MATHAI 13

Helei Ka’nrukpeu gu Sam’nda

(Mrk 4.1-9; Luk 8.4-8)

1Chipau mai singge Isua â kilûng gene zuapat lu, sungkling kung ge ’ntau bam de lei. 2Zai baudime misonggame ne pe dage hengeiwang bei dege pa â ’nnei ge gut lu, ’ntau bam di lei; zai baudime ’nteumena deseîloa ge sap bam lei. 3Zai mâ-mâ ramme sam’nda ne misongga penui je pa acheu ze salia de lei, “Helei ka’nrukpeu helei ’nruk ra tat ti de lei. 4Zai pa acheu ze ’nrukkaibe luage gêsa â ’mpuî’ntai taige keu gai di de lei, zai ’nruine ne wang lu chize kuaiteu kam ’ndi lei. 5Zai gêsa â tingchuterazeu kedei kahepeube ge keu gai di de lei, deichie cham dadege puakpatrâp ti de lei, 6kane naimik huchu gai dege chiramme pugesiê gai bei de lei; zai pema gabe ziegene heguikeu kam di de lei. 7Zai helei gêsa â hetuzeu ge keu gai di lei; zai hetubang ramme chîngchu dege chize zin’ngga nan tai lei. 8Zai helei gêsa â kedei keyibe ge keu gai de lei, zai pechî gêsa â bak haî, gêsa â bak riakseruk, gêsa â bak himreu ka’nchi lei. 9Pe kun bambe kau â peize seu le lau,” acheu zeu.

Sam’nda ramme ne Geteigaibe

(Mrk 4.10-12; Luk 8.9-10)

10Zai pe gu kenieme wang lu pechu, “Ndaitew ze penui je sam’nda ne nang sa lau?” kacheu de lei. 11Dadege pa ne penui kuâ kak ze, “Tinggîm heguangram gu hekimsam ramme ze ningnui je â chî ra hang pei gai ’nde lei, kane penui je â pei gai me lei. 12Mi-mige de kebambe kau je â peisuâ gai bu lei, misongga bam ra hangge zeu; kane mi-mige de pe dage gabe kau je â bambe nanne du pe dagene lutat ’ndu lei. 13Chipauziegene penui je sam’nda ne I sa lei, penui ne ngau lu sedu ngauchi mak, zai seu lu sedu seuchi mak, zai chî de chîmakbe ziegeneu. 14Penui peireige Isaiabe ne rangka’ntuabe ze tewpui gai de lei:

‘Ningnui seu â seu gu,

kane mâtew-tewsede seuchi ra mak,

zai ningnui ngau â ngau gu,

kane mâtew-tewsedu ngauchi ra mak lei.

15Aime bau lung â ’nda kam di lei,

zai penui kun ramme du seu’nda kam di,

zai penui mik ramme heruîkeu kam di de lei,

maklaîzai â, penui mik ramme ne ngauchi lu,

zai penui kun ramme ne seuchi lu,

zai penui lung gene ’nningchi lu,

penui je tew’mmi gai ra a lam ’nreiwang gu de lei,’ kacheube sam zeu.

16Kane ningnui mik benai ningnui kun ramme zene ngau lu seu lu penui paurega lei. 17Pelingsing I ningnui je rang lei, kemeume benai ziemmena kapelingme misonggame ne ningnui ngaube ze ngaunei ze bam de lei, kane ngau mak tai de lei, zai ningnui ne seube ze seunei ze bam de lei, kane seu mak tai de lei.

Helei Ka’nrukpeu gu Sam’nda Sa’nchigaibe

(Mrk 4.13-20; Luk 8.11-15)

18“Chidaze helei ka’nrukpeu gu sam’nda ze ’ngking le lau. 19Mige heguangram gu sam seu lu, chize ’nningchi lak bei dege kesiapeu ne wang lu, pe lung ge ’nrukkaibeibe ze sut-tat ti de lei. Aize ’mpuî’ntai-taige ’nrukkaibe ze de lei. 20Zai tingchuterazeu ge ’nrukkaibe ze â, sam ze seu lu, kelua ze pelung suiyibe ne sam ze seupeu de lei; 21kane pe dage pema ga, acheusede kecheîne ringnak kai lei, zai chi sam ziegene kahereube mei nune tewsabe mei ze wang bei dege luakatne pa kâukeu ra chang di de lei. 22Hetuzeu ge ’nrukkaibe ze â, sam ze pa ’ngking lu kane kedeirei hangge ’nningkahereube benai keheube ramme hangge pe suigutpat kai nan dege chiramme zene sam ze zin’ngga nan ze pechî ’nchimaktaipeu de lei. 23Zai kedei keyibe ge ’nrukkaipeu ze â sam ze seu lu ’nningchilupeu lei; chipaupeu â pechî ’nchipat lei, gêsa â bak haî, gêsa â bak riakseruk, gêsa â bak himreu ’nchipat lei,” kacheu de lei.

Hemeumâ gu Sam’nda

24Sam’nda kêdabe penui suage lupat kai ze acheu ze pa salia kadai lei: “Tinggîm heguangram â ziemmena hangkat ne pe gu helu ge helei keyibe ’nrukkaibe gum lei; 25kane ziemmena ramme jeidibe luagene pechu hemimeupeu ne wang lu, hemeu ruage hemeumâ ’nruk kai nan ze tat ti de lei. 26Zai hemeu puakpat ze pebuî ’mbuî gai dege hemeumâ ze du ngau di de lei. 27Zai heki ’mpaupeu guâ ka’ngguame ramme wang lu pechu, ‘Anui pau gau, ning lu ge helei keyibe nang ’nruk kai mak ti lau? ’Ndaigum hemeumâ chige bam lu lau?’ ze penui kacheu de lei. 28Dadege pa ne penui je ‘Hemimeupeu ne chize tew gai de lei,’ kacheu de lei. Zai tâka’ngguame zene pechu, ‘Acheuzaine chiramme anui ne tat ze lu’ndui gai be ra hang nang nei mei?’ kacheu de lei. 29Kane pa ne, ‘Mak lei; hemeumâ ramme ningnui lu’ndui dezai hemeu du lupat’mpam nan ta du lei. 30Hechit ting chang mak tâne peize kena chîngchu’mpam zu lau; helugatbe ting dezai helugatme je, Hemeumâ ramme lu’ndui gai raî lu zai rû ra hangge bekît-kît kang gai lau, kane hemeu â a gu ’nseu ge teiwang’ndui gai lau,’ ze kacheu de lei,” ze acheu zeu.

’Nzeyichêu gu Sam’nda

(Mrk 4.30-32; Luk 13.18,19)

31Sam’nda kêdabe penui suage lupat kai ze acheu ze pa salia kadai lei, “Tinggîm heguangram â ’nzeyichêu hangkat ne lu lu pe gu helu ge ’nrukkaibe gum lei; 32chize â helei leine ruage pechêu chei langbe lei, kane chîngchu gai dege â mâ-kiak ruage dilangbe chang ze hingbang chang di de lei, chidadege â ’nruine kehu ’mbe liamruabe kau ramme wang lu, bekeî ramme ge penui chippua gai de lei,” kacheu de lei.

’Nduihî gu Sam’nda

(Luk 13.20,21)

33Sam’nda kêdabe penui je pa salia kadai lei, “Tinggîm heguangram â ’nduihî ’mpuimi hangkat ne lu lu ze dekuî hit’ngkai rît ze zuktui mak tâne ’nduihî kebutkaibe gum lei,” kacheu de lei.

Isua ne Sam’nda ramme Teibe

(Mrk 4.33,34)

34Airamme leine Isua ne sam’nda ne baudime je salia de lei; sam’nda tei mak ze â penui suage mâ de pa sa mak run de lei. 35Kemeu’mpeu ne rangbe tewpui gai de lei:

“Sam’nda ramme sa ra hang a mui ’ngngapat lei,

kedei ’ndampatbe gene ’mbaidibe ramme I sapat ku lei,” ze kacheube sam zeu.

Hemeumâ rasam’nda Salia’nchigaibe

36Chipau chângge baudime je pa sâu nan ze kilûng ’mbe gut ti de lei. Zai pa kenieme pe dage wang lu pechu, “Helu ge hemeumâ bambe rasam ’nda anui je ranglia’nchi gai lau,” ze kacheu de lei. 37Dadege pa ne kak ze, “Helei keyibe ka’nrukpeu ze â ziemmena Na de lei; 38helu ze kedeirei de lei; zai helei keyibe ze heguangram name lei; zai hemeumâ ramme ze â kesiapeu name lei, 39chi hemeumâ ka’nrukpeu ze â satan de lei; zai chi helugatbe ting ze â beting kamgaidibe ze de lei, zai gatme ze â angelme ze de lei. 40Hemeumâ ramme teiwang’ndui lu ze hemi ne rû ’ndi gum ze, beting kamgairabe ge du chigum gu lei. 41Ziemmena Na ne pe gu angelme je lang gai gu lei; hemui ge chuigaime benai tâ-kesiabe tewme leine je penui je pe gu heguangram gene teiwang’ndui gai gu lei, 42dezai hemideki ge penui je tuâ gai gu lei; chige ziemmename hap ze penui geu kegit ze bam gu lei. 43Chidezai katelingme â penui Peu gu heguangram ge naimik gum lerba ze bam gu lei; pe kun kebambe kau je peize seu le lau.

Mi heu Baigaibe gu Sam’nda

44“Tinggîm heguangram â helu ge mi heu baigaibe gum lei, chize hangkat ne ngaudau lu kebauchim gai lei; zai pe suiyi-desang ze tat ze pe gu kebambe leine zua lu, chi helu ze lui lu lei.

Teluichu gu Sam’nda

45“Zai tinggîm heguangram â helîkahedat kau hangkat ne teluichu yibe ramme peube gum lei, 46teluichu kat pemîhung-kadesangbe ze ngaudau lu tat ze pe gu kebambe leine zua lu, chize lui lu lei.

Chiâk gu Sam’nda

47“Zai tinggîm heguangram â sungkling ge chiâk tuâ gai ze hekâ zat leine ’nraklube gum lei; 48zai chize pui di dege deseîloa ’mbe chakpat lu, ’ntaukâu lu ’ntui ramme ge keyibe ramme kuaipat kai de lei, kane kesiabe ramme â tuâ nan tai lei. 49Beting kam ra dezai â chigum gu lei. Angelme zuapat ze kapelingme ruagene kesiame je teichâm gai gu lei, 50zai hemideki ge penui je tuâ gai ’ndu lei; chige ziemmename ne hap ze hegeu kegit ze bam gu lei.

Samsang Karchibe behai Perie

51“Airamme leine ningnui chî’mmi de mei?” ze ka’nneu lei. Penui ne pechu, “Eu lei,” kacheu de lei. 52Dadege pa ne penui je, “Chidaze leisirawme mi-mige de tinggîm heguangram hang pechu getei’mmi’ndibe kau â heki’mpaupeu gum lei, pe heu kaika’nduibe gene mâ-mâ perie benai karchibe ramme lupatpeu zeu,” ze kacheu de lei.

Nazareth ge Isua je Neimakbe

(Mrk 6.1-6; Luk 4.16-30)

53Zai aipau sam’nda ramme Isua ne sa kam lu dege, chigene pa rimnatat ti de lei, 54dadege pe ram ’mbe pa wang lu ze, penui gu ka’nduibeki ge penui je pa ne mâ-kagetei de lei, dadege penui ’nningdaulak ze, “Aipaupeu ze ’ndai’nggene aipau ningching benai tâ-kedibe ramme ngau lu lau? 55Pa â heching ne hechiâm-tâ tewpeu Na mak ti lau? Pe pui ze Marile mak ti lau? Zai pe kiname â Jakobbe, Josepbe, Simonbe zai Judabe mak ti lau? 56Zai pe kinapui ramme ’nteumena anui ruage la de zeî lau? Chidaze aipaupeu ze ’ndai’nggene airamme leine ngau lu lau?” ze kacheu de lei. 57Dadege pechu ze penui lunggailak ti de lei. Kane Isua ne penui je, “Kemeu’mpeu â pe ngêugabe kau mak lei, pe ram benai pe ki ge runne ga zangnêu,” ze kacheu de lei. 58Zai penui ’nnum’mmimakbe ziegene chige â tâ-kedibe ramme misongga pa ne tew gai mak tai lei.

Currently Selected:

MATHAI 13: ZEMEBSI

Highlight

Copy