JO:N 10

Bera Soben Kanggabya:ncdok kvkanna Kvbinam Do:yvng

1“Aroru:pc aroru:pc, ngo nolum lubidung, sc:kobv yabgodog berasoben tumko okumdo:pc gva:ma:ycnc cmpige:la angu lambclok renga:yc, cdc tani:dc dopsongc odokkc rodkutnc; 2cmpige:la sc:kobv yabgodok gva:dagnc bv:na berasoben kvdv:dok ka:svncdcnc. 3Bvk lcga:pc yabgodok kanggabya:ncdc moge:bidag; bera sobenkvdv:dc bvk agomcm tadkindag, odokkc bvk avkc bera kvdv:dcm bv amin minna gogdag odokkc cdcmbulum go:lenbomdag. 4Bv cdvlo bvk cdc appv:dcm go:lenbomdagji, bv bulum gvpong gvpo:la gvdag, odokkc bera kvdv:dc bvk lcdu lcdulo gvmvndag, kapila:nc bulu bvk gomugcm tadkindag. 5Kinma:nam tani:kolok lcdulo bulu gvmvnma:yc, cmpige:la bulu bvkkolokkc dugpandugransuyc, kapila:nc bulu kinma:nam tani:kvdv:dok gomugdcm tadkinmang.” 6Jisubv sc kvkanbinam do:yv:scm bulum kvtc:la kvnaka, cmpige:la Bv okkom lubidungaji bulu tadkintomang.

Jisubv Ainc Me:r Soben Kanggabya:ncdc

7Cdcmpila Jisubv bulum lckoda lubito, “Aroru:pc, aroru:pc, ngo nolum lubidung, ngo bera sobenkvdv:dok yabgodc. 8Ngom sc:kobulu gvpongkanc cdc appv:dc dopso:nclang rodkudnc; cmpige:la bera sobenkvdv:dc buluk agomcm tattomang. 9Ngo yabgodc; sc:koiyc ngogkolok gva:mvlo, bvm moturyc, odokkc gvlenycsin gva:ycsin odokkc dogongkowycm pa:yc. 10Dopsongkvdv:dc dopsongkapclang mokekapc odokkc mopen-moyenkapc gvdag; Ngo gvka bulujen turnamcm pa:ycpc cmna, odokkc cdcm pv:se-pv:yedopc pa:ycpc cmna.

11“Ngo:na ainc bera soben kanggabya:ncdc. Ainc bera soben kanggabya:ncdc bvk turnamdcmci bera sobenkvdv:dok lcgangc tolvgdag. 12Sc:kobv dorra langa:nammcnc odokkc bera soben kanggabya:ma:nckonc, bera sobenkvdv:dc sckkc avkcma:nc, ra:miki kvdv:dc duga:dopc ka:begycmvlo odokkc bera soben kvdv:dcm mcpakge:la dugpagamdag; odokkc ra:miki:kvdv:dc cdcmbulum gamna rcgpit-rcgyit supakdag. 13Bv dugpakdag kapila:nc bv dorla langa:nammc odokkc bera sobenkvd:dcm ka:sv:mang. 14Ngo:na ainc bera soben ka:sv:ncdc; ngo avkckvdv:dcm kindag odokkc ngok avkckvdv:dc ngom kindag, 15Abudbv ngom kapc kindagji odokkc ngo Abudcm kindag; odokkc ngok turnamcm bera soben kvdv:dok lcga:pc tolvgdag. 16Odokkc ngokkc angu bera sobenc du:da, okodc:bulu sc kcrc:sokkcma:ji; ngo bulumsin gonga:rungkupcnammc, odokkc bulu ngok gomugcm tadkindag. Cdcmpidag odo kcrcng akkongkopc iyc, ka:sv:nc akkongko. 17Odok lcgangv:pc Abudc ngom aipc mc:dag, lcga:dc ngok turnamcm ngo tolvgdag, ngo:jen cdcm lckoda la:la:dokupc. 18Sc:kobvsin cdcm ngokkolokkcm la:mang, ckvdaggom ngo cdcm ngok mcngkampc tolvgdo. Ngokkc cdcm lc:nanc lc:lang-gvlangc dung, odokkc ngokkc cdcm langkunannc la:lang-gvlangc dung; cdc lulvgdcm ngok Abukolokkcm ngo pa:to.”

19Cdc agomkvdv:dok lcgangki lckoda Jiwukvdv:dok ara:lo angunammc lengkang. 20Bulukkodok bojcrungkonc luto, “Bvkkc uiko dung, odokkc Bv simadncko; kapila Bvk agomcm tadycn?” 21Akedc lulo, “Sc:bulu sckkc uiyc du:nc bvk lunammang. Uiakonc miglunc tani:lok amigcm darmola:dagnci?”

Jisumc Lupaknam

22Jerusalemdo Bipaknamdok dopun-dojardcm dodungai; 23odo dvgvnai, odokkc Jisubv kumko okumdo gvgo:la dungai, Solomonkc baranda:do. 24Cdcmpila Jiwukvdv:dc Bvm yadribomge:la luto, “No cddvkopc ngolum mcmola du:moycn? No Kristobvmvlo, ngolum aiyo:pc lutei?”

25Jisubv bulum lubito, “Ngo nolum lubito, odokkc nolu mc:jvgmang. Ngok Abukc aminno gernam agerkvdv:dc, ngom lukanbidag; 26cmpige:la nolu mc:jvgmang, kapila:nc nolu ngok bera sobenkvdv:dok ara:dokkcmang. 27Ngok bera sobenkvdv:dc ngok gomugcm tadkindag, odokkc ngo bulum kindag, odokkc bulu ngok lcdulo gvmvndag; 28odokkc ngo bulum lo:dvscm turyarla turla du:nam turnamcm bido, odokkc bulu cdvlosin yogpakma:yc, odokkc sc:kosin bulum Abudok alagdokkcm sopakla:ma:yc. 29Ngok Abubv sc:kobv bulum ngom bitagnc, appvngcmyam bottaya:nc, odokkc sc:kosin bulum Abudok alagdokkcm sopakla:ma:yc. 30Ngo:lang Abubv akkongc.”

31Jiwukvdv:dc lckoda vlvngcm la:sangamto Bvm crkepc cmna. 32Jisubv bulum lubito, “Ngo nolum bojcrungko ainc agercm Abudokkcm lcngkanto; odokbuluk okodok lcgangc nolu ngom vlvngki crkepc cmna mc:dang?” 33Jiwkvdv:dc Bvm luto, “Nom ainc ager gernam lcgangc vlvngki crmang cmpige:la lugc-gcnam lcgangcmvn; kapila:nc no, tani:tu:layam, avdc Ru:ncpvncpc lusudag.”

34Jisubv bulum lubito, “Noluk lujvgluro kvdv:do adma:lang, ‘Ngo ludung nolu Ru:ncpvnckc?’ 35Bulum Bv Ru:ncpvnc kvdvngc cmmvlo sc:kobulukkolo:pc Ru:ncpvnckc agomc pvngangka:ji (odokkc Ru:nckc agomcm adgabcm luyotla:mang,) 36nolu ludonci Bvm sc:kom Abudc bipaktonc mo:pvso:pc mclvgtonc, ‘no aima:pc lugcgcdung,’ ngok lunam lcgangc, ‘Ngo Ru:ncpvnckc Awodc cmna?’ 37Ngok Abukc agercm ngo gerra du:ma:du:mvlo, odo ngom mc:jvgyoka; 38Cmpige:la ngo gerdu:mvlo cdcmbulum, nolu ngom mc:jvgcimanggom, agerkvdv:dcmci mc:jvgtoka, odomvlo nolu kinycpc odokkc Abudc:jc ngokkolo dung odokkc ngo Abudokkolo dung.”

39Lckoda bulu Bvm ycnggabpc cmna mcngka:la ka:to, cmpige:la Bv buluk alaglokkc gvsukkang.

40Bv Jordan kekonpc gvpakkang okolo Jo:nbv baptismo biyangar pongkaji, odokkc odo Bv dungkang. 41Odokkc bojcrungc Bvkkolo:pc gva:to; odokkc bulu luto, “Jo:nbv oko kanggodcmsim imangai, cmpige:la Jo:nbv sc tani:sok agomcm lunam appv:dc arrai.” 42Odokkc bojcrungc olo Bvm mc:jvgto.

Currently Selected:

JO:N 10: MISIBSI

Highlight

Copy