LUKA 17

Hemui

(Mat 18.6-7,21,22; Mrk 9.42)

1Zai Isua ne pe gu kenieme je, “Tewkaugairabe hangge keduaibe ramme ze â wang sing gu de lei; kane chi keduaibe ramme châu dagene pat ra mei, chipaupeu ze â pe duângga gu lei! 2Ai kecheime ramme ruage hangkat je pa ne tewkau gai ra sua â, pe guang ge mâ-niakbe chukâng reu gai lu ze sungkling ge pechu â tuâgai’ndibe ze pe hang yi’nteu gu lei. 3Ning sikina ne hemui tâ tew dizai â, pechu ’ngngiam lau, zai pa ne heli dizai â, pechu lun be lau; 4mai kat ge lua sena ning peireige tâsiabe tew gai lu lua sena ’nreiwang ze, ‘I kaheli de lei,’ acheu dizai â, nang pechu lun sing ra lei,” ze kacheu de lei.

Keneibe

5Chi apostolme ne Heguangpeu je, “Anui keneibe tewpung gai lau!” kacheu de lei. 6Dadege Heguangpeu ne, “’Nzeyichêupum kat gum ze ningnui keneibe bam dizai â, ai meitikchibang je, ‘Ning runne ning ma li lu ze sungkling ge tau gai le lau,’ ze ningnui acheuchi duî lei, zai chize ningnui kuâpheu gu lei.

Ka’ngguapeu gu Tâ-ngeu

7“Ningnui ruage mige pe gu tâtewpeu hening pu mei nune meli reî mei ze bam ze, helu ’mbene pa wang dai dezai, ‘Mâ-teu ra wangkelua ze ’ntau gai zu lau,’ ze pa ne acheu gu mei? 8Kane, ‘A hang hegî teseu hang teleu du lau, zai ning kia ’ngkang gai lu I teu sak kam mak tâne achu ’nggua lau; zai na dezai nang â teu ze sak lau,’ ze acheu mak ra mei? 9Pa diegaibe tewbeibe ziegene pe gu tâtewpeu je pa ne toa semei? 10Zai ningnui du chigum ze ningnui je tâtew ra diegaibe tew kam lu dezai, ‘Anui â tâtewme ’nta kau ramme lei; anui tewrabe tâ runne anui â tew lei,’ ze acheu lau,” ze kacheu de lei.

Isua ne Hangkereu je Tewka’mmibe

11Jerusalem ’mbe tatbe ge, Samaria benai Galili pa tatpela ze tat ti de lei. 12Zai keloa kat ge pa gut kai dege, ka’mpame hangkereume pechu kahedau de lei, chime ze kedeu ’mbene sap lu ze, 13penui rankai ’nrung ze, “Isua, Geteiliapeu, anui je ngau’nggia gai lau,” ze kacheu de lei.

14Pa ne penui je ngau lu dege penui je, “Tat ze tingkume dage ningnui runne ningnui pum sing ne liâ be lau,” acheu bei de lei. Zai acheu ze penui tatbe luage penui ’nchi kam di de lei. 15Zai penui ruage hangkat ne pa yi di de lei be chî lu dege, wang dai lu pe rankai ’nrung ze Hera je toa de lei; 16zai Isua pî kangge ’ngkumkeu lu, pe suiyibe sam salia de lei. Chunage pa ze Samaria’mpeu lei. 17Dadege Isua ne, “Hangkereume je tew’nchi gai mak mei? Hangsekuime ze ’ndai’ngge la lau? 18Ai hesangkedeu’mpeu runne zangno mî de wang dai ze Hera je toabe ngau mak mei?” ze kacheu de lei. 19Dadege pa ne pechu, “Zuachu lu tatchu lau; nang keneibe ne ningchu tew’mmi bei de lei,” acheu bei de lei.

Heguangram Wangkeurabe

(Mat 24.23-28,37-41)

20Zai Pharisaime ne pechu, Hera heguangram wangkeurabe hî ’nneu bei dege, pa ne penui je kak ze, “Hera gu heguangram â hela ge ’nchetkaibe piekuabe gene wangkeu ra mak lei; 21‘Pie le lau, aige ni!’ ze mei nune ‘Wîge ni!’ ze mei du penui ne rang ra mak lei; pie le lau, Hera gu heguangram â ningnui ruage la daseu,” ze kacheu de lei.

22Zai pa ne kenieme je, “Ziemmena Na gu naimikpui ramme ruage naimikpui kat ningnui ne ngauneirabe ting ze wangchang de lei, zai chize ningnui ngau ra mak lei. 23Zai ningnui je, ‘Chige ni!’ ze mei nune ‘Aige ni!’ ze mei du penui acheu gu lei. Tat se lau, penui chai sui se lau. 24Tingkepitplikkaibe luage tingmik katlam gene kêdabe mik katlam bachang gum ze ziemmena Na du pe gu tingnaimikpui ge chigum gu daseu. 25Kane pa mâ-pelane misongga hereulie-raî gu, zai henai reheime ne pechu tuâpat kai gu lei. 26Noabe ting ge gum ze, ziemmena Na ting ge du chigum gu lei. 27Noabe dui’nnei ge gut ti ze hedui naîwang ze penui je tew’nggakamrabe riâ chang mak tâne teu sak ze, meneu ze, henâu kai ze bam de lei. 28Lotbe ting ge du chigum de lei—penui, teu-sak ze penui lui de lui, zua de zua, zai ling ze penui hekitew ze bam de lei, 29kane Sodom gene Lotbe zuapattibe mai gîmsing ge tinggîm ’mbene hemi benai Salphar ruikeu ze, penui ’nteumena je tewchat kam ’ndi lei— 30chigum ze ziemmena Na ju liâgaibe tingnaimikpui ge du chigum gu lei. 31Chipau mai ge â heki’mpûm ge bambepeu pe kilûng ge merua bambe lu ra peize wangkeu se lau; zai helu ge bambepeu je du chigum ze peize wang dai se lau. 32Lotbe nâu je ’nningtâu bam lau. 33Mi-mige de pa keringbe tew ’nring ra peube kau â, pa keringbe ’ngga gu lei, kane mi-mige de pa keringbe gagaibe kau â, pa keringbe tew’nring gai gu lei. 34Ningnui je I rang lei, chipau mai tingmuî ge â jeî kat ge ziemmena hangna jei bam gu lei; zai hangkat je â nguatat tu, zai kêdabe hangkat je â sâudiak kai gu lei. 35’Mpuimi hangna chêutâu-herua bam gu lei, zai hangkat je â nguatat tu, zai kêdapui je â sâudiak kai gu lei.” 36“Hangna helu ge bam gu lei; hangkat je â nguatat tu, zai hangkat je â sâudiak kai gu lei,” ze kacheu de lei. 37Dadege penui ne pechu, “Heguang gau, ’ndaige lau?” kacheu de lei. Pa ne penui je, “Herum bambe bâm ge lawai ramme wang’ndui gu lei,” acheu bei de lei.

Currently Selected:

LUKA 17: ZEMEBSI

Highlight

Copy