Luke 5

Ko e Fili ‘e Si̇̄sū ʻEne Fuofua Kau Akó

(Mātiu 4:18-22; Ma‘ake 1:16-20)

1Pea ko e ʻaho ‘e taha, na‘e faiako ʻa Si̇̄sū ki ha kakai tokolahi he matātahi ʻo e Tahi Kenesaleti̇́, pea naʻe feteketekeʻi mai ʻa e kakai̇́, ko ʻenau fie fanongo ki he Folofola ʻa e ‘Otuá.

2Pea fakatokanga‘i ‘e Si̇̄sū ha ongo ki‘i vaka kuo tau ofi atu ai, kau kuo hifo atu ʻa e kau toutai ke fō honau ngaahi kupengá. 3Pea naʻe heka ki ha vaka ‘e taha, ko e vaka ʻo Saimoné, ʻo ne kole ange kia Saimone ke ki‘i teke‘i si‘i atu ʻa e vaká mei he matātahi̇́. Pea taʻutu ai pē ʻa Si̇̄sū mei vaka ʻo faiako ki he kakai̇́.

4Pea ʻi he ‘osi ʻene faiakó, naʻá ne pehēange kia Saimone: ‟Toe tahataha atu ki he lolotó, pea li̇̄ ai ʻa e kupengá ke fusi ha‘amou ika.”

5Pea pehēange ‘e Saimone: ‟Tangata‘eiki, ko e talu ʻeni ʻemau toutai mei ʻanepō mo e hala ha meʻa ‘e ma‘u. Kaekehe, koeʻuhi̇̄ ko hoʻo fekaú, te u toe li̇̄ pē ʻa e kupengá.” 6Pea ʻi heʻenau li̇̄ ʻa e kupengá, ko e ika lahi mo‘oni na‘e ma‘ú, pea kamata mahae ai ʻa e kupengá.

7Pea nau ta‘alo atu ki honau kaungātoutai he vaka ‘e tahá ke nau haʻu ʻo tokoni mai. Pea ʻi he aʻu mai ʻa e kau tangata ko iā, naʻa nau ʻaʻau fakataha ʻa e kupengá ki he ongo vaká, pea naʻe tangotongoto ʻa e ongo vaká he lahi ʻa e ika naʻe ma‘ú.

8Pea ʻi he mamata leva ʻa Saimone Pita ki he meʻa kuo hokó, naʻá ne tū‘ulutui atu ki he vaʻe ʻo Si̇̄suú ʻo ne pehē: ‟ʻEiki, ʻalu atu muʻa meiate au he ko e tangata angahala au.” 9He na‘e ‘ohovale lahi ʻa Pita, mo kinautolu kotoa na‘e ʻi ai̇́, ʻi he lahi ʻa e ika na‘e ma‘ú. 10Pea ‘ohovale ai foki mo e ongo kaungātoutai ʻo Pitá, ʻa Sēmisi mo Sione, ko e ongo foha ʻo Sēpeti̇́. Pea pehēange ‘e Si̇̄sū kia Saimone: ‟‘Oua te ke manavahē! He ‘e kamata he ʻahó ni hoʻo toutai kakai.” 11Pea naʻe toho leva ‘e he kau tangatá ʻa e ongo vaká ki ‘uta, pea nau li‘aki ai pē ʻenau meʻa kotoa ka nau muimui kia Si̇̄sū.

Ko e Fakamo‘ui ‘e Sīsu ha Tangata Kilia

(Mātiu 8:1-4; Ma‘ake 1:40-45)

12Pea lolotonga naʻá ne ʻi ha kolo ʻe taha, naʻe nofo ai ha tangata kilia. Pea ʻi he sio ʻa e tangata kiliá kia Sīsuú, naʻá ne tō tū‘ulutui ʻo kole kiate ia: ‟ʻEiki, kapau te ke loto ki ai, te ke lava pē ke fakamaʻa au.”

13Pea ala atu leva ʻa Si̇̄sū kiate ia, mo ne pehēange: ‟‘Oku ou loto pē ke fakamaʻa koe!” Pea mavahe leva ʻa e kiliá meiate ia.

14Pea tuʻutuʻuni ‘e Si̇̄sū ki he tangatá: ‟Vakai naʻá ke talanoa ki ha taha ʻa e meʻa kuo hokó, ka ke ʻalu pē ki he taula‘eiki, peá ke ‘ave ʻa e feilaulau ʻa ē naʻe tu‘utu‘uni ‘e Mōsesé, ke ʻiloʻi ʻaki ‘e he kakai̇́ kuo ʻosi fakamaʻa koe.”

15Ka na‘e fakautuutu ai pē ʻa e mafola ʻa e ongoongo ʻo Sīsuú, pea ko e kakai tokolahi ‘aupito na‘e omi ʻo fanongo malanga mo fakamo‘ui honau ngaahi alanga mahaki ʻiate ia. 16Ka na‘e faʻa ʻalu ʻa Si̇̄sū ʻo kumi ha feitu‘u lōngonoa ke fai ai ʻene lotu lilo.

Ko e Fakamo‘ui ‘e Si̇̄sū ha Tangata Mamatea

(Mātiu 9:1-8; Ma‘ake 2:1-12)

17Pea ko e ʻaho ʻe taha, na‘e faiako ʻa Si̇̄sū, ‘oku ʻi ai ha kau Fālesi mo ha kau mataotao he Lao ʻa Mōsesé, ʻa ia kuo nau ō mai mei Selusalema pea mo e ngaahi kolo kotoa ʻi Kāleli mo Siutea, pea naʻa nau fanongo malanga ai. Pea ko e mafai ʻo e ʻEiki̇́, ke fakamoʻui mahaki̇́ naʻe ʻia Si̇̄sū. 18Pea ʻiloangé naʻe fata mai ‘e ha ni‘ihi ha mamatea ʻi ha fala ʻo feinga ke fakahū atu ki fale ke ʻoatu kia Si̇̄sū. 19Ka na‘e ʻikai te nau lava, koe‘uhi̇̄ ko e fu‘u tokolahi ʻa e kakai̇́. Pea talu ai ʻenau kaka ki he funga falé ʻo ta ʻaki ha konga ʻo e ʻató, ʻo tukutuku hifo ai ʻa e fala naʻe tokoto ai ʻa e tangatá, kia Si̇̄sū.

20Pea ʻi he mamata ʻa Si̇̄sū ki he lahi ʻenau tui̇́, naʻá ne pehēange ki he tangata mamateá: ‟Tangata, kuo fakamolemole‘i ho‘o ngaahi angahalá!”

21Pea kamata fifililoto ai ʻa e kau Fālesi̇́ mo e kau mataotao he Laó, ʻo nau pehē: ‟Ko hai ʻa e tangatá ni, ʻokú ne lea pehē ai̇́! He ko e ‘Otuá pē taha ‘oku ʻi ai hono mafai ke fakamolemole angahalá!”

22Ka kuo ‘osi ʻafioʻi ʻe Si̇̄sū ʻa e anga ʻenau fakakaukaú, ko ia naʻá ne ʻeke ange kiate kinautolu:: ‟Ko e hā ‘oku pehē ai hoʻomou fakakaukaú? 23Ko fē ʻoku faingofua ange kiate aú, ke u talaange ki he tangata mamateá ni kuo fakamolemole‘i ʻene ngaahi angahalá, pē ko ʻeku talaange ke tu‘u ki ‘olunga ʻo ʻalu? 24Ka ko ʻeku ‘ai ʻeni ke mahino kiate kimoutolu, ‘oku mafai ʻe he Foha ʻo e Tangatá ke ne fakamolemole angahala ʻi māmani.” Pea pehēange leva ‘e Si̇̄sū ki he mamateá: ‟Tu‘u ki ‘olunga! pea takai ho falá ʻo ʻalu ki homou ‘api̇́.” 25Pea tu‘u hake leva ʻa e tangatá ki ‘olunga, ʻo nau sio kotoa pē ki ai. Pea naʻe toki takai hono falá ʻo lue atu ʻo ʻalu ki hono ‘api̇́ mo fakamālō ki he ‘Otuá.

26Pea na‘e fakatumutumu ai ʻa e kakai kotoa pē mo fakalāngilangi‘i ʻa e ‘Otuá. Na‘e faka‘ohovale ‘aupito ki he kakai̇́ ʻa e meʻa naʻa nau mamata ai̇́, ʻo nau pehē: ‟Ko e mana fakaofo moʻoni kuo tau sio ai he ʻahó ni!”

Ko e Fili ‘e Si̇̄sū ʻa Līvai

(Mātiu 9:9-13; Ma‘ake 2:13-17)

27Pea hili ʻa e ngaahi meʻa ko iā, pea ʻalu atu ʻa Si̇̄sū, ʻo ne fakatokanga‘i ha tangata tānaki tukuhau ko Li̇̄vai hono hingoá, ‘oku ta‘utu mai ʻi he ʻōfisi totongi tukuhaú. Pea naʻe folofola kiate ia: ‟Ha‘u ʻo muimui kiate au!” 28Pea li̇̄ ʻaki leva ‘e Li̇̄vai ʻa e meʻa kotoa, ʻo ne muimui kiate ia.

29Pea naʻe fai ‘e Līvai ha fu‘u fakaafe ʻi hono ‘api̇́ ke talitali ki ai ʻa Si̇̄sū. Pea na‘e omi ki ai mo ha kau tānaki tukuhau tokolahi mo ha kau fakaafe kehe ʻo nau kai fakataha ai.

30Ka naʻe lāunga ʻa e kau Fālesi mo e kau faiako Lao ʻa Mōsesé ki he kau ako ʻa Sīsuú, ʻo pehē: ‟Ko e hā ‘oku mou kai mo inu fakataha ai mo e kau tānaki tukuhau ko ʻená mo e kau angahalá?”

31Pea tali ‘e Si̇̄sū kiate kinautolu: ‟‘Oku ʻikai ko e kakai mo‘ui lelei̇́ ‘oku ʻaonga ki ai ʻa e toketaá, ka ko e kakai mahamahaki̇́. 32Na‘e ʻikai te u ha‘ú ke fakaafe‘i ʻa e kau failelei̇́, ka ko e kau angahalá ke nau fakatomala.”

Ko e Fehu‘i ʻa e Kakai̇́ he ‘Aukai̇́

(Mātiu 9:14-17; Ma‘ake 2:18-22)

33Pea pehēange ‘e ha ni‘ihi kia Si̇̄sū: ‟‘Oku faʻa lotu mo ‘aukai ʻa e kau ako ʻa Sioné, pea ‘oku pehē pē mo e kau ako ʻa e kau Fālesi̇́, ka ko e kau ako ʻaʻaú ‘oku nau kai pē mo inu.”

34Pea talaange ‘e Si̇̄sū kiate kinautolu: ‟‘E ʻikai faifai pea ‘aukai ʻa e ngaahi kaungāmeʻá ʻo ha tangata ‘oku teu mali̇́, ʻi he kei nofo ʻa e tangata teu mali̇́ mo kinautolú. 35Ka kuo pau ke hoko mai ʻa e ʻaho ‘e ‘ave ai meiate kinautolu, ʻa e tangata teu mali̇́, pea te nau toki ‘aukai leva he taimi ko iā.”

36Na‘e fai foki ‘e Si̇̄sū mo e talanoa fakatātā ko ʻeni̇́ kiate kinautolu: ‟He‘ikai hanga ‘e ha taha ʻo tuʻusi mai ha konga tupenu foʻou ke monomono ʻaki ha kofu motuʻa. He kapau te ne fai pehē: ‘e mahae ʻa e konga tupenu fo‘oú, pea ʻe ʻikai hoatatau ʻa e konga tupenu foʻou mo e kofu motuʻa.

37Pea he‘ikai hanga ‘e ha taha ʻo ‘utu ha uaine fo‘ou ki ha ngeʻesi hina uaine motuʻa. He kapau te ne fai pehē: ‘e tupu ʻa e uaine fo‘oú ia ʻo pā ai ʻa e hina uaine motuʻá pea maumau ai ʻa e uainé, pea ta‘e‘aonga ai mo e ngeʻesi hina uainé.

38Ko e uaine fo‘oú, ke ‘utu pē ia ki ha ngeʻesi hina uaine fo‘ou.

39Pea ‘oku ʻikai foki ha taha ʻe holi ke inu uaine fo‘ou, ʻoka ‘osi ʻene inu he uaine motuʻá. He kuo pau ke ne talamai ‘e ia, ‛‘Oku ifo ange pē ʻa e uaine motuʻá ia.’”

Currently Selected:

Luke 5: TCNT

Highlight

Copy