Luke 13
13
Ko e Foki Mai ki he ‘Otuá
1Pea na‘e ai ha faʻahinga ʻi he taimi ko iā naʻa nau fakahā kia Si̇̄sū ʻa e meʻa naʻe hoko ki he kau Kāleli ʻa ia naʻe hanga ʻe Pailato ʻo huʻiʻaki honau totó ʻenau feilaulaú. 2Pea tali ‘e Si̇̄sū kiate kinautolú: ‟‘Oku mou pehē koā ko e hoko ʻa e meʻá ni ki he kau Kāleli ko iā koe‘uhi̇̄ he naʻe lahi ange ʻenau faiangahalá he toenga ʻo e kau Kāleli̇́? 3Ko ʻeni ʻoku ou talaatú, naʻe ʻikai ʻaupito! Ka ʻokapau ʻe ‘ikai te mou fakatomala, te mou ʻauha pehē pē foki mo kimoutolu hono kotoa. 4Pea fēfē ʻa e toko hongofulu mā valu na‘e mate he holo ‘iate kinautolu ʻa e Taua ʻi Sailoamé? ‘Oku mou fakakaukau koā naʻá nau kovi ange kinautolu ʻi he toenga ʻo e kakai ‘o Selusalemá? 5Ko ʻeni ʻoku ou talaatú, naʻe ʻikai ʻaupito! Ka ʻokapau ʻe ʻikai te mou tafoki fakatomala ʻo tafoki ki he ʻOtuá, te mou ʻauha pehē pē foki mo kimoutolu hono kotoa.”
Ko e Talanoa ki he Fu‘u Fikí
6Pea fai ‘e Si̇̄sū kiate kinautolu ʻa e fo‘i talanoa ko eni̇́: ‟Tau lau naʻe ʻi ai ha tangata ngoue naʻá ne tō ha fu‘u fiki he‘ene ngoue‘angá. Pea ʻalu atu ia he ʻaho ‘e taha ke toli fiki. Ka na‘e ‘ikai ke ʻi ai ha fo‘i fua he fu‘u fiki̇́. 7Ko ia, naʻá ne fakalea ange ki he tangata tauhi ngoué, ‛Ko e ta‘u ʻeni ‘e tolu hokohoko mo ʻeku haʻu ʻo kumi ha fua mei he fu‘u fiki̇́ ni mo e ʻikai pē maʻu ha meʻa! Tā ia mo e maumau kelekele!’
8Ka naʻe kole ange ‘e he tauhingoué, ‛Tangata‘eiki, toe tuku mai pē muʻa ia he taʻú ni, ka u keli takai hono tefitó mo fafanga kelekele ia; 9Naʻa faifai pea fua ia he ta‘u kaha‘ú. Peá ka ‘ikai, peá ke toki tā ia.’”
Ko e Fakamo‘ui ‘e Si̇̄sū ha Fefine he ʻAho Sāpate
10Pea ʻi ha Sāpate ʻe taha, naʻe faiako ʻa Si̇̄sū ʻi ha falelotu o e kakai Siú. 11Pea ko eni, na‘e ʻi ai ha fefine kuo ta‘u ‘e hongofulu mā valu ʻene nofo tu‘apiko, koe‘uhi̇̄ ko hono ma‘u ia ‘e ha faʻahikehe. Pea kuo ‘ikai ke ne toe lava ‘o tu‘u tonu. 12Pea ʻi he mamata ʻa Si̇̄sū ki he fefiné, naʻá ne ui ange ke ne haʻu ki muʻa, pea naʻe folofola kiate ia: ‟Fefine, kuo fakatauʻatāina koe mei ho faingataʻaʻiá!” 13Pea naʻe toki hilifaki hono nimá ki he fefiné, pea naʻe toe tu‘u tonu hake ‘o fakamālō ki he ‘Otuá.
14Ka na‘e ‘ita lahi ai ʻa e pule falelotú he fakamo‘ui mahaki ʻa Si̇̄sū he Sāpaté. Pea naʻe pehēange ki he kakai̇́: ‟Ko e uike kotoa pē, ‘oku ʻi ai ʻa e ʻaho ‘e ono ke tau ngaūe ai. Mou omi ʻi he ngaahi ʻaho ko iā ke fakamo‘ui ai homou ngaahi alanga mahaki̇́, kae tuku ho‘omou omi he Sāpaté.”
15Pea tali ʻe he ʻEiki̇́ kiate ia: ‟ʻA e kau lotuloi! Ko hai ‘iate kimoutolu ‘oku ‘ikai ke ne vete ʻene pulú, pē ʻasi̇́, he Sāpaté ‘o taki atu ke fakainu? 16Pea ko si‘i fefiné ni, ʻa e hako ʻo ʻĒpalahame ko eni̇́, ko e ta‘u ʻeni ‘e hongofulu mā valu hono haʻihaʻi ia ‘e Sētane. Ko e hā leva hano maumau hono fakatau‘atāinaʻi ia he Sāpaté?”
17Pea ʻi heʻene lea pehē na‘e mā ‘aupito ai hono ngaahi fili̇́, ka na‘e fiefia lahi ʻa e toenga ‘o e kakai̇́ ʻi he ngaahi meʻa mālie kuó ne fai̇́.
Ko e Tenga‘i Mūsita mo e Lēvani
(Mātiu 13:31-33; Ma‘ake 4:30-32)
18Pea pehē ange ‘e Si̇̄sū ki he kakai̇́: ‟Ko e hā ha meʻa ʻe fakatatau ki ai ʻa e Pule‘anga ‘o e ‘Otuá? Te u fakatatau nai ia ki he hā? 19‘Oku hangē ia ha taha kuó ne tō ha tenga‘i mūsita heʻene ngoue‘angá. Pea ʻoku tupu hake ia ‘o hoko ko e fu‘u ʻakau lahi, pea haʻu ʻa e fanga manupuná ʻo ngaohi honau punungá ʻi hono ngaahi vaʻá.”
Ko e Lēvani
(Mātiu 13:33)
20Pea toe pehēange ‘e Si̇̄sū ki he kakai̇́: ‟Ko e hā nai te u fakatatau ki ai ʻa e Pule‘anga ‘o e ‘Otuá? 21‘Oku tatau ia mo ha fefine naʻá ne toʻo ha meʻi lēvani ʻo ne natuʻaki ia ha falukunga mahoaʻa ‘e tolu, pea tupu kotoa ʻa e mahoaʻa ko iā.”
Ko e Matapā Fāsi‘i̇́
(Mātiu 7:13,14,21-23)
22Pea fononga atu ʻa Si̇̄sū ʻo fou atu he ngaahi kolo lalahi̇́ mo e ngaahi kolo iiki̇́, ʻo ne faiako ai, heʻene ʻalu atu ʻo fakataumuʻa ki Selusalema. 23Pea fehu‘i ange ‘e ha toko taha ki ai: ‟ʻEiki, ‘oku tokosi‘i pē koā ʻa e kakai ‘e fakamoʻui̇́?” Pea talaange ‘e Si̇̄sū, 24‟Mou tūkuingata ke hū atu he matapā fāsi‘i̇́! He ‘oku tokolahi ʻa e kakai ‘e feinga ke huú, ka ‘e ‘ikai ke nau lava ke hū. 25He ka tu‘u mai leva ʻa e tangata ‘oku ‘o‘ona ʻa e falé ‘o tāpuni ʻa e matapaá pea te mou tuʻu ʻi tuʻa ʻo tukituki ai mo ui atu, ‛ʻEiki ē, to‘o atu muʻa ʻa e matapaá!’ Ka te ne toki tali mai, ‘Oku ‘ikai ʻaupito te u ʻilo ‘e au kimoutolu pē ko hoʻomou haʻu mei fē.
26Peá te mou toki pehēange ai, ‛Ka naʻa tau faʻa kai mo inu fakataha mo koe pea naʻá ke faiako ʻi homau ngaahi koló.’
27Peá te ne pehē mai ‘e ia, ‘Oku ‘ikai ʻaupito te u teitei ʻilo ‘e au kimoutolu! Mou ʻalu meiate au, ʻa e kau faikovi!
28Peá te mou toki tangi mamahi ai pea te mou uʻuuʻunifo hoʻomou ʻitá, he te mou sio kia ʻĒpalahame, mo ʻAisake, mo Sēkope pea mo e kau palōfita kotoa, ‘oku nau ʻi he Pule‘anga ‘o e ‘Otuá, ka kuo li̇̄ kimoutolu ia kituʻaʻā. 29Pea ‘e toki ‘aukau mai ʻa e kakai̇́ mei he feitu‘u kotoa pē ‘o ma‘u honau nofo‘angá, ʻi he kātoanga ʻi he Pule‘anga ‘o e ‘Otuá.
(Mātiu 23:37-39)
30Pea ko eni, ʻoku ʻi ai ha faʻahinga ‘oku li‘ekina ʻi he ʻahó ni, ka te nau nofomuʻa ʻi he kātoanga ko iā, mo ha faʻahinga ‘oku tuʻukimuʻa ʻi he ʻahó ni, ka ʻe li‘ekina ʻi he kātoanga ko iā.”
Ko Si̇̄sū mo Hēlota
(Mātiu 23:37-39)
31Pea ʻi he taimi ko iā, naʻe ha‘u ha kau Fālesi ‘o talaange kia Si̇̄sū: ‟Fei mo ke hola mei heni ʻo ʻalu ki ha feituʻu kehe! He ‘oku fakaʻamu ʻa Hēlota ke ne tāmate‘i koe.”
32Pea pehēange ‘e Si̇̄sū kiate kinautolu: ‟Mou ō ‘o tala ki he fōkisi ko iá, ‛Ko au ʻeni te u kei kapusi faʻahikehe pē mo fakamo‘ui mahaki he ʻahó ni mo ʻapongipongi, pea ‘e toki kakato ʻeku ngāué ʻi he ʻaho hono tolú.’ 33He ko hono moʻoni̇́, te u kei fononga pē he ʻahó ni, mo ʻapongipongi, mo e ʻaho hono hokó, ʻi hoku fononga‘angá he ʻoku ʻikai tāmateʻi ha palōfita ʻi ha feituʻu kehe, ka ʻi Selusalema pē.
Ko e ‘Ofa ʻa Si̇̄sū ʻi Selusalema
(Mātiu 23:37-39)
34‘E Selusalema! ʻE Selusalema ē! ʻA kimoutolu ʻa e faʻahinga na‘e fakapoongi ʻa e kau palōfitá, mo tolomaka‘i ʻa e kau talafekau na‘e fekau atu kiate kimoutolú. Kuo tā tu‘o fiha ʻeku faka‘amu ke tātānaki mai kimoutolu, ‘o hangē ko e ‘ō‘ōfaki ‘e ha motuʻa moa hono fāngangá ki hono lalo kapakaú. Kae ‘ikai pē te mou loto ki ai.
35Pea ko eni, ‘e li̇̄ ʻaki homou Temipalé. Pea ʻoku ou tala moʻoni atu, he‘ikai te mou toe mamata kiate au kae ‘oua kuo hoko mai ʻa e ʻaho te mou toki pehē ai,
‛Tauange ke fai tāpuekina
ʻA e Toko Taha ‘oku hā‘ele mai ʻi he huafa o e ʻEiki̇́.’”
Currently Selected:
Luke 13: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
