JO:N 6

Jisubv Lv:ying Anggoko Tani:ycm Domonam

(Met 14.13-21; Mark 6.30-44; Lu:k 9.10-17)

1Odok lcdupc Jisubv Galil siycng asidok kekondo:pc gvkongka okodc Tiberiang siycnga:ji. 2Odo tani:yc bojcrungkonc Bvk lcdulo gvmvnkang, kapila:nc bulu cdc kinam ka:nc tani:kvdv:do mcngapla:ma:nam ager gernam kvdv:dcm ka:to. 3Jisubv adi: talc:pc re:sangkang, odokkc odo Bvk agom tadjvgla gvmvnnc kdv:dokki lckopc tedbosuto. 4Cdcmpidodcm gvbo:la gvnamdok, Jiwudi: kvdv:dok dopun-dojardcm donamdc pvngangkangaboi.

5Bvk amigcm bcrasa:la, odo, odokkc tani:yc bojcrungkopc Bvkkolo:pc gva:namdcm ka:la, Jisubv Pilipmmc luto, “Kapc iycn ngolu pitangko rcmvlo, sc tani:kvdv:sc doycpc?” 6Cdcm Bv bvm anka:la ka:pc cmna luto, kapila:nc Bv okkom iycji avdci kindagai. 7Pilipbv Bvm lubito, “Lvngko anyi adoli: arckopc pitangcm rcdaggomci buluk appv:dokkcpc adji: adji:opci pa:dopc pv:ma:yc.” 8Bvk agom tadjgla gvmvnnc tani:akonc, Andriwubv, Simon Pitorkc bvrodc, bvm luto, 9“Ko:ako sc dung sckkc anyak pitang borngokolang ongo pirnyiko du:ji; cmpige:la cddo:bulu okopc iycn siddvnc tani:kvdv: sokkcpc?”

10Jisubv luto, “Tani:kvdv:dcm tedtu:motok.” Cdcmpinamc odo bojcrungko ncsinc dungai; cdcmpila tani:kvdv:dc tedamkang, kvnamlok lv:ying anggo kvramkopc. 11Jisubv odokkc pita:dcm la:sa:to, odokkc Bv cdcm aipai bitonc, Bv cdc tedla du:nc kvdv:dcm orto; cdcmv:pc ongodcmsin, bulu cddvkoi kodagaji. 12Odokkc cdvlo bulu dotv:namko dotoji, Bvk agom tadjvgla gvmvnnc kvdv:dcm luto, “Orngo:la mcpaknam kvdv:dcm langkumsutok, adjiokosin onyokma:dopc.” 13Cdcmpila bulu cdcmbulum gempa pvyingkolang pvnyikopc anyak pitang borngodok orngo:dcm tvkumsuto, cdc sc:kobulu dongatla mcpaktoji. 14Cdvlo tani:kvdv:dc cdc kanggod lcngkannamdcm ka:toji, bulu luto, “Sc:ru:bongkc aropakpc mo:pvso:pc gvpcnc lungor luncdc!”

15Bulu Bvm ke:ke:mo:re:p langa:la buluk migompc mopc cmnamdcm kinna:yam, Jisubv atcro:dc adi:pc gvpakkang.

Jisubv Asi Talc:dok Lambc Gvnam

(Met 14.22-33; Mark 6.45-52)

16Yumc ayirnammc, Bvk agom tadjvgla gvmvnnc tani:kvdv:dc siycng asido:pc gvikang, ollungkolo angkang, 17odokkc Kapernaumpc kongkongkang. Odo yumckangaboi, odokkc Jisubv bulukkodo:pc odosin gvpv:mvnmangada. 18Siycng asidc lu:sangkangai kapila:nc bottcru:nc csarko sarsangkangai. 19Bulu mail awum appi:ko ko:tobong, bulu Jisumc siycng asido lambc gvdopc odokkc buluk ollung kcra:do:pc gva:dopc ka:to. Bulu pcsokangai, cmpige:la Bv bulum luto, 20“Sc ngo:mvn; pcsoma:pcka.” 21Odo bulu Bvm ollung ara:do a:bopc mc:pokang, odokkc oddung ollu:dc tcmpvdo konga:to bulu oko amo:do:pc ko:dungaji.

Tani:kvdv:dc Jisumc Manam

22Longkondo kekondo du:paknc tani:kvdv:dc ko:nam ollung asongko odo du:pakkang, odokkc, Jisubv ollu:do Bvk agom tadjvgla gvmvnnc tani:kvdv:do gva:mvnmangai, cmpige:la agom tadjvgla gvmvnnc tani:kvdv:do atcrongc gvpakkang. 23Cdcmpidaggomsin, Tiberia:dokkc ollungc pv:do oko mo:takdo Ru:tumbv aipai bige:la buluk pitangcm dokaji. 24Cdcmpila tani:kvdv:dc ka:to jc Jisubv odo kamangai, Bvk agom tadjvgla gvmvnnc tani: kvdv:dc:singom, bulu av avyc ollung kvdv:do a:to odokkc Kapernaumpc, Jisumc mala gvkang.

Jisubv Turnamlok Pitangc

25Bulu kekondo Bvm pangkunammc, bulu Bvm luto, “Rabbi, no cdvlo so:pc gvton?” 26Jisubv bulum lubito, “Aropakpc, aroru:pc, ngo nolum lubidung, nolu ngom mcngapla:ma:nam kanggodcm ka:begnamkokkimang, cmpige:la nolu pv:namkopc pitangcm dola:mvn madu:n. 27Yogpakpcnc donam tv:namdok lcgangc agercm geryoka, cmpige:la oko donamdc turyarla turnamdokkcpc du:tvdagnc odok lcga:pc ilangka, okodcm tani:kc Awodc nolum biycji; kapila:nc bvkkolo Abu Ru:ncpvncbv bvk muorcm tubjedlvgdag.” 28Odo bulu Bvm tawuto, “Ru:ncpvnckc ager gerpcnammvlo ngolu okkarcm ipcnammcn?”

29Jisubv bulum lubito, “Ru:ncpvnckc agerdc scmpcna, jc sc:kom Bv mclvgtagji nolu Bvm mc:jvgtoka.” 30Cdcmpila bulu Bvm tawuto, “cmpcmvlo no oko kanggodcm lcngkanycn, ngolu ka:dopc, odokkc nom mc:tindopc? No oko agercm gerdon? 31Ngoluk abukvdv:dc yumra:do mannangcm doka; cdcm adla lc:namdcmpc, ‘Bv bulum taycng amo:tok pitangcm dodopc bika.’ ”

32Odo Jisubv bulum lubito, “Aroru:pc, aroru:pc, ngo nolum lubidung, taycng amo:tokkcm sc:kobv pitangcm bikaji cdc Mose:bv:mangai, ngok Abubv:mvn nolum aro pita:dcm taycng amo:tokkcm bidang. 33Kapcnc Ru:ncpvnckc donamdc taycng amo:tokkc oleddag, odokkc mo:pvscm turnamcm bidag.” 34Bulu bvm luto, “Ru:tuma, ngolum lo:dcm cdc pita:dcm bi:ka.”

35Jisubv bulum lubito, “Ngo:na cdc turkunamdok pita:dc; sc:kobv ngokkolo:pc gva:ycnc bv kcno:ma:yc, odokkc sc:kobv ngom mc:jvgycnc bv cdvlosin tv:lv:ma:yc. 36Ckvdaggom ngo nolum ludung jc nolu ngom ka:begto odokkc ckvdaggom mc:jvgmang. 37Abukc ngom binam appv:dc ngokkolo:pc gva:yc; odokkc ngokkolo:pc gva:ncdcm ngo cdvlosin mcnpakma:yc. 38Kapila:nc ngo taycng amo:tokkc gvidung, ngok avkc mcngkamdcmpc gerkapcmang, cmpige:la sc:kobv ngom mclvgtagnc Bvk mcngkamcm gerkapc; 39odokkc scmpc Bvk mcngkamdc ngom sc:kobv mclvgtagnc, jc ngo cdc ngom binam appv:dcm akosin yogmopcma:nammc, cmpige:la du:tcr dungapdo la:sangam-kupcnammc.” 40Kapila:nc sc ngok Abukc mcngkamdc jc sc:kobvi Awodcm ka:doji odokkc mc:jvgdoji Bvm bvkkolo turyarla turnamdcm pa:yc; odokkc bvm ngo du:tcr longcdo sosa:ycku.

41Jiwudi: kvdv:dc odo bvn-bvnaitakkang Bvm, kapila:nc Bv luto, “Ngo cdc taycng amo:tok olednc donamdc.” 42Bulu luto, “Sc Josepkc awo Jisubv:ma:lang, sck ancdcmlang abudcm ngolu kindagji? Kapc Bv cmpcm su:pak, ‘Ngo taycng amo:tokkc gvidung cmna luycn’?”

43Jisubv bulum lubito, “Nolu av avkvdv:dc bvnbvnaiyok. 44Sc:kosin ngokkolo:pc gva:la:mang Abudc sc:ko ngom mclvgtagji bvm mc:bomola gva:moma:mvlo; odokkc bvm ngo du:tcr dungap longcdo turmoycku. 45Cdcm lungorlunam kvdv:do adla lc:tag, ‘Odokkc bulum Ru:ncpvnc kokki luyircm lubiyc.’ Sc:kobv Abudokkcm tadla tadyirsutonc ngokkolo:pc gva:dag. 46Sc:kobv Ru:ncpvnckotokkc mclvgnammcnc bv:ma:mvlo sc:kosin Abudcm kangkvmang; Bv Abudcm kangkvtak. 47Aroru:pc, aroru:pc, ngo nolum lubidung, sc:kobv mc:jvgdagnc turyarla turnamc dung. Ngo:na turnamsok donamdc. 48Noluk abukvdv:dc yumra:do mannangcm doka, 49odokc bulu sikang. 50Cdc taycng amo:tok gvinc donamc, tani: akonc cdcm domvloi sima:yc. 51Ngo:na turnc donamdc okodc taycng amo:tokkc gvidu:ji; sc:koiyc akonc sc donamscm domvlo, bv lo:dvscm turyc: odokkc mo:pvsok lcgangc turnam bipcnam donamdc ngok adinc.”

52Jiwudi: kvdv:dc odo buluk buluk ara:lo scmpc lula luker-luyer mvnsukang, “Sc tani:sc Bvk adincm dodopc bila:ycn?”

53Jisubv bulum luto, “arorupc nolu tani:kc Awodok adindcm doma:sisscm odokkc Bvk i:dcm tv:ma:sisscm, nolukkc avkc turnamc kamang; 54sc:kobv ngok adincm doycji odokkc ngok i:ycm tv:ycji turyarla turnamc dung, odokkc ngo bvm du:tcr dungap longcdo turmoycku. 55Kapila:nc ngok adinsc aropakpci donamc odokkc ngok i:dc aropakpci tv:namc. 56Sc:kobv ngok adincm doycji odokkc ngok i:ycm tv:ycji ngok dungkodo lcdulo du:mvn-dagmvndag, odokkc ngo:sin bvk dungkolo du:mvndo. 57Turra du:nc Abudc kapc ngom mclvgtoji, odokkc ngo Abukc lcgangkokki turdu:nc, cdcmpc sc:kobv ngom doycnc ngok lcgangkokki turyc. 58Sc:na donamdc okodc taycng amo:tokkc gvidu:nc, abukvdv:dc doge:la sinamdcmpinc mang; sc:kobv sc donamscm doycnc lo:dvscm turyartvla du:yc.”

59Scm Bv kumko okumlo lubika, Kapernaumdo Bv luyirla du:dodcm.

Turyarla Turnamdok Agomkvdvng

60Agom tadjvgla gvmvnnc tani:kvdv:dok bojcrungkonc, cdcm cdvlo tattoji, luto, “Sc tornc agomko; cdcm sc:ko tadla:ycncm?”

61Jisubv cmpige:la, Bvk agom tadjvgla gvmvnnc kvdv:dc cdcm bvnbvnaila ludung cmna kinna, bulum luto, “Nolu cdcm tadnyi:pci taddang? 62Cmpcmlo tani:kc Awodcm Bv po:pc okolo dungaji dc:sa:dokupc ka:mvlo kapc iyya:n nolu? 63Cdc yalodc:mvn turnamcm bincdc, adindc oko arrcsin kamang; ngok noluk agom lunamkvdv:dc yallolang turnamc. 64Cmpige:la noluk ara:lo sc:kobulu mc:jvgdagji dung.” Kapila:nc Jisubv lua:dan-dokkoboi kindagai sc:kobulu cdc mc:jvgma:nc kvdv:dca:ji, odokkc cdc sc:kobva:ji cdc Bvm mirupc tolvgpcncdc. 65Odokkc Bv luto, “Cdcmpila:na ngo nolum lubitonc jc Abudc:ma:mvlo sc:kobv:sin ngokkolo:pc gva:la:mang Abudc togcsuma:mvlo.”

66Odok lcdudokkc bojcrungko agom tadjvgla gvmvnnc kvdv:dc gvladamkangku odokkc Bvk lcdulo cdvlosin gvmvntokuma:bong. 67Jisubv vyvngkolang anyidcm luto, “Nolusinyc gvpaklv:dakkun?”

68Simon Pitorbv bvm lubito, “Ru:tuma, ngolu sckkolopcn gvycn? Nokkc lo:dvscm turyarla turnamdcm binc gomugdc dung, 69Odokkc ngolu mc:jvgtobong, odokkc ngolu kintobong jc no Ru:ncpvnckc angunncdc.”

70Jisubv bulum lubito, “Ngo nolum bala balenmangalang, vyvngkolang anyidcm, odokkc nolukkolo akonc uiyc?” 71Bv Simon Iskariotkc awo Judangkc agomcm luto, kapila:nc bv, vyvngkolang anyidok akkai, Bvm sc:ko miru alaglo tolvgpcncdcaji.

Currently Selected:

JO:N 6: MISIBSI

Highlight

Copy