LU:KKC 17

Pa:bc

(Met 18.6-7,21-22; Mark 9.42)

1Odokkc Bvk agom tadjvgla gvmvnnc tani:kvdv:dcm Bv luto, “Pa:bcm ilv:nammc aroru:pc a:ycrung, ckvdaggom sckkokki cdcbulu a:dagji bv mc:dvrpcnamc! 2Cdc bvkkcpc vlvngko lv:podo raglvgsuge:la siycng asilo oyutsunamdcmci aiya:ycpc, sc adjio:nckvdv:sok akoncm pa:bcm imonamdcmpcyam. 3Nolu av avyc ansuka:sutoka; nok bvrokonc pa:bcm iycmvlo, bvm aima:pc ge:yirrang, odokkc bv asinc mc:dvrra mc:latsuyckumvlo, bvm mc:yinsulangka; 4Odokkc nok birudi:pc longcdcm kvnvdkopc pa:pko bv imurycmvlo, odokkc nokkolo:pc kvnvdkopc gva:ycmvlo, odokkc luyc, ‘Ngo asinc mcngkutsula mc:dungku,’ no bvm mc:yinsupa:yc.”

Mc:jvgnam

5Ru:ncpvnckc ager gerdopc mclvgnam tani:kvdv:dc Ru:tummc luto, “Ngoluk mc:jvgcm bojcmotei!” 6Odokkc Ru:tumbv luto, “Nokkc mc:jvgc pctu ammo apirongkvddvpc pirtamvlo, sc nuni: vsvng amv:scm, ‘Ngursa:la siycng assolo sa:ta:ka cmna lumvlo cdc noluk agom tadycpc.

Ager Gerya:nckolo Ipc-gvpcnam

7“Nolukkolok sc:koiyc, sckkc a:l gvncko cdcmanggom bera soben kanggapya:ncko du:ji, bv arvgolokkc gva:dokudom tcbuldo tedtok cmna luycnc? 8Cdcmyam bvm luma:yclang, ‘Ngok lcgangc donam tv:namko mosv:tei, odokkc ngom ila:sa:la bi:, ngo tv:ma:doma:sisscm; odokkc lcdupc no tv:ma:domayclang?’ 9Bv ager gerya:ncdcm aipai cmdagyc bvm lulvgnamdok lcgangc? 10Cdcmpila nolusin, cdvlo nolum lulvgnam appv:dcm ingabycnc, lulang ‘Ngolu arckama:nc ager gerya:nc; ngoluk gerpcnam agerdcm ngolu gerto.’ ”

Jisubv Tani: Vyvngko Csa:mokunam

11Jerusalempc gvko lambvdok Bv Samariangclang Galil pongkokdog gvdungai. 12Odokkc Bv do:lungkolok gva:nammc, Bvm ngero: ro:nam ami vyvngkonc rvgsuto, 13sc:kobulu mo:tcngo:pc dagrobge:la jc:la luto, “Jisuc: Ru:tuma, ngolum aya:teipcn.”

14Bv bulum ka:begge:la bulum luto, “Kumnam ager gernckvdv:dcm gvla avycm avyc lcngkansungapta:k.” Odokkc bulu gvnamc bulu csangamkangku. 15Odo bulukkolok akonc bv csangkangku cmna ka:sunammc Ru:ncpvncmc bottcpakpc aipai cmna: cmna gvlatkangku; 16odokkc bv Jisukc alckcra:do cgsorra kuma:to, Bvm aipai bila: bila. Bv Samariangkai. 17Odo Jisubv luto; “vyvngkopc aimokumangalang? Okola:n ake kona:dc? 18Sc amiamo:lok tani:sok angupc akosinnci Ru:ncpvncmc aipai bincko pa:toma:n?” 19Odokkc Bv bvm luto, “Darobtoka odokkc gvkangkuk; nok mc:jvgdc nom csa:motoku.”

Migom Doko Amo:dok Lenkunam

(Met 24.23-28,37-41)

20Parisi:kvdv:dc Ru:ncpvnckc migom donamdc cdvlo a:ycji cmna tawula:yam, Bv bulum lubito, “Ru:ncpvnckc migom doko mo:pvdc ka:begnam kanggodki ka:pa:dop pvnga:ma:yc; 21cdcmpcmanggom bulu luycnci, ‘Ka:tok, sc:na cdc!’ Cdcmanggom ‘Clcna!’ Kapila:c ka:toka, Ru:ncpvnckc migom doko mo:pvdc noluk ara:do dung.”

22Odokkc Bvk agom tadjvgla gvmvnnc tani:kvdv:dcm Bv luto, “cdvlo nolu Tani:kc Awodok longckvdv:dcm ka:lv:ycji, odokkc cdcm ka:begma:yc. 23Odokkc bulu nolum luyc, ‘ka:tok, clcna!’ Cdcmanggom ‘ka:tok, sidc!’ Gvyoka, buluk agomcm tadyok. 24Kapila:nc do:mvrtok tungkondokkc tungkondo:pc yari:yc kapc arra pva:modagnc, cdcmv:pc tani:kc Awodc:sin Bvk longckvdv:do iyc. 25Ckvdaggom Bv bojcrung lcgangc ipusire:ycm pa:yc odokkc sc ope:ncgv:sok lcgangc mcpaknampc iyc. 26Noakc longckvdv:do kapc idagaji, tani:kc Awodok longckvdv:do:sin iyc. 27Bulu doto, bulu tv:to, midangcm moto, midangcm mola bika, Noakc ollung ara:do a:do longckvdv:do:pc, odokkc pu:mi asidc billupkang, odokkc buluk appv:dcm bidkeyamto. 28Cdcmarpc Lo:tkc longckvdv:d kapc idagajibulu doto, tv:to, rcto, koto, leto, bulu okumcm moto, 29cmpige:la Lo:tbv Sodomdokkc gvlendo longcdo vmmclang gondok pcdongc taycng amo:tokkc ola bulum appv:dcm okkeyamto 30Cdcmv:pc cdvlo tani:kc Awodc lenyckunc cdc iyc.

31“Odo longcdo, sc:kobv okum mv:dumto du:nc, bvk attarc okumara:do du:daggom, cdcmbulum langkakupc gvikupcnamma:bong; cdcmv:pc arvgolo sc:kobv du:nc gvlatkupcnamma:bong. 32Mc:pa:langka Lo:tkc nc:dcm. 33Sc:kobvi turla du:namdcm pa:pc cmna mc:ycnc bv yogma:yc, cmpige:la sc:kobvi turnamcm yogmoycnc cdcm mosv:dag. 34Ngo nolum lubidung, odo yumcdo asublo anyikonc lckko:pc yubla du:yc; akoncm la:ycku odokkc akondcm mcpakyc. 35Nc:ng anyikonc donam vla du:yc; 36akoncm gvboycku odokkc akondcm mcpakyc.” 37Odokkc bulu Bvm tawuto, “Okolo Ru:tuma?” Bv bulum lubito, “Okoloi sima:dc du:ycji, sogumkvdv:dc oddoi lckko:pc dcngkumsuyc.”

Currently Selected:

LU:KKC 17: MISIBSI

Highlight

Copy