TÂTEWBE 12

Deisâ ka’nteube

1Chipau ting ge heguangpeu Herodbe ne herakiangname hanggesame je nîm lu ze tewsâ ra tew gai de lei. 2Johanbe kinapeu Jakobbe je hiazutkie ne pa ne bichat ’ndi de lei; 3zai aize ne Judame penui suiyi ra tew gai lei be pa ngau lu dege Peterbe je du nîm ra hekachu di de lei. Aize ’Nduihîkaimakbe Tingku-ngi ting de lei. 4Zai Peterbe je pa nîm lu dege, kebangki ge bang gai ’ndi de lei, zai sipai hangmedaime bau bau medai ne peize reîhelei ra pa ne penui ba ge pei gai bei de lei, Tat’ntuahengi châng dezai baudime suage Peterbe je nguapat ra ’nning gai lu zeu. 5Chigum ze Peterbe je kebangki ge kaikua de lei; kane herakiangname ne pe hangge penui laîkai ze kellum gai de lei.

Kebangki gene Peterbe je ’Mpatkaibe

6Herodbe ne pechu samram ra nguapatrabe suabe mai tingmuî ge Peterbe â sipaime hangna kakge hegeî’ngkap kena ’nta gai lu ze jei bam lei, zai kebangki kemui ge kereîme ne hekêt-kai ze bam lei; 7zai pie le lau, Tingwang gu angel’mpeu ne liâ ze, kebangki sîam ze kebabe ne sireba gai de lei; zai pa ne Peterbe lap ge gekêu ze pechu ’ngkia ze, “Chu kelua lau,” ze kacheu de lei. Dadege hegeî’ngkap kena ze pe ba gene ’ngngaîperakeu di de lei. 8Zai angel’mpeu ne pechu, “Ning puâ kai lu ze ning pîchûp kai le lau,” ze kacheu de lei. Dadege chigum ze Peterbe tew de lei. Zai angel’mpeu ne pechu, “Ning gu sâuguak-mechua kai lu ze a chai sui le lau,” acheu bei de lei. 9Dadege pa kebangki gene zuapat lu ze pe chai suitat ti de lei; angel’mpeu ne tâtewbe tak ze gesang lei be pa chî mak lei, kane keliâbe ngaube hangge pa â ’nning gai lei. 10Zai hekêtkaibe bâm raîlangbe benai pakenabe ze penai tat’ntua gai dege, keloaning patbe hegeî’ngkam ge penai patchang di de lei, zai penai pat ra hangge hegeî’ngkam perunne latpat ti de lei. Zai keloa ge ’mpuîki kat penai tat’ntua gai de lei; dadege luakatne angel’mpeu ze pechu sâu gai ’ndi de lei. 11Zai Peterbe perunne ’nrakpat lu dege, “Tingwang ne pe gu angel’mpeu je lang gai ze, Herodbe ba gene benai Judame heguîkuame ba gene achu meupat kai de lei be chuna â I chîpeling lu de lei,” kacheu de lei.

12Zai chize Johan, chi Markabe acheu ze du kûpeu pui Marile ki lam’mbe pa tat ti de lei, misonggame wang’ndui lu ze kellum bambe bâm gezeu. 13Zai pa ne heki namsûng ’ngkam gekêu gai dege tâka’ngguapui pe ji, Rhodale ne ’mpau gai ra pat te lei. 14Zai Peterbe kuâ ze pa ’nchetchi lu dege, pe suiyi’nteu nan ze, ’ngkam lat kai mak ze pakgut dai lu ze, Peterbe kemuiki ge sap lamui lei, ze pau gai de lei. 15Penui ne pechu, “Nang mie de lei,” kacheu de lei. Kane pa ne, gesang run de lei, kacheu de lei. Penui ne, “Chize pe gu angel’mpeu nung mei!” ze acheu bei de lei. 16Kane Peterbe â ’ngkam ze gekêu bam de lei; zai penui latpat kai dege, pechu penui ngau lu, ’nningdaulaklu-lu bam di de lei. 17Kane pa ne penui kuâneu mak ra pe ba ne kezapliâ ze, Tingwang ne pechu kebangki gene ’ndaigum ze nguapat kai mei be tak ze ranglia kam bei de lei. Dadege pa ne, “Aize Jakobbe benai mi puiname dage salia be lau,” kacheu de lei. Dadege pa zuapat lu ze mâkedabe bâm ’mbe tat ti de lei.

18Chunage hechua dadege sipaime ruage Peterbe peireige ’ndaikau chang di mei be zene kakeleube bambe kecheîne ta di de lei. 19Zai Herodbe ne pechu peurua ze, ngau dai lak ti dege, hekêtkaime je kedî gai lu dege, penui je tewchat ne ra samdie gai bei de lei. Chipau chângge Herodbe â Judia gene Kaisaria ’mbe wangkeu lu chige bam di de lei.

Herodbe Chaibe

20Chunage Herodbe â Tira benai Sidon ge bamme peireige pe lumpum-desang bam di de lei; zai penui pum sing ne penui pe dage zuamie de lei, zai heguang ki ge pemuitewpeu Blastabe je penui kiâm gai lu dezai desieyibetewrabe hangge penui ka’nneu de lei, penui ram â heguangpeu gu heram gene teu ra sak ra ngau ra chang dadegeu. 21Zai diegailube mai ze wangchang dege, Herodbe ze heguang puâ kai lu, heguang-bamrak ge ’ntau lu ze baudime je mâsalia de lei. 22Dadege baudime ne, “Aize hera ne samsabe kuâ de lei, ziemmena kuâ mak zeu!” ze acheu ka’nrung de lei. 23Hera dage hengêutewbe pa ne peimakbe ziegene Tingwang gu angel’mpeu ne luakatne pechu lak bei de lei; dadege pechu â tingsî ramme ne teu bei ze pa chai di de lei.

24Kane Hera gu sam â pung-ze-sa ze bam de lei.

25Dadege Barnabasbe benai Saulbe ze penai tâtewrabe tewkam gai lu dege, Johanbe chi Markabe acheu ze du kubepeu je ngua lu Jerusalem ’mbe helatwang dai di de lei.

Currently Selected:

TÂTEWBE 12: ZEMEBSI

Highlight

Copy