San Lucas 16

Woun ãb ich khĩirjug khaugau khapkhʉʉn baautarr

1Maimua Jesuu ĩchab mʉg nem ĩgkhaadam ĩgkhajim aajem, ich dʉi ogdʉba wenʉrraajerr khʉʉnag:

—Ãb rik sĩejim aajem. Mamʉ ichdeu ich nem khaugba, deeumʉgta ich nem thum jaau wai sĩejim aajem, magʉgta ich denjo amkhĩir. Mamʉ khãai ãb chi morkhʉʉu ũurwai i nem aair aba parhooba sĩi ichdeu ampierrta wau sim a ũrbaawai, 2thʉ̃rpʉiwia irig magjim anʉm: “¿Khan ajaugta mua ũurwai mag pua bʉ̃ʉrjã mʉ nem aair aba chirʉm anʉ́ma? Mʉ iekhau nauwe jopkhaa pʉchdeu nem waaujem thum phãkhanaa mʉrʉg oopibá” ajim anʉm, “mua khap aag. Mag oopiwia warre pʉdeu sĩiubaad, tag mua pʉ igbam” ajim anʉm ich khĩircha. 3Magbaawai chi rik nem thʉa chirarr wounau khĩirju sĩi awia, ich odegpai, “¿Nau mʉ jãga ajuutaa mʉgbaadema?” ajim anʉm, “mʉg mʉ patronaujã mʉ jʉrbaadem. Sirphʉg ee thuthui dʉi phidkhaju serbiiba chirʉm. Parhooba sĩi atcha kaaijã ee nem jeeu chitaagjã khaba chirʉm” ajim anʉm ichdeupai ichig. 4Maimua ich odegpai, “Ãa, ya mua khĩirju atham” ajim anʉm, “jãga aju mʉch mʉigmua jʉrbapäaiwai õrau amach deg mʉch obeerpimkhĩir.” 5Mag khĩirju auwia chadcha ich patronag debpaar paraa narr khʉʉn ãhãbdo thʉ̃rnaa amag jeeu oomajim aajem. Nacharamʉg, “¿Pua maach patronag kharr paraa chirʉ́?” ajim anʉm. 6Magbaawai warmua, “Muan irig cien latas de aceite paraa chirʉmgui” ajim anʉm. Ichig mag jaaubaawai, “Chadcha pua mag aujim; cha sim ag ẽsap” ajim anʉm. “Mamʉ thʉrreupʉiwia magan jũrr jopkharraa cincuenta lataspai phã sĩubá; mua pʉrʉg jãrrpai jeeukhim” ajim anʉm. 7Maimua ãbakhai paar sĩerragjã agjo, “¿Puajã kharr maach patronag paar chirʉ́?” ajim anʉm. Magbaawai chi debpaar paraa chirarrau, “Mua irig trescientos sacos de arroz paar chirʉm” ajim anʉm. Magbaawai chi khap aag jeeu sĩerrau, “Chadcha pua mag aujimke” ajim anʉm. “Cha sim ag ẽsap” ajim anʉm. “Mamʉ thʉrreupʉiwia jũrr doscientos cincuenta sacospai phã sĩubá” ajim anʉm. 8Magbarm khaug athaawai chi patrón jooirau ich nem aair aba arr woun igwia ich odegpai, “Joo, wounan chadcha khĩirjug khaphʉta chirʉma” ajim anʉm.

Maimua jũrr ich iek ũr narr khʉʉnagta magjim aajem, ich Jesuu: —Chadcha Ẽwandam iek ʉkhamaaugau amach khõchagpierr wenʉrraajem khʉʉnta Ẽwandam iek ajapha ʉkha khitheem khʉʉn khãyaujã khĩir ubʉcha sĩerrjeemgui ajim anʉm, amach gar õor thereu awaag. 9Pãade ũrbat. Phatkhonan chadcha nem parhoobam wau nʉmua ganwia nem khaigbam atheejã iigjem. Mag sĩeb mamʉ, pãach phatkhon aauwai õordam dʉi nem ajapha wau nʉmuata am dʉi khapeen khabat ajim anʉm. Maagwai pãach meebarm ed mʉg jẽb gayam nem tag igba aadeewai jũrr ʉ̃gtharjã makhʉʉn dʉita nʉisiju, Ẽwandamau pãach ʉdʉraa obeerpibaawai. 10Woun ãbmua nemdam bʉ̃rʉʉm awia khãijã ajapha ʉʉrkha simʉn, magan nem dʉrrʉʉm awiajã ich mag ajapha irua wai nʉrraju. Mamʉ nem bʉ̃rʉʉm awia agʉg oomaphamjo warag ʉdʉraa ãrpi simʉn, magan nem dʉrrʉʉm chará sĩi ãrpijugui ajim anʉm. 11Mʉg jẽb gaai Ẽwandamau pãachig nem deetarrdampaijã ajapha ʉʉrkhaa meraa nʉmʉn, ¿jãga ich aram nem ajapcharam irua pãrag deebarju? Deebamgui ajim anʉm. 12Chikham nemjã pãrau ajapha ʉʉrkhaba nʉm chan, ¿khaíu pãrag okhar nem jʉ̃apiju arr khãijã jʉ̃apibarju? Jʉ̃apíbamgui ajim anʉm. 13Ni ãbmuajã pod patronnaan numiim khʉʉn chogkhaju khaba simgui ajim anʉm. Patronnaan numí akhiin, iwiir ãbpaita ʉ̃rcha kha khõsi aju. Ich agjota simgui ajim anʉm ĩchab Ẽwandam dʉijã. Pod pãrau Ẽwandam khĩrag wʉrpanaa phatkhonagjã wʉrpa aju khaba nʉm. Pãar magta nʉm chan pod Ẽwandam ipierraa khaba nʉmgui ajim anʉm.

14Mamʉ ĩchab aig fariseonaan phatkhon athee bĩe khitheem khʉʉnaupa chi Jesuu iekhamam ũr narr aawai warag i wau iekha naajim aajem. 15Magbaawai Jesuu amag iekhamamua, —Pãran, pãachta ʉ̃rcha phatkhon wai nʉm awia Ẽwandam dau najã ʉucha nʉm aajeebma; mamʉ chadcha Ẽwandamauta pãar thãar khaphʉ simgui ajim anʉm. Mʉg jẽb gayam khʉʉnaun phatkhonta nem thum mʉg jẽb gaai thʉnʉm khãyau ajapcha sim awia agʉgta ee aajerram. Amag mag nem wajaug sĩeb mamʉ, agua nem khaigba waauwaita sĩi odomie sẽrkha thʉnʉmjo Ẽwandamau khõchkhaba aajemgui ajim anʉm.

Warrgarm ley ich mag sĩerrʉm

16Mag nem jajawagmamua ĩchab ich iek ũr narr khʉʉnag Jesuu magjim aajem: —Juan õor por choomieu Ẽwandam i jaauju naweran pãrau Moiseeu iek phã pʉatarr dʉi Ẽwandam i jaaumienau ẽsap phãtarrpai wai naajimgui ajim anʉm, ag gaai jaau sim ipierr wenʉrraag. Mamʉ Juanau iek iiur Ẽwandam aar obeerpiejemta wai beejimgui ajim anʉm, chi wajapcharam. Mag jaauchetarr aigmua atag mag Ẽwandamta chi Porkhaimʉʉ sim khaug athampierr, ĩsta õor pom i ipierraa am ig nʉm, chadcha amach Porkhabaadeewai i dʉi naam khõchgau. 17Mag iek iiur wai naab mamʉ, jooingar Ẽwandamau Moiseeg ich iek phãpitarran ich warr sĩejerr agtha ich mag serbii sĩerrʉmgui ajim anʉm. Mʉg durr thum edjãpa chugpawiajã jooingarwe phã pʉatarr iek chan bʉdam ãbjã okhoobamgui ajim anʉm.

18’Magua ĩsjã warrgarmjo dich ʉʉi isegwia deeum ʉʉi aumʉn pekauta wau simgui ajim anʉm; wa deeumua ʉʉi pʉatarr khãijã aumʉn magan agjo pekauta wau simgui ajim anʉm.

Woun ãb aphʉʉ khitarr rik dʉi

19Maimua ĩchab mʉg nem ĩgkhaadam jaaujim aajem Jesuu: —Woun ãb sĩejim aajem, rik. Maan sĩi khajũa parhẽpagkham apphata jũajeejim aajem. Maimua mag nʉm dʉi ed eepierr sĩi nemkhoo jaramjota thachjã wau khoojeejim aajem. 20Mamʉ ĩchab woundam aphʉʉ khitʉm Lázaro a thʉ̃r sim sĩejim aajem, sĩi phĩe kha dodoso khitʉm. Mag khitʉmʉn sĩi chi rik puertdi bigaau õor bʉ eeta oo kheraajeejim anʉm. 21Mag kherʉmʉn jãsogau chi rik thach kho sim mes eegar pan perasdam khʉimam khom khõchag kherʉm ee, saakienauta i phĩedau sẽcheejeejim aajem. 22Mag khitʉʉ awia chi aphʉʉ khitarrdam meejim aajem. Mag meebaadeewai Ẽwandam chognaan beewia sĩi i akhaardam ʉ̃gthar Abrán sim aar arrjierram aajem. Mag khur chi rikjã ĩchab meebaadeewai bep sĩuwia khĩmie durrta oberjim aajem. 23Maimua ya khĩmie durrpanaa maach gaai machag ãwatbajujo thʉnʉmua ʉ̃gthaag oowai dau warpha Lazarota Abrán bigaau khõinaa päar sim oo athajim anʉm, chi rik arrau. 24Magbaawai mammua thet, “Jooi Abrán, mʉ ap chitʉm mʉ dau aug khaugbáa” ajim anʉm. “Lázaro jĩgpirdam gaaipai khãijã dodamau omnaa mʉ aar pʉibapʉʉi. Ya mʉʉn o jʉʉumaam. Õt khierr pechag mʉg thʉnʉmjã mua ãwatbajujota thʉnʉʉmgui” ajim anʉm ähäakhamua. 25Mamʉ magbaawai jooi Abranau irig magjim anʉm warag: “Khĩir eyaa ajuma” ajim anʉm, “pʉch monakha aawai nem khĩir thum paraanaa bʉ̃ʉrjã augcheba chitarr. Maagwai Lázaro bʉ̃ʉrjã magʉm chukhu i dau aphʉʉ khamor masi kherʉmjã pua irig ooba aajeejim. Mamʉ ĩs mʉig i khõinaa bibigag chukhu chirʉm. Jãigta khĩirjujuma ajim anʉm, jãgwia jũrr ĩs pʉ idawaa chirʉ́, õt khierr pechag ee. 26Pua mag chirab mamʉ, pʉ aar pod mua Lázaro pʉibamgui ajim anʉm. Magnaa maach jãrr mʉg do khõrg sĩi jẽb ithurm jaaba wejomjo sim ee ¿jãga i maju? Jammuajã pod beeju khaba, ni maumuajã pod maju khabamgui” ajim anʉm jooi Abranau. 27Magbaawai chi rik arrau warag chaigpa khitʉmua jooi Abranag, “Magan jũrr mʉ aai di aarta i chogbapʉi” ajim anʉm, 28“mʉ khod ãbam khʉʉn cinco phe wai chirʉm aar, mʉ mʉg chirʉm jaaubaimaawai amach khaibag isegwia khĩirjug ajapham aumkhĩir, magbaawai am meem edjã mʉjo mʉgʉm aar gaai machag ãwataan beem ugua” ajim anʉm, chi rik arrau. 29Magbaawai Abranau irig, “Mamʉ amau Ẽwandam iek wai naabahab, Moiseeu chi Ẽwandam i jaaumien dʉimua phã pʉatarr. Amau mag gaai jaau sĩsidʉmta ipierraa aju aai naabahab” ajim anʉm, “pʉ sim aar wetmapha nʉmʉn.” 30Magbaawai chi khĩmie durr simua magjim anʉm: “Ʉ̃hʉ̃, mag khabam jooi Abrán. Sĩi phã sim gaaipai chan amau ʉkhabam. Mamʉ ãb meetarrta deeu am aar oberimawia amag jaauwimakhiin chadau, warre amau amach khaibag isegjurau” ajim anʉm. 31Magbaawai Abranau irig magjim aajem: “Mamʉ amau mag Ẽwandam iek chi phãm wai nʉm gaai jaau sim ʉkhaba nʉm chan, magan ãb meewia deeu iiu phiidʉwia amag jawaan makhiinjã, amau ʉkhabajugui” ajim aajem, chi rik arrag.

Currently Selected:

San Lucas 16: noaA

Highlight

Copy