JO:N 12

Jisumc Betani:do Yonnvgnam

(Met 26.6-13; Mark 14.3-9)

1Gvbo:la gvla dopun dojardok longc longkcng po:pcdo:bong, Jisubv Betani:pc gvto, okolo Lajaru:bv dungaji, sc:kom Jisubv sikolokkcm moturtokuji. 2Odo bulu Bvm donamtv:namko ibito; Marta:bv ila:sa:la bito, odokkc Lajarubv Bvk lcdulo tcbuldok domvnnc kvdv:dok akonai. 3Meri:bv airu:pc arc kanc namponc tulangko adcrkopc la:to odokkc Jisukc alcdo yonnvgto odokkc Bvk alcdcm bvk dumvddokki tidpu:bitoku; odokkc cdc okumdc tula:dok arrc nambungkang. 4Cmpige:la Juda Iskaroitbv, Bvk agom tadjvgla gvmvnnc tani:kvdv:dok akonc (sc:kobv Bvm mirupc tolvgpcnc dca:nc,) luto, 5“Kapila sc namponc tula:scm lvngko awum adoli:lok kotoma:n odokkc opankvdv:dcm bitoma:n?” 6Cdcm bv luto, bv:jc opankvdv:dcm ka:svmosv:ncla mangai cmpige:la bv:jc dopsonga:nc cdcmpilangc, odokkc bvkkc murkong sogcndc du:la:yam okodcmci odo lvgdonc cdcmci la:dungai.

7Jisubv luto, “Bvk atcrongcm, bvm cdcm ngok yudo longcdok lcngangc lc:motoka. 8Opankvdv:dc lo:dvscm noluk lcdulo dung, cmpige:la nolu lo:dvscm ngom du:bosumang.”

Lajaru:kc Birudi:pc Ru:sunam

9Jiwukvdv:dok yadkumsunc bottcru:nc tani:kvdv:dc Bv odo dung cmnam cdvlo kintoji, bulu gva:to, Jisuo:mcmang cmpige:la Lajaru:mcsin kangkapc, sc:kom Bv sikolokkcm turmotokuji. 10Cdcmpinamc dormo ager gernckvdv:dok bottarya:nckvdv:dc Laja ru:mcsin mokepc cmna ru:suto, 11kapila:nc bvggongkokki Jiwukvdv:dok bojcrungc gvyodla gvdungai odokkc Jisumc mc:jvgto.

Jisubv Mopvla Vrroi Cmna Jerusalempc Gva:nam

(Met 21.1-11; Mark 11.1-11; Lu:k 19.28-40)

12Longkondo bottcru:nc yadkumsunc tani:kcrcngkonc sc:kobulu doko tvngkodo:pc Jisubv:jc Jerusalempc gvdung cmnamdcm tadbegto. 13Cdcmpila bulu kajur vsv:lok annc kvdv:dcm la:to odokkc Bvm gvrvgsupc cmna jc:la: jc:la gvlenamkang, “Vrroi! Ru:tumkc aminno sc:ko gvdu:ji Bv aipainc, Israel dokkci migomc!” 14Odokkc Jisubv dorme:nc gadong gure: adorko pa:la odo sa:to; cdcm adla lc:namdcmpc,

15“Pcsoyok, Jionkc omma;

ka:toka, gadong gure: awokolo sa:la,

noluk migomdc gvdo!”

16Bvk agom tadjvgla gvmvnnc tani:kvdv:dc cdcm tada:danna tadkintomang; cmpige:la Bvm cdvlo Jisumc amin gvmotonc, odo bulu mc:patoku jc cdc Bvk agomcm adtungai odokkc Bvm gerbito. 17Bvk lcdulo yadkumsula du:nc tani:kvdv:dc cdvlo Lajarumc Bv agodokkcm goglenkaji odokkc sikolokkcm darobmotokuji lukancm lubito. 18Yadkumsunc tani:kvdv:dc Bvm rvgsukapc gvnam lcga:dc jc bulu Bv cdc kanggoddcm lcngkanto. 19Parisi:kvdv:dc odo akoncm akonc luka:mvnsuto, “Nolu ka:begdag jc nolu okkomsin ila:mang; ka:tok, rcngamsci Bvk lcdulo gvmvnamkang.”

Girik ckkc Jisumc Manam

20Cdcmpidodcm cdc dopun dojar dodo tv:dodcm kumkapc gvnckvdv:dok akke Girikai. 21Cdcmpila cdcbulu Pilipkolo:pc gva:to, sc:kobv Galildok Betsaida dokka:ji, odokkc bvm luto, “Miganga, ngolu Jisumc ka:lv:dag.”

22Pilipbv odokkc Andriumc lubito; Andriubv Pilipkc lcdulo gvmvnkang odokkc bulu Jisumc lubito. 23Odokkc Jisubv bulum lubito, “Tani:kc Awodokkc amin gvmonanc ayirdc pvnga:du:bong. 24Aroru:pc, aroru:pc, ngo nolum lubidung, geu a:m apirkonc amo:bo kcdledla sa:ma:sisscm, cdc apirongkopc ila du:dag; cmpige:la cdc simvlo, cdc bojcrungko a:yc e:dag. 25Sc:kobv avkc turnamcm mc:bodagnc cdcm yogmodag, odokkc sc:kobv bvk turnamcm tayumycnc sc rcngamso turyarla turnam dokkcpc cdcm lc:dag. 26Sc:koiyc ngok mcngkam agercm germvlo, bv ngok lcdulo gvmvnru:pa:yc, odokkc ngo okolo du:ycji, odo ngok ager gerya:nckvdv:dc:sin; sc:koiyc ngok agercm germvlo, Abubv bvm mcngcyc.

Jisubv Bvk Sinamcm Lubisunam

27“Su:pakna ngokkc mc:pinmcngogcnc. Odokkc ngo okkomna luiya:ji? ‘Abba, sc ayirsokkcm ngom moya:tei cmycnci’? Ma: sok lcgangcmvn ngo sc ayirso:pc gvdu:n. Abba, nok amincm gvmotoka.” 28Odo taycng amo:tokkc gomugkko bugyi:kang, “Ngo cdcm amincm gvmoto, odokkc ngo lckoda cdcm amincm gvmoyc.” 29Odok dagla du:nc yadkumsunc tani:kcrcdc cdcm tatto odokkc cdc do:mvrko mvrkang cmna tatto. Akedc luto, “Taycng among lutad lunckonc Bvm luto.”

30Jisubv lubito, “cdc gomugdc noluk lcgang bukkang, ngok lcga:mang. 31Su:pak sc mo:pvsok kcbangcm ba:dung, su:pak sc mo:pvsok migom donckvdv:dcm la:pagamyc; 32odokkc ngo, cdvlo ngom mo:pvsokkcm la:sa:yckunc, appvng tani:ycm ngokkolo:pc la:sangamycku.” 33Bv kapinc sinampc siycji cdcm lcngkanpc cmna cdcmpc luto.

34Yadkumsunc tani: kvdv:dc Bvm luto, “Lujvg lurodokkcm ngolu tatto jc Kristobv lo:dvpc du:do. No kapc lula:don tani:kc Awodcm la:sa:ru:payc? Sc:kon cdc tani:kc Awodc?”

35Jisubv bulum lubito, “Pva:dc noluk lcdulo asudowongkoda dung. Pva:dc du:dodcm gvgo:toka, ckvma:mvlo kcmodc nolum mokombomycpc; sc:kobv kcmolo gvgodagnc okolopc gvdagji bv kinmang. 36Nolukkolo pva:dc du:dauso, pva:dcm mc:jvgtoka, odomvlo nolugom pva:dok omma:pc iycpc.”

Tani:kvdv:dok Mc:jvgma:nam

Jisubv cdcm luge:la, Bv gvpakkang odokkc bulukkolokkc avdc gvsisukang. 37Buluk kangkolo Bv cddvkoi kanggodcm lcngkankagom, cmpige:la:sinci bulu Bvm mc:jvgtomang; 38cdc lungor lunc Isaia:kc lunamdc lukamdcmpc iycpc cmna ikang:

“Ru:tuma, sc:konu ngoluk lubinammcm mc:jvgton,

odokkc sckkcpc Ru:tumkc alagcm lcngkanton?”

39Cdcmpila bulu mc:jvgla:tomang. Kapila:nc Isaia:bv lckoda luto,

40“Bv buluk amikkvdv:dcm migluammoto,

odokkc asinkvdv:dcmsin tormoto,

ckvma:mvlo bulu ka:pa:yc buluk amikkvdv:dokki

odokkc buluk asinkvdv:dokki mcngkinyai,

odokkc ngokkolo:pc gvlat yangkui bulum ka:pvtdokupc.”

41Isaia:bv cdcm luto kapila:nc bv Bvk amin gvnamcm ka:to odokkc bvk agomcm luto.

42Cdcmpc idag imanggom bojcrungc migom donckvdvngc Bvm mc:jvgto, ckvdaggom Parisi:kvdv:dcm pcsola bulum cdcm lukansutomang, ckvma:mvlo bulu kumko okum okumkvdv:dokkcm mcnnennvgpckc cmna! 43Kapila:nc bulu tani:kvdv:dok luitdcm mc:bodagai Ru:ncpvnckc luitdcmyam.

Jisukc Agomkokki Kcbang Ba:nam

44Odokkc Jisubv bottapc jc:la luto, “Sc:kobv ngom mc:jvgdonc, ngom mc:jvgmang cmpige:la Bvm mc:jvgdag sc:kobv ngom mclvgtagji. 45Odokkc sc:kobv ngom ka:begdagji Bvm ka:begdung sc:kobv ngom mclvgtu:ji. 46Ngo pva:pc ila mo:pvso:pc gvdung, jc sc:kobvi ngom mc:jvgycnc bv:jen kcmolo du:tvpc ima:yc. 47Sc:koiyc ngok lunam agomkvdv:dcm tadyc odokkc cdcmbulum mcnggabla lc:ma:ycnc, ngo bvm kcbangcm ba:ma:yc; kapila:nc ngo rcngam kcba:bangkampc gvmang cmpige:la rcngamscm moturkapcmvn gvdu:n. 48Sc:kobv ngom lupakycnc odokkc ngok agom lunamkvdv:dcm torvgsuma:ycnc kcbang ba:namko du:do; ngok lunam agomkvdv:dc:na du:tcr longcdo bvk kcba:pc iycku. 49Kapila:nc ngok avkc ilang gvlangki ngo agomdcm lumang; Abudc sc:kobv ngom mclvgtagnc Bv avdci ngom lulvgcm lutag okkom lupcnamcji odokkc okko cmpcnammcji. 50Odokkc ngo kindagjc Bvk lulvgnamdc turyarla du:nam turnamdc. Ngo okkom ludonc, cdcmpila, Abudc ngom lukamdcmpci ngo ludo.”

Currently Selected:

JO:N 12: MISIBSI

Highlight

Copy