ܝܘܚܢܢ 20

ܩܝܵܡܬܵܐ ܕܝܼܫܘܿܥܡ̣ܢ ܓܵܘ ܡܝܼܬܹ̈ܐ

ܡܬܝ 28‏:1‏‐10؛ ܡܪܩܘܣ 1‏:8‏‐16؛ ܠܘܩܐ 24‏:1‏‐12

1ܒܨܲܦܪܵܐ ܕܚܲܕܒܫܲܒܵܐ، ܗܹܫ ܚܸܫܟܵܐ، ܐ݇ܬܹܐ ܠܵܗ̇ ܡܲܪܝܲܡ ܡܲܓ݂ܕܠܵܝܬܵܐ ܠܩܲܒ݂ܪܵܐ ܘܚܙܹܐ ܠܵܗ̇ ܟܹܐܦܵܐ ܡܘܼܚܕܸܪܵܐ ܡ̣ܢ ܦܘܼܡܵܐ ܕܩܲܒ݂ܪܵܐ. 2ܪܚܝܼܛ ܠܵܗ̇ ܠܟܸܣ ܫܸܡܥܘܿܢ ܟܹܐܦܵܐ ܘܠܟܸܣ ܗ̇ܘ ܬܲܠܡܝܼܕܵܐ ܐ݇ܚܹܪ݇ܢܵܐ ܕܡܲܚܸܒ ܗ݇ܘܵܐ ܠܹܗ ܝܼܫܘܿܥ، ܘܐ݇ܡܝܼܪܵܗ̇ ܐܸܠܲܝܗܝ، ”ܫܩܝܼܠ ܠܗܘܿܢ ܡܵܪܲܢ ܡ̣ܢ ܩܲܒ݂ܪܵܐ، ܘܠܹܐ ܝܘܲܚ ܒܝܼܕܵܥܵܐ ܐܲܝܟܵܐ ܝܢܵܐ ܡܘܼܬܒܹܗ.“ 3ܦܠܝܼܛ ܠܗܘܿܢ ܫܸܡܥܘܿܢ ܟܹܐܦܵܐ ܘܗ̇ܘ ܬܲܠܡܝܼܕܵܐ ܐ݇ܚܹܪ݇ܢܵܐ ܘܐ݇ܙܝܼܠ ܠܗܘܿܢ ܠܩܲܒ݂ܪܵܐ. 4ܬܸܪܘܲܝܗܝ ܪܚܝܼܛ ܠܗܘܿܢ ܡܥܘܼܕܵܠܹ̈ܐ. ܐܝܼܢܵܐ ܗ̇ܘ ܬܲܠܡܝܼܕܵܐ ܐ݇ܚܹܪ݇ܢܵܐ ܪܚܝܼܛ ܠܹܗ ܡ̣ܢ ܩܵܕ݇ܡ ܫܸܡܥܘܿܢ ܟܹܐܦܵܐ، ܘܡܛܹܐ ܠܹܗ ܩܵܕ݇ܡܵܝܵܐ ܠܩܲܒ݂ܪܵܐ. 5ܟܝܼܦ ܠܹܗ ܘܚܙܹܐ ܠܹܗ ܟܸܬܵܢܹ̈ܐ ܡܘܼܬܒܹܐ، ܐܝܼܢܵܐ ܠܵܐ ܥܒ݂ܝܼܪܹܗ ܓܵܘ ܩܲܒ݂ܪܵܐ. 6ܐ݇ܬܹܐ ܠܹܗ ܡ̣ܢ ܒܵܬ݇ܪ ܡܸܢܹܗ ܫܸܡܥܘܿܢ ܟܹܐܦܵܐ. ܥܒ݂ܝܼܪܹܗ ܓܵܘ ܩܲܒ݂ܪܵܐ ܘܚܙܹܐ ܠܹܗ ܟܸܬܵܢܹ̈ܐ ܡܘܼܬܒܹܐ، 7ܘܝܵܠܸܚܬܵܐ ܕܝܼܗ݇ܘܵܐ ܒܪܹܫܹܗ ܠܹܐ ܝܗ݇ܘܵܐ ܡܘܼܬܸܒ݂ܬܵܐ ܥܲܡ ܟܸܬܵܢܹ̈ܐ، ܐܸܠܵܐ ܟܘܼܪܡܸܟ݂ܬܵܐ ܒܢܲܦ̮ܫܘܼܗ̇ ܒܚܕܵܐ ܕܘܼܟܵܐ ܐ݇ܚܹܪ݇ܬܵܐ. 8ܗ̇ܝܓܵܗ ܥܒ݂ܝܼܪܹܗ ܐܘܼܦ ܗ̇ܘ ܬܲܠܡܝܼܕܵܐ ܐ݇ܚܹܪ݇ܢܵܐ ܕܡܸܛܝܵܐ ܝܗ݇ܘܵܐ ܩܵܕ݇ܡܵܝܵܐ ܠܩܲܒ݂ܪܵܐ. ܚܙܹܐ ܠܹܗ ܘܗܘܼܡܸܢܹܗ، 9ܣܵܒܵܒ ܗܹܫ ܠܹܐ ܝܵܕܥܝܼ ܗ݇ܘܵܘ ܡ̣ܢ ܟܬܵܒܹ̈ܐ ܕܘܵܠܹܐ ܝܗ݇ܘܵܐ ܕܩܵܐܹܡ ܗ݇ܘܵܐ ܝܼܫܘܿܥ ܡ̣ܢ ܓܵܘ ܡܝܼܬܹ̈ܐ. 10ܗ̇ܝܓܵܗ ܕܝܼܪܗܘܿܢ ܐܵܢܝܼ ܬܲܠܡܝܼ̈ܕܹܐ ܠܒܲܝܬܲܝܗܝ.

ܝܼܫܘܿܥ ܦܝܵܫܵܐ ܚܸܙܝܵܐ ܠܡܲܪܝܲܡ ܡܲܓ݂ܕܠܵܝܬܵܐ

ܡܪܩܘܣ 16‏:9‏‐11

11ܡܲܪܝܲܡ ܡܲܓ݂ܕܠܵܝܬܵܐ ܟܠܝܼܬܵܐ ܝܗ݇ܘܵܐ ܠܒܲܕܲܪ ܡ̣ܢ ܩܲܒ݂ܪܵܐ ܒܸܒܟ݂ܵܝܵܐ. ܟܲܕ ܗܹܫ ܒܸܒܟ݂ܵܝܵܐ، ܟܝܼܦ ܠܵܗ̇ ܘܚܝܼܪܵܗ̇ ܓܵܘ ܩܲܒ݂ܪܵܐ، 12ܘܚܙܹܐ ܠܵܗ̇ ܬܪܹܝ ܡܲܠܲܐܟܹ̈ܐ ܒܠܒ݂ܝܼܫܬܵܐ ܚܘܵܪܬܵܐ ܝ݇ܬܝܼܒܹܐ ܐܲܝܟܵܐ ܕܦܝܼܫܵܐ ܝܗ݇ܘܵܐ ܡܘܼܬܒ݂ܵܐ ܦܲܓ݂ܪܵܐ ܕܝܼܫܘܿܥ، ܚܲܕ ܠܟܸܣ ܪܹܫܹܗ ܘܚܲܕ ܠܟܸܣ ܐܲܩܠܵܬܹ̈ܗ. 13ܒܘܼܩܸܪܗܘܿܢ ܡܸܢܘܼܗ̇، ”ܒܲܟ݂ܬܵܐ، ܩܵܡܘܿܕܝܼ ܒܸܒܟ݂ܵܝܵܐ ܝܘܲܬܝ؟“ ܓ̰ܘܼܘܸܒ ܠܵܗ̇، ”ܫܩܝܼܠ ܠܗܘܿܢ ܡܵܪܝܼ، ܘܠܹܐ ܝܘܵܢ ܒܝܼܕܵܥܵܐ ܐܲܝܟܵܐ ܝܢܵܐ ܡܘܼܬܒܹܗ.“ 14ܟܲܕ ܐ݇ܡܝܼܪܵܗ̇ ܐܵܗܵܐ، ܕܝܼܪܵܗ̇ ܠܒܵܬ݇ܪܘܼܗ̇، ܘܚܙܹܐ ܠܵܗ̇ ܝܼܫܘܿܥ ܟܸܠܝܵܐ، ܐܝܼܢܵܐ ܠܵܐ ܝ݇ܕܝܼܥ ܠܵܗ̇ ܕܝܼܫܘܿܥ ܝܗ݇ܘܵܐ. 15ܐ݇ܡܝܼܪܹܗ ܐܸܠܘܼܗ̇ ܝܼܫܘܿܥ، ”ܒܲܟ݂ܬܵܐ، ܩܵܡܘܿܕܝܼ ܒܸܒܟ݂ܵܝܵܐ ܝܘܲܬܝ؟ ܠܡܵܢܝܼ ܒܸܛܥܵܝܵܐ ܝܘܲܬܝ؟“ ܘܗ̇ܝ ܚܫܝܼܒ݂ ܠܵܗ̇ ܕܓܲܢܵܢܵܐ ܝܗ݇ܘܵܐ، ܐ݇ܡܝܼܪܵܗ̇ ܐܸܠܹܗ، ”ܡܵܪܝܼ، ܐܸܢ ܐܲܢ݇ܬ ܫܩܝܼܠ ܠܘܼܟ݂ ܐܸܠܹܗ، ܐ݇ܡܘܿܪ ܐܸܠܝܼ ܐܲܝܟܵܐ ܡܘܼܬܒܹܗ ܝܘܸܬ، ܘܐܵܢܵܐ ܒܸܬ ܫܵܩܠܵܢܹܗ.“ 16ܐ݇ܡܝܼܪܹܗ ܐܸܠܘܼܗ̇ ܝܼܫܘܿܥ، ”ܡܲܪܝܲܡ.“ ܕܝܼܪܵܗ̇ ܡܲܪܝܲܡ ܘܐ݇ܡܝܼܪܵܗ̇ ܐܸܠܹܗ ܒܠܸܫܵܢܵܐ ܥܸܒ݂ܪܵܝܵܐ، ”ܪܲܒܘܿܢܝܼ،“ ܒܡܲܥܢܵܝܵܐ ܕܡܲܠܦܵܢܵܐ. 17ܐ݇ܡܝܼܪܹܗ ܐܸܠܘܼܗ̇ ܝܼܫܘܿܥ، ”ܠܵܐ ܕܵܩܪܲܬܝ ܒܝܼܝܼ، ܣܵܒܵܒ ܗܹܫ ܠܹܐ ܝܘܸܢ ܐ݇ܣܝܼܩܵܐ ܠܟܸܣ ܒܵܒܝܼ. ܐܝܼܢܵܐ ܙܹܠ݇ܝ ܠܟܸܣ ܐܲܚܘܿܢܘܵܬܝܼ̈ ܘܐ݇ܡܘܿܪܝ ܐܸܠܲܝܗܝ ܕܒܹܐܣܵܩܵܐ ܝܘܸܢ ܠܟܸܣ ܒܵܒܝܼ ܘܒܵܒܵܘܟ݂ܘܿܢ، ܘܠܟܸܣ ܐܲܠܵܗܝܼ ܘܐܲܠܵܗܵܘܟ݂ܘܿܢ.“ 18ܗ̇ܝܓܵܗ ܐ݇ܬܹܐ ܠܵܗ̇ ܡܲܪܝܲܡ ܡܲܓ݂ܕܠܵܝܬܵܐ ܘܐ݇ܡܝܼܪܵܗ̇ ܠܬܲܠܡܝܼ̈ܕܹܐ، ”ܚܙܹܐ ܠܝܼ ܠܡܵܪܲܢ.“ ܘܐ݇ܡܝܼܪܵܗ̇ ܐܸܠܲܝܗܝ ܡܘܿܕܝܼ ܐ݇ܡܝܼܪܹܗ ܐܸܠܘܼܗ̇ ܡܵܪܲܢ.

ܝܼܫܘܿܥ ܦܝܵܫܵܐ ܚܸܙܝܵܐ ܒܬܲܠܡܝܼ̈ܕܹܐ

ܡܬܝ 28‏:16‏‐20؛ ܡܪܩܘܣ 16‏:14‏‐18؛ ܠܘܩܐ 24‏:36‏‐49

19ܒܪܲܡܫܵܐ ܕܗ̇ܘ ܝܵܘܡܵܐ، ܕܝܼܗ݇ܘܵܐ ܚܲܕܒܫܲܒܵܐ، ܟܲܕ ܬܲܪ̈ܥܵܢܹܐ ܕܒ݂ܝܼܪܹܐ ܐܲܝܟܵܐ ܕܓ̰ܡܝܼܥܹܐ ܝܗ݇ܘܵܘ ܬܲܠܡܝܼ̈ܕܹܐ ܡ̣ܢ ܙܕܘܼܥܬܵܐ ܕܝܗܘܼܕܵܝܹ̈ܐ، ܐ݇ܬܹܐ ܠܹܗ ܝܼܫܘܿܥ ܘܟܠܹܐ ܠܹܗ ܓܵܘܲܝܗܝ ܘܐ݇ܡܝܼܪܹܗ، ”ܫܠܵܡܵܐ ܐܸܠܵܘܟ݂ܘܿܢ.“ 20ܡ̣ܢ ܒܵܬ݇ܪ ܕܐ݇ܡܝܼܪܹܗ ܐܵܗܵܐ، ܡܘܼܚܙܹܐ ܠܹܗ ܐܸܠܲܝܗܝ ܐܝܼܕܵܬܹ̈ܗ ܘܕܸܦܢܹܗ. ܘܦܨܝܼܚ ܠܗܘܿܢ ܪܵܒܵܐ ܬܲܠܡܝܼ̈ܕܹܐ ܕܚܙܹܐ ܠܗܘܿܢ ܠܡܵܪܲܢ. 21ܡܸܢܕܪܸܫ ܐ݇ܡܝܼܪܹܗ ܐܸܠܲܝܗܝ، ”ܫܠܵܡܵܐ ܐܸܠܵܘܟ݂ܘܿܢ. ܕܵܐܟ݂ܝܼ ܕܫܘܼܕܸܪܹܗ ܒܵܒܵܐ ܐܸܠܝܼ ܐܘܼܦ ܐܵܢܵܐ ܫܲܕܘܼܪܵܘܟ݂ܘܿܢ ܝܼܘܸܢ.“ 22ܟܲܕ ܐ݇ܡܝܼܪܹܗ ܐܵܗܵܐ، ܢܦܝܼܚ ܠܹܗ ܒܝܼܲܝܗܝ ܘܐ݇ܡܝܼܪܹܗ، ”ܩܲܒܠܘܼܢ ܪܘܼܚܵܐ ܕܩܘܼܕܫܵܐ. 23”ܐܸܢ ܦܲܚܠܝܼܬܘܿܢ ܠܐ݇ܢܵܫܹ̈ܐ ܚܛܝܼܵܬܲܝ̈ܗܝ، ܒܸܬ ܦܵܝܫܝܼ ܦܘܼܚܠܹܐ ܐܸܠܲܝܗܝ، ܘܐܸܢ ܠܵܐ ܦܲܚܠܝܼܬܘܿܢ ܠܐ݇ܢܵܫܹ̈ܐ ܚܛܝܼܵܬܲܝ̈ܗܝ، ܠܹܐ ܦܵܝܫܝܼ ܦܘܼܚܠܹܐ ܐܸܠܲܝܗܝ.“

ܝܼܫܘܿܥ ܦܝܵܫܵܐ ܚܸܙܝܵܐ ܠܬܐܘܿܡܵܐ

24ܬܐܘܿܡܵܐ، ܚܲܕ ܡ̣ܢ ܬܪܸܥܣܲܪ ܕܟܹܐ ܦܵܐܹܫ ܗ݇ܘܵܐ ܩܸܪܝܵܐ ܓ̰ܲܡܵܐ، ܠܹܐ ܝܗ݇ܘܵܐ ܥܲܡ ܬܲܠܡܝܼ̈ܕܹܐ ܐܝܼܡܲܢ ܕܐ݇ܬܹܐ ܠܹܗ ܝܼܫܘܿܥ ܠܟܸܣ ܠܲܝܗܝ. 25ܐ݇ܡܝܼܪܗܘܿܢ ܐܸܠܹܗ ܬܲܠܡܝܼ̈ܕܹܐ ܐ݇ܚܹܪ̈݇ܢܹܐ، ”ܚܙܹܐ ܠܲܢ ܠܡܵܪܲܢ.“ ܘܗ̇ܘ ܓ̰ܘܼܘܸܒ ܠܹܗ، ”ܐܸܢ ܠܵܐ ܚܵܙܹܝܢ ܒܓܵܢܝܼ ܫܵܘܦܵܦܹ̈ܐ ܕܡܝܼܚܹ̈ܐ ܓܵܘ ܐܝܼܕܵܬܹ̈ܗ ܘܡܲܬܒܸܢ ܨܸܒܥܵܬܝܼ̈ ܓܵܘܲܝܗܝ ܘܦܲܫܛܸܢ ܐܝܼܕܝܼ ܒܕܸܦܢܹܗ، ܠܹܐ ܗܲܡܸܢܸܢ.“ 26ܡ̣ܢ ܒܵܬ݇ܪ ܬܡܵܢܝܵܐ ܝܵܘܡܵܢܹ̈ܐ، ܡܸܢܕܪܸܫ ܓ̰ܡܝܼܥܹܐ ܝܗ݇ܘܵܘ ܬܲܠܡܝܼܕܘܼ̈ܗܝ ܠܓܵܘܵܐ، ܘܬܐܘܿܡܵܐ ܥܲܡܲܝܗܝ. ܟܲܕ ܬܲܪ̈ܥܵܢܹܐ ܕܒ݂ܝܼܪܹܐ، ܐ݇ܬܹܐ ܠܹܗ ܝܼܫܘܿܥ ܘܟܠܹܐ ܠܹܗ ܓܵܘܲܝܗܝ ܘܐ݇ܡܝܼܪܹܗ ܐܸܠܲܝܗܝ، ”ܫܠܵܡܵܐ ܐܸܠܵܘܟ݂ܘܿܢ.“ 27ܘܐ݇ܡܝܼܪܹܗ ܠܬܐܘܿܡܵܐ، ”ܡܲܬܸܒ݂ ܨܸܒܥܘܼܟ݂ ܠܐܲܟ݂ܵܐ ܘܚܙܝܼ ܐܝܼܕܵܬܝܼ̈، ܦܲܫܸܛ ܐܝܼܕܘܼܟ݂ ܘܡܲܬܸܒ݂ ܒܕܸܦܢܝܼ، ܘܠܵܐ ܗܵܘܹܝܬ ܠܵܐ ܡܗܘܼܡܢܵܐ، ܐܸܠܵܐ ܡܗܘܼܡܢܵܐ.“ 28ܓ̰ܘܼܘܸܒ ܠܹܗ ܬܐܘܿܡܵܐ ܘܐ݇ܡܝܼܪܹܗ ܐܸܠܹܗ، ”ܡܵܪܝܼ ܘܐܲܠܵܗܝܼ.“ 29ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܣܵܒܵܒ ܚܙܹܐ ܠܘܼܟ݂ ܐܸܠܝܼ ܗܘܼܡܸܢܘܼܟ݂؟ ܛܘܼܒ݂ܵܐ ܠܐܵܢܝܼ ܕܠܵܐ ܚܙܹܐ ܠܗܘܿܢ ܐܸܠܝܼ ܘܗܘܼܡܸܢܗܘܿܢ.“

ܢܝܼܫܵܐ ܕܐܵܗܵܐ ܟܬܵܒ݂ܵܐ

30ܪܵܒܵܐ ܢܝܼܫܲܢܩܹ̈ܐ ܐ݇ܚܹܪ̈݇ܢܹܐ ܥܒ݂ܝܼܕ ܠܹܗ ܝܼܫܘܿܥ ܩܵܕ݇ܡ ܥܲܝܢܹ̈ܐ ܕܬܲܠܡܝܼ̈ܕܹܐ، ܐܲܝܢܝܼ ܕܠܹܐ ܝܢܵܐ ܟܬܝܼܒܹܐ ܓܵܘ ܕܐܵܗܵܐ ܟܬܵܒ݂ܵܐ. 31ܐܝܼܢܵܐ ܐܲܢܹܐ ܦܝܼܫܹܐ ܝܢܵܐ ܟܬܝܼܒܹܐ ܕܗܲܡܸܢܝܼܬܘܿܢ ܕܝܼܫܘܿܥ ܝܼܠܹܗ ܡܫܝܼܚܵܐ، ܒܪܘܿܢܵܐ ܕܐܲܠܵܗܵܐ، ܘܐܝܼܡܲܢ ܕܗܲܡܸܢܝܼܬܘܿܢ، ܗܵܘܹܐ ܠܵܘܟ݂ܘܿܢ ܚܲܝܹ̈ܐ ܒܫܸܡܹܗ.

Currently Selected:

ܝܘܚܢܢ 20: ABTAB

Highlight

Copy