MATHAI 10

Kenieme Hangkereu-ze-Kename

(Mrk 3.13-19; Luk 6.12-16)

1Zai pe gu kenieme hangkereu-ze-kename je pe dage pa ne kûwang lu, heruikahebâbe ramme je kelitua ra, zai ka’nrâme leine benai teuneube zat leine ze tew’mmi ra penui je rezie pei gai bei de lei. 2Zai kenieme hangkereu ze kena ji ramme ai lei: Railangbe ze Simonbe, pe ji hang Peterbe ze kubepeu benai pe kinapeu Andriabe; zai Jebedaibe na Jakobbe benai pe kinapeu Johanbe; 3Philipbe benai Bartholomaibe; zai Thomasbe benai ’mpuâhabepeu Mathaibe; zai Alphaibe na Jakobbe benai Thadaibe; 4Kanaan’mpeu Simonbe benai Juda-Iskariotbe pechu zuapeu aime ze de lei.

Hangkereu-ze-kename je Tâtew ra Langpatbe

(Mrk 6.7-13; Luk 9.1-6)

5Aime hangkereu-ze-kename je Isua ne langpat lu, acheu ze penui je sam rangsing gai ze, “Jentailme ruage tat se lau, zai Samariame gu namdi ge du gut se lau, 6chisuane â Israelme kiduîme meli gadime dage tat lau. 7Zai ningnui tat dezai, ‘Tinggîm heguangram na de lei,’ ze acheu paurua lau. 8Ka’nrâme je tew’mmi, zai kechaime je kuakchu, ka’mpame je tew’nchi, zai herasiabe ramme je kelitua lau. ’Ntane ningnui ngau lu da, ’ntane pei lau. 9Ningnui kiakâk ge gechâk mei, gepût mei nune rangkâng mei ze pung se lau, 10ningnui ’mbei ra hangge, chiaka mei nune mechua kena mei, nune pîchûp mei, hetui mei ze tei se lau; tâtewbe kau â, pa teteu hang â ngau ra bui daseu. 11Zai namdi ge mei nune namchiau ge mei ze ningnui gutkaibe leine ge ningnui nguarêugaira-yibe kau je peu le lau; zai ningnui tat dai mak tâne chige ’nnai bam lau. 12Ningnui kilûng zuagut dezai penui peireige ’nchâlai ze mâ-dam gai lau. 13Zai kaheguîbe luigum ze kilûng ge dau dizai â ningnui damgaibe peize chige wangchang lau; kane chigumbe dau mak tizai â, ningnui damgaibe ze peize ningnui dage wang gai dai de lau. 14Zai mi-mige ne ningnui je ’nchâ gai mak mei nune ningnui kuâ ’ngking gai mak mei dizai â chipau ki gene mei nune namdi gene mei ze ningnui tatpat dezai ningnui pîdei ge kedeimoîne kechungtua ne lau. 15Ningnui je pelingsing ze I rang lei, samrambe mai ge â chipau namdi sua â Sodom benai Gomorra a lieyibi gu lei.

Tewsabe Wangrabe ramme

(Mrk 13.9-13; Luk 21.12-17)

16“Pie le lau, heneidung ruage meli ramme je gum ze, ningnui je I langpat kai lei; chidaze ningnui henêu gum ze ningching ze, zai depeine gum ze kesiajaî ga ze bam zu lau. 17Zai ziemmename je ’ntîng le lau; ningnui je samrambeki gene samram ra hangge penui ne pei gai gu, zai penui gu ka’nduibeki gene ningnui je lak ku lei. 18Ziemmename ramme benai Jentailme suage sakkitewbe chang ra hangge a ziegene ningnui je laksaibe ramme benai heguangme suage zuwang gai gu lei. 19Ningnui je samram gai ra penui ne ningnui je peipat kai dezai, ’ndaigum ze sam dam ra mei nune ’ndaigum samsa ra mei be hangge ningnui ’nninghereu se lau; chipau hî ge ningnui ’ndaikau sa ra mei be ningnui je pei gu lei; 20chi sapeu ze ningnui mak lei, kane ningnui peu ne ningnui dagene sa lei. 21Zai tewchat ra hangge besikina ne besikina je peipat kai gu, zai pe peu ne pe na je peipat kai gu, zai pe name ne penui pui-peume je ’nggi gu, zai penui je tewchat ku lei, 22zai a ji gene ’nteumena ne ningnui je ngaugailak ku lei. Kane nâlangbe mai riâ liechanglube kau ne ring gu lei. 23Namdi kat ge penui ne ningnui je tewsâ dezai, namdi kêda ’mbe pak kai de lau; pelingsing ze ningnui je I rang lei, ziemmena Na wangkeurabe suagene â Israelram namdi leine ningnui tatrua-wangtui ra mak lei.

24“Geteiliabe suibe kau â, pechu geteiliapeu peireige bam mak lei, zai ka’ngguapeu du pa ’mpaupeu peireige bam mak lei; 25geteiliabe suibe kau â, pechu geteiliabepeu gum ze bam ra bui lei, zai ka’ngguapeu du pa’mpaupeu gum ze bambe ze bui de lei. Heki’mpaupeu je Be-elzebul ze penui kû dizaine â, pe kiduîme je â ’ndaizeuge kû mak ta ra lau?

Châu je Hing ra

(Luk 12.2-7)

26“Chidaze penui je ningnui hing se lau; liâmakrabe hangge ruichimbe mâ de ga lei, zai chîmakrabe hangge ka’ngkimbe ga daseu. 27Kemuibe ge ningnui suage I rangbe ze, kebabe ge sa lau; zai ningnui dage telumgaibe ze heki’mpûm gene sa gai lau. 28Zai mi pum tewchat ze mi keringbe je tewchatlakme je â ningnui hing se lau; kane gehenna ge mi keringbe benai mi pum ze deî’ngga duibepeu je ningnui hing le lau. 29Poîsa kat hangge ’ngkînepui kena ze zua mak ti lau? Zai ningnui peu suî’nning chî mak ze chi kena ruage kat ze kedei ge kêu’ngga gai ra mak lei. 30Kane ningnui peîtam ramme ’nsangdu sei kam lei. 31Chidaze hing se lau; ’ngkînepui ramme misongga bambe sua â ningnui â pemîhung’nteu lei.

Krista je Rangliabe benai ’Nchâmakbe

(Luk 12.8,9)

32“Ziemmename suage mi-mige achu chigaihâbe kau je â I du a peu tinggîm ge kebampeu suage chigaihâ gu lei; 33kane mi-mige de ziemmename suage achu ka’ngkimbe kau je â, a peu tinggîm ge bampeu suage I du ’ngkim gu lei.

Desieyibe makse Hiazutkie

(Luk 12.51-53; 14.26,27)

34“Kedeirei ge desieyibe lungzeunetewbe teikeu ra I wangkeube hangge ’nning gai se lau; desieyibe lungzeunetewbe teikeu ra I wangkeu mak lei; kane hiazutkie ze zangnêu. 35’Mpeumi ne pe peu je ’nggi ra tew gai ra, zai pe na ’mpuimi ne pe pui je ’nggi ra tew gai ra, pe mupui ne pe nai je ’nggi ra tew gai ra hang I wangkeu daseu; 36zai ziemmena teureime ze pe kiduîme ne chang gu lei. 37Mi-mige de achu suadu pe peu je mei, nu pe pui je mei hungbe kau â, a gu changbui me lei; zai mi-mige de achu suadu pe na ’mpeumi je mei nu ’mpuimi mei je hungbe kau â, a gu changbui me lei; 38zai mi-mige de pe gu heling pua ze a chai suimakbe kau â, a gu changbui me lei. 39Mi-mige de pa keringbe ngaube kau â, chize ga gai gu lei, zai a ziegene pa keringbe gagaibe kau â chize ngau dai gu lei.

Hetoahi ramme

(Mrk 9.41)

40“Ningnui je ka’nchâbe kau ze achu ka’nchâ de lei, zai achu ka’nchâbe kau ze achu langgaipeu je ka’nchâ de lei. 41Kemeu’mpeu je pa kemeu changbe ziegene pechu ka’nchâbe kau â, kemeu’mpeu gu hetoahi pa ngau gu lei; zai katelingpeu je pa katelingbe ziegene pechu ka’nchâbe kau â, katelingbe gu hetoahi ngau gu lei. 42Zai mi-mige de ai kecheime ruage hangkat je pe kenieme changbeibe ziegene hedui kahegeibe piak kat runne leusedu sak ra peibe kau â pelingsing ze ningnui je I rang lei, pe gu hetoahi ze mâtew-tewsedu ga ra mak lei.”

Currently Selected:

MATHAI 10: ZEMEBSI

Highlight

Copy