chukhu narrjo naajim anaabá. 15Amach mag oobaawai, ãbmua deeu ewag khaphig urumua onee, “Ẽwandam, ĩsin chadau puan mʉ dʉi ʉuta abarm; pʉjo jua theegkham chan mʉg jẽb gaai chukhum” a ijẽjẽbag beejim aajem, ich appai.

16Mag beewi Jesús bʉkhʉrr phõbkha jẽbjã gaai dagau dʉrnaa, “Ʉu ajim” ajim aajem irig, ich monaautarr paar. Chi mag Jesuug ʉu ajim aan beetarr, Samariapierr ajim aajem.

17Magbaawai Jesuu magʉg, —¿Pãar chi monaautarr khʉʉn diez naabajĩ? ¿Jam nʉma ajim anʉm tagam khʉʉn nueve? 18Amach monaautarr paar Ẽwandamag “Ʉu ajim” aju chukhu arrjo, ãba pʉ appaita deeu khitaichebma ajim anʉm, deeum durramkha chirʉmta.

19Maimua ichdeupai mag chi kokobé beneu bar khitarrag, —Phiidʉwia petá ajim anʉm. Mua jaautarr ipierr pʉch odegpai, “Chadcha i ipierraa amʉn mʉ monaauju” a khĩirjutarr gaaimua, ʉu pʉ peerdʉwia monaaujã monaau chirsim ajim aajem irig.

Deeu Jesús mʉg jẽb gaai dʉnʉʉubaichem ed ¿jãga aju khai?

(Mt. 24:23-28,36-41)

20Khãai ãb chi ajapha Moiseeu Ẽwandam iek phã pʉatarr ʉʉrkhaajem khʉʉnau Jesuug, —¿Jãagwaichata mʉg jẽb gaai Ẽwandam maach Porkha sĩeichejuwa? ajierram aajem irig.

Magbaa Jesuu amag magjim aajem: —Ẽwandam ichta chi Porkha sĩeicheju chan oob dau daauta beeju amiet. 21Mua nem wau chirʉm gaaimua pãrau khaphʉ aju aai nʉm, Ẽwandam ya pãach ee sim; magua irua ich jua oopi simgui ajim anaabá, chadcha ichta thum ich iek ʉkha nʉm khʉʉn Porkha sĩeichem khap amkhĩir. Maagwai õrau mʉʉgwaiwe chan, “Mʉgá, ar nʉrrʉ́,” wa “Achum ar sĩ” abajugui ajim anʉm.

22Makhʉʉnag mag jaauwi jũrr ich dʉi ogdʉba wenʉrraajerr khʉʉnagta magjim aajem:

—Mʉg atag pãach appai wenʉrrʉm aig, pãrau mʉch chi Emkhooi Iewaa khĩirjuwia khãaidam ãbpai khãijã ũmaai deeu mʉ dʉi wenʉrram khõsi aju. Mamʉ pod mag wenʉrrabajugui ajim anʉm. 23Mʉg atag õrau pãachig, “Mʉgá, ar nʉrrʉ́, ya beejimwai,” wa magbam khai “Achum sim” aawai, oob ʉkhawia aar oon wetmiet ajim aajem. Magua pãachig nem jaauwaijã oob am iek ʉkhamiet. 24Mʉch chi Emkhooi Iewaa beewain, thumaam khʉʉnauta mʉ oojugui ajim anʉm, ich jãg pagthʉm dau phʉr jẽer athaawai edjã thum arar athaajemjo. Magua õrau mag pãachig ya mʉ barbaichem a jaauwaijã oob ʉkhamiet ajim anʉm. 25Mamʉ magju nawe ichiita mʉ dau aphʉʉ aju aai chirʉmgui ajim anʉm, õor mʉg thʉnʉm khʉʉn jua ee, amachdeuta mʉ kha isee wai wenʉrraawai. 26Mag mʉg atag mʉch chi Emkhooi Iewaa deeu beeju gayaa paawai, jooingar jooi Noé khakhitarr jaar õor dohãdau opäaiwai amachdeu ampierr thʉnaajerrjota thʉnaajugui ajim anʉm ĩchab. 27Mag jooi Noé sim jaar õrau amach okhoojujã khĩirjuba, sĩi phiesta waunaa, thach khowia, dodojo doju, maimua jua pʉrjuuta khĩirju naajim. Am mag thʉnʉm ee, jooi Noeeu ichig Ẽwandamau barco pom waupi jaautarrjo chadcha wau auwia ag ee dubjim. Mag dubbaadeewai dohãd pom beewia sĩi õor pom odubjim anaabá. 28Maimua jooi Lod khachitarr Sodoma phobor ee sĩejeewaim jaarjã ich agjota thʉnaajim ĩchab. Am khĩirjugan, ãba thach khoju, dodojo doju, amachdeu nem khõsimpierr aunaa jũrr amach garmua perju, nem jĩirju maimua di eujupai ajim. Mamʉ mag nʉmjã Ẽwandam gaai khĩirjuju chan aba aajeejim. 29Mamʉ am mag thʉnʉm ee, jooi Lod Sodoma phobor eemua oberbaadeewai ich Ẽwandamau edjã eemua õtdau khĩir khʉipijim. Mag õtdau khĩirta noseg che thʉnʉmjo khʉi thʉnʉisimua õor thumaa phaa khechpʉijim. 30Jãg amachdeu Ẽwandam khĩirjuba thʉnarrjota thʉnaajugui ajim anʉm ĩchab, mʉch chi Emkhooi Iewaa deeu mʉg jẽb gaai dʉnʉʉubaichem edjã.

31Mag jaaumamua ich Jesuupai, —Mag mʉ pierrum ed ãb khãijã ich diheu ʉ̃r jua ʉ̃i sim khai, ich nem phe awaan awia oob tag ierrag dubam ajim anʉm; wa magba ich phidkhaajem aar khãijã sim khai, oob ich diig khaphig beem. 32Khĩir eyaa abat ajim anʉm: ewag oopiba arr ee Lod ũanau sĩi ich nem khĩirjuwia ewag ootarr jũrrpai Ẽwandamau mag ʉʉi thakharag paapʉitarr. 33Ar chi mʉ iek ʉkha sim gaaimua phithurg ãwatmapha sĩi warag “Eeu jãgʉm gaaimua mʉ thõodukham” a khãijã iyʉʉ sim khʉʉn warreta okhoo simgui ajim anʉm. Mamʉ ar chi mʉ iek gaaimuata dau aphʉʉ khãijã abarm wounan chadau ʉ̃gtharcha oberjugui ajim anʉm.

34Mag ich khapeenag jajawagmamua, —Mag mʉ beewai õor numí ãbam put ee naajugui ajim anʉm. Mamʉ mua ãbpai mʉch dʉi arrwia, ãb werpʉaju. 35Ʉʉinjã numí ĩchab ãbam molin gaai ba naaju. Mamʉ mua ãbpai mʉch dʉi arrwia, ãbakhai werpʉajugui ajim anʉm. [ 36Õor numí agjo di chaaur naaju. Mamʉ mua ãbpai mʉch dʉi arrwia, ãbakhai werpʉajugui a jaaumajim aajem.]

37Magbaawai i khapeenau irig, —Señor, cha purua jaau sim, ¿jampaita magju khai? a jeeujierram anʉm.

Magbaa Jesuu amag, —Jampai agá ajujã khaba simgui ajim anʉm. Pãrau khaphʉ nʉm, nemmí sim aig ãkõs ich khĩrau jupcheejem. Ich agjota ajugui ajim anʉm ĩchab muajã mʉch iek ʉkha nʉm khʉʉn dʉi; am phe arraag mʉch beem ed am aigta dau daau urum thumaam khʉʉnau mʉ oojugui ajim anaabá.

Currently Selected:

San Lucas 17: noaA

Highlight

Copy