MATHAI 12

’Ntakbambe Mai rasam Ka’nneube

(Mrk 2.23-28; Luk 6.1-5)

1Chipau ting ge Isua ’ntakbambe mai ge helu tatpelatat ti de lei; pa kenieme ’njei di de lei, zai hemeubuî ’nzut lu penui teuchu di de lei. 2Kane Pharisaime ne chize ngau lu dege pechu, “Pie le lau, ning kenieme â ’ntakbambe mai ge besie makbe tew zeu,” ze kacheu de lei. 3Pa ne penui je, “Dabidbe benai pe dage bamme ne ’njeidibe luage ’ndaikau tew mei be rasam ningnui kiâ gai mak ti lau: 4Tingkume ne makchai â, pa benai pe dage bamme ne teuneube, chi keliâbe tingkukuak ze pa ne Hera ki ge gut lu ze teu’ndibe rasam tak zeu? 5Makchai ’ntakbambe mai ge kellumki ge tingkume ne ’ntakbambe mai tewhebâ gai lu mâ de kemaube gabe rasam hingde ge ningnui kiâ gai mak ti lau? 6I ningnui je rang lei, kellumki suadu kedibe mâge â aige lamui lei. 7Zai ‘Herâtewbe mak ze ka’nggiabe I ne ka’nchâ lei,’ kacheube samrimba ningnui chî di laîzai â, ’ngkuimakme je ningnui sa’nsia gai ra mak te lei. 8Ziemmena Na â ’ntakbambe mai Wangpeu daseu,” kacheu de lei.

Pe ba Chaibepeu

(Mrk 3.1-6; Luk 6.6-11)

9Zai chigene pa tat’nduâ ze penui gu ka’nduibeki ge gut ti de lei. 10Zai pie le lau, hangkat pe ba chaibepeu bam lei, zai pe peireige penui kesia’ndam gai ra hangge, “Ntakbambe mai ge tewka’mmibe besie mei?” ze pechu penui sam ka’nneu lei. 11Dadege pa ne penui je, “Ningnui ruage mige meli kat bam ze ’ntakbambe mai ge mâ-kuiki ge keu gai di lêuzai, châu chize lupat kai mak ta ra lau? 12Meli kat sua â ziemmena hangkat â pemî ’ndaizeu hung ra lau! Chipauziegene ’ntakbambe mai ge tâ-keyibe tew ra betâu lei,” ze kacheu de lei. 13Dadege pa ne chipaupeu je, “Ning ba getuapat kai lau” bei ze pe ba getuapat kai de lei, zai katlam ’mbia ba gum ze tew’mmi gai bei de lei. 14Zai Pharisaime zuapat lu, ’ndaigum ze pechu tew’ngga le ra mei ze samhedei bam di de lei.

Pe Guâ ka’ngguapeu je Hera ne Kelânglube

15Chize Isua chî lu ze chi gene ’mbiatat ti de lei. Zai misongga ze pe chai suitat ti de lei, zai penui ’nteumena je pa ne tew’mmi gai bei de lei, 16zai pe rasam sarua mak ra hang penui je rangsing gai bei de lei. 17Kemeu’mpeu Isaiabe ne rangbe ze tewpui gai de lei:

18“Pie le lau, I ne kelânggai’ndibe,

a guâ ka’ngguapeu,

I ne a suiyi-kadesangbe,

I hunglangpeu zeu.

Pe peireige a gu Herui I ne kai gu lei,

dezai pa ne Jentailme dage samrambe kapelingbe rasam paurua gu lei.

19Pa â tingkang ra mak,

zai ’nrung de ’nrung ra mak lei,

’mpuî-rimdi ramme ge du mî ne de pe kuâ seu ra mak lei;

20pa ne hekupum puptibe tewbet ra mak kachâlei taube ’mmittenabambe tew’mmit ra mak lei,

pa ne samrambe tâ tewbe duîwang gai mak tâneu;

21zai pe ji ge Jentailme ne heguî ze bam gu lei,” ze kacheube sam zeu.

Isua benai Be-elzebul

(Mrk 3.20-30; Luk 11.14-23)

22Chipau chângge hangkat pe mikchit zai samsapatlakbe heruisiabe bambepeu je pe dage nguawang de lei, zai pechu pa ne tew’mmi gai bei de lei; dadege samsapatlakpeu ze sam sapat ti, zai pe mik ngau di de lei. 23Dadege baudime haimena ’nningdaulak ti ze, “Aipau peu ze Dabidbe na de lau?” ze penui kacheu de lei. 24Kane Pharisaime chize seu lu dege, “Aipaupeu â Be-elzebul, herasiabe ramme wangpeu, herasiabe ramme je kelituapeu ze de lei,” ze kacheu de lei. 25Penui ka’nningbe ramme chî lu pa ne penui je, “Heguangram leine ne pe ram-karai lungge ’nggi dizai â, pe ram ga ra chang lei, zai namdi mei nu kelak mei ze du perunne lungge ’nggi dizai â, sap ra mak lei; 26zai Satan ne Satan je kelitua dizai â pe runne pechu tewpang de lei; chigum dizai â ’ndaigum ze pe gu heguangram ze sapchi ra lau? 27Zai Be-elzebul ziegene herasiabe ramme je I ne kelitua dizai â, châu ziegene herasiabe ramme je ningnui name kelitua lu lau? Chidaze ningnui peireige penui ne samramme chang gu lei. 28Kane Hera gu Herui ne herasiabe ramme je I ne kelitua dizai â, Hera gu heguangram ningnui dage wangchang di de lei. 29Makchai peranchibe kau je pirai ne makchai â, ’ndaigum ze hangkat ne peranchipeu ki ge gut ze pe gu merua kehiauchi le ra lau? Pirai lu dezai pe ki kehiau ra de zangneu. 30A lam gu makbe kau â achu ka’nggibe kau lei, zai gekumwanghâmakbe kau â tewkatimra lei. 31Chipauziegene ningnui je I rang lei, ziemmename je hemui leine benai sakahebâbe leine â lun gai bu lei, kane Herui je sakahebâbe peireige â lun ra mak lei. 32Zai mi-mige de ziemmena Na je saka’nsiabe kau je â lun gai gu lei; kane mi-mige de Herui Ka’nchibe je saka’nsiabe kau je â chuna ringbe ting ge du, zai beting wangchangrabe ge du pechu â lun ra mak lei.

Hingbang benai Perachî

(Luk 6.43-45)

33“Hingbang yi ra ningnui tew dizai â, pechî du yi gu lei; zai hingbang sia ra tew dizai â, pechî du sia gu lei; hingbang â pechî gene chî lu daseu. 34Ningnui henêu chaname gau! ningnui sia lu, ’ndaigum ze yibe sachi ra lau? Helung ge puibe gezene mi mui gene sapatka’nsui daseu. 35Ziemmena keyibe kau â pelung ge keyibe kaika’nduibe gene mâ-keyibe ramme ’nrukpat-pat lei; kane ziemmena kesiabe kau â pelung ge kesiabe kaika’nduibe gene kesiabe ramme ’nrukpat-pat lei. 36Zai ningnui je I rang lei, ziemmename ramme mêruang samsabe leine samrambe mai dezai chipau sam ramme ze penui hang riam gai gu lei; 37ning sam ramme ne ningchu tew’nzei gai gu, zai ning sam ramme ne ningchu tew’ngkui gai gu lei.”

Dak tewlia ra Kiebe

(Mrk 8.11,12; Luk 11.29-32)

38Zai chipau chângge leisirawme benai Pharisaime ruage hanggesame ne pechu, “Geteiliapeu gau, ning dagene dakka’nchatbe anui ngau nei lei,” kacheu de lei. 39Kane pa ne penui je, “Kesiabe benai kahemabe rehei ne dakka’nchatbe peu lei; kane penui je dakka’nchatbe mâ de pei ra mak lei, kemeu’mpeu Jonabe pumgîm gene dakka’nchatbe peibe runne zangnêu. 40Jonabe naimikpui kechum, mui kechum heka kedibe lungge bam gum ze, ziemmena Na du naimikpui kechum, muî kechum kedei lungge bam gu lei. 41Samrambe bâm ge Ninebime ne aipau reheime je nguachu ze penui je sa’nsia gai gu lei; penui â Jonabe sampaube gene helung-heli lu dadegeu, zai pie le lau, Jonabe suadu mâge â kedibe kau aige lamui de lei. 42Samrambe bâm ge tingpîme gu heguangpui ne aipau rehei je nguachu ze penui je sa’nsia gai gu lei; pa â kedeimik deulangbe gene Solomonbe kaningchingbe rasam ’ngking ra wang lu dadegeu, zai pie le lau, Solomonbe sua kedibe mâge â aige lamui de lei.

Heruisiabe Helatwangkadaibe

(Luk 11.24-26)

43“Herui kahebâbe ze ziemmena hangkat dagene pat lu dege, saugairabe bâm hang peu ze heduigabe bâm ramme ge tatruapat ti de lei, kane mâ de ngau mak lei. 44Chidadege pa, ‘I zuapatbe bâm a ki lam’mbe helatwang dai ra de lei,’ ze kacheu lei. Zai pa wang dege ’nruaria zai biakzun lu zai reheîzun lu laleube pa ngau de lei. 45Dadege tat ze pa sua siabe herui kahebâbe hangsena je ngua lu, chige gut ze penui bam de lei; zai chipaupeu kebambe tak ze keraîbe lua suadu nâlangbe luage â, sia’nteu di de lei. Chigum ze ai helungriaksiabe rehei peireige du wangchang gu lei,” ze kacheu de lei.

Isua Pui benai Pe Kiname

(Mrk 3.31-35; Luk 8.19-21)

46Baudime je pa ’mpau lage, pie le lau, pe pui benai pe kiname ne pechu ’mpau gai nei ze hela ge sapkua bam lei. 47Dadege hangkat ne pechu, pie le lau, “Ning pui benai ning kiname ningchu mâ-pau gai nei ze hela ge sapkua la lei,” acheu bei de lei. 48Kane pa ne pechu paugaipeu je, “Châu ze a pui zai châu ze a kiname lau?” ze acheu kak lei. 49Zai kenieme tailam pe ba getuapat lu, “Aige bamme ze a pui benai a kiname de zeî lau! 50Mi-mige a peu tinggîm ge bampeu suî’nning tewbe kau leine ze a kinapeu da, zai a kinapui da, zai a pui de lei,” ze kacheu de lei.

Currently Selected:

MATHAI 12: ZEMEBSI

Highlight

Copy