Jenesis 34

Defolans Dina

1Lemmyn Dina, an vyrgh dineythys gans Lea dhe Yakob, eth yn-mes dhe weles myrghes an pow. 2Ha Shekem mab Hamor an Hivyas, penntern an pow na, a's gwelas ha'y hemmeres ha growedha gensi ha'y uvelhe. 3Ha'y enev a lenas orth Dina, myrgh Yakob, hag ev a garas an vowes ha kewsel yn kuv dhe'n vowes. 4Ytho Shekem a gewsis dhe Hamor y das, ow leverel. ‘Kemmer an voren ma ragov avel gwreg.’ 5Ha Yakob a glewas ev dhe dhefola Dina y vyrgh pan esa y vebyon gans y jatel y'n gwel; ha Yakob a dewis bys pan dheuthons. 6Ha Hamor, tas Shekem, eth yn-mes dhe Yakob dhe gewsel orth Yakob a'n mater. 7Pan glewsons, mebyon Yakob a dheuth dhiworth an gwel, ha troblys o an wer, ha pur serrys; rag ev re wrussa outray yn Ysrael ow krowedha gans myrgh Yakob, rag ny dhegoedh gul yndella.

8Ha Hamor a gewsis gansa, ow leverel, ‘Enev Shekem ow mab re lenas orth dha vyrgh. Ro hi dhodho avel gwreg, my a'th pys, 9ha junya genen yn demmedhyans; rewgh agas myrghes dhyn ni ha kemmerewgh agan myrghes dhywgh hwi. 10Trigys vydhowgh genen, ha'n pow a vydh a-dheragowgh; trigewgh, ha mos a-dro ynno ha trevesiga ynno.’ 11Hag yn-medh Shekem dh'y thas ha dh'y breder, ‘Gesewgh vy dhe gavoes gras yn agas golok, ha my a vynn ri pynag a vynnowgh leverel. 12Govynnewgh orthiv pris pur vras avel mona-pries ha ro, ha my a'n re dell leverowgh dhymm; saw rewgh dhymm an vowes avel gwreg.’

Dial Mebyon Yakob

13Ha mebyon Yakob a worthybis Shekem ha Hamor y das yn unn doella; i a gewsis yndella drefenn ev dhe dhefola Dina aga hwoer. 14Yn-medhons dhedha. ‘Ny yllyn gul hemma, ri agan hwoer dhe dhen nag yw trodreghys, rag meth dhyn via henna. 15Ny wren ni assentya genowgh marnas hwi a vynn bos kepar ha ni: pub gorreydh ahanowgh dhe vos trodreghys. 16Ena ni a re agan myrghes dhywgh ha kemmeres agas myrghes dhyn ni, ha triga genowgh ha dos ha bos unn bobel. 17Mes mar ny vynnowgh koela orthyn, dhe vos trodreghys, ni a gemmer agan myrgh ha mos yn-kerdh.’

18Ha da lowr o aga geryow yn dewlagas Hamor hag yn dewlagas Shekem mab Hamor. 19Ha ny dhelatyas an den yowynk gul an dra, rag yth esa delit dhodho yn myrgh Yakob. An moyha enorys ova yn oll chi y das. 20Ytho Hamor ha Shekem y vab a dheuth dhe yet aga sita ha kewsel orth gwer aga sita, ow leverel, 21‘An wer ma yw yn kres genen. Ytho gesewgh i dhe driga y'n pow ha mos a-dro ynno, hag awotta, efan yw an pow a-dheragdha. Gesewgh ni dhe gemmeres aga myrghes dhyn ni avel gwragedh, ha ri agan myrghes dhedha i. 22Mes ny assentyons an wer triga genen, dhe vos unn bobel, marnas pub gorreydh ahanan a vydh trodreghys, par dell yns i trodreghys. 23Aga chatel, ha'ga fyth hag oll aga bestes, a ny vydhons dhyn ni? Ny res moy es assentya gansa hag i a vynn triga genen.’ 24Hag oll an re ow mos yn-mes dre yet y sita a goelas orth Hamor ha Shekem y vab, ha pub gorreydh a veu trodreghys, pubonan esa ow mos yn-mes a yet y sita.

25Ha'n tressa dydh, pan esens yn paynys, dew vab Yakob, Simeon ha Levi, breder Dina a gemmeras pubonan y gledha ha dos heb y wodhvos a-ji dhe'n sita, ha ladha pub gorreydh. 26I a ladhas Hamor ha Shekem y vab dre vin an kledha, ha kemmeres Dina mes a ji Shekem ha mos dhe-ves. 27Mebyon Yakob a dheuth war an re ledhys, ha pylla an sita, rag i dhe dhefola aga hwoer. 28I a gemmeras aga deves ha'ga chatel ha'ga asenes ha pup-tra esa y'n sita hag y'n gwel; 29hag oll aga fyth hag oll aga fleghes ha'ga gwragedh i a gemmeras yn keth, ha pylla pup-tra esa y'n chiow. 30Hag yn-medh Yakob dhe Simeon ha Levi, ‘Hwi re dhros anfeusi warnav, ow kul dhymm flerya yn mysk trigoryon an pow, yn mysk an Kananysi ha'n Perizzysi. Boghes yw niver ow thus vy, hag i a vydh kuntellys war-barth er ow fynn ha'm diswul; ha my ha'm chi a vydh distruys.’ 31Hag yn-medhons i, ‘A wra ev dyghtya agan hwoer avel hora?’

Currently Selected:

Jenesis 34: ABK

Highlight

Copy