ܚܓܝ 2

ܐܝܼܩܵܪܵܐ ܕܗܲܝܟܠܵܐ ܬܪܲܝܵܢܵܐ

1ܒܝܲܪܚܵܐ ܕܫܲܒ݂ܥܵܐ، ܒܥܸܣܪܝܼ ܘܚܲܕ ܒܝܲܪܚܵܐ، ܗܘܹܐ ܠܹܗ ܚܲܒܪܵܐ ܕܡܵܪܝܵܐ ܒܝܲܕ ܚܲܓܲܝ ܢܒ݂ܝܼܵܐ، ܒܹܐܡܵܪܵܐ، 2”ܕܹܐ ܐ݇ܡܘܿܪ ܠܙܘܼܪܒܵܒܹܠ ܒܪܘܿܢܵܐ ܕܫܹܠܲܬܐܹܝܠ، ܫܲܠܝܼܛܵܐ ܕܝܼܗܘܼܕܵܐ، ܘܠܝܼܫܘܿܥ ܒܪܘܿܢܵܐ ܕܝܘܼܙܵܕܵܩ، ܟܵܗܢܵܐ ܓܘܼܪܵܐ، ܘܠܣܵܗܡܵܐ ܦܝܼܫܵܐ ܕܥܲܡܵܐ، 3’ܡܵܢܝܼ ܓܵܘܵܘܟ݂ܘܿܢ ܦܝܵܫܵܐ ܝܠܹܗ ܕܚܙܹܐ ܠܹܗ ܠܐܵܗܵܐ ܒܲܝܬܵܐ ܒܚܸܩܪܹܗ ܩܵܕ݇ܡܵܝܵܐ؟ ܘܕܵܐܟ݂ܝܼ ܒܸܚܙܵܝܹܗ ܝܬܘܿܢ ܐܵܕܝܼܵܐ؟ ܗܵܐ، ܠܹܐ ܝܠܹܗ ܠܟܸܣ ܕܗ̇ܘ ܐܲܝܟ݂ ܗܸܟ̃ ܡܸܢܕܝܼ ܒܥܲܝܢܵܘ̈ܟ݂ܘܿܢ؟ 4ܘܐܵܕܝܼܵܐ ܚܲܠܸܢ، ܙܘܼܪܒܵܒܹܠ،‘ ܒܹܐܡܵܪܵܐ ܝܠܹܗ ܡܵܪܝܵܐ، ’ܘܚܲܠܸܢ، ܝܼܫܘܿܥ ܒܪܘܿܢܵܐ ܕܝܘܼܙܵܕܵܩ، ܟܵܗܢܵܐ ܓܘܼܪܵܐ، ܘܚܲܠܸܢ، ܟܠܹܗ ܥܲܡܵܐ ܕܐܲܪܥܵܐ،‘ ܒܹܐܡܵܪܵܐ ܝܠܹܗ ܡܵܪܝܵܐ. ’ܘܦܠܘܿܚܘܼܢ، ܣܵܒܵܒ ܐܵܢܵܐ ܥܲܡܵܘܟ݂ܘܿܢ ܝܼܘܸܢ،‘ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، 5’ܠܚܲܒܪܵܐ ܕܩܛܝܼܥ ܠܝܼ ܥܲܡܵܘܟ݂ܘܿܢ، ܟܲܕ ܦܠܝܼܛ ܠܵܘܟ݂ܘܿܢ ܡ̣ܢ ܡܸܨܪܹܝܢ، ܘܪܘܼܚܝܼ ܟܠܝܼܬܵܐ ܝܠܵܗ̇ ܒܓܵܘܵܘܟ݂ܘܿܢ، ܠܵܐ ܙܵܕܥܝܼܬܘܿܢ.‘ 6ܣܵܒܵܒ ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ’ܡܸܢܕܪܸܫ ܚܕܵܐ ܓܵܗܵܐ ܐ݇ܚܹܪ݇ܬܵܐ، ܒܵܬ݇ܪ ܙܲܒ݂ܢܵܐ ܟܸܪܝܵܐ، ܘܐܵܢܵܐ ܒܸܬ ܡܲܫܥܸܫܸܢ ܫܡܲܝܵܐ ܘܐܲܪܥܵܐ، ܘܝܵܡܵܐ ܘܒܸܪܙܵܐ، 7ܘܒܸܬ ܡܲܫܥܸܫܸܢ ܠܟܠܲܝܗܝ ܐܸܡܘܵܬܹ̈ܐ، ܘܒܸܬ ܦܵܝܫܝܼ ܡܘܼܐܬܝܹܐ ܣܝܼܡܵܬܹ̈ܐ ܫܘܼܗܘܸܬܹ̈ܐ ܕܟܠܲܝܗܝ ܐܸܡܘܵܬܹ̈ܐ، ܘܒܸܬ ܡܵܠܹܝܢ ܠܐܵܗܵܐ ܒܲܝܬܵܐ ܡ̣ܢ ܐܝܼܩܵܪܵܐ،‘ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ. 8’ܕܝܼܝܼ ܝܠܹܗ ܣܹܐܡܵܐ، ܘܕܝܼܝܼ ܝܠܹܗ ܕܲܗܒ݂ܵܐ،‘ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ. 9’ܓܘܼܪܵܐ ܒܸܬ ܗܵܘܹܐ ܚܸܩܪܵܐ ܕܐܵܗܵܐ ܒܲܝܬܵܐ ܐ݇ܚܵܪܵܝܵܐ ܒܘܼܫ ܡ̣ܢ ܕܗ̇ܘ ܩܵܕ݇ܡܵܝܵܐ،‘ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ’ܘܒܐܵܗܵܐ ܕܘܼܟܬܵܐ ܒܸܬ ܝܵܗ݇ܒܹܢ ܫܠܵܡܵܐ،‘ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ.“

ܩܵܘܠܹ̈ܐ ܕܒܘܼܪ̈ܟܵܬܹܐ ܠܥܲܡܵܐ ܡܲܨܝܸܬܵܢܵܐ

10ܒܥܸܣܪܝܼ ܘܐܲܪܒܥܵܐ ܒܝܲܪܚܵܐ ܕܬܸܫܥܵܐ، ܒܫܹܢ݇ܬܵܐ ܕܬܲܪܬܹܝ ܠܕܲܪܝܵܘܵܫ، ܗܘܹܐ ܠܹܗ ܚܲܒܪܵܐ ܕܡܵܪܝܵܐ ܒܝܲܕ ܚܲܓܲܝ ܢܒ݂ܝܼܵܐ، ܒܹܐܡܵܪܵܐ، 11”ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ’ܕܹܐ ܒܲܩܸܪ ܡ̣ܢ ܟܵܗܢܹ̈ܐ ܒܘܼܬ ܢܵܡܘܿܣܵܐ، ܒܹܐܡܵܪܵܐ، 12”ܐܸܢ ܫܵܩܹܠ ܐ݇ܢܵܫܵܐ ܒܸܣܪܵܐ ܕܩܘܼܕܫܵܐ ܒܫܸܦܘܼܠܵܐ ܕܓ̰ܘܼܠܹܗ، ܘܕܵܩܹܪ ܒܫܸܦܘܼܠܹܗ ܒܠܲܚܡܵܐ ܘܒܒܘܼܫܵܠܵܐ، ܘܒܚܲܡܪܵܐ ܘܒܡܸܫܚܵܐ، ܘܒܟܠܵܗ̇ ܡܹܐܟ݂ܘܼܠܬܵܐ، ܒܸܬ ܦܵܝܫܝܼ ܩܘܼܕܫܹ̈ܐ؟“‘“ ܘܓ̰ܘܼܘܸܒ ܠܗܘܿܢ ܟܵܗܢܹ̈ܐ ܘܐ݇ܡܝܼܪܗܘܿܢ، ”ܠܵܐ.“ 13ܘܐ݇ܡܝܼܪܹܗ ܚܲܓܲܝ، ”ܐܸܢ ܕܵܩܹܪ ܐ݇ܢܵܫܵܐ ܡܛܘܼܡܐܵܐ ܒܝܲܕ ܓܵܢܵܐ ܡܝܼܬܬܵܐ ܒܚܲܕ ܡ̣ܢ ܕܐܲܢܹܐ، ܒܸܬ ܗܵܘܹܐ ܛܲܡܐܵܐ؟“ ܘܓ̰ܘܼܘܸܒ ܠܗܘܿܢ ܟܵܗܢܹ̈ܐ ܘܐ݇ܡܝܼܪܗܘܿܢ، ”ܒܸܬ ܗܵܘܹܐ ܛܲܡܐܵܐ.“ 14ܘܓ̰ܘܼܘܸܒ ܠܹܗ ܚܲܓܲܝ ܘܐ݇ܡܝܼܪܹܗ، ”’ܗܲܕܟ݂ܵܐ ܝܠܹܗ ܐܵܗܵܐ ܥܲܡܵܐ، ܘܗܲܕܟ݂ܵܐ ܝܠܵܗ̇ ܐܵܗܵܐ ܐܘܼܡܬܵܐ ܩܵܕ݇ܡܝܼ،‘ ܒܹܐܡܵܪܵܐ ܝܠܹܗ ܡܵܪܝܵܐ، ’ܘܗܲܕܟ݂ܵܐ ܝܠܹܗ ܟܠܹܗ ܦܘܼܠܚܵܢܵܐ ܕܐܝܼܕܵܬܲܝ̈ܗܝ، ܘܡܸܢܕܝܼ ܕܡܲܩܪܸܒ݂ܝܼ ܬܵܡܵܐ ܛܲܡܐܵܐ ܝܠܹܗ. 15ܘܐܵܕܝܼܵܐ ܕܹܐ ܡܲܣܸܡܘܼܢ ܒܵܠܵܐ ܡܐܸܕܝܘܿܡ ܠܒܵܬ݇ܪܹܗ، ܟܲܕ ܗܹܫ ܠܵܐ ܡܘܼܬܒ݂ܵܐ ܟܹܐܦܵܐ ܥܲܠ ܟܹܐܦܵܐ ܒܗܲܝܟܠܵܐ ܕܡܵܪܝܵܐ. 16ܡܗܘܵܝܬܲܝܗܝ، ܟܲܕ ܥܒ݂ܝܼܪܹܗ ܐ݇ܢܵܫܵܐ ܠܒܸܐܕܪܵܐ ܠܸܫܩܵܠܵܐ ܥܸܣܪܝܼ ܟܝܘܼܠܹ̈ܐ ܡ̣ܢ ܩܘܼܚܵܐ، ܗܘܹܐ ܠܗܘܿܢ ܥܸܣܪܵܐ، ܘܟܲܕ ܥܒ݂ܝܼܪܹܗ ܠܡܲܥܨܲܪܬܵܐ ܠܸܓܪܵܫܵܐ ܚܲܡܫܝܼ ܚܵܘܕܹ̈ܐ ܕܚܲܡܪܵܐ، ܗܘܹܐ ܠܗܘܿܢ ܥܸܣܪܝܼ. 17ܩܲܡ ܡܵܚܹܝܢ ܒܡܚܘܿܬܵܐ ܕܦܵܘܚܵܐ ܘܒܝܲܪܩܵܢܵܐ ܘܒܒܲܪܕܵܐ ܠܟܠܹܗ ܦܘܼܠܚܵܢܵܐ ܕܐܝܼܕܵܘ̈ܟ݂ܘܿܢ، ܐܝܼܢܵܐ ܠܹܐ ܝܬܘܿܢ ܕܝܼܪܹܐ ܠܟܸܣ ܠܝܼ، ܒܹܐܡܵܪܵܐ ܝܠܹܗ ܡܵܪܝܵܐ. 18ܕܹܐ ܡܲܣܸܡܘܼܢ ܒܵܠܵܐ ܡܐܸܕܝܘܿܡ ܠܒܵܬ݇ܪܹܗ، ܡ̣ܢ ܝܵܘܡܵܐ ܕܥܸܣܪܝܼ ܘܐܲܪܒܥܵܐ ܒܝܲܪܚܵܐ ܕܬܸܫܥܵܐ، ܡ̣ܢ ܝܵܘܡܵܐ ܕܦܝܼܫ ܠܵܗ̇ ܡܘܼܬܸܒ݂ܬܵܐ ܫܲܬܐܸܣܬܵܐ ܕܗܲܝܟܠܵܐ ܕܡܵܪܝܵܐ، ܡܲܣܸܡܘܼܢ ܒܵܠܵܐ. 19ܗܹܫ ܒܲܪܙܲܪܥܵܐ ܓܵܘ ܐܵܘܨܪܵܐ ܝܠܹܗ؟ ܐܘܼܦ ܓܸܦܬܵܐ، ܘܬܹܐܢܵܐ، ܘܪܸܡܘܼܢܵܐ، ܘܐܝܼܠܵܢܵܐ ܕܙܲܝܬܵܐ، ܠܵܐ ܛܥܝܼܢܗܘܿܢ، ܐܝܼܢܵܐ ܡ̣ܢ ܐܸܕܝܘܿܡ ܝܵܘܡܵܐ ܒܸܬ ܒܲܪܟܸܢܗܘܿܢ.‘“

ܚܲܒܪܵܐ ܕܡܵܪܝܵܐ ܦܝܵܫܵܐ ܝܘܼܗ݇ܒ݂ܵܐ ܠܙܘܼܪܒܵܒܹܠ

20ܘܗܘܹܐ ܠܹܗ ܚܲܒܪܵܐ ܕܡܵܪܝܵܐ ܓܵܗܵܐ ܕܬܲܪܬܹܝ ܠܚܲܓܲܝ، ܒܥܸܣܪܝܼ ܘܐܲܪܒܥܵܐ ܒܝܲܪܚܵܐ، ܒܹܐܡܵܪܵܐ، 21”ܐ݇ܡܘܿܪ ܠܙܘܼܪܒܵܒܹܠ، ܫܲܠܝܼܛܵܐ ܕܝܼܗܘܼܕܵܐ، ’ܐܵܢܵܐ ܒܸܬ ܡܲܫܥܸܫܸܢ ܫܡܲܝܵܐ ܘܐܲܪܥܵܐ، 22ܘܒܸܬ ܡܲܚܕܸܪܸܢ ܟܘܼܪܣܝܵܐ ܕܡܲܠܟܘܵܬܹ̈ܐ، ܘܒܸܬ ܛܲܠܩܸܢ ܚܲܝܠܵܐ ܕܡܲܠܟܘܵܬܹ̈ܐ ܕܐܸܡܘܵܬܹ̈ܐ، ܘܒܸܬ ܡܲܚܕܸܪܸܢ ܡܲܪܟܲܒ݂ܬܵܐ ܘܪ̈ܵܟܒ݂ܵܢܘܼܗ̇، ܘܒܸܬ ܢܵܦܠܝܼ ܣܘܼܣܵܘܵܬܹ̈ܐ ܘܪ̈ܵܟܒ݂ܵܢܲܝܗܝ، ܐ݇ܢܵܫܵܐ ܒܣܲܝܦܵܐ ܕܐܲܚܘܿܢܘܼܗܝ. 23ܒܗ̇ܘ ܝܵܘܡܵܐ،‘ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ’ܒܸܬ ܫܵܩܠܹܢܘܼܟ݂، ܙܘܼܪܒܵܒܹܠ ܒܪܘܿܢܵܐ ܕܫܹܠܲܬܐܹܝܠ، ܪܹܓܝܼ،‘ ܒܹܐܡܵܪܵܐ ܝܠܹܗ ܡܵܪܝܵܐ، ’ܘܒܸܬ ܥܵܒ݂ܕܹܢܘܼܟ݂ ܐܲܝܟ݂ ܚܵܬܡܵܐ، ܣܵܒܵܒ ܐܸܠܘܼܟ݂ ܓܘܼܒܹܐ ܠܝܼ،‘ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ.“

Currently Selected:

ܚܓܝ 2: ABTAB

Highlight

Copy