JO:N 13
13
Jisubv Bvk Agom Tadjvgla Gvmvnnc Tani:kvdv:dok Allcm Vrbinam
1Cdcmpc idodcm Gvbo:la gvla dopun dojardok po:pcbong, Jisubv Bvk mo:pvsokkc Abukoto:pc gvpakkunam ayirdc aninka:bong cmna cdvlo kintoji, mo:pvso sc:kobulu du:nc cdcmbulum ayangge:la, Bv bulum du:tcrdo:pc aipcmc:to.
2Odokkc dodo tv:dodcm Simonkc awo Iskaroitkc asindo cdvlo uidc Bvm mirupc topakpc cmna, asindo angka:ji, 3Jisubv, Abudc Bvk alagdo appvngcm bitung cmna kinna:yam, odokkc Bv:jc Ru:ncpvnckotokkc gvnnc odokkc Ru:ncpvnckoto:pc gvdagku cmna, 4dokodokkc darobkang, Bvk gcnam attarkvdv:dcm angupc lcngge:la odokkc Bv avyc dumcrkokki yc:rcgsuto. 5Odokkc soliangkolo asscm pvlvgto, odokkc agom tadjvgla gvmvnnc tani:kvdv:dok alckvdv:dcm vrrobbomkang, odokkc cdcmbulum Bvk yc:rcgsunanc dumcrdokki notpu:robbomkang. 6Bv Simon Pitorkolo:pc gva:to; odokkc Pitorbv Bvm luto, “Ru:tuma, no:yc ngok allcm vrdon?”
7Jisubv bvm luto, “Ngo okkom idu:nc no su:pak kinmang, cmpige:la lcdupc no mcngkinycpc.”
8Pitorbv Bvm luto “No cdvlosin ngok allcm vryoka.” Jisubv bvm lubito, “Ngo nom vrbima:mvlo, ngokkolo nokkc okkosin kamang.”
9Simon Pitorbv bvm luto, “Ru:tuma, ngok allo:scmmang ngok alakvdv:scmsin odokkc ngok mittukscmsin!”
10Jisubv bvm luto, “Sc:kobv vrsutagji bvkkc allo:dc:ma:mvlo vrsupcnamc kama:bong, cmpige:la bv appv:dc narc:dagbong; odokkc nolu narc:dag, ckvdaggom noluk appv:dc:mang.” 11Kapila:nc Bv kindagai sc:kobv mirupc tolvgycji, cdcmpilangv:ng Bv luto, “Nolu appv:dc narc:mang.”
12Cdvlo Bv buluk alckvdv:dcm vrtonc, odokkc Bvk gcnam attarkvdv:dcm gctokunc, odokkc Bvk dungkolo du:tokunc, Bv bulum tawuto, “Nolu kindang okkom ngo nolum itoji? 13Nolu ngom Luyirnclang Ru:tumc cmna gogdag; odokkc nolu goggabdag, kapila:nc ngo cdcmv:pc innc. 14Ngo cdcmpcmvlo, noluk Ru:tumclang Luyirncmvlo, noluk alckvdv:dcm vrbitomvlo, nolusin akonkc allcm akonc vrbipa:do. 15Kapila:nc ngo nolum lcngkanko ibito, nolujen ngok nolum ikampc iycpc. 16Aroru:pc, aroru:pc, ngo nolum lubidung, ager gerya:nckonc bvk ru:tumdcm bottcya:ncmang; cdcmanggom sc:kobvm mclvgtagnc mclvgncdcm bottaya:mang. 17Nolu sc agomkvdv:scm kinmvlo, nolu cdcmbulum imvlo gernc.
18“Ngo noluk appv:dok agomcm lumang; ngo kindag sc:kom balentagji; cdc lujvgluro adnam potindok lukampc iycpc cmna. ‘Sc:kobv ngok pitangcm dotonc bvk alc lcddom ngok lukamdcmma:pc ke:sa:to.’ 19Ngo nolum lubidung su:pak, cdcmpc cdc ima:dopc, jc cdvlo cdc iycnc nolu mc:jvgycpc ngo:jc Bv cmna. 20Aroru:pc, aroru:pc, ngo nolum lubidung, sc:kobv ngo sc:kobvm torvgsudagnc ngommci torvgsudag; odokkc sc:kobv ngom torvgsudagnc Bvmmci torvgsudag sc:kobv ngom mclvgtagji.”
Jisumc Topaknamdcm Lungornam
(Met 26.20-25; Mark 14.17-21; Lu:k 22.21-23)
21Cdvlo Jisubv cdcmpc lutonc, Bvk yalodc mc:pinmcngoksukang, odokkc lukanko lubito, “Aroru:pc, aroru:pc, ngom miru alaglo tolvgyc.”
22Agom tadjvgla gvmvnnc tani:kvdv:dc akoncm akonc kangka:mvnsuto, sc:kom Bv ludungaji cdcm kinma:la. 23Bvk agom tadjvgla gvmvnnc tani:akonc, sc:kom Jisubv aipc mc:dagaji, Jisukc angkcng ru:yido kcyirra dungai; 24cdcmpila Simon Pitorbv Bv tadyugo:la tadka:la ka:to odokkc luto, “Lutei ngolum sck agomcm Bv ludu:ji.”
25Cdcmpila cdcmpc gc:yamna dungge:la, Jisukc angkcng kcra:do dungge:la, bv Bvm tawuto, “Ru:tuma, cdc sc:kobv:n?”
26Jisubv lubito, “Cdc bv sckkolo:pc ngo sc pitang atakscm ngo cdvlo cdcm jvbutge:la biycji.” Cdcmpila cdvlo Bv cdc pitang atakdcm jvbuttoji, Bv cdcm Juda:mc bito, Simonkc awo Iskaroitmc. 27Odok atakdok lcdupc, Satan uidc bvkkolo angkang. Jisubv bvm luto, “Okkom no ipcmna idu:ji, lomdanna ita:ka.” 28Cdcmpinamc sc:kosin kapila Bv cdcm lutoji kinmangai. 29Akke mc:to jc, lcga:dc Judangkc murkong sogcndc du:la:yam, Jisubv bvm ludungai, “Donam tv:namdok lcgangc okkom rcpcnammcnc rcta:ka;” cdcmanggom jc bv o:kaiko opankvdv:dcm bipa:do. 30Cdcmpila, atakdcm langge:la, bv vgcmpc gvlenpakkang; odokkc odo yumcdaggai.
Anu Lulvg Lunamdc
31Bv cdvlo gvlenka:nc, Jisubv luto, “Su:pak tani:kc Awodcm amingvmoyc, odokkc Bvkkolo Ru:ncpvncbv amin gvkang; 32Ru:ncpvncbv Bvkkolo amin gvka:mvlo, Ru:ncpvncbv:sin Bvm Bvk avkolo amin gvmoyc, odokkc Bv vgcmpc amin gvmoyc. 33Ame:onc ko:kangkvdvnga, ckvdaggom adjio:koda ngo noluk lcdulo dung. Nolu ngom mayc; odokkc Jiwukvdv:dcm ngo lunamdcmpc su:paksin ngo nolum lubidung, ‘Okolopc ngo gvdagji nolu gvmvnna:mang.’ 34Ngo anu lulvgko ngo nolum lubidung, jc nolu akoncm akonc aipc mc:mvnsulangka. 35Odokkina appvng tani:yc kinyc jc nolu ngok agom tadjvgla gvmvnnc tani:yc, nolukkc akoncm akonc aipc mc:mvnsunamc du:mvlo.”
Jisubv Pitorkc Lupak Sunamdcm Luno:nam
(Met 26.31-35; Mark 14.27-31; Lu:k 22.31-34)
36Simon Pitorbv Bvm tawuto, “Ru:tuma, no okolopc gvdang?” Jisubv lubito, “Ngo okolopc gvdagnc nolu su:pak gvmvnna:mang; cmpige:la nolu lcdupc gvmvnyc.”
37Pitorbv Bvm luto, “Ru:tuma, kapila ngo supak nok lcdulo gvmvnna:ma:ycn? Ngo nok lcgangc turnamscm tolvgyc.”
38Jisubv lubito, “Ngok lcgangc no turnamcm tolvgycnci? Aroru:pc, aroru:pc, ngo nolum lubidung, no lcumkopc kinmang cmna luma:sisscm, porogc kogma:yc.
Currently Selected:
JO:N 13: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
