ܝܘܚܢܢ 19

ܝܼܫܘܿܥ ܦܝܵܫܵܐ ܕܝܼܢܵܐ ܠܡܵܘܬܵܐ

ܡܬܝ 27‏:15‏‐31؛ ܡܪܩܘܣ 15‏:16‏‐20؛ ܠܘܩܐ 23‏:1‏‐5

1ܗ̇ܝܓܵܗ ܦܝܼܠܵܛܘܿܣ ܣܘܼܦܹܐ ܠܹܗ ܠܝܼܫܘܿܥ ܕܦܵܐܹܫ ܡܸܚܝܵܐ ܒܫܵܘܛܹ̈ܐ. 2ܘܓܕܝܼܠ ܠܗܘܿܢ ܕܲܚܫܹ̈ܐ ܟܠܝܼܠܵܐ ܡ̣ܢ ܟܸܬܘܹ̈ܐ ܘܡܘܼܬܸܒ݂ ܠܗܘܿܢ ܒܪܹܫܹܗ، ܘܡܘܼܠܒܸܫ ܠܗܘܿܢ ܐܸܠܹܗ ܓ̰ܘܼܒܵܐ ܕܐܲܪܓܘܵܢܵܐ، 3ܐܵܬܝܼ ܗ݇ܘܵܘ ܠܟܸܣ ܠܹܗ ܘܐܵܡܪܝܼ ܗ݇ܘܵܘ، ”ܫܠܵܡܵܐ ܠܘܼܟ݂، ܝܵܐ ܡܲܠܟܵܐ ܕܝܗܘܼܕܵܝܹ̈ܐ.“ ܘܡܵܚܝܼ ܗ݇ܘܵܘ ܠܹܗ ܥܲܠ ܦܵܬܹܗ. 4ܡܸܢܕܪܸܫ ܦܠܝܼܛ ܠܹܗ ܦܝܼܠܵܛܘܿܣ ܠܒܲܕܲܪ ܘܐ݇ܡܝܼܪܹܗ ܠܝܗܘܼܕܵܝܹ̈ܐ، ”ܡܘܼܐܬܹܐ ܠܝܼ ܠܟܸܣ ܠܵܘܟ݂ܘܿܢ ܕܝܵܕܥܝܼܬܘܿܢ ܠܹܐ ܝܘܸܢ ܡܲܫ݇ܟ̰ܘܼܚܹܐ ܓܢܵܗܵܐ ܒܝܼܹܗ.“ 5ܐܝܼܡܲܢ ܕܦܠܝܼܛ ܠܹܗ ܝܼܫܘܿܥ ܠܒܲܕܲܪ، ܟܠܝܼܠܵܐ ܕܟܸܬܘܹ̈ܐ ܒܪܹܫܹܗ ܘܓ̰ܘܼܒܵܐ ܕܐܲܪܓܘܵܢܵܐ ܥܲܠܘܼܗܝ، ܐ݇ܡܝܼܪܹܗ ܦܝܼܠܵܛܘܿܣ ܠܝܗܘܼܕܵܝܹ̈ܐ، ”ܗܵܐ، ܓܲܒ݂ܪܵܐ.“ 6ܟܲܕ ܚܙܹܐ ܠܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܕܲܚܫܹ̈ܐ ܠܝܼܫܘܿܥ، ܡܘܼܩܘܸܚ ܠܗܘܿܢ، ”ܙܩܘܿܦ ܠܹܗ، ܙܩܘܿܦ ܠܹܗ!“ ܓ̰ܘܼܘܸܒ ܠܹܗ ܐܸܠܲܝܗܝ ܦܝܼܠܵܛܘܿܣ، ”ܫܩܘܿܠܘܼܢ ܐܲܚܬܘܿܢ ܘܙܩܘܿܦܘܼܢ ܠܹܗ. ܐܵܢܵܐ ܒܓܵܢܝܼ ܠܹܐ ܝܘܸܢ ܡܲܫ݇ܟ̰ܘܼܚܹܐ ܒܝܼܹܗ ܥܸܠܬܵܐ.“ 7ܓ̰ܘܼܘܸܒ ܠܗܘܿܢ ܐܸܠܹܗ ܝܗܘܼܕܵܝܹ̈ܐ، ”ܐܲܚܢܲܢ ܐܝܼܬ ܠܲܢ ܢܵܡܘܿܣܵܐ، ܘܐܲܝܟ݂ ܢܵܡܘܿܣܵܐ ܘܵܠܹܐ ܝܠܵܗ̇ ܕܡܵܐܹܬ، ܣܵܒܵܒ ܥܒ݂ܝܼܕܵܐ ܠܹܗ ܓܵܢܹܗ ܒܪܘܿܢܵܐ ܕܐܲܠܵܗܵܐ.“ 8ܐܝܼܡܲܢ ܕܫܡܝܼܥ ܠܹܗ ܦܝܼܠܵܛܘܿܣ ܐܵܗܵܐ، ܒܘܼܫ ܙܕܝܼܥ ܠܹܗ. 9ܥܒ݂ܝܼܪܹܗ ܠܓܵܘ ܩܲܨܪܵܐ ܡܸܢܕܪܸܫ ܘܒܘܼܩܸܪܹܗ ܡ̣ܢ ܝܼܫܘܿܥ، ”ܡ̣ܢ ܐܲܝܟܵܐ ܝܘܸܬ؟“ ܐܝܼܢܵܐ ܝܼܫܘܿܥ ܠܵܐ ܓ̰ܘܼܘܸܒ ܠܹܗ ܐܸܠܹܗ. 10ܐ݇ܡܝܼܪܹܗ ܐܸܠܹܗ ܦܝܼܠܵܛܘܿܣ، ”ܩܵܡܘܿܕܝܼ ܠܹܐ ܝܘܸܬ ܗܲܡܙܘܼܡܹܐ ܥܲܡܝܼ؟ ܠܹܐ ܝܘܸܬ ܒܝܼܕܵܥܵܐ ܕܐܝܼܬ ܠܝܼ ܫܘܼܠܛܵܢܵܐ ܕܫܵܪܹܝܢܘܼܟ݂ ܘܐܝܼܬ ܠܝܼ ܫܘܼܠܛܵܢܵܐ ܕܡܵܚܹܝܢܘܼܟ݂ ܠܙܩܝܼܦܵܐ؟“ 11ܓ̰ܘܼܘܸܒ ܠܹܗ ܐܸܠܹܗ ܝܼܫܘܿܥ، ”ܠܹܐ ܗܵܘܹܐ ܗ݇ܘܵܐ ܠܘܼܟ݂ ܫܘܼܠܛܵܢܵܐ ܥܲܠܝܼ ܐܸܢ ܠܵܐ ܦܵܐܹܫ ܗ݇ܘܵܐ ܝܘܼܗ݇ܒ݂ܵܐ ܐܸܠܘܼܟ݂ ܡ̣ܢ ܫܡܲܝܵܐ. ܒܘܼܬ ܐܵܗܵܐ ܗ̇ܘ ܕܩܲܡ ܣܲܦܹܐ ܠܝܼ ܐܸܠܘܼܟ݂، ܚܛܝܼܬܹܗ ܒܘܼܫ ܓܘܼܪܬܵܐ ܝܠܵܗ̇ ܡ̣ܢ ܕܗ̇ܝ ܕܝܼܘܼܟ݂.“ 12ܡ̣ܢ ܗ̇ܝ ܥܕܵܢܵܐ ܦܝܼܠܵܛܘܿܣ ܟܹܐ ܒܵܥܹܐ ܗ݇ܘܵܐ ܕܫܵܪܹܐ ܗ݇ܘܵܐ ܠܝܼܫܘܿܥ، ܐܝܼܢܵܐ ܝܗܘܼܕܵܝܹ̈ܐ ܒܘܼܫ ܙܵܘܕܵܐ ܡܲܩܘܸܚܝܼ ܗ݇ܘܵܘ ܘܐܵܡܪܝܼ ܗ݇ܘܵܘ، ”ܐܸܢ ܫܵܪܹܝܬ ܠܹܗ، ܠܹܐ ܝܘܸܬ ܠܓܹܒܵܐ ܕܩܹܣܲܪ. ܟܠ ܡ̇ܢ ܕܥܵܒܹܕ ܓܵܢܹܗ ܡܲܠܟܵܐ، ܕܲܠܩܘܼܒ݂ܠ ܕܩܹܣܲܪ ܝܼܠܹܗ.“ 13ܐܝܼܡܲܢ ܕܫܡܝܼܥ ܠܹܗ ܦܝܼܠܵܛܘܿܣ ܐܲܢܹܐ ܚܲܒܪܹ̈ܐ، ܦܘܼܠܸܛ ܠܹܗ ܠܝܼܫܘܿܥ ܠܒܲܕܲܪ، ܘܝ݇ܬܝܼܒ݂ ܠܹܗ ܥܲܠ ܟܘܼܪܣܝܵܐ ܕܕܝܼܘܵܢ، ܒܕܘܼܟܵܐ ܕܦܵܝܫܵܐ ܗ݇ܘܵܐ ܩܪܝܼܬܵܐ، ”ܪܨܝܼܦܬܵܐ ܕܟܹܐܦܹ̈ܐ،“ ܘܒܠܸܫܵܢܵܐ ܐܵܪܵܡܵܝܵܐ، ”ܓܦܝܼܦܬܵܐ.“ 14ܝܵܘܡܵܐ ܕܗܵܕܲܪܬܵܐ ܝܗ݇ܘܵܐ، ܘܝܗܘܼܕܵܝܹ̈ܐ ܗܲܕܘܼܪܹܐ ܝܗ݇ܘܵܘ ܩܵܐ ܦܸܨܚܵܐ، ܘܣܵܥܲܬ ܕܬܪܸܥܣܲܪ ܝܼܗ݇ܘܵܐ. ܐ݇ܡܝܼܪܹܗ ܦܝܼܠܵܛܘܿܣ ܠܝܗܘܼܕܵܝܹ̈ܐ، ”ܗܵܐ، ܡܲܠܟܵܘܟ݂ܘܿܢ.“ 15ܘܐܵܢܝܼ ܡܘܼܩܘܸܚ ܠܗܘܿܢ، ”ܫܩܘܿܠ ܠܹܗ ܘܙܩܘܿܦ ܠܹܗ.“ ܐ݇ܡܝܼܪܹܗ ܐܸܠܲܝܗܝ ܦܝܼܠܵܛܘܿܣ، ”ܠܡܲܠܟܵܘܟ݂ܘܿܢ ܙܵܩܦܹܢ؟“ ܓ̰ܘܼܘܸܒ ܠܗܘܿܢ، ”ܠܲܝܬ ܠܲܢ ܡܲܠܟܵܐ ܫܒ݂ܘܿܩ ܡ̣ܢ ܩܹܣܲܪ.“ 16ܗ̇ܝܓܵܗ ܦܝܼܠܵܛܘܿܣ ܣܘܼܦܹܐ ܠܹܗ ܐܸܠܲܝܗܝ ܕܦܵܐܹܫ ܙܩܝܼܦܵܐ، ܘܦܘܼܠܸܛ ܠܗܘܿܢ ܠܝܼܫܘܿܥ ܘܠܘܼܒܸܠ ܠܗܘܿܢ ܐܸܠܹܗ.

ܙܩܵܦܬܵܐ ܕܝܼܫܘܿܥ

ܡܬܝ 27‏:32‏‐44؛ ܡܪܩܘܣ 15‏:21‏‐32؛ ܠܘܩܐ 23‏:26‏‐43

17ܦܠܝܼܛ ܠܹܗ ܝܼܫܘܿܥ ܛܥܝܼܢܵܐ ܙܩܝܼܦܹܗ ܠܕܘܼܟܵܐ ܕܦܵܝܫܵܐ ܗ݇ܘܵܐ ܩܪܝܼܬܵܐ ܩܲܪܩܲܦܬܵܐ، ܘܒܠܸܫܵܢܵܐ ܐܵܪܵܡܵܝܵܐ ܟܹܐ ܦܵܝܫܵܐ ܩܪܝܼܬܵܐ ܓܵܓ݂ܘܿܠܬܵܐ. 18ܬܵܡܵܐ ܙܩܝܼܦ ܠܗܘܿܢ ܐܸܠܹܗ، ܘܥܲܡܹܗ ܬܪܹܝ ܐ݇ܚܹܪ̈݇ܢܹܐ، ܚܲܕ ܡ̣ܢ ܐܵܗܵܐ ܓܹܒܹܗ ܘܚܲܕ ܡ̣ܢ ܗ̇ܘ ܓܹܒܹܗ ܐ݇ܚܹܪ݇ܢܵܐ، ܘܝܼܫܘܿܥ ܒܹܝܬ݇ ܦܲܠܓܵܐ. 19ܘܟܬܝܼܒ݂ܵܐ ܝܗ݇ܘܵܐ ܦܝܼܠܵܛܘܿܣ ܠܘܼܚܵܐ ܘܡܘܼܬܒ݂ܘܼܗ̇ ܥܲܠ ܙܩܝܼܦܵܐ. ܘܟܬܝܼܒ݂ܬܵܐ ܗܲܕܟ݂ܵܐ ܝܗ݇ܘܵܐ، ”ܝܼܫܘܿܥ ܢܵܨܪܵܝܵܐ ܡܲܠܟܵܐ ܕܝܗܘܼܕܵܝܹ̈ܐ.“ 20ܪܵܒܵܐ ܡ̣ܢ ܝܗܘܼܕܵܝܹ̈ܐ ܩܪܹܐ ܠܗܘܿܢ ܠܐܵܗܵܐ ܠܘܼܚܵܐ، ܣܵܒܵܒ ܕܘܼܟܵܐ ܕܥܲܠܘܼܗ̇ ܦܝܼܫܵܐ ܝܗ݇ܘܵܐ ܙܩܝܼܦܵܐ ܝܼܫܘܿܥ ܩܘܼܪܒܵܐ ܝܗ݇ܘܵܐ ܠܡܕܝܼܢ݇ܬܵܐ. ܘܠܘܼܚܵܐ ܦܝܼܫܬܵܐ ܝܗ݇ܘܵܐ ܟܬܝܼܒ݂ܬܵܐ ܒܠܸܫܵܢܵܐ ܥܸܒ݂ܪܵܝܵܐ، ܘܪܗ݇ܘܿܡܵܝܵܐ، ܘܝܵܘܢܵܝܵܐ. 21ܐ݇ܡܝܼܪܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܠܦܝܼܠܵܛܘܿܣ، ”ܠܵܐ ܟܬܘܿܒ݂، ’ܡܲܠܟܵܐ ܕܝܗܘܼܕܵܝܹ̈ܐ،‘ ܐܸܠܵܐ، ’ܗ̇ܘ ܐ݇ܡܝܼܪܹܗ، ܕܡܲܠܟܵܐ ܕܝܗܘܼܕܵܝܹ̈ܐ ܝܘܸܢ.‘“ 22ܓ̰ܘܼܘܸܒ ܠܹܗ ܦܝܼܠܵܛܘܿܣ، ”ܡܸܢܕܝܼ ܕܟܬܝܼܒ݂ ܠܝܼ، ܟܬܝܼܒ݂ ܠܝܼ.“

23ܕܲܚܫܹ̈ܐ ܕܙܩܝܼܦ ܠܗܘܿܢ ܠܝܼܫܘܿܥ ܫܩܝܼܠ ܠܗܘܿܢ ܓ̰ܘܼܠܘܼ̈ܗܝ ܘܥܒ݂ܝܼܕܲܝ ܠܗܘܿܢ ܐܲܪܒܥܵܐ ܣܵܗܡܹ̈ܐ، ܚܲܕ ܣܵܗܡܵܐ ܩܵܐ ܟܠ ܕܲܚܫܵܐ. ܨܘܼܕܪܹܗ ܦܝܼܫܬܵܐ ܝܗ݇ܘܵܐ. ܠܹܐ ܝܗ݇ܘܵܐ ܚܝܼܛܬܵܐ، ܙܩܝܼܪܬܵܐ ܝܗ݇ܘܵܐ ܚܲܕ ܩܸܛܥܵܐ ܡ̣ܢ ܠܥܸܠܸܠ ܠܠܬܸܚܬ. 24ܐ݇ܡܝܼܪܗܘܿܢ ܚܲܕ ܠܗ̇ܘ ܐ݇ܚܹܪ݇ܢܵܐ، ”ܠܵܐ ܦܵܪܛܲܚ ܠܵܗ̇، ܐܸܠܵܐ ܕܵܪܲܚ ܦܸܫܟܵܐ ܘܚܵܙܲܚ ܠܡܵܢܝܼ ܒܸܬ ܗܵܘܝܵܐ،“ ܕܦܵܐܹܫ ܬܘܼܡܸܡܵܐ ܟܬܵܒ݂ܵܐ ܕܐ݇ܡܝܼܪܹܗ:

ܦܘܼܠܸܥ ܠܗܘܿܢ ܓ̰ܘܼܠܝܼ̈ ܒܹܝܠܲܝܗܝ،

ܘܥܲܠ ܠܒ݂ܝܼܫܬܝܼ ܕܪܹܐ ܠܗܘܿܢ ܦܸܫܟܵܐ.#ܡܙܡܘܪ̈ܐ 22‏:18

ܗܲܕܟ݂ܵܐ ܥܒ݂ܝܼܕ ܠܗܘܿܢ ܕܲܚܫܹ̈ܐ.

25ܟܸܠܝܹܐ ܝܗ݇ܘܵܘ ܠܟܸܣ ܙܩܝܼܦܵܐ ܕܝܼܫܘܿܥ ܝܸܡܹܗ، ܘܚܵܬܵܐ ܕܝܸܡܹܗ، ܡܲܪܝܲܡ ܒܲܟ݂ܬܵܐ ܕܩܲܠܝܘܿܦܵܐ، ܘܡܲܪܝܲܡ ܡܲܓ݂ܕܠܵܝܬܵܐ. 26ܐܝܼܡܲܢ ܕܚܙܹܐ ܠܹܗ ܝܼܫܘܿܥ ܝܸܡܹܗ ܟܠܝܼܬܵܐ ܬܵܡܵܐ، ܘܐܘܼܦ ܗ̇ܘ ܬܲܠܡܝܼܕܵܐ ܕܡܲܚܸܒ ܗ݇ܘܵܐ ܠܹܗ، ܐ݇ܡܝܼܪܹܗ ܠܝܸܡܹܗ، ”ܒܲܟ݂ܬܵܐ، ܐܵܗܵܐ ܝܠܹܗ ܒܪܘܿܢܵܟ݂ܝ.“ 27ܘܠܗ̇ܘ ܬܲܠܡܝܼܕܵܐ ܐ݇ܡܝܼܪܹܗ، ”ܐܵܗܵܐ ܝܠܵܗ̇ ܝܸܡܘܼܟ݂.“ ܘܡ̣ܢ ܗ̇ܝ ܣܵܥܲܬ ܠܘܼܒܠܵܐ ܠܹܗ ܗ̇ܘ ܬܲܠܡܝܼܕܵܐ ܠܒܲܝܬܹܗ.

ܡܵܘܬܵܐ ܕܝܼܫܘܿܥ

ܡܬܝ 27‏:45‏‐56؛ ܡܪܩܘܣ 15‏:33‏‐41؛ ܠܘܩܐ 23‏:44‏‐49

28ܒܵܬ݇ܪ ܐܲܢܹܐ، ܟܲܕ ܝ݇ܕܝܼܥ ܠܹܗ ܝܼܫܘܿܥ ܕܟܠ ܡܸܢܕܝܼ ܦܝܼܫ ܠܹܗ ܡܘܼܟܡܸܠܵܐ، ܕܦܵܐܹܫ ܬܘܼܡܸܡܵܐ ܟܬܵܒ݂ܵܐ، ܐ݇ܡܝܼܪܹܗ، ”ܨܹܗܝܵܐ ܝܘܸܢ.“ 29ܐܝܼܬ ܗ݇ܘܵܐ ܬܵܡܵܐ ܡܵܐܢܵܐ ܡܸܠܝܵܐ ܚܲܠܵܐ. ܛܡܝܼܫ ܠܗܘܿܢ ܓܵܘܹܗ ܐܸܣܦܘܼܓܵܐ، ܘܡܘܼܬܸܒ݂ ܠܗܘܿܢ ܒܪܹܫܵܐ ܕܩܲܝܣܵܐ ܕܙܘܿܦܵܐ، ܘܦܘܼܫܸܛ ܠܗܘܿܢ ܠܦܘܼܡܹܗ. 30ܐܝܼܡܲܢ ܕܛܥܝܼܡ ܠܹܗ ܚܲܠܵܐ ܝܼܫܘܿܥ، ܐ݇ܡܝܼܪܹܗ، ”ܬܘܼܡܸܡܵܐ ܝܠܹܗ.“ ܐܝܼܡܲܢ ܕܐ݇ܡܝܼܪܹܗ ܐܵܗܵܐ، ܡܘܼܟܸܦ ܠܹܗ ܪܹܫܹܗ ܘܣܘܼܦܝܵܐ ܠܹܗ ܪܘܼܚܹܗ.

ܕܸܦܢܵܐ ܕܝܼܫܘܿܥ ܦܝܵܫܵܐ ܟ̰ܪܝܼܙܬܵܐ

31ܗ̇ܘ ܝܵܘܡܵܐ، ܝܵܘܡܵܐ ܕܗܵܕܲܪܬܵܐ ܝܗ݇ܘܵܐ، ܗܵܕܲܪܬܵܐ ܩܵܐ ܦܸܨܚܵܐ. ܘܝܵܘܡܵܐ ܐ݇ܚܹܪ݇ܢܵܐ ܫܲܒܬܵܐ ܓܘܼܪܬܵܐ ܝܗ݇ܘܵܐ، ܘܝܗܘܼܕܵܝܹ̈ܐ ܠܵܐ ܒܥܹܐ ܠܗܘܿܢ ܕܫܠܲܕܹ̈ܐ ܦܵܝܫܝܼ ܗ݇ܘܵܘ ܥܲܠ ܙܩܝܼܦܹ̈ܐ ܒܝܵܘܡܵܐ ܕܫܲܒܬܵܐ. ܒܘܼܬ ܐܵܗܵܐ ܛܠܝܼܒ ܠܗܘܿܢ ܡ̣ܢ ܦܝܼܠܵܛܘܿܣ ܕܦܵܝܫܝܼ ܫܡܝܼܛܹܐ ܫܵܩܵܢܲܝ̈ܗܝ، ܘܫܠܲܕܹ̈ܐ ܡܘܼܨܠܝܼܹܐ ܡ̣ܢ ܥܲܠ ܙܩܝܼܦܹ̈ܐ. 32ܐ݇ܬܹܐ ܠܗܘܿܢ ܕܲܚܫܹ̈ܐ ܘܫܡܝܼܛ ܠܗܘܿܢ ܫܵܩܵܢܹ̈ܐ ܕܗ̇ܘ ܩܵܕ݇ܡܵܝܵܐ ܕܙܩܝܼܦܵܐ ܝܗ݇ܘܵܐ ܥܲܡ ܝܼܫܘܿܥ، ܘܐܘܼܦ ܕܗ̇ܘ ܐ݇ܚܹܪ݇ܢܵܐ. 33ܐܝܼܢܵܐ ܟܲܕ ܐ݇ܬܹܐ ܠܗܘܿܢ ܠܟܸܣ ܝܼܫܘܿܥ، ܚܙܹܐ ܠܗܘܿܢ ܕܡܝܼܬܵܐ ܝܗ݇ܘܵܐ ܡ̣ܢ ܩܵܕ݇ܡ ܥܕܵܢܵܐ، ܠܵܐ ܬܒ݂ܝܼܪܲܝ ܠܗܘܿܢ ܫܵܩܵܢܘܼ̈ܗܝ. 34ܐܝܼܢܵܐ ܚܲܕ ܡ̣ܢ ܕܲܚܫܹ̈ܐ ܡܚܹܐ ܠܹܗ ܒܪܘܼܡܚܵܐ ܠܕܸܦܢܹܗ. ܘܒܗ̇ܝ ܥܕܵܢܵܐ ܦܠܝܼܛ ܠܗܘܿܢ ܕܸܡܵܐ ܘܡ̈ܝܼܵܐ. 35ܗ̇ܘ ܕܚܙܹܐ ܠܹܗ ܐܲܢܹܐ ܒܝܼܵܗ݇ܒ݂ܵܐ ܝܠܹܗ ܣܵܗܕܘܼܬܵܐ ܕܐܲܚܬܘܿܢ ܗܲܡܸܢܝܼܬܘܿܢ، ܘܣܵܗܕܘܼܬܹܗ ܫܲܪܝܼܪܬܵܐ ܝܠܵܗ̇. ܗ̇ܘ ܒܝܼܕܵܥܵܐ ܝܠܹܗ ܕܫܪܵܪܵܐ ܗܲܡܙܘܼܡܹܐ ܝܠܹܗ. 36ܐܲܢܹܐ ܗܘܹܐ ܠܗܘܿܢ ܕܦܵܐܹܫ ܬܘܼܡܸܡܵܐ ܟܬܵܒ݂ܵܐ، ”ܐܘܼܦ ܚܲܕ ܡ̣ܢ ܓܲܪ̈ܡܘܼܗܝ ܠܹܐ ܦܵܐܹܫ ܫܡܝܼܛܵܐ.“#ܡܦܩܢܐ 12‏:46؛ ܡܢܝܢܐ 9‏:12؛ ܡܙܡܘܪ̈ܐ 34‏:20 37ܡܸܢܕܪܸܫ ܟܬܵܒ݂ܵܐ ܐ݇ܡܝܼܪܹܗ ܒܚܕܵܐ ܕܘܼܟܵܐ ܐ݇ܚܹܪ݇ܬܵܐ، ”ܒܸܬ ܚܵܝܪܝܼ ܒܗ̇ܘ ܕܟ̰ܪܝܼܙ ܠܗܘܿܢ.“#ܙܟ݂ܪܝܐ 12‏:10

ܩܒ݂ܵܪܬܵܐ ܕܝܼܫܘܿܥ

ܡܬܝ 27‏:57‏‐61؛ ܡܪܩܘܣ 15‏:42‏‐47؛ ܠܘܩܐ 23‏:50‏‐56

38ܡ̣ܢ ܒܵܬ݇ܪ ܐܲܢܹܐ ܐ݇ܬܹܐ ܠܹܗ ܝܵܘܣܸܦ ܡ̣ܢ ܪܵܡܬܵܐ، ܗ̇ܘ ܕܝܼܗ݇ܘܵܐ ܬܲܠܡܝܼܕܵܐ ܕܝܼܫܘܿܥ ܒܛܸܫܘܵܐ ܡ̣ܢ ܙܕܘܼܥܬܵܐ ܕܝܗܘܼܕܵܝܹ̈ܐ، ܘܛܠܝܼܒ ܠܹܗ ܡ̣ܢ ܦܝܼܠܵܛܘܿܣ ܕܫܵܩܹܠ ܦܲܓ݂ܪܵܐ ܕܝܼܫܘܿܥ. ܒܦܣܵܣܵܐ ܕܦܝܼܠܵܛܘܿܣ ܐ݇ܙܝܼܠ ܠܹܗ ܝܵܘܣܸܦ ܘܫܩܝܼܠ ܠܹܗ ܦܲܓ݂ܪܵܐ. 39ܐ݇ܬܹܐ ܠܹܗ ܥܲܡܹܗ ܐܘܼܦ ܢܝܼܩܵܕܹܡܘܿܣ، ܗ̇ܘ ܕܐ݇ܬܝܼܵܐ ܝܗ݇ܘܵܐ ܩܵܕ݇ܡܵܝܬܵܐ ܠܟܸܣ ܝܼܫܘܿܥ ܒܠܲܝܠܹܐ. ܢܝܼܩܵܕܹܡܘܿܣ ܡܘܼܐܬܹܐ ܠܹܗ ܥܲܡܹܗ ܡܐܲܝܟ݂ ܐܸܡܵܐܐ ܠܝܼܛܪܹ̈ܐ ܕܡܘܼܪܵܐ ܘܥܸܠܘܲܝ ܡܙܝܼܓܹܐ ܒܥܘܼܕܵܠܹ̈ܐ. 40ܫܩܝܼܠ ܠܗܘܿܢ ܠܦܲܓ݂ܪܵܐ ܕܝܼܫܘܿܥ ܘܟܪܝܼܟ݂ ܠܗܘܿܢ ܒܟܸܬܵܢܹ̈ܐ ܘܒܒܸܣܡܹ̈ܐ، ܐܲܝܟ݂ ܥܵܕܲܬ ܕܩܒ݂ܵܪܬܵܐ ܕܝܗܘܼܕܵܝܹ̈ܐ. 41ܐܝܼܬ ܗ݇ܘܵܐ ܓܲܢܬܵܐ ܒܗ̇ܝ ܕܘܼܟܵܐ ܕܝܼܫܘܿܥ ܦܝܼܫܵܐ ܝܗ݇ܘܵܐ ܙܩܝܼܦܵܐ. ܘܓܵܘ ܗ̇ܝ ܓܲܢܬܵܐ ܐܝܼܬ ܗ݇ܘܵܐ ܩܲܒ݂ܪܵܐ ܚܲܕܬܵܐ ܕܗܹܫ ܐ݇ܢܵܫܵܐ ܠܹܐ ܝܗ݇ܘܵܐ ܡܘܼܬܒ݂ܵܐ ܓܵܘܘܼܗ̇. 42ܣܵܒܵܒ ܝܵܘܡܵܐ ܕܗܵܕܲܪܬܵܐ ܕܝܗܘܼܕܵܝܹ̈ܐ ܝܗ݇ܘܵܐ، ܘܩܲܒ݂ܪܵܐ ܩܘܼܪܒܵܐ ܝܗ݇ܘܵܐ، ܡܘܼܬܸܒ݂ ܠܗܘܿܢ ܠܝܼܫܘܿܥ ܬܵܡܵܐ.

Currently Selected:

ܝܘܚܢܢ 19: ABTAB

Highlight

Copy