LUKA 18

Kemîpui benai Samrampeu gu Sam’nda

1Sau mak zai helung’nnukeu mak ze kellum bam ra hangge penui je sam’nda pa ne salia de lei. 2Pa ne rang ze, “Namdi kat ge samrampeu hangkat bam lei, chipaupeu â Hera je hing mak, zai ziemmename je du heguâ-hezeutew mak lei; 3zai chipau namdi ge kemîpui hangkat bam lei, chipaupui pe dage wang’nsui bam lei, acheu sa ze, ‘Achu ka’nggibe kau dagene tew’nzei gai lau,’ ze kacheu de lei. 4Zai ting kat â pa tewnei mak lei; kane bechâng dege â ‘I Hera je hing mak, zai ziemmename je heguâ-hezeu tew mak bam leusedu, 5ai kemîpui zene achu tewkeleubambe ziegene pe peireige samram’nzei gai gu lei, makchai â, pa wang’nzie-bambe ne achu tewhereu’nsui gu daseu,’ ze pe lung gene kacheu de lei,” ze kacheu de lei. 6Dadege Heguangpeu ne, “Samrambe pelingtewpeu samsabe je ’ngking le lau. 7Hera pa ne kelânglume ne kemuî-keba ’nrung ze bamme peireige tew’nzei gai mak ra mei? Penui peireige pa gîngtie ze bam ra mei? 8Ningnui je I rang lei, pa ne penui je tew’nzei gai kelua gu lei. Acheu lêuzaidu ziemmena Na wangkeu dezai kedeirei ge keneibe bambe pa ngau gu mei?” ze kacheu de lei.

Pharisai’mpeu benai ’Mpuâhâhapeu Sam’nda

9Pa ne penui runne penui je katelingme bau hang ’nnum’mmi lu ze, miramme je ngauka’nname dage aipau sam’nda salia de lei: 10“Mi hangna kellumki ’mbe kellum ra hang di lei, hangkat â Pharisai’mpeu, zai hangkat â ’mpuâhapeu lei. 11Chi Pharisai’mpeu â sap lu perunne acheu kellum ze, ‘Hera gau, I â miramme sut-teume, zai pelingtewmakme, zai kahemame mei nune aipaupeu ’mpuâhâhapeu gum ze bammakbe ziegene ning dage a suiyibe sam pau gai lei. 12’Ntakkak kat lungge I luana teseurei ze bam, I mâ-mâ kengaube leine gene kereu ge kat I pei’nzie ze bam lei,’ ze kacheu de lei. 13Kane chi ’Mpuâhapeu â sap’ndeutau lu, tinggîm ’mbe pe ma du ’ngngangchudau lak ze pe ga zûmgetie ze, ‘Hera gau, I hemui kau je ngau’nggia gai lau!’ ze kacheu de lei. 14Ningnui je I rang lei, aipaupeu â kêdapeu je suadu tew’nzeigaibe ngau lu ze, pe ki lam wangkeu di lei; mi-mige de pe runne pechu suanggaibe kau je â tewhelêu gai bu, zai pe runne pechu kecheiluîtewkeube kau je â pechu suang gai bu daseu,” kacheu de lei.

Isua ne napoine ramme je ’Nnamgaibe

(Mat 19.13-15; Mrk 10.13-16)

15Chunage ’ngngiêne ramme je ’nsangdu peize deîtau gai ra pe dage penui puawang de lei; zai pe gu kenieme ne chize ngau lu dege, penui je ’ngngiam bei de lei. 16Kane Isua ne penui je pe lam kûwang lu ze, “Napoine ramme je peize a lam wang lau, penui je nam se lau. Hera gu heguangram â aigumbe kau ramme hang daseu. 17Pelingsing ze ningnui je I rang lei, mi-mige de napoine gum ze Hera gu heguangram je ’nchâmakbe kau â chige gut ra mak lei,” acheu bei lei.

Keheupeu

(Mat 19.16-30; Mrk 10.17-31)

18Dadege besuitewpeu hangkat ne pechu ’nneu ze, “Geteiliapeu yipeu gau, ringbetunmakbe nguaheu ra I ’ndaikau tew ra lau,” ze kacheu de lei. 19Dadege Isua ne pechu, “’Ndaitew nang achu yipeu ze ku lau? Mî de yi me lei, kane Hera runne zangnêu. 20Hingde ramme nang chî dezeî lau, ‘Hema se lau, tewchat se lau, hega se lau: Karasa ne sakkitew se lau, ning pui ning peu ngeutew lau,’ kacheube ze de lei,” ze acheu bei de lei. 21Dadege pa ne, “I hena’ngka gene airamme leine â, rei kam lu de lei,” kacheu de lei. 22Zai chize Isua ne seu lu dege pechu, “Kat nang ’nsang merei lei, ning gu kebambe leine zua lu kelaksiame je ’nzi gai be lau, chidezai tinggîm ge ning heu bam gu lei; zai kei lei, a chai sui le lau,” acheu bei de lei. 23Kane aipau sam pa ne seu lu dege, pe suisia di de lei, pa lungyi-kadesang dadegeu. 24Isua ne pechu pie lu acheu sa ze, “Penui heu bamme hang â Hera gu heguangram gut ra hung-desang lei! 25Keheupeu ne Hera gu heguangram gut ra sua â put-hu ne ’ngngim kunki bua’nzut ra sêu’nteu lei,” ze kacheu de lei. 26Zai chi keseume ne acheu sa ze, “Acheuzaine, châu je tew’nring gai dui lau?” kacheu de lei. 27Kane pa ne, “Ziemmena dage changlakbe leine Hera dage â chang dui kam lei,” acheu bei de lei. 28Dadege Peterbe ne, “Ni, anui â getaleine sâu nan ze ning chai sui de lei,” kacheu de lei. 29Dadege pa ne penui je, “Ningnui je pelingsing ze I rang lei, Hera gu heguangram hang ziegene pe ki mei, nune pe pui pe peu mei, nune pe sikina mei, nune pe nâu mei, nune pe name mei je sâulube kau â 30ai keringbe ting ge misongga ngausuamakrabe kau, zai wangdairabe ting ge ringbetunmakbe ngaumakrabe kau ga lei,” ze acheu bei lei.

Isua ne Pa Chairabe rasam Sabe Pakechumbe

(Mat 20.17-19; Mrk 10.32-34)

31Dadege hangkereu-ze-kename je nguachâm lu, pa ne penui je, “Pie le lau, Jerusalem ’mbe anui hang gu de lei, zai kemeume ne ziemmena Na deu ge samraugai’ndibe leine tewpui gai gu de lei. 32Pechu Jentailme dage penui ne peipat kai gu, zai pechu teihenuitew gu, zai pechu tewkengam gai ze ’nchai’ntui gai gu lei; 33zai penui ne pechu lakgetie ze, tewchat ku lei, zai pakechumbe mai ge pa chu gu lei,” kacheu de lei. 34Kane aipau sam ramme mâ de penui ’nningchi mak tai lei; zai aipau sam sabe ze penui dagene tei’mbai ’ndi de lei, zai sagai’ndibe ze penui chî mak tai de lei.

Pemikchit ze Mâ-kieteupeu je Isua Tewka’mmibe

(Mat 20.29-34; Mrk 10.46-52)

35Pa Jeriko wangchang tena dege, hangkat pemikchitpeu ’mpuî’ntai ge ’ntau lu mâ-mâ ’nduakie ze laleu lei; 36dadege baudime tatpatbe’ncheu seu lu dege, ’ndaikautew mei be pa ka’mmêt lei. 37Penui ne pechu, “Nazareth’mpeu Isua patbeibe ne de lei,” ze acheu bei de lei. 38Dadege pa ’nrung ze, “Isua Dabidbe Na gau, achu ngau’nggia gai lau,” ze kacheu de lei. 39Dadege tatraime ne peize pe kuâneu mak zîng bam ra pechu ’ngngiam bei de lei, kane pa ne, “Dabidbe kiria’mpeu gau, nang ne achu ngau’nggia gai lau,” ze ’nrung’nchibi-bi bam de lei. 40Dadege Isua sau gai lu pe tailam pechu nguapat ra rang gai bei de lei; zai pa wang’nna gai dege, pa ne pechu, 41“Ning hangge I ’ndaikau tew gai be ra nang lunei lau,” ze ka’nneu de lei. Pa ne, “A Wang gau, a mik ngau ra pei lau,” kacheu de lei. 42Dadege pa ne pechu, “Ngau de zu lau; nang keneibe ne ningchu tew’mmi gai bei de lei,” acheu bei de lei. 43Dadege â luakatne pe mik ngau lu ze Hera ngeutew ze pe chai suitat ti de lei; zai ’nteumena chize ngau lu dege Hera je penui toa de lei.

Currently Selected:

LUKA 18: ZEMEBSI

Highlight

Copy