JOHAN 14

Isua â Bepeu lam Tatbe ’Mpuî lei

1“Ningnui lung peize tewhereu se lau; Hera ge ’nnum’mmi lau, zai I ge du ’nnum’mmi lau. 2A peu ki ge hekisiâm misongga la lei; ga laîzaine â ningnui bâm hang teleu ra I tat tu lei, ze ningnui je I acheu ra semei? 3Zai I tat ze ningnui bâm hang teleu lu dezai I wangkeu dai ze ningnui je a dage ngua gai gu lei, I bambe ge ningnui du bam ra hangge zeu. 4Zai I ’ndai’ngge tat ra mei be ’mpuî ningnui chî lei,” kacheu de lei. 5Thomasbe ne pechu, “Heguang gau, nang ’ndai’ngge tat ra mei be anui â chî me lei; ’ndaigum ze ’mpuî anui chî le ra lau?” kacheu de lei. 6Isua ne pechu, “I â ’mpuî zai samsang zai keringbe lei; a dagene makchai â mî de Bepeu dage wang me lei. 7Achu ningnui chî lu laîzaine â, a peu je du ningnui chî gu lei; chuna gene seu ze pechu ningnui chî zai ngau lu de lei,” kacheu de lei.

8Philipbe ne pechu, “Heguang gau, anui je Bepeu teilia lau, dezai anui lungwângchang du lei,” kacheu de lei. 9Isua ne pechu, “Philipbai, aitiege ningnui dage I bam bam bei sedu nang achu chî mak kerei mei? Achu ngaulube kau ze Bepeu je ngau lu de lei; ‘Anui je Bepeu teilia lau,’ ze ’ndaigum nang acheuchi ra lau? 10Bepeu ge I bam, zai I ge Bepeu bam lei be nang ’nnum’mmi mak mei? Ningnui dage I samsabe ramme a runne gu rezie ne I sabe mak lei; kane Bepeu a dage bambepeu ne pe tâ ramme tew lei. 11I Bepeu ge bam zai Bepeu I ge bambe achu ’nnum’mmi le lau; makchai du tâ ramme ziegene achu ’nnum’mmi le lau. 12“Pelingsing, pelingsing ze ningnui je I rang lei, achu ’nnumka’mmibe kau â, I tewbe tâ ramme pa du tew gu lei; zai airamme suadu kedibe tâ ramme pa tew gu lei, Bepeu dage I tatbe ziegeneu. 13A ji gene ningnui gekiebe leine ze I tew gai gu lei, chidezai pe Na ge Bepeu ngeu-tew’ndi gai be ra hangge zeu; 14a ji gene ningnui mâ-mâ leine kie dizai â chize I tew gai gu lei.

Herui Ka’nchibe Ngau ra Samhatkaibe

15“Ningnui ne achu hung zai â, I samdiegaibe ramme ningnui tei gu lei. 16Zai I ne Bepeu dage kie gu lei, dezai ningnui dage betingbeta nguabam-bam ra kêdabe Nguakageteipeu pa ne ningnui je pei gai gu lei, 17kedeirei ne luchilakbe, kagesangbe Herui du pei gai gu lei, kedeirei â pechu ngau de ngau mak zai chî de chimakbe ziegeneu; ningnui â pechu chî lei, pa ne ningnui dage nguabam-bam dadegeu, zai ningnui ge bam gu lei.

18“Ningnui je I putzîng gai ra mak lei; ningnui dage I wang gu lei. 19Mâtiege mak ze kedeirei ne achu ngau ta gu de lei, kane ningnui achu ngau gu lei; I ringbe ziegene ningnui du ring gu lei. 20Chipau mai ge â, I a peu ge bam, zai ningnui I ge bam, zai I ningnui ge bam lei be ningnui chî gu lei. 21A gu samdiegaibe ramme pe dage bam, zai chize teika’mmibe kau â achu kehungbe kau lei; zai achu hungbe kau je â a peu ne hung gai bu lei, zai pechu I ne hung gu, zai I sing ne pe dage liâ gu lei,” kacheu lei. 22Judabe (Iskariotbe-makbepeu) ne pechu, “Heguang gau, ’ndaigum ze nang sing ne anui dage liâ ze, kedeirei dage liâ mak ra lau?” kacheu de lei. 23Isua ne kak ze, “Ziemmena mige hangkat ne achu hung zai â a sam ze pa tei’mmi gu, zai a peu ne pechu hung gu lei, zai pe dage anai (a peu benai I) wang ze anai bamrabe bâm tew gu lei. 24Achu hungmakbe kau â a sam ramme tei’mmi mak lei; zai chi sam ningnui seube â, a gu mak lei, kane a peu achu langgaipeu gu lei.

25“Ningnui dage I bambe luage, airamme ningnui je I salia bei de lei. 26Kane chi Nguageteiliapeu Herui Ka’nchibe, Bepeu ne a ji gene langgairapeu zene mâgetaleine ningnui je geteilia gai gu lei, zai I ne ningnui dage sagai’ndibe leine ze ningnui ’nningdau bam ra pa ne tew gai gu lei. 27Desieyibe ningnui dage I sâudiak kai lei; a gu desieyibe ze ningnui je I pei lei; kedeirei ne pei gum ze I pei me lei. Ningnui lung peize tewhereu se lau, zai peize hing de hing se lau. 28‘I tat tu lei, zai ningnui dage I wang gu lei,’ ze I ningnui je kacheube ze ningnui seu lu de lei. Ningnui ne achu hung bei laîzai â ningnui suiyi’nta ze bam du de lei, Bepeu dage I tatbe ziegeneu; Bepeu â a sua â di-bi daseu. 29Zai chuna chi mâ-wangchang makge ningnui je I rang gai de lei, chi mâ-wangchang dezai ningnui ’nnum’mmi ra hangge zeu. 30I ningnui dage sam sa’ngkie ta du de lei, ai kedeirei gu samrampeu wang mui daseu. A peireige pe gu rezie mâ de ga lei; 31kane Bepeu ne samdiegaibe luigum ze I â tew lei, chidezai kedeirei ne Bepeu je I hung lei be chî le ra hangge zeu. Zuachu lau, aigene anui tatchu kei lei.

Currently Selected:

JOHAN 14: ZEMEBSI

Highlight

Copy