MATHAI 4
4
Hênamkang ge Isua je Duaibe
(Mrk 1.12-13; Luk 4.1-13)
1Chidadege â Satan ne peize duai ra hang Isua je Herui ne ngua lu hênamkang ’mbe tat ti de lei. 2Zai hezie hedai, mui hedai pa teseu ’ngkîmlube châng dege â pa ’njei di de lei. 3Dadege keduaipeu wang lu, pechu, “Nang Hera Na lei zaine â ai tingchukâng ramme ne tingku chang ra hangge samdie gai be lau,” ze kacheu de lei. 4Kane pa ne kak ze, “Chige raw gai ’nde lei,
‘Tingku runne ne ziemmena ring ra mak lei,
Hera mui gene sam ramme peipatbe leine ne zangnêu,’
acheu zeu,” ze kacheu de lei.
5Chipau chângge satan ne pechu ka’nchibe namdi ’mbe nguagut lu, kellumki ’mpûm ge teichu gai lu, 6pechu, “Nang Hera Na lei zaine ning runne ’nsiamkeu le lau,
‘Ningchu hereiheka ra hang pe gu angelme je pa lang gai gu lei,’
zai ‘Penui ba ne ningchu tei’nggim ’ndu lei,
makchai â ning pî tingchu ne getau gu daseu!’
acheu raw gai la dezai lau,” ze kacheu de lei.
7Isua ne pechu, “Acheu ze raw gai ’nde lei, ‘Tingwang ning Rapeu je duai ra mak lei,’ acheu zeu,” ze kacheu de lei. 8Zai satan ne pechu peloa kehu ’mbe nguachu dai lu kedeirei gu heguangram ramme benai chi pengêudibe leine teilia lei; 9zai pechu pa ne, “Airamme leine ningchu I pei gu lei, nang ne achu keikutkeu ze kellum gai bei zaine ai,” kacheu de lei. 10Chidadege Isua ne pechu, “Nang Satan aigene tat lau!
‘Tingwang ning Rapeu je nang kellum lau,
zai pe guâ runne ’nggua lau,’
ze raw gai daseu,” ze acheu bei de lei.
11Chipau châng dege â satan pechu sâu gai nan ze tat ti de lei, zai pie le lau, angelme ne wang lu, pechu ’nggua ze bam di de lei.
Galili ge Isua Tâtewchube
(Mrk 1.14-15; Luk 4.14-15)
12Zai Johanbe je nîm’ndibe rasam pa seu lu dege Galili ’mbe pa tat ti de lei; 13zai Nazareth sâu ze, Zebulun benai Naphtali lung sungkling kung, Kaperna-um ge pa tat ze bam gai di de lei. 14Chize kemeu’mpeu Isaiabe ne aipau sam rangbe ze tewpui gai ra hangge zeu:
15“Sungkling ’mbe Jordan geukung ge Zebulun benai Naphtali gu heram,
Jentailme gu Galili ge,
16kemuîbe ge ka’ntaume ze kebabe kedibe ngau lu de lei,
zai chipau bâm ge benai kechaibe kezui ge bamme hangge kebabe bapat la de lei,” kacheube zeu.
17Chipau ting gene Isua Hera sam pauruachu di de lei: acheu sa ze, “Helung-heli zu lau, tinggîm heguangram â na de lei,” kacheu de lei.
Hekânimme Hangmedai je Isua Kube
(Mrk 1.16-20; Luk 5.1-11)
18Zai Galili sungkling kung ge pa tatrua lage, besikina hangna Simonbe pe ji Peterbe ze kacheubepeu benai pe kinapeu Andriabe sungkling ge chiâk gi ze bambe pa ngau de lei, penai â hekâ nîmme dadegeu. 19Dadege pa ne penai je, “A chai sui le lau, I ne ningnai je ziemmena nîm ra tew gai gu lei,” acheu bei de lei. 20Chidadege penai gu chîak ramme saupêt nan ze pe chai suitat ti de lei.
21Zai chigene pa tat-hang dai dege, kêdabe besikina hangna, Zebedaibe na Jakobbe benai pe kinapeu Johanbe ’nnei ge penai peu Zebedaibe penui bau penui gu chîak ketak bambe pa ngau de lei, dadege pa ne penai je ku de lei. 22Chidadege penai gu ’nnei benai penai peu je saupêt nan ze pe chai suitat ti de lei.
Isua ne Geteiliabe, Sampauruabe, Tewka’mmibe
(Luk 6.17-19)
23Zai Isua Galiliram leine ge tatrua ze, penui gu ka’nduibeki ramme ge pa ne mâ-geteilia zai heguangram gu samkeyibe paurua zai baudime ruage herarît zat leine benai teuneube zat leine tew’mmi ze bam lei. 24Chigum ze pe rasam Siriaram leine ge satat ti de lei, zai ka’nrâme leine, zai herarît zat gechâm-châmbe leine benai kahereube lieme, zai herasiabe bamme, zai kebui’nrâpatme, zai pepumchaime je pa ne tew’mmi kam bei de lei. 25Zai Galili gene zai Dekapolis gene, Jerusalem benai Judia gene zai Jordan giam gene du baudime misongga ze pe chai suitat ti de lei.
Currently Selected:
MATHAI 4: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
