JOHAN 16

1“Kâutatrabe gene ningnui je tei’nggim le ra airamme leine ningnui je I salia gai de lei. 2Penui ne ningnui je ka’nduibeki ramme gene tuâpat kai gu lei, mi-mige ne ningnui je tewchat kai lu dezai, Hera hangge tâka’nggua lei ze pa ne ’nninggairabe ting ze gesangsing ze wangzi gu de lei. 3Zai penui aize tew gu lei, penui ne Bepeu je chî mak zai achu du chimakbe ziegeneu. 4Kane airamme ningnui je I salia bei de lei, chidezai penui hang panehî wangchang dezai ningnui je penui rasam I salia bei de lei be ningnui ’nningdau ra hangge zeu.

Herui Ka’nchibe Tatew

“Bepîbang gene airamme ningnui je I salia mak lei, ningnui dage I bambe ziegeneu. 5Kane chuna â achu langgaipeu dage I tat tu de lei; leusede ningnui ruage mî ne de, ‘’Ndai’ngge nang tat ra lau?’ ze acheu ’nneu mak lei. 6Kane airamme ningnui je I saliabeibe ziegene helungkahereube ne ningnui lung ge pui di de lei. 7Acheuleusede samsang ningnui je I salia lei, I tattibe ze ningnui hangge kegiebe lei, I ne tat mak tizai â, chi Nguageteiliapeu ze ningnui dage wang ra mak daseu; kane I tat tizai â, I ne ningnui dage pechu lang gai gu lei. 8Zai pa wangkeu dezai kedeireime je hemui, zai katelingbe zai samrambe deu ge chî ra pa ne tew gai gu lei: 9hemui deu gu ze â penui ne I ge ’nnum’mmimakbe ziegene chang lei; 10zai katelingbe deu gu ze â, Bepeu dage I tat ti ze ningnui ne achu ngau ta de ra changbe ziegene chang lei; 11samrambe deu gu ze â ai kedeirei gu samrampeu je samramgai’ndibe ziegene de lei.

12“Ningnui dage mâ-mâ ramme I sa ra misongga larei lei, kane chuna â chiramme ningnui teikamchi lak lei. 13Chi kagesangbe Herui wangkeu dezai, kagesangbe leine ge ningnui je pa ne ngua gai gu lei: pe runne gu rezie ne pa â sa ra mak, kane pa seu-seube sam ze pa sa gu, zai mâ-mâ wangchangrabe ramme ze ningnui dage pa saba gai gu daseu. 14Pa ne a ngeu-tew’ndi gai gu lei, a gu ze pa lu lu ningnui dage saba gai gu daseu. 15Bepeu gu kebambe leine ze a gu lei; chipauziegene a gu ze pa lu lu chize ningnui dage saba gai gu lei, ze I ranglia de lei.

Hesuisiabe benai Hesuiyibe

16“Mâtiege-makse ningnui achu ngau ta du lei; zai mâtiege-makse ningnui achu ngau dai gu lei,” ze kacheu de lei. 17Pe gu kenieme hanggesame ne kat-kat je, “Aize anui dage pa sabe ze ’ndaikau lau, ‘Mâtiege-makse ningnui achu ngau ta du lei, zai mâtiege-makse ningnui achu ngau dai gu lei,’ zai ‘A peu dage I tatbe ziegeneu,’ kacheube sam zeu?” kacheu de lei. 18Penui ne, “Pa ne, ‘Mâtiege-makse’ kacheube ze ’ndaikau lau? Pa ne ’ndaikau hangge rang mei be anui â chî mak zeu,” ze kacheu de lei. 19Penui ne pechu ’nneugaineibe Isua chî di de lei; dadege pa ne penui je, “I ne rangbe tak ge, ‘Mâtiege-makse ningnui achu ngau ta du lei, zai mâtiege-makse ningnui achu ngau dai gu lei,’ kacheube ze mei, ningnui runne ningnui ruage ka’mmêtbe zeu? ze kacheu de lei. 20Pelingsing, pelingsing ze ningnui je I rang lei, ningnui â hap ze heu gu lei, kane kedeirei â pe suiyi’nta gu lei; ningnui lung hereu gu lei, kane ningnui lung kahereube ze ningnui suiyibe chang dai gu lei. 21’Mpuimi henalungkeurabe ting ge â, pe lung hereu ka’nzie lei, pe hangge panehî wangchangdibe ziegeneu; kane chi hena lungkeu lu dege â pa kahereube ze chî ta di tai lei, kedeirei ge pa henalungkeu lu pe suiyi dadegeu. 22Chigum ze ningnui chuna â ningnui lung kahereu de lei, kane ningnui je I ngau dai gu lei, dezai ningnui lung suiyi’nta gu lei, zai ningnui suigut ze ningnui dagene mî ne de lutat ra mak lei. 23Chipau mai ge â, achu ningnui mâ de kie ra mak lei. Pelingsing, pelingsing ze ningnui je I rang lei, Bepeu dage ningnui mâge â kie dizai â, chize a ji gene ningnui je pa ne pei gu lei. 24Chuna riâ chang ze a ji gene ningnui mâ de kie mak lei; kie lau, dezai ningnui ngau gu lei, chidezai ningnui suigut puigit bam ra hangge zeu.

Kedeirei je Keduîbe

25“I ne teikakedabe tak gene aize ningnui je teilia ze salia de lei; I ne teikakedabe tak gene ningnui je teilia ze mâ-saliatarabe ting wangzi gu de lei, kane ’nchichiak ze peluîrun ze Bepeu rasam salia gu lei. 26Chipau mai ge a ji gene ningnui kie gu lei; zai I ne Bepeu dage ningnui hang kie gai gu lei, ze I ningnui je acheu me lei; 27Bepeu sing ne ningnui je hung la daseu, ningnui ne achu hung bei, zai I Bepeu dagene wangkeu lei be ningnui ne ’nnum’mmibeibe ziegeneu. 28I Bepeu dagene pat ze kedeirei ge wangkeu lei; zai kedeirei sâu dai nan ze Bepeu dage I tat tu lei,” kacheu de lei.

29Pe gu kenieme ne, “Ni chuna â teikakedabe tak gene teilia ze mâ-salia ta di ze ’nchichiakbe ne nang sa la de lei! 30Nang â mâgetaleine chî lei be chuna â anui chî de lei, zai mî ne de ningchu ’nneu ra ’nnang ta de lei, ai gene nang â Hera dagene wangkeu lei be anui ’nnum’mmi de lei,” kacheu de lei. 31Isua ne penui je kak ze, “Chuna â ningnui ’nnum’mmi de mei? 32Panehî wangchang mui de lei, wang de wangchang de lei, ningnui je tewtimraripkairabe ting, ziemmename leine ne penui ki lam lam tatkamderabe ting zeu, achu runne sâudiak kai gu lei; acheusede I a runne bam me lei; Bepeu a dage la daseu. 33Aize I ne ningnui je salia gai de lei, dezai zêune bambe desieyibe ningnui I gene ngau le ra hangge zeu. Kedeirei ge ningnui hang kahereube mi duanggabe bam de lei; kane ningnui suirengachai ze bam lau, I ne kedeirei ngam gai bei de lei,” kacheu de lei.

Currently Selected:

JOHAN 16: ZEMEBSI

Highlight

Copy