Jenesis 33

Yakob ow Metya gans Esaw

1Ha Yakob a dhrehevis y dhewlagas ha mires, hag awotta, yth esa Esaw ow tos ha ganso peswar kans gour. Ytho ev a rannas an fleghes yntra Lea ha Raghel ha'n dhiw vaghteth. 2Hag ev a worras an maghtethyon ha'ga fleghes kynsa, ha Lea ha'y fleghes war aga lergh ha Raghel ha Yosep yn tiwettha. 3Ev y honan a dremenas a-dheragdha, hag omblegya dhe'n leur seythgweyth bys pan dheuth nes dh'y vroder.

4Mes Esaw a boenyas er y bynn ha'y vyrla ha koedha war y gonna hag amma dhodho; hag i a oelas. 5Hag ev a dhrehevis y dhewlagas ha gweles an benynes ha'n fleghes ha leverel, ‘Pyth yw an re ma dhiso jy?’ Hag yn-medh ev, ‘An fleghes a ros an Arloedh dhe'th was a'y ras.’ 6Ena an maghtethyon a dheuth nes, i ha'ga fleghes, hag omblegya. 7Ha Lea ha'y fleghes ynwedh a dheuth nes hag omblegya, ha wosa henna, Yosep ha Raghel a dheuth nes hag omblegya. 8Hag yn-medh ev, ‘Pyth yw dhiso jy oll an kamp ma re vetis?’ Hag yn-medh ev, ‘Rag kavoes gras yn golok ow arloedh.’ 9Mes yn-medh Esaw, ‘Genev vy yma pals, ow broder. Bedhes dhiso an pyth usi genes.’ 10Hag yn-medh Yakob, ‘Nansi, my a'th pys, mar kwrug vy kavoes gras y'th wolok, kemmer ow ro dhiworth ow leuv; rag my re welas dha fas, kepar ha pan ve gweles fas Duw, ha plesys osta genev vy. 11Kemmer, my a'th pys, ow bennath yw dres dhiso, rag Duw re beu grassyes dhymm, hag yma dhymm pup-tra.’ Ev a ynnias warnodho, hag ev a'n kemmeras.

12Ena ev a leveris, ‘Gwren mos yn-rag, ha my a vynn mos a-dheragos.’ 13Hag yn-medh ev dhodho, ‘Ow arloedh a woer bos an fleghes tender ha bos an flokk ha'n chatel ow tena genev. Mars yns drivys kales unn jydh, oll an flokk a vydh marow. 14Re dremenno ow arloedh dherag y was, ha my a wra mos yn-rag yn lent orth kamm an bestes usi dheragov, hag orth kamm an fleghes, erna dhyffyn dhe'm arloedh dhe Seir.’

15Ytho Esaw a leveris, ‘Gas vy dhe asa genes rann a'n bobel usi genev.’ Hag yn-medh ev, ‘Prag? Re gyffiv gras yn golok ow arloedh.’ 16Ytho Esaw a dhehwelis an jydh na war y fordh dhe Seir. 17Mes Yakob a lavuryas dhe Sukkoth ha drehevel chi dhodho, ha rag y jatel ev a wrug skovvaow. Rag henna ev a elwis hanow an tyller Sukkoth.

18Ha Yakob a dheuth yn sawder dhe sita Shekem, usi yn pow Kanan, hag ev ow tos dhiworth Padan-aram; hag ev a gampyas dherag an sita. 19Hag ev a brenas rann a'n gwel may hwrussa drehevel y dylda dhiworth mebyon Hamor, tas Shekem, a gans bath a vona.#33:19 bath a vona: Ebrow keshita, anwodhvedhys y dalvosogeth. 20Hag ev a dhrehevis ena alter, ha'y elwel El-elohe-ysrael.#33:20 El-elohe-ysrael: Po El, Duw Ysrael.

Currently Selected:

Jenesis 33: ABK

Highlight

Copy