ZEKARIA 13
13
1“Chipau mai ge Dabid ki benai Jerusalem ge lungme hangge penui je hemui gene benai mâ-kahebâbe gene hui’nchi ra keringbe dekua ze lat kai gu lei.
2“Zai chipau mai ge heram gene heraluîtewbe ramme ji ze I ne lutua ’ndu lei, chidezai penui je peize ’nningdau bam ta ra hangge zeu; zai heram gene kemeume ramme benai herui kahebâbe ramme ze du I ne tei’mbia ’ndu lei. 3Zai mige kemeu gum ze sappat dai dizai â, pechu lungkeupui benai lungkeupeu ne pechu, ‘Nang Tingwang ji gene mâ-sabe ziegene, nang â ring ra mak lei,’ ze acheu gai ra lei; zai pa ne kemeu samsabe luage pechu lungkeupui benai lungkeupeu ne pechu huîpelapik kai ra lei. 4Chipau mai ge kemeume leine pe gu-gu kemeu samsabe luage ’ngngam du de lei; miramme je choa ra hangge kemeume gu mâ-gêu mechuapui tiebe pa kai ra mak lei, 5kane pa ne, ‘I â kemeu’mpeu mak lei, I â kedei ge helu tâ tewpeu lei; zai I hena’ngka gene tâtew-teuchube kau dadegeu,’ ze acheu gu lei. 6Zai mige ne pechu, ‘Ning ching ge ’ndaikau kiê ramme lau?’ ze ’nneu lêuzai â, pa ne, ‘A kangme ki gene achu tewjâm bei lei,’ ze acheu gu lei,” ze Tingwang ne kacheu de lei.
Hera gu Melireîpeu je Tewchatbe
7“Hiazutkie gau,
a gu melireîpeu peireige ’nggi ze ’nrakchu lau,
a chângge sappeu zeu,”
ze Tingwang baudime Rapeu ne kacheu de lei.
“Melireîpeu je lak kai be lau,
dezai meli ramme rariptat te ra hangge zeu;
a gu ziemmena kecheibe kau ramme je I ne ’nggi gu lei.
8Heram pelane ge dau chum ge dau na je â tew’ngga ’ndu lei,
zai penui ga gai du lei,
zai dau chum ge dau kat â ’nzuak kai bu lei.
9Zai ai dau chum ze â hemi ge I ne kai ’ndu lei,
zai gepût je tewka’nchi gum ze penui je tew’nchi gai gu lei,
zai gechâk je kaheda gum ze penui je heda gu lei.
Penui a ji kû gu lei,
zai I ne penui kuâ kak kai gu lei.
I ne, ‘Penui â,
a gu ziemmename lei,’ ze acheu gai gu lei;
chidezai penui ne,
‘Tingwang â, a Rapeu lei,’
ze penui acheu gu lei,”
ze Tingwang ne kacheu de lei.
Currently Selected:
ZEKARIA 13: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
