TÂTEWBE 13

Barnabasbe benai Saulbe je Kelâng gai lu Langpatbe

1Chunage Antiok ge herakiangna bambe ge, kemeume benai geteiliame bam lei, chime ze Barnabasbe, Simeonbe, Niger, (Getikbepeu) kacheupeu, Kurini’mpeu Lukiabe, Mana-enbe laksaibe Herodbe dage bambepeu, zai Saulbe de lei. 2Penui Tingwang je kellum ze teseurei ze bambe luage, Herui Ka’nchibe ne, “Barnabasbe benai Saulbe je I ne kûgai’ndibe tâ ze penai tew ra penai je kaichâm ne lau,” ze kacheu de lei. 3Chidadege penui teseurei ze kellum kam lu dege penai hangna peireige penui ba die gai lu ze, penai je langpat kai bei de lei.

Sipra ge bambe

4Chigum ze Barnabasbe benai Saulbe je Herui Ka’nchibe ne lang gai bei ze Seleukia ’mbe penai wangkeu di de lei; zai chigene Sipra ’mbe ’nnei gene chaîtat ti de lei. 5Shelabemis ge penai wangchang dege, Judame ka’nduibeki ramme ge Herasam penai pauliâ gai de lei. Zai chige Johanbe du penai dage tâ’ngguagaihâ ze bam de lei. 6Chi duiluaka’nggua tatpela lu, Paphos riâ penai chang dege, chige kahekapeu Judame kemeu karasa kau hangkat pe ji Bar-Isua kacheupeu dage penui wang de lei. 7Pa â laksaibe, Sergia Paulbe, ziemmena kaningchingpeu, chi Barnabasbe benai Saulbe je kû lu Hera gu samyibe ’ngking ra peubepeu dage bam lei. 8Kane chi Elimasbe kahekapeu (aize du pe ji rimba hang changpeu) zene laksaibe ne peize nei gai mak ra hangge tewnam ’nde ra penai je katingkang de lei. 9Kane Saulbe, Paulbe kacheupeu, Herui Ka’nchibe ne puigitbampeu, ne pechu piereking lu ze, 10“Nang satan na, nang kapelingbe leine teureipeu, kechoabe benai helungriaksiabe ne puibe kau, Tingwang gu ’mpuî ka’nzeibe ramme ze tew’ngkui ze bambe gene nang sau me ra mei? 11Zai chuna, pie le lau, Tingwang ba ning peireige la de lei, zai ning mik chit tu, zai tingkat â nang tingnaimik ngau ra mak lei,” ze acheu bei de lei. Luakat ne kemuangrâ benai kemuîbe pe peireige nup kai di ze pechu pe ba tei gai ra hang ziemmename je peu ze getamrua bam de lei. 12Chidadege laksaibe ze tâwangchangbe ngau lu dege ’nnum’mmi di de lei. Heguangpeu gu sam geteiliabe ze pa ’nningdaulak ze bam de lei.

Pisidia ge Antiok ge bambe

13Chunage Paphos gene Paulbe benai pe kangme ’nnei gene tat ze Pamphilia ge Perga ge wangchang de lei. Dadege Johanbe â chigene penui je sâu gai nan ze Jerusalem ’mbe wang dai di de lei; 14zai Perga gene penui tat’nduâ ze Pisidia ge Antiok ge wang de lei. Zai ’ntakbambe mai ge ka’nduibeki ge penui gut lu, ’ntau bam de lei. 15Hingde leisi benai kemeume gu leisi sam kiâ gai lu dege, ka’nduibeki ge besuitewme ne penui dage sam lang gai ze, “Mi puiname gau, baudime hangge ningnai ne penui je gecheugaineibe sam sa ra bam zai â, sa gai be lau,” ze kacheu de lei. 16Dadege Paulbe sapchu lu ze, pe ba kezap ze sam sa ze:

“Israelme, zai Hera je ningnui hingchi ze bamme gau, a sam ’ngking le lau. 17Ai Israelme zat Rapeu ne anui peume je kelângpat kai ze Ijipram ge penui hesang chang ze bambe ting ge penui je teichu’ngngu gai bei de lei; zai pe ba getuapatbe ba ne chipauram gene penui je nguapat kai bei de lei. 18Zai hênamkang ge kum hedai riâ penui je pa ne reî ze ’nggum bam bei de lei. 19Zai Kanaanram ge heramzat zat sename je deî’ngga gai lu dege pe gu heram ze penui ne kum haî medai ze rengeu riâ ’nram ze bam ra pa ne penui je pei bei de lei. 20Zai Chipau châng dege â, kemeu’mpeu Samuelbe ting chang mak tâne hangge pa ne penui je nguarame hang samramme ramme je penui dage pei gai bei de lei. 21Dadege â penui ne heguang hangkat kie de lei; dadege Hera ne penui je Kisbe na Saulbe, Benjamin zat ’mpeu je kum hedai hangge pei gai bei de lei. 22Zai pa ne pechu tei’mbia dai ni dege, pa ne Dabidbe je penui gu heguang hangge teichu gai bei de lei; pe peireige pa ne sakki acheu tew gai ze, ‘A ’nning tewrapeu, ziemmena a lungsuitak benai ka’nzuâbepeu ze Jessibe na Dabidbe gene I ngau lu de lei,’ ze kacheu de lei. 23Aipaupeu dagene reheipiakeube gene Tewka’nringpeu Isua je Hera ne Israelme dage nguawang gai bei de lei, pa ne hatkailube luigum zeu. 24Pa wangrabe suage Johanbe ne helung kahelibe baptistewrabe sam ze Israelme haimena dage pauliâ gai de lei. 25Zai Johanbe pa tewrabe tâ ze tew kamzi ra dege pa ne, ‘Ningnui ne achu châu hangge ’nnum gai lau? I â pa mak lei. Mak lei, a chângge hangkat wang gu lei, pe pîchûp ria hei gai ra du I â bui me lei,’ ze kacheu de lei.

26“Mi puiname, Abrahambe chaname bau, zai ningnui ruage Hera je hingchi ze bamme leine gau, anui dage ai tewka’nringbe sam ze lang gai bei de lei. 27Jerusalem ge bamme benai penui gu samramme ne pechu chî mak zai ’ntakbambe mai ’nsangne ge kiâ ze chi kemeume ne sabe ramme penui ne ’nningchimakbe ziegene penui ne airamme tewpui gai de lei, pechu tew’ngkuigaibe geneu. 28Pa chai ra hangge pe peireige patedeu mâ de penui ngaupat mak sede, pechu tewchat kai be ra hangge Pilatbe dage penui ne kie bei de lei. 29Zai pe rasam rawdiakkaibe leine penui ne tew’nsang kam gai lu dege, hingbang gene pechu lukeu lu ze heraw ge penui ne ’njei gai ’ndi de lei. 30Kane Hera ne pechu kechaibe gene zuchu gai bei de lei; 31zai Galili gene Jerusalem ’mbe pechu ngua lu hangme dage hezie misongga ze pa liâ ze bam de lei, zai chime bau ze chuna baudime dage pe gu sakki tewchangme bau de lei. 32Zai mi pau-paime dage Hera ne hatkai’ndibe hesuiyibe sam karchibe ze anui ne ningnui dage pau gai de lei. 33Anui peume chaname anui changbe ze pa ne Isua je teichugaibeibe gene chize tew’nsang gai bei de lei; chi getoabeleu pakenabe ge rawgaibe gene du,

‘Nang â a Na lei,

nemai ge I ne ningchu piakeu gai lei,’ ze kacheube gum zeu.

34Zai kechaibe gene pechu pa ne zuchugaibe sam ’nchui ge hui’nggagaiderabe ge â helatwang dai ra ga de lei, pa ne aigumbe tak gene sa gai ze,

‘I ne ningchu ka’nchibe benai Dabidbe gu ’nnamgaibe kaikua’ndibe ramme pei gai gu lei,’ kacheu de lei.

35Chipauziegene getoabeleu kêdabe ge pa ne rang gai ze,

‘Ning gu Ka’nchibe Hangkat je hui’nggagaiderabe ngau ra nang ne pei ra mak lei,’ kacheu de lei.

36Dabidbe â pe gu rehei ting ge Hera guâ ’nggua gai lu ze jeikeu gai di de lei, zai pe peume taige ’njei gai bei de lei, zai pa hui’ngga gai di de lei; 37kane Hera ne zuchugaibeipeu, pa ze â hui’nggagaibe ngau mak lei. 38Chipauziegene mi puiname gau, aipaupeu dagene hemui kelunbe rasam ze â ningnui dage pau gai ra chang de lei, 39Mosabe gu hingde zene ningnui lungzeune tew ra ngaulakme leine ze mi-mige pa ge ’nnumka’mmime leine je â pa gezene lungzeune tew ra pei gai bei de lei. 40Chidaze ’ntîngchi le lau, makchai â, kemeume ne ranggaibe sam ze ningnui pumgîm ge wangchang gu lei, chige rawgaibe ze:

41‘Pie le lau, ningnui ngauka’nname gau,

’nningdaulak ze ga gai de zu lau;

ningnui ting ge I tâ kat tewgaibe ningnui mâtew-tewsede ’nnum’mmi ra mak lei,

mige ne ningnui je rang sing gai dizai aî,’ kacheube zeu,” ze kacheu de lei.

42Paulbe benai Barnabasbe ka’nduibeki gene patbe luage baudime ne ’ntakbambe mai daukadaibe ge airamme salia sing ra penai je kiam de lei. 43Zai ka’nduibe bapat dege, Judame benai Jentailme, Juda sie ge guttime Paulbe benai Barnabasbe chai sui ze bam di de lei, chi penui je Hera ka’nggiabe ge bam bam ra salia ze gecheugaibe hangna dage zeu.

44Chi daukadaibe ’ntakbambe mai ge, chi namdi ge bamme gechu riâ gum ze Hera gu sam ’ngking ra wangka’ndui de lei. 45Kane Judame ne baudime je ngau lu dege, penui lung ge hemimeube ne pui di de lei, zai Paulbe samsabe ze geikum ze pechu ’nrûgetie bam lei. 46Zai Paulbe benai Barnabasbe ne kuugiereu ze sa ze “Railangbe ge ningnui dage Hera gu sam sa gai ra betâu ’nnang sing de lei. Kane ningnui ne lunei mak ze tuâpat, zai keringbe betunmakbe ngaubuimakbe hangge ningnui runne ningnui je riamgaibe ziegene, pie le lau, anui â Jentailme lam’mbe ’nreitat ti de lei. 47Chigum ze Tingwang ne anai je,

‘I ne ningchu Jentailme hangge kebabe chang ra sum gai de lei,

dezai kedeimik deulangbe chang ze tewka’nringbe rasam nang ne pauchang gai ra hangge zeu,’

ze acheu ze die gai bei daseu,” ze kacheu de lei.

48Zai aipau sam ze Jentailme seu lu dege, penui suiyi ze Hera gu sam ngeutew’ndi ze bam de lei; zai keringbe betunmakbe ngau ra hangge kelânggailume leine â ’nnum’mmi kam di de lei. 49Dadege chipauram huâzie pebâm’nsangne ge Tingwang gu sam ze ’nruktui di de lei. 50Kane Judame ne ’mpuimi betâudime neika’nchukme benai namdi ge kesa-kerang changme ramme je kiâ’nrui bam de lei, zai Paulbe benai Barnabasbe je tewsâ ra hangge gecheu’nsia gai bei de lei, zai penui ramdei gene penai je chuipat ’ndi de lei. 51Kane penai pîdei ge ’mbuimoîne bambe ze penui peireige gechung gai nan ze Ikoniam ’mbe tat ti de lei. 52Zai keneime â penui suiyibe benai Herui Ka’nchibe ne pui ze bam di de lei.

Currently Selected:

TÂTEWBE 13: ZEMEBSI

Highlight

Copy