ZEKARIA 12
12
Bechâng dezai Jerusalem je Lupatkairabe
1Israelme tedeu ge Tingwang gu sam: Tingwang, tingsung kedibe liâmpat kai, kedei tei’ntua gai zai ziemmena dage keringbe bam ra tewgaipeu: 2“Pie le lau Jerusalem je I ne pa’mpa-pa ge lungguâme leine hangge kakedunbe piak hang tew gai zi gu de lei; Jerusalem peireige chumwangbe ge Juda peireige du tewtâu gai gu lei. 3Chipau mai ge Jerusalem ze ziemmena zat leine hangge tingchukâng keritbe hang I ne tew gai gu lei; chize kagesuime leine â, hejam’nteukala gai gu lei. Zai kedeirei ge heramzatme leine ne chipau chukâng je ’nggiwang gu lei. 4Chipau mai ge hekun ramme leine je hing ze pedapsap bam ra, zai hekun chingchuame mie gai de ra I ne tewkeleu gai gu lei, ze Tingwang ne kacheu de lei. Kane Juda kibaume je â I ne pe ma piekua ’ndu lei, penui teureime heramzatme ramme gu hekun ramme mik I ne tewchitbe luage zeu. 5Juda ki peuname ramme hela ge lungme ramme ne penui runne penui karai ge ‘Jerusalem ge lungme â Tingwang baudime Rapeu, penui Rapeu ziegene penui dage heranchi la lei,’ ze acheu gu lei.
6“Chipau mai ge Juda ki peuname je I ne heching zeu ge heli rûgie bambe gum ze, zai hemeu mekum zeu ge keleu tauben bambe gum ze bam ra I ne tew gai gu lei; zai penui hia-hiage bamme ziemmena zat ramme je tew’ngga kam ’ndu lei, Jerusalem â pe bâm luî-luî ge bamdibe luage zeu.
7“Zai Tingwang ne Juda kibaume bambe hetiamki peireige keduîbe pei gai raî gu lei, chidezai Dabid ki ji dibe benai Jerusalem ge lungme ji dibe ze Juda ji dibe riâ peize dichang mak ra hangge zeu. 8Chipau mai ge Tingwang ne Jerusalem ge bamme je hinggei ne dienam gai gu lei, chidezai penui ruage heran-galangme chipau mai ge Dabidbe gum chang ra, zai Dabid kiduîme ze Hera gum, zai Tingwang gu angelme gum ze bam ra hangge zeu. 9Zai chipau mai ge heramzatme Jerusalem je ’nggi ra wangme leine je I ne tew’nsia ra peu gu lei.
10“Zai Dabid ki peireige benai Jerusalem ge lungme peireige ngauka’nggiabe benai gekietewchibe lungtak I ne ruî gai gu lei, chidezai penui ne suchatkaibeipeu je penui pie gai dezai mige pe na hangkatsiakne bampeu hangge kadesuipeu, hangkat pe na meraibe peireige pe lungsittew ze hapkaipeu gum ze penui ne pe hangge hap kai ra hangge zeu. 11Chipau mai ge Jerusalem ge kadesuibe ze Megiddo kâm ge Hadad-rimmon râ je desui-desanggaibe riâ desui gu lei. 12Heramme ne penui kiduî-duîtew ze desui gu lei; Dabidbe kiduîme penui baukattew lu, zai penui nâu ramme â penui lam châm lu ze desui gu lei; Nathanbe kiduîme penui baukattew lu, zai penui nâu ramme â penui lam châm lu ze desui gu lei; 13Lebibe kiduîme penui baukattew lu, zai penui nâu ramme â penui lam châm lu desui gu lei; Shime-ibe kiduîme penui baukattew lu, zai penui nâu ramme â penui lam châm lu desui gu lei; 14zai kelak ramme ’nsakkaibe ramme leine penui baukattew lu zai penui nâu ramme â penui lam châm lu desui gu lei.
Currently Selected:
ZEKARIA 12: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
