MATHAI 9

Bepumpikatlam Chaibepeu je Tewka’mmibe

(Mrk 2.1-12; Luk 5.17-26)

1Zai Isua ’nnei ge gut kai lu, sungkling kapat lu ze, pa bambe namdi ge chang de lei. 2Zai pie le lau, bepumpikatlam chaibepeu je jeî ge ’njei gai lu ze, pe dage penui ne teiwang de lei; zai Isua ne penui keneibe ngau lu dege, bepumpikatlam chaibepeu je, “A na gau, ning lung di ze bam lau; ning gu hemui leine lun gai bei de lei,” acheu bei de lei. 3Zai pie le lau, leisirawme hanggesame ne penui lung ge, “Aipaupeu ze Hera je saka’nsia de lei,” ze penui kacheu de lei. 4Kane Isua ne penui ka’nningbe tak chî lu ze, “Ndaitew ze ningnui lung ge kesiabe ka’nning lau? 5‘Ning gu hemui ramme lun bei de lei,’ kacheube sa ra sêubi mei, nune ‘Chu lu tatpat kai ni lau,’ kacheube sa ra sêubi lau? 6Chize â kedeirei ge ziemmena Na dage hemui ramme lun ra rezie la lei be ningnui chî ra teiliabe hang lei,” ze kacheu de lei—dadege pa ne bepumpikatlam chaibepeu je “Chu le lau, ning paîzui pua lu ze ning ki lam’mbe tatchu lau,” acheu bei de lei. 7Dadege pa chu lu pe ki lam’mbe tat ti de lei. 8Chize baudime ngau lu dege, penui hing di de lei, ziemmename je chigum ze reziechibe peipeu Hera ngeutew de lei.

Mathaibe je Kube

(Mrk 2.13-17; Luk 5.27-32)

9Zai chigene Isua tatchu ze mâ-hâ kaika’nduibeki ge hangkat pe ji, Mathaibe ze ’ntau laleu lei; zai pa ne pechu, “A chai sui le lau,” acheu bei de lei. Dadege pa chu lu pe chai suitat ti de lei.

10Chipau châng dege, hekilung ge Isua ’ntau lu ze mâ-teu lage, pie le lau, ’mpuâhame benai hemuipungme misongga wang lu, Isua benai pe kenieme je nguateu de lei. 11Zai chize Pharisaime ngau lu dege, pe kenieme je, penui ne, “Ndaitew ze ningnui gu geteiliabepeu ’mpuâhame benai hemuipungme je mâ-nguateu lau?” ze kacheu de lei. 12Kane chize Isua ne seu lu dege pa ne penui je rang je, “Penui pumsakyime â tewka’mmipeu je ’nnang mak lei, ka’nrâme ne zangno. 13Tat ze chî le lau ‘Herâtewbe I lunei mak, kane ka’nggiabe I lunei lei,’ kacheube rimba zeu. Katelingme je kû ra I wangkeu mak lei, kane hemuipungme je kû ra wangkeu lei,” ze kacheu de lei.

Teseureibe Deu ge Mâ-ka’nneube

(Mrk 2.18-22; Luk 5.33-39)

14Chipau châng dege Johanbe gu kenieme ramme ne pe dage wang lu, “Ndaitew ze anui benai Pharisaime teseurei bam ze, ning kenieme rei mak lau?” kacheu de lei. 15Dadege Isua ne penui je, “Henâukagepâume dage henâukupeu bam tâne henâukagepâume desui ze bam ra chang semei? Penui dagene henâukupeu je nguatatterabe tingnaimikpui wangchang gu lei, chidezai penui teseurei ra chang zangno. 16Zai mige du paî perie ge paî karchibe dâng ne kup kai mak lei, chi kupkaibe paîrie zene paî tewhak’ndi-’nteu nan ta du daseu. 17Mige du wain karchibe hemeigeibung perie ge kai mak lei; chigum dizai â hemeigeibung pâng gu, zai wain zâutat kam du, zai hemeigeibung du sia kam du lei; kane wain karchibe â hemeigeibung karchibe ge kai lei, dezai kena yi ze bam lei,” ze kacheu de lei.

Saîbe na Heleu’mpui benai Isua Paîri Deîtaupui

(Mrk 5.21-43; Luk 8.40-56)

18Aipau sam ramme penui dage pa sabe luage, pie le lau, besuitewpeu hangkat wang lu, pe suage keikeu lu, “A na ’mpuimi napoine chuna gene chai de lei; kane wang ze pe peireige ning ba die gai lau, dezai pa ring gu lei,” kacheu de lei. 19Dadege Isua chu lu, pe kenieme je ngua lu pe chai suitat ti de lei. 20Zai pie le lau, ’mpuimi hangkat kum kereu ze kena kahejaipui, pe chai ’mbene wang lu pe paîri dei gai de lei; 21“Pe paîri I dei gai dezai I yi du lei,” ze pe runne pe lung ge ka’nningbe ziegeneu. 22Kane Isua ne ’nreiwang lu, pechu ngau lu ze pechu, “A na gau, ning lung di ze bam lau, nang keneibe ne ningchu tew’mmi bei de lei,” kacheu de lei. Dadege ’mpuimi ze chipau hî sing gene yi di de lei. 23Zai besuitewpeu ki ge Isua gut lu, metiam ka’mmutbe benai baudime ne ’nrungkeleulia bambe ngau lu ze, 24pa ne penui je, “’Mbia gai lau, heleumenapoine â chai me lei, kane jeikeu di lei,” kacheu de lei. Dadege penui pechu telia ze ka’nnui de lei. 25Kane baudime je hela ’mbe sâu gai nan ze kilûng ge pa gut lu dege, pe ba ne tei gai bei dege, chi heleumenapoine ze chu di de lei. 26Dadege aipau rasam ze chipau heram leine ge satat ti de lei.

Pemikchitme Hangna je Tewka’mmibe

27Zai Isua chigene tat’nduâpatbe luage mikchitme hangna pe chai suipat lu ’nrung’nchi ze, “Dabidbe Na gau, anai je ngau’nggia gai lau,” ze kacheu de lei. 28Pa kilûng ’mbe gut dege mikchitme hangna pe dage zuawang de lei; dadege Isua ne penai je, “I ne aize tew’mmi dui lei be ningnai ne ’nnum’mmi mei?” kacheu de lei. Penai ne pechu, “Eu lei, Heguang gau,” ze kacheu de lei. 29Dadege pa ne penai mik deî gai lu, “Ningnai keneibe luigum ze, ningnai peireige wangchang de zu lau,” kacheu de lei. 30Dadege penai mik lat kai bei de lei, zai Isua ne penai je, “Peize mî du chi mak ra ’ntîng le lau,” ze diesing gai bei de lei. 31Kane penai â chigene pat lu, chipau heram huâzie ge pe ji sasuang ze bam di de lei.

Pekuâpatlakpeu je Tewka’mmibe

32Zai penui patbe luage, pie le lau, mi hangkat herasiabe bambe ziegene pekuâpatlakpeu je penui ne pe dage nguawang de lei. 33Zai herasiabe je kelitua nan dege â pekuâpatlakpeu ze samsa di de lei; dadege baudime ’nninglu-lu bam lei, acheu sa ze, “Israelme ruage aigum ze mâdau de ngau me lei,” ze penui kacheu de lei. 34Kane Pharisaime ne, “Herasiabe wangpeu changlube ziegene herasiabe ramme je pa kelitua de lei,” kacheu de lei.

Isua ne Baudime je Ngauka’nggiabe

35Zai Isua ne namdi benai keloa leine ge tatrua ze penui gu ka’nduibeki ge geteilia ze, heguangram gu sam keyibe paurua ze, zai geteukeneube zat leine benai ka’nrâme ramme je tewka’mmi de lei. 36Baudime je pa ngau lu dege, melireîpeu gabe gum ze, zai penui lung hereu, zai rarip ze bambe ziegene pa ngau’nggia-desang di de lei. 37Chidadege pa ne pe gu kenieme je, “Helu gat ra kie-desang de lei, kane tâtewrame â cham lei; 38chidaze pe gu helu gat ra hang tâtewme je lang gai ra, pa’mpaupeu dage kie zu lau,” ze kacheu de lei.

Currently Selected:

MATHAI 9: ZEMEBSI

Highlight

Copy