MATHAI 3

Baptistewpeu Johanbe ne ’Mpui Kateleube

(Mrk 1.1-8; Luk 3.1-18; Jhn 1.19-28)

1Zai chipau ting ge Baptistewpeu Johanbe pat ze Judiaram hênamkang ge Hera sam paurua ze, 2“Helung-heli zu lau, tinggîm heguangram a na de lei,” ze kacheu de lei. 3Kemeu’mpeu Isaiabe ne sabe ge,

“Mihangkat ne hênamkang ge ka’nrungbe kuâ:

Heguangpeu gu ’mpuî teleukuâ lau,

pe gu ’mpuî ramme teleu’nzei gai lau,” ze kacheube ze,

pechu rang de lei.

4Zai Johanbe a put-hugêu paî bâ lu pe kia ge hemeigei kiakâk ne kak lei; zai pe gu hetak â tîngkau (hênam teipichêu) ramme benai ’ngkuidui lei. 5Chipau ting ge Jerusalem ge, zai Judia ge bamme leine zai Jordan huâzie ge bamme ’nteumena pe dage wang de lei, 6zai penui ne penui gu hemui ralia ze Jordan geuki gene pa ne penui je baptistew gai bei de lei.

7Kane Pharisaime benai Saddusime misongga pe dage baptisma lu ra wangbe pa ngau lu dege, pa ne penui je, “Ningnui henêu chaname nung gau! Châu ne ningnui je helumpumbe wangrabe gene pak te ra rang gai bei lau? 8Ningnui helungkahelibe teiliabe rachî ’nchi zu lau; 9zai anui hang ‘Anui peu changbe Abrahambe lamui lei,’ acheu ze ningnui runne ningnui je ’nning gai se lau; aipau chukâng ramme gene Abrahambe dage ziemmename je Hera ne teichu gai dui lei be I ningnui je rang lei. 10Zai chunage du ’nrei â hingbang pî ramme ge ’ngking gai ’nde lei; chidaze hingbang leine pechî keyibe ’nchimakbe â kuîtua lei, zai hemi ge tuâ gai lei. 11Ningnui lung kahelibe hangge ningnui je hedui ne I baptistew lei; kane a chaige patrapeu â a suadu di ze tâtewchi’nteu lei, pe pichûp du I â tei ra bui mak lei; pa ne Herui Ka’nchibe benai hemi ne ningnui je baptistew gu lei. 12Zai ’nreu pe ba ge la lei, zai chize ne pe gu kechaîpung kelapzun gai gu lei, hedua ge pe gu chêu kai gu lei, kane chêurie â hemi ’mmitdaimakbe gene pa ne rûkam ’ndu lei,” ze kacheu de lei.

Isua je Baptistewbe

(Mrk 1.9-11; Luk 3.21-22)

13Chipau ting ge Isua Galili ’mbene Jordan geuki ’mbe Johanbe dage peize pa ne baptistew gai ra wang de lei. 14Kane Johanbe ne, “Nang ne achu baptistew ra ’nnang bam ze, Nang ne a lam wang zeu,” acheu ze pechu nam ’ndi de lei. 15Kane Isua ne pechu kak ze, “Chuna ting hang â peize acheu du lau, aigumbe gene kapelingbe leine anui tewpui ra bam sing de lei,” ze kacheu de lei. Chidadege â pa hezuâ gai de lei. 16Zai Isua baptistew lu hedui gene zuapatgap dege, pie le lau, tinggkehube lat kai bei ze Hera gu Herui depeine gum ze pe peireige wangkeube pa ngau de lei. 17Zai tinggîm ’mbene sam rang ze, “Aize a Na-nekune I kehungbe lei, pe peireige I a suiyi-sang-yi lei,” ze kacheu de lei.

Currently Selected:

MATHAI 3: ZEMEBSI

Highlight

Copy