ܡܙܡܘܪܐ 7
7
ܫܸܓܝܘܿܢ ܕܕܘܝܕ، ܗ̇ܘ ܕܙܡܝܪܗ ܠܡܪܝܐ ܥܠ ܟܘܫ ܒܢܝܡܝܢܝܐ.
1ܝܵܐ ܡܵܪܝܵܐ ܐܲܠܵܗܝܼ، ܒܝܼܘܼܟ݂ ܫܩܝܼܠ ܠܝܼ ܓܵܘܣܵܐ،
ܦܲܪܸܩ ܠܝܼ ܡ̣ܢ ܟܠܵܝܗܝ ܪ̈ܵܕܘܿܦܝܼ ܘܦܲܨܝܼ ܠܝܼ.
2ܠܵܐ ܗܵܘܹܐ ܕܐܲܝܟ݂ ܐܲܪܝܵܐ ܦܲܪܦܸܛ ܠܵܗ̇ ܓܵܢܝܼ،
ܦܵܪܹܛ ܟܲܕ ܠܲܝܬ ܦܲܨܝܵܢܵܐ.
3ܝܵܐ ܡܵܪܝܵܐ ܐܲܠܵܗܝܼ، ܐܸܢ ܥܒ݂ܝܼܕ ܠܝܼ ܐܵܗܵܐ،
ܐܸܢ ܐܝܼܬ ܥܵܘܠܵܐ ܒܐܝܼܕܝܼ̈؛
4ܐܸܢ ܦܪܝܼܥ ܠܝܼ ܒܝܼܫܬܵܐ ܠܡ̇ܢ ܕܝܼܠܹܗ ܒܫܠܵܡܵܐ ܥܲܡܝܼ،
ܘܣܠܝܼܒ ܠܝܼ ܠܕܲܠܩܘܼܒ݂ܠܵܝܝܼ ܒܠܵܐ ܥܸܠܬܵܐ؛
5ܫܒ݂ܘܿܩ ܢܵܦܹܠ ܕܸܫ̃ܡܸܢ ܒܵܬܪ ܓܵܢܝܼ ܘܡܵܛܹܐ ܥܲܠܝܼ،
ܘܕܲܫܕܸܫ ܠܐܲܪܥܵܐ ܚܲܝܝܼ̈،
ܘܡܲܬܸܒ݂ ܠܥܲܦܪܵܐ ܐܝܼܩܵܪܝܼ.ܣܹܠܵܗ
6ܩܘܼܡ، ܝܵܐ ܡܵܪܝܵܐ، ܒܟܲܪܒܘܼܟ݂،
ܡܲܪܸܡ ܓܵܢܘܼܟ݂ ܥܲܠ ܚܸܡܬܵܐ ܕܕܸܫ̃ܡܸܢܝܼ̈،
ܘܪܥܘܿܫ ܒܘܼܬ ܕܝܼܝܼ ܒܕܝܼܘܵܢ ܕܦܩܝܼܕܵܐ ܝܘܸܬ،
7ܘܫܒ݂ܘܿܩ ܟܸܢܫܵܐ ܕܐܸܡܘܵܬܹ̈ܐ ܓ̰ܵܡܥܝܼ ܚܵܕܸܪ̈ܘܵܢܘܼܟ݂،
ܘܝܬܘܿܒ݂ ܥܲܠܵܝܗܝ ܕܲܝܵܢܵܐ ܡ̣ܢ ܪܵܘܡܵܐ.
8ܡܵܪܝܵܐ ܟܹܐ ܕܵܐܹܢ ܠܥܲܡܡܹ̈ܐ،
ܥܒ݂ܘܿܕ ܠܵܗ̇ ܕܝܼܘܵܢܝܼ، ܝܵܐ ܡܵܪܝܵܐ، ܐܲܝܟ݂ ܙܲܕܝܼܩܘܼܬܝܼ ܘܐܲܝܟ݂ ܬܲܡܝܼܡܘܼܬܵܐ ܕܐܝܼܬ ܒܝܼܝܼ.
9ܗܵܐ، ܫܒ݂ܘܿܩ ܬܵܝܡܵܐ ܒܝܼܫܬܵܐ ܕܪ̈ܲܫܝܼܥܹܐ، ܘܡܲܩܘܝܼ ܠܙܲܕܝܼܩܵܐ؛
ܝܵܐ ܒܵܚܪܵܢܵܐ ܕܠܸܒܵܘܵܬܹ̈ܐ ܘܪܸ̈ܥܝܵܢܹܐ، ܐܲܠܵܗܵܐ ܙܲܕܝܼܩܵܐ.
10ܡܵܛܵܠܝܼ ܝܠܹܗ ܥܲܡ ܐܲܠܵܗܵܐ،
ܦܲܪܩܵܢܵܐ ܕܬܪ̈ܘܼܨܹܐ ܕܠܸܒܵܐ.
11ܕܲܝܵܢܵܐ ܙܲܕܝܼܩܵܐ ܝܠܹܗ ܐܲܠܵܗܵܐ،
ܘܓܵܘ ܚܸܡܬܵܐ ܝܠܹܗ ܐܲܠܵܗܵܐ ܟܠ ܝܘܿܡ.
12ܐܸܢ ܠܵܐ ܬܲܘܸܒ ܐܢܵܫܵܐ، ܣܲܝܦܹܗ ܒܸܬ ܡܲܚܪܸܦ ܠܹܗ ܐܲܠܵܗܵܐ،
ܩܸܫܬܹܗ ܡܬܝܼܚܘܼܗ̇ ܝܠܹܗ ܘܗܘܼܕܪܘܼܗ̇.
13ܘܙܲܝܢܹ̈ܐ ܕܡܵܘܬܵܐ ܗܘܼܕܪܵܝ ܠܹܗ ܐܸܠܹܗ،
ܓܹܐܪ̈ܘܼܗܝ ܥܒ݂ܝܼܕܵܝ ܠܵܗܝܵܢܹ̈ܐ.
14ܗܵܐ، ܪܲܫܝܼܥܵܐ ܟܹܐ ܕܵܒܹܩ ܚܸܒ݂ܠܹ̈ܐ ܕܥܵܘܠܵܐ،
ܘܟܹܐ ܒܵܛܹܢ ܐܘܼܠܨܵܢܵܐ، ܘܝܵܠܹܕ ܦܸܠܡܵܐ.
15ܒܹܐܪܵܐ ܟܹܐ ܥܵܩܹܪ ܘܚܵܦܹܪ،
ܘܢܵܦܹܠ ܒܓܘܼܒܵܐ ܕܬܘܼܪܸܨ ܠܹܗ.
16ܐܘܼܠܨܵܢܹܗ ܒܪܹܝܫܹܗ ܒܸܬ ܕܵܐܹܪ،
ܘܛܠܘܼܡܝܹܗ ܠܩܲܪܩܲܦܬܹܗ ܒܸܬ ܨܵܠܹܐ.
17ܒܸܬ ܫܲܟܪܸܢ ܠܡܵܪܝܵܐ ܐܲܝܟ݂ ܙܲܕܝܼܩܘܼܬܹܗ،
ܘܒܸܬ ܙܵܡܪܹܢ ܫܸܡܵܐ ܕܡܵܪܝܵܐ ܥܸܠܵܝܵܐ.
Currently Selected:
ܡܙܡܘܪܐ 7: aii
Highlight
Share
Copy
Want to have your highlights saved across all your devices? Sign up or sign in
© 2014, Aramaic Bible Translation, Inc. All rights reserved.