JO:N 9

Jisubv Ododokkcbong Miglunc Tani:ko Ka:begmokunam

1Bv gvpakkunamc, Bv tani:akonc ododokkcbong migluncko ka:begto. 2Odokkc Bvk agom tadjvgla gvmvnnc kvdv:dc Bvm tawuto, “Rabbi, sc:ko pa:bcm iton, sc tani:sc:yc: cdcmanggom bvk anc-abukvdv:dc:yc, bvmjc migludopc otonc?”

3Jisubv lubito “Sc tani:sc:jc pa:bcm itonc cdcmang, cdcmanggom bvk anc-abudc:sinmang, cmpige:la Ru:ncpvnckc agerkvdv:dcm bvkkolo ka:begamycpc cmna:mvn. 4Ngolu Bvk agerdcm gerpcrung iyc sc:ko ngom mclvgtagji, longgc du:dodcm; cdvlo sc:kobv:sin agercm gerra:ma:ycji, yummc a:dobong. 5Mo:pvso cddv:koi ngo du:ycji, ngo mo:pvsok pvangc.”

6Bv cdcm lutu:la amo:bo takircm sugla amo:dcm yondupto odokkc tani:dok amikkvdv:dcm yonnvgbito bvm yondupnam amo:dokki, scmpc lula, Gvkang, Siloam pa:ta:do vrpu:suta:ka (okodcm Mclvgnammc cmdagaji.) 7Cdcmpila bv gvla vrpu:suto odokkc ka:beglangkula gva:toku. 8Kumrvko:rvkvdv:dc odokkc cdc sc:kobulu bvm kogo:nc cmna ka:la dungaji, luto, “Cdc tedla dungge:la kogo:ncdc:ma:lang?” 9Akke luto “Cdc bvyvng;” akke luto, “Ma:, cmpige:la bv bvkkcmpc incko.” Bv luto, “Ngo cdc tani:dc.” 10Bulu bvm luto, “Cmpcmvlo nok amikkvdv:dc kapc darkangkun?”

11Bv lubito, “Jisu cmnam tani:dc amongcm yonbito odokkc ngok amikso yonnvgto odokkc ngom luto, Siloampc gvkang odokkc vrpu:suta:ka; cdcmpila ngo gvto odokkc vrpu:sula ngok amigc ka:pangkangku.” 12Bulu Bvm luto, “Bv okolo du:n?” Bv lubito, “Ngo kinmang.”

Csa:mokunamdcm Parisi:kvdv:dc Mago:la ka:nam

13Bulu tani:dcm Parisi:kvdv:do:pc gva:boto sc:kobv po:pc miglula dungaji. 14Cdcmpidodcm cdc yodla ager germa:pc du:nam longgai cdvlo Jisubv amo:dcm yondubkaji odokkc bvk amikdc darkaji. 15Parisi:kvdvdc lckoda Bvm kapc ka:pa:tokuji tawuto. Odokkc bulum bv luto, “Bv ngok amikso yondubnam amongcm yonnvgto, odokkc ngo vrpusukaku, odokkc ngo ka:begkang.”

16Parisi:kvdv:dok akke luto, “Sc tani:sc Ru:ncpvnc kotokkcmang, kapila:nc Bv yodla ager germa:pc du:namdcmpc du:mang.” Ckvdaggom akedc luto, “Kapc papi:tani: akonc cdcmpinc agerko gerla:ycn?” Buluk ara:do angu angunammc lenkang. 17Cdcmpila lckoda bulu miglunc tani:dcm luto, “No okkomna Bvk agomcm ludon, Bv:jc nok amigcm darmotonc?” Bv luto, “Bv lungor luncko.”

18Jiwukvdv:dc bv:jc migludagai odokkc ka:begkangku, ka:begkunc tani:dok anc-abudcm gogge:la, 19“Sc noluk awwoi, sc:kom nolu migludopc otungai cmna ludonc? Cmna tadma:sisscm bulu mc:jvgtomang. Kapc bv su:pak ka:begkangkun?”

20Bvk anc-abukvdv:dc lubito, “Ngolu kindag jc sc ngoluk awwo, odokkc 21Cmpige:la bv kapc su:pak ka:begkangkunc ngolu kinmang, cdcmpcmanggom bvk amig pirnyidcm sc:ko ka:begmotokusong ngolu kinmang. Bvm tadtoka; bv bottaka:bong, bv avyc avkc agomcm lubisuycpc.” 22Bvk anc-abudc cdcmpc luto kapila:nc bulu Jiwukvdv:dcm pcsodagai, kapila:nc Jiwukvdv:dc odo ru:sutagai sc:kaiyc Bvm Kristobv cmna luycnc, bvm kumko okumdokkc mcn nenlvgyc. 23Cdcmpila bvk anc-abudc luto, “Bv bottaka:bong, Bvm tawusutok.”

24Cdcmpila lckoda bulu miglunc tani:dcm gogto, odokkc bvm luto, “Ru:ncpvncmc aipai cmtok; ngolu kindag jc sc tani:sc pa:pkannc.” 25Bv lubito, “Bv pa:p kannciycsong kamangcincsong, ngo kinmang; agom apirkodan kindag, jc ngo migludagagom, su:pak ka:begkangku.”

26Bulu bvm luto, “Bv okkom nom ibiton? Bv kapc nok amigdcm ka:begmotokun?” 27Bv bulum lubito, “Ngo nolum lubbcitobong, odokkc nolu tadangcitomang. Nolu kapila cdcm tadlv:dakkun? Nolusinnci Bvk agom tadjvgla gvmvnncpc ilv:dang?”

28Odo bulu bvm scmpc lula, aima:pc ge:to, “No:na bvk agom tadjvgla gvmvnncnc, cmpige:la ngolu Mose:kc agom tadjvgla gvmvnnc. 29Ngolu kindag jc Ru:ncpvncbv Mose:mc agomcm luto, cmpige:la sc amiscmdan, ngolu kinmang bv okolokkc gvdu:song.”

30Cdc tani:dc lubito, “Kapila, cdc mc:la mcgapla:ma:pc ipcnammcn! Bv okolokkc gvnncji nolu kinmang, odokkc ckvdaggom Bv ngok amigcm darmotoku. 31Ngolu kindag jc Ru:ncpvncbv pa:p kanc tani:lok agomcm tadmang cmpige:la sc:koiyc Ru:ncpvncmc kumncmvlo odokkc Bvk mcngkampc agercm geryc, Ru:ncpvncbv Bvk agomcm taddag. 32Mo:pvsok ru:lenpvlendodokkc miglupci onam tani:ako amigcm ka:begmotoku cmnamcm tadkvmang. 33Sc tani:sc Ru:ncpvnc-kolokkcmanga:mvlo, Bv okkomsin ila:ma:yai.”

34Bulu bvm lubito, “No papi:loksin papi:pc onamc, odokkc noi ngolum luyirpcnncn?” Odokkc bulu bvm nv:lenlvgto.

Yalodok Agomlo Miglunam

35Jisubv tattojc Bvm cdcmpc nv:lennvgto cmna, odokkc bvm rvgsuge:la Bv luto, “No tani:kc Awodcm mc:jvgdagyc?” 36Bv tawuto, “Odokkc sc:kon Bv, miganga, ngo:jc Bvm mc:jvgpcnamcnc?” 37Jisubv bvm luto, “No Bvm ka:tobong odokkc sc:kobv nom agom ludu:nc sc Bv:bong.” 38Bv luto, “Ru:tuma, ngo mc:jvgdag.” Odokkc Bvm bv kumto. 39Jisubv luto, “Kcba: ba:nam lcgangc ngo mo:pvso:pc gvdung, jc sc:kobulu ka:pa:ma:nc ka:pa:yckupc cmna, odokkc sc:kobulu ka:pa:dagji bulu migluycpc cmna.”

40Parisi:kvdv:dok akke Bvk kcra:dok dagnc kvdv:dc cdcm tadbegto, odokkc bulu Bvm luto, “Ngolusinyc migludang?” 41Jisubv lubito bulum, “Nolu migluya:mvlo, nolukkc imurc kama:yai; cmpige:la su:pak nolu ludag, ‘Ngolu ka:begdag.’ Noluk imurc nolukolo du:tvkang.”

Currently Selected:

JO:N 9: MISIBSI

Highlight

Copy