JOHAN 15

Isua Grepchîria Kagesangbe

1“I â grepchîria gesang lei, zai a peu â grepchîria kateleupeu lei. 2A dage bekeî bambe leine bechî ’nchimakbe â pa ne lutua lei, zai bekeî bechî ’nchipatbe leine â, pa ne teleuka’mmi lei, bechî misongga ’nchipat le ra hangge zeu. 3Ningnui dage I sagai’ndibe sam zene ningnui je tew’nchi gai bei de lei. 4I ge bam bam lau, zai I du ningnui ge bam bam gu lei. Bekeî grepchîria ge bam makchai â, pe runne ne bechî ’nchi lak gum ze, ningnui du I ge bam makchai â, ningnui bechî ’nchichi lak lei. 5I â grepchîria lei, zai ningnui â bekeî ramme lei. I ge bam-bambe kau, zai pa ge I bam-bambe kau ze â bechî misongga ’nchipatbe kau lei, I ’ngga zai â ningnui mâ de tewchi lak daseu. 6Ziemmena I ge bammakbe kau â bekeî gum ze pechu â tuâpat nan tai lei, zai hegui gai di tai lei, zai chi bekeî ramme â tei’ndui lu, hemi ge tuâ gai bei ze rû nan tai lei. 7Ningnui I ge bam bam dizai â, zai a sam ramme ningnui ge bam bam dizai â, ningnui kenei-neibe kie lau, zai chize ningnui hang tew gai bu lei. 8Aigene a peu ngeu-tew’ndi gai bei de lei, chidezai ningnui bechî misongga ’nchipat ra, zai ningnui a kenieme lei be teilia be ra hangge zeu. 9A peu ne achu hung bei gum ze, I du ningnui je hung de lei; I kehungbe ge bam bam lau. 10A gu samde ramme ningnui tei dizai â I kehungbe ge ningnui bam bam gu lei, I ne a peu gu samde ramme tei’mmi lu ze pa kehungbe ge bam bam gum zeu. 11A suigut ningnui ge bam ra, zai ningnui suigut puigit bam ra hangge airamme ningnui dage I sa gai de lei.

12“Aize a gu samde lei, ningnui je I hung bei gum ze ningnui kat-kat je hung lau. 13Ziemmena pe kangme hangge pa keringbe peigaibe peirei ziemmena dage chi suane kehungbe kedibe ga de lei. 14I samdiegaibe ningnui tew dizai â ningnui a kangme lei. 15Ningnui je I kebang ze kû ta du de lei, kebang â pe pau ’ndaikau tew mei be chî mak daseu; kane ningnui je I a kangme ze kû de lei, a peu dagene I seulube leine ze ningnui je I chiliâ gai bei daseu. 16Ningnui ne achu kakelâng mak lei, kane I ne ningnui je kakelâng lei, zai sum gai bei de lei, ningnui tat ze bechî ’nchipat ra, zai ningnui rachî bam bam de ra hangge zeu; chidezai Bepeu dage a ji gene ningnui gekiebe leine ze pa ne chize ningnui je pei gu lei. 17Ningnui kat-kat je hung ra aize I ne ningnui je die gai lei.

Kedeirei ne Ngaugailakbe

18“Kedeirei ne ningnui je ngaugailak tizaine â, ningnui je ngaugailak makge pa ne achu ngaugailak lei be chî le lau. 19Ningnui kedeirei gu dizaine â, kedeirei ne pe gume je hung gu lei, kane ningnui â kedeirei gu mak dadege kedeirei ne ningnui je ngaugailak lei, kane I ne ningnui je kedeirei gene kelâng gai de lei. 20‘Kebang â pe pau sua â di me lei,’ ze ningnui dage I sagai’ndibe sam ze chibam lau, penui ne achu tewsâ dizai â penui ne ningnui je tewsâ gu lei; penui ne a sam tei dizai â penui ne ningnui sam du tei gu lei. 21Kane airamme ze a ziegene penui ningnui je tew gai gu lei, achu langgaipeu je penui chimakbe ziegeneu. 22I wangkeu ze penui dage sam sa gai mak laîzai â penui dage hemui ga gu lei; kane chuna â penui gu hemui lun dai ra ga de lei. 23Achu ngaugailakbe kau â a peu je du ngaugailak lei. 24Mî de tewmakbe tâ zat ramme penui ruage I ne tew gai mak laîzai â, penui dage hemui ga gu lei; kane chuna â I benai a peu je penui ngau lu, anai je penui ngaugailak ti de lei. 25Aize penui gu hingde rawgai’ndibe, ‘Patedeu mâ de ga ze, penui achu ngaugailak lei,’ kacheube ze tewpui gai ra chang di de lei. 26Kane chi Nguageteiliapeu, chi Bepeu dagene I langgairapeu, kagesangbe Herui, Bepeu dagene patbe ze wang dezai, pa ne achu sakkitew gai gu lei; 27zai ningnui ze du sakkitewme de lei, bepîbang gene ningnui â a dage bam-bamdibe ziegeneu.

Currently Selected:

JOHAN 15: ZEMEBSI

Highlight

Copy